1. Hebrëus 12:1 ninqannö, ¿imatataq ruranantsik ushananyaq cörrinapaq?

 BIBLIACHÖQA nin llapan cristiänukuna carrërachö cörrikanqantsiktam. Y chäyanqanyaq tsë carrërata cörreqkunaqa, mana wanushpa kawëtam chaskishun (2 Tim. 4:7, 8). Ushanan tiempuchönam këkantsik, tsëmi masraq kallpachakunantsik cörrita mana dejarinapaq. Apostol Pabluqa tsë carrërata cörrir usharqanmi, peru ¿imataq yanaparqan? Kënömi nirqan: “Llapan lasämaqnintsikta [...] dejashun, y puntantsikchö këkaq carrërachö alli aguantar cörrishun” (leyi Hebrëus 12:1).

2. Apostol Pabluqa “llapan lasämaqnintsikta [...] dejashun” nirqa, ¿ima nitataq munëkarqan?

² ¿Ima ninantan “llapan lasämaqnintsikta” dejëqa? Apostol Pabluqa manam nirqantsu jinëlla ëwanapaq, sinöqa mana yanapamänantsikpaq kaqkunata dejanapaqmi. Mana yanapamaqnintsik kaqkunata aparqa masmi utirishun o pishipärishun y manam ras o sas cörrita puëdishuntsu. Tsë lasämaqnintsikkunataqa manam llapantaqa apanantsiktsu ni manam tsëkunaman yarparäkunantsiktsu. Peru wakin lasämaqnintsikkunataqa apanantsikmi. Tsëta dejarninqa, manam cörrikanqantsik carrërata ushashuntsu (2 Tim. 2:5). ¿Imakunatataq apanantsik? Rikärishun wakinllata.

3. (1) Gälatas 6:5 ninqannö, ¿imatataq cada ünu ruranantsik? (2) ¿Imatataq këchöqa yachakushun y imanir?

³ (Leyi Gälatas 6:5). Kë textuchöqa, cada cristiänu imata ruranampaq kaqtam apostol Pablu kënö nirqan: “Cada nunam ruranampaq kaqtaqa ruranan, manam juktsu”. ¿Imapaqtaq parlëkarqan? Diostaqa kikintsikmi sirwinantsik, y manam jukqa yanapamënintsikta puëdinqatsu. Këchöqa yachakushun, cada ünu imata ruranapaq kaqta y imakuna  yanapamänapaq kaqtam. Y yachakushunmi, mana yanapamaqnintsik kaqkunata mana ruranapaq y imanö dejanapaq kaqta. Yanapamaqnintsikkunata rurarqa, cörrirmi sïguishun y mana wanushpa kawëtam chaskishun.

4. ¿Imanirtan Diosllatana sirwinantsikpaq äninqantsiktaqa cumplinantsik? (Rikäri fötukunatawan dibüjuta).

⁴ Diosllatana sirwinapaq änikunqantsik. Jehovällatana sirwinapaq änikurqa, pëllatana adoranapaq y voluntäninta ruranapaqmi decidirqantsik. Tsë änikunqantsiktaqa cumplinantsikmi. Jehoväqa kamamarquntsik voluntäninta ruranapaqmi y äninqantsiktaqa manam sasatanötsu o ajatanötsu rikantsik (Apoc. 4:11). Tsëmi kikin niraqta kamamashqantsik kaptin, Pëta reqita y adorëta munanapaq shonquntsikman churamushqa. Tsërëkurmi pëwan amïgu këta puëdintsik y voluntänintam kushishqa rurantsik (Sal. 40:8). Y manam tsëllatsu, Jehovä munanqanta rurar y Tsurin ruranqannö imatapis rurarqa, kushishqam sientikuntsik (Mat. 11:28-30).

5. ¿Imatan yanapashunki Diosllatana sirwinëkipaq äninqëkita cumplinëkipaq? (1 Juan 5:3).

 ⁵ ¿Imatan yanapashunki? Juk, Jehoväta mas kuyanëkipaq kallpachakuy. ¿Imatan yanapashunki Jehovä Diosta mas kuyanëkipaq? Qampaq imëkata ruramunqanman pensanqëki y shamoq tiempuchö bendicionkunata chaskinëkipaq kaqman pensanqëkim. Diosta mas kuyaptikiqa, manam sasatsu o ajatsu kanqa mandakunqanta cäsukunëkiqa (leyi 1 Juan 5:3). Ishkë, Jesus ruranqannö imatapis rurë. Pëqa Teytampa voluntäninta ruranampaqqa, imëpis mañakoqmi y bendicionkunata chaskinampaq kaqmanmi yarparaq (Heb. 5:7; 12:2). Jesus ruranqannölla, Jehovä yanapëkushunëkipaq mañakuy y shamoq tiempuchö alli kawakunëkipaq kaqman pensë. Jehoväta mas kuyarnin y Jesus ruranqanta rurarninqa, pëllatana sirwinëkipaq änikunqëkitaqa cumplita puëdinkim.

6. ¿Imanirtan ollqu kaqkunaqa familiankunata manteniyänampaq kallpachakuyänan? (Rikäri fötukunatawan dibüjuta).

⁶ Familiankunatam manteniyänan. Cörrikanqantsik carrërachö ganarir mana wanushpa kawëta chaskinapaqqa, Jehovätawan Jesustam familiantsikpitapis masqa kuyanantsik (Mat. 10:37). Tsënö kaptimpis, manam familiantsikta mantenitaqa dejanantsiktsu ni Jehoväta sirwinqantsikchö michämaqnintsiktanöqa rikänantsiktsu. Tsëpa rantinqa, Jehovätawan Jesusta kushitsinapaqqa familiantsikta manteninapaq mandamanqantsiktam cumplinantsik (1 Tim. 5:4, 8). Tsëta rurarqa, mas kushishqam kashun. Jehoväqa musyanmi casädukuna kuyanakuyaptin, respetanakuyaptin, teytakuna wamrankunata kuyayaptin, yachatsiyaptin y wamrakuna teytankunata cäsukuyaptinqa, familiachö kushishqa kawakuyänampaq kaqta (Efes. 5:33; 6:1, 4).

7. ¿Imatan yanapashunki familiachö Jehovä munanqannö imatapis ruranëkipaq?

⁷ ¿Imatan yanapashunki? Casädu kar o wamra karpis familiakunapaq Bibliachö consëjukunata cäsukunëkipaqmi kallpachakunëki. Ama costumbrikimannö o yachaq tukoq nunakuna niyanqannöqa, imatapis rurëtsu (Prov. 24:3, 4). Publicacionkunata leyi, tsëchömi tarinki Bibliachö consëjukuna imanö yanapashunëkipaq kaqta. Këllaman pensarishun: jw.org päginachömi “Ayuda para las familias” neqchö mëtsika consëjukunata tarinki. Tsë consëjukunaqa casädukunata, teytakunata y jövinkunatam problëmakunapa pasayaptin yanapan. b Familiëki Diosta mana sirwiptimpis, Bibliachö consëjukunata cäsukunëkipaqqa decidïdum këkänëki. Tsëta ruraptikiqa, familiëkim kushishqa kanqa y Jehovämi bendicishunki (1 Pëd. 3:1, 2).

8. ¿Imamantan decidinqantsikqa chätsimashwan?

⁸ Decidinqantsikkuna mana alli yarquptin. Imatapis decidita puëdinqantsikqa Jehoväpa qarëninmi. Pëqa munan imatapis decidir kushishqa kanantsiktam, peru manam tsapämantsiktsu mana allita decidinqantsikpita sufrinataqa (Gäl. 6:7, 8). Tsëmi mana alli decidinqantsikpita, mana pensar parlanqantsikpita o imatapis raslla o saslla ruranqantsikpita mana allikunapa pasarqa, kikintsik culpayoq kanqantsikta yarpänantsik. Capazchi höraqa ruranqantsikpita llakikushun y concienciantsikchöpis mana alli sientikushun. Peru ¿imanötan yanapamäshun kikintsik culpayoq kanqantsikta cuentata  qokunqantsik? Yanapamänantsikpaq willakunapaq y mana allikunata manana ruranapaq kallpachakunapaqmi. Tsëta rurarmi cörrikanqantsiktaqa dejarishuntsu.

9. ¿Imatan yanapashunki mana alli decidishqa kaptikiqa? (Rikäri fötukunatawan dibüjuta).

⁹ ¿Imatan yanapashunki? Mana allita decidinqëkitaqa manam altsëta puëdinkinatsu. Peru ama tsëllaman yarparäkurqa kakuytsu, ni jukkunata culpatsëtsu, ni tukuynöpa tsapäkuytsu. Tsëpa rantinqa, pantashqa kanqëkita cuentachö katsi y puëdinqëkita rurë mas alli sientikunëkipaq. Ruranqëkipita mana alli sientikurqa, llapan shonquykiwan Jehoväman mañakuy, pantanqëkita willë y perdonashunëkipaq mañakuy (Sal. 25:11; 51:3, 4). Pitapis llakitsishqa karqa, perdonta mañakuy. Y precisaptinqa anciänukunatapis willë yanapayäshunëkipaq (Sant. 5:14, 15). Pantanqëkikunapita yachakuy y allitana decidinëkipaq kallpachakuy. Y segürum këkänëki Jehovä yanapashunëkipaq y llakipäshunëkipaq kaqta (Sal. 103:8-13).

10. ¿Imanirtan shuyaranqantsik prontulla mana cumplikaptinqa llakikushwan? (Gälatas 6:4).

¹⁰ Imapis munanqantsik mana rurakaptin. Wakinkunawan igualatsikunqantsikqa manam yanapakuntsu (leyi Gälatas 6:4). Tsëta rurashqaqa, wakinkunapita mas alli këta munarmi imatapis rurar qallëkushun y envidianakushunmi (Gäl. 5:26). Wakinkuna rurayanqannölla rurëta munarqa, capaz kikintsiklla utirishun o pishipärishun. Diospa Palabranmi kënö nin: “Imatapis shuyaräyanqan prontulla mana cumplikaptinqa, tsëman yarpararmi llakikuyan” (Prov. 13:12). Tsëmi logrëta mana puëdinapaq kaqkunata shuyararqa masraq llakikushun, manam kallpantsik kanqatsu y cörrikanqantsik carrërachöqa utirishunmi o pishipärishunmi (Prov. 24:10).

11. ¿Imatan yanapashunki rurëta mana puëdinqëkikunata mana shuyaränëkipaq?

¹¹ ¿Imatan yanapashunki mana shuyaränëkipaq? Jehoväqa rurëta mana puëdinqëkitaqa manam mañashunkitsu. Tsëmi mana mañashunqëkitaqa ruranëkitsu (2 Cor. 8:12). Ama llakikuytsu, Jehoväqa manam piwampis igualatsishunkitsu (Mat. 25:20-23). Jehoväqa qam ruranqëkitam valoran: shonqupita sirwinqëkita, mana dejanqëkita, y alli aguantanqëkitam valoran. Humildi kanqëkim yanapashunki edärëkur, salor-rëkur, o juk asuntukunarëkur unënöna imatapis rurëta mana puëdinqëkita cuentachö katsinëkipaq. Barziläinömi kanëki, juk carguchö yanapakunëkipaq niyäshuptikipis qeshyapäkurninqa manam chaskikunëkitsu (2 Sam. 19:35, 36). O manaqa, Moises ruranqannö rurë, juk carguta chaskikurqa, yanapayäshunëkipaq wakinkunata mañakuy (Ex. 18:21, 22). Humildi karqa, rurëta mana puëdinëkipaq kaqkunataqa imatapis manam shuyarankitsu y cörrikanqëki carrërachö cörrinëkipaqpis kallpayoqllam këkanki.

12. ¿Wakinkuna mana allita decidiyanqampitaqa culpayoqku kantsik?

¹² Wakinkuna mana allita decidiyaptin culpayoq sientikuytsu. Manam noqantsik jukkunapaq decidita puëdintsiktsu ni manam mana allita decidiyanqampita defendita puëdintsiktsu. Capaz juk wamra decidinman Jehoväta manana sirwinampaq, y tsëqa teytankunata alläpam llakitsinman. Tsënö kaptimpis, wamran mana allita decidinqampita teytankuna culpayoq sientikurqa, jukpa qepinta apaq cuentanam këkäyanman y tsëtaqa Jehovä manam munantsu (Rom. 14:12).

13. ¿Imatataq juk teyta ruranman wamran mana allita decidiptin?

 ¹³ ¿Imatan yanapashunki culpayoq mana sientikunëkipaq? Yarpë, Jehoväqa imatapis kikintsik decidinapaqmi permitimarquntsik, hasta sirwinapaq o mana sirwinapaqpis cada ünum decidinantsik. Jehoväqa musyanmi imatapis pantanqëkita. Pëqa alli teyta kanëkipaq kallpachakunëkitam munan. Jehoväta wamrëki sirwita dejariptinqa, manam qamtsu culpayoq kanki, kikinmi tsëta decidikan (Prov. 20:11). Tsënö kaptimpis, capazchi wamrëkita yanaparnin ruranqëkikunachö pantarqunki y tsëpita mana alli sientikunki. Tsënö sientikurqa, Jehoväta willë y perdonta mañakuy. Pëqa musyanmi pasakunqankunata cambiëta mana puëdinëkipaq kaqta. Jehoväqa manam shuyarantsu wamrëki mana allita decidinqampita qam libranëkita. Peru yarpë, wamrëki Jehoväta sirwinampaq yapë kallpachakuptinqa, pëqa kushishqam chaskinqa (Lüc. 15:18-20).

14. ¿Imatan yanapamäshun alläpa mana culpayoq mana sientikunapaq?

¹⁴ Alläpa culpayoq mana sientikunapaq. Jutsata rurarirqa, culpayoqmi sientikuntsik. Peru culpayoq kanqantsikllaman alläpa yarparäkunataqa manam Jehoväqa munantsu. Jutsata ruranqantsikpita willakushqana kar, arrepentikushqana kar y manana ruranapaq kallpachakuykarqa, segürunam kanantsik Jehovä perdonamanqantsikta (Hëch. 3:19). Y tsëkunata rurashqana këkarqa, manam Jehoväqa munantsu jutsata ruranqantsikpita llakikurlla kakunantsikta. Pëqa musyanmi tsëllaman yarparäkunqëkiqa mana allita rurashunëkipaq kaqta (Sal. 31:10). Jutsata ruranqantsikpita llakikurlla kakurninqa, capaz qelanärishun y imëyaqpis kawakunapaq cörrikanqantsik carrërachö ganëta puëdishuntsu (2 Cor. 2:7).

15. ¿Imatan yanapashunki alläpa culpayoq kanqëkita pensaptiki? (1 Juan 3:19, 20).

¹⁵ ¿Imatan yanapashunki llakikurlla  mana kakunëkipaq? Jutsata ruranqëkillaman yarparäkurqa, Diosnintsik ‘rasumpa perdonakoq’ kanqanman pensë (Sal. 130:4). Pillapis shonqupita arrepentikuptinqa, Jehoväqa kënö änikunqantam cumplin: “Jutsankunataqa mananam mas yarpäshaqnatsu” (Jer. 31:34). Tsënö nirqa Jehovä jutsata ruranqëkita manana yarpanqantam nikan. Capazchi jutsata ruranqëkipitaqa mana allikunapa pasëkanki, tsënö kaptimpis Jehoväqa perdonashurqunkinam. Jutsata ruranqëkipita congregacionchö yanapakuyta manana puëdirqa, ama alläpaqa yarpachakuytsu. Jutsata ruranqëkitaqa Jehoväqa qonqëkushqanam. ¿Qampis manatsuraq pënö qonqëkunkiman? (Leyi 1 Juan 3:19, 20).

16. Cörrinqantsikchöqa, ¿imatataq cuentachö cläru katsinantsik?

¹⁶ Imëyaqpis kawakunapaq premiuta chaskinapaqqa, kë consëjutam cäsukunantsik: “Tsëqa tsëta ganayänëkipaqnö cörriyë” (1 Cor. 9:24). Tsëpaqqa clärum musyantsik, imakunata ruranapaq kaqta y imakunata rurëta dejanapaq kaqkunata. Këchöqa juk ishkëllatam yachakurirquntsik, manam llapantatsu. Jesusmi kënö nirqan: “Cuidakuyë mëtsikata mikuypaq, mëtsikata upuypaq y kë vïdachö imëkapaq shonquykikunachö yarpachakuypita” (Lüc. 21:34). Kë textukuna y wakin textukunam yanapamäshun imakunachö cambiukunata ruranapaq, tsënöpa cörrikanqantsik carrërachö mana utirinapaq o mana pishipärinapaq.

17. ¿Imanirtan mana wanushpa kawëta chaskinapaq kaqtaqa següru këkantsik?

¹⁷ Segürum këkantsik cörrinqantsik carrërachö ganarnin mana wanuypa kawakuyta chaskinapaq kaqta, tsëpaqqa Jehovämi poderninwan yanapamäshun (Is. 40:29-31). Tsëmi apostol Pablunöpis premiuta chaskinëkipaq mana qelanashpa cörrir sïguinëki (Filip. 3:13, 14). Manam qampa rantikichö jukqa cörrita puëdintsu, peru Jehovämi ruranëkipaq kaqkunata ruraptiki y mana yanapakoq kaqkunata dejanëkipaq yanapashunki (Sal. 68:19). Pë yanapashuptikim, alli aguantanki y cörrikanqëki carrërachö gananki.