1. Juk cristiänu alläpa jutsata rurashqa karpis, ¿imatataq rurëta puëdin?

 PUNTA KAQ yachatsikuychömi yachakurqantsik Corintu congregacionchö juk cristiänu alläpa jutsata ruranqampita mana arrepentikuptin, congregacionpita rakiyänampaq apostol Pablu nishqa kanqanta. Tsëmi congregacionpita rakiriyarqan. Tsënö kaptimpis, kë yachatsikuypa qallananchö textu ninqannöpis jutsa ruraqtaqa arrepentikunampaqmi Jehovä Diosnintsik yanapëta puëdin (Rom. 2:4). ¿Imanötan jutsa ruraqkunata arrepentikuyänampaq Jehovä yanapan anciänukunawan?

2, 3. ¿Imatataq rurashwan juk wawqi o juk pani alläpa jutsata rurashqa kanqanta musyarqa, y imanirtan tsëta ruranantsik?

² Këman pensarishun: ¿Imatataq rurashwan juk wawqi o juk pani alläpa jutsata rurashqa kanqanta musyarqa? Jutsa rurashqa wawqita o panitam ninantsik anciänukunata willanampaq. Y anciänukunaqa ima pasakushqa kanqanta musyar-raq yanapëta puëdiyanqa (Is. 1:18; Hëch. 20:28; 1 Pëd. 5:2).

³ Peru ¿imatataq rurashwan mana willakuptinqa? Yanapayänanta munarmi anciänukunata kikintsik willanantsik. Tsëtaqa rurantsik tsë jutsa ruraq wawqita o panita kuyarninmi. Jutsa rurëta mana dejarqa, Jehoväpa amïgun këtam perdirinqa y nunakunapis wawqi panikunapaqmi mana allita parlayanqa. Tsëmi willakunantsikpaq valienti kanantsik y Jehoväta y jutsa ruraqta kuyarmi anciänukunata willanantsik (Sal. 27:14).

 ¿IMANÖTAN ANCIÄNUKUNAQA JUTSATA RURASHQA CRISTIÄNUTA YANAPAYAN?

4. ¿Imapaqtan anciänukunaqa jutsa ruraqwan juntakäyan?

⁴ Juk cristiänu jutsata rurariptinqa, congregacionchö llapan anciänukunam juntakäyan kimaq anciänukunata alli akrayänampaq, y tsë kiman anciänukunanam a jutsata rurashqa wawqiwan o paniwan parlayanqa. Tsë anciänukunaqa manam pensayänantsu llapan pasakunqanta musyayanqantaqa, y humildim kayänan. Yarpäyänanmi arrepentikunampaq yanapëta munarpis, obliguëta mana puëdiyänampaq kaqta (Deut. 30:19). Jutsa ruraqkunaqa, wakinqa Davidnömi consejayanqanta chaskikuyan (2 Sam. 12:13). Peru wakinkunaqa manam Jehoväpa consëjunta chaskikuyantsu (Gen. 4:6-8). Tsënö kaptimpis, tsë kiman anciänukunaqa llapan puëdiyanqannömi arrepentikunampaq yanapayänan. Peru anciänukunaqa, ¿Jehoväpa mëqan consëjunkunatataq yarpäyänan jutsa ruraqwan parlayanqan höra?

5. ¿Ima consëjutataq anciänukuna yarpäyänan jutsata rurashqa wawqiwan o paniwan parlayanqan höra? (2 Timoteu 2:24-26; rikäri dibüjuta).

⁵ Anciänukunaqa jutsa ruraqta rikäyänan Jehoväpa oqrakashqa üshantanömi (Lüc. 15:4, 6). Tsëtaqa rikätsikuyanqa jutsata ruraqpaq imata pensayanqanchö, shumaq parlapäyanqanchö y shumaq tratayanqanchömi. Manam lasaq shiminkunapaqa parlapäyänantsu, ni manam cumpliyänan kaptinllaqa jutsata ruraqwan parlayänantsu. Tsëpa rantinqa, 2 Timoteu 2:24 a 26 (leyi) ninqantam rurayänan. Arrepentikunanta munarmi, jutsata rurashqa wawqita o panitaqa kuyëpa, respëtuwan y pacienciawan parlapäyänan.

6. ¿Imanötan anciänukunaqa preparakuyanman jutsa ruraqta yanapayänampaq? (Romänus 2:4).

⁶ Anciänukunaqa allim preparakuyänan. Apostol Pablu kënö ninqantam yarpäyänan: “[¿]Arrepentikunëkipaq Teyta Dios yanapëkäshunqëkita mana musyarku, alläpa alli kanqanta [...] desprecianki?” (leyi Romänus 2:4). Anciänukunaqa Jehovänömi jutsata rurashqa wawqita o panita shumaq tratayänan. Yarpäyänanmi sirweqninkunata cuidayänampaq Jehovä churashqa kanqanta, tsëmi Jesus mandakunqannö y ruranqannö shumaq tratayänan (Is. 11:3, 4; Mat. 18:18-20). Tsëqa, ¿imatataq rurayänan jutsata rurashqa wawqiwan o paniwan manaraq parlarnin? Arrepentikunampaqmi yanapayänan. Peru tsëpaqqa puntatam  Jehoväman mañakuyänan, Bibliachö y publicacionkunachö consëjukunata ashiyänan y Jehovätam mañakuyänan jutsa ruraqta entiendiyänampaq y imanir jutsaman ishkishqa kanqanta musyayänampaq. Y kënömi pensayänan: “¿Imanirtan kananqa tsënö portakun? ¿Imanirtan Dios munanqannönatsu pensan? Y ¿imanirtan jutsa rurëman chashqa?”. Tsëtam alli entiendita procurayänan (Prov. 20:5).

7, 8. ¿Imanötan anciänukunaqa Jehovänö kayanqanta rikätsikuyan jutsa rurashqata yanapayanqan höra?

⁷ Anciänukunaqa Jehovänömi pacienciakoq kayänan. Jutsa ruraqkunata Jehovä imanö tratanqantam yarpäyänan. Këllaman pensarishun: Caintam pacienciawan entienditsirqan alli kaqta ruraptinqa amïgun sïguinampaq kaqta, peru mana cäsukurqa mana allikunaman chänampaq kaqta (Gen. 4:6, 7). Gobernanti Davidta correginampaqnam willakoqnin Natanta mandarqan, y pëqa juk ejempluwanmi shumaq entienditsirqan (2 Sam. 12:1-7). Y israelïtakunamannam, cambiayänanta munar willakoqninkunata kutin kutin mandarqan (Jer. 7:24, 25). Jehoväqa sirweqninkunata yanapanampaqqa manam arrepentikuyänantaraqtsu shuyararqan, tsëpa rantinqa jutsata rurëkäyaptinllaran arrepentikuyänampaq yanaparqan.

⁸ ¿Imanötan anciänukunaqa jutsata rurashqa wawqita o panita Jehovänö yanapayan? 2 Timoteu 4:2 ninqannömi, “alläpa pacienciawan” yanapayan. Tsëmi alli kaqta ruranampaq corregirqa, kuyëpa y pacienciawan yanapayänan. Peru qayapäyaptin o mana alli tratayaptinqa, manam consejayanqanta chaskikunqatsu y manam arrepentikuyta munanqatsu.

9, 10. ¿Imanötan jutsata rurashqa wawqita o panita anciänukuna yanapayanman ruranqan mana alli kashqa kanqanta entiendinampaq?

⁹ Jutsaman imanir ishkishqa kanqantam entiendita procurayänan. ¿Ichikpa ichikpatsuraq Bibliata estudiëta y yachatsikoq yarquyta dejarirqan? ¿Manatsuraq seguïduna Diosman mañakoq? O ¿janan shonqullatsuraq mañakoq? ¿Mana alli munëkunatatsuraq o rurëkunatatsuraq yarpararqan? ¿Mana alli amïgukunawantsuraq juntakaq o imatapis mana allikunatatsuraq Internetchö o imachö karpis rikaraq? Tsë jutsa ruraqqa, ¿alliku entiendin ruranqanwanqa Jehoväta llakitsishqa kanqanta?

¹⁰ Jutsa rurëman imanir ishkishqa kanqanta entiendiyänampaqqa, anciänukunaqa shumaq y kuyëllapam tapupäyänan y parlakunantam dejayänan. Peru tapuparpis, musyëta wanayanqan kaqkunallatam tapuyänan (Prov. 20:5). Y Davidta Natan yanapanqannömi, ruranqan mana alli kanqanta entiendinampaq ejemplukunawan yanapayänan. Mana allita rurashqa kanqanta entiendirirqa, capazchi puntata parlayanqanllachöna mana alli sientikunqa y arrepentikurinqa.

11. ¿Imanötan jutsa ruraqkunata Jesus tratarqan?

¹¹ Anciänukunaqa Jesusnömi jutsa ruraqkunata tratayänan. Jesusmi Tarsupita Sauluta kënö tapurqan: “Saulu, Saulu, ¿imanirtan imëkata rurar sufrikätsimanki?”. Tsënöqa tapurqan rurëkanqan mana alli kanqanta cuentata qokunampaqmi (Hëch. 9:3-6). Apocalipsis 2:20 y 21 textuchönam ‘Jezabelpaq’ parlarnin kënö nirqan: “Arrepentikunampaqmi tiempu pasananta dejarqä”.

12, 13. ¿Imatataq anciänukuna rurayanman jutsa ruraqta arrepentikunampaq yanapëta munarqa? (Rikäri fötukunata).

¹² Anciänukunaqa manam pensayänantsu  jutsa ruraqkunaqa arrepentikuyta mana munayanqanta. Tsënö pensarqa, manam Jesusnötsu rurëkäyanman. Wakinkunaqa puntata parlapäriyaptinllam arrepentikuriyanqa, peru wakinkunaqa mas tiemputaran wanayanqa. Tsëmi anciänukunaqa yapë parlayänampaq patsätsiyänan. Capazchi puntata parlapäyanqankunaman pensarnin, jutsa ruraqqa cuentata qokunqa mana allita rurashqa kanqanta y Jehoväta perdonta mañakunqa (Sal. 32:5; 38:18). Y capazchi yapë parlayänampaqqa arrepentikushqana kanqa.

¹³ Anciänukuna pitapis arrepentikunampaq yanapëta munarqa, imakunapa pasëkanqantam cuentachö katsiyänan y kuyëpam tratayänan. Tsë jutsa ruraqta juiciunman kutinampaq y arrepentikunampaq yanapëkäyanqanta bendicïkunampaqmi Jehoväman mañakuyänan (2 Tim. 2:25, 26).

14. ¿Pï permitiptintan jutsata ruraqqa arrepentikun?

¹⁴ Jutsata rurashqa wawqi o pani arrepentikuptinqa, alläpam kushikuntsik (Lüc. 15:7, 10). Peru ¿pï permitiptintan tsë jutsa ruraqqa arrepentikun? Apostol Pablum nirqan arrepentikunampaq “Teyta Dios” permitinqanta (2 Tim. 2:25). Yachakurinqantsiknömi, jutsa ruraqqa arrepentikun kikin Jehovä permitiptin; pëmi yanapan cuentata qokunampaq. Y ¿imanötan arrepentikunqanqa yanapan? Pablum nirqan rasumpa kaqta musyanampaq, juiciunman kutinampaq y Satanaspa trampanman mana ishkinampaq yanapanqanta (2 Tim. 2:26).

15. ¿Imatataq anciänukuna rurayanman arrepentikoq wawqita o panita maslla yanapayänampaq?

¹⁵ ¿Imatataq anciänukuna rurayanman juk wawqi o pani arrepentikuriptin? Yanapayänampaqmi seguïdu watukayänan. Tsënö yanapayaptinmi Jehoväman maslla markäkunqa, yapëqa tentacionman ishkinqatsu y Jehovä munanqannö kawakunqa (Heb. 12:12, 13). Yanapaq anciänukunaqa manam pïmëta willayänantsu tsë wawqi o  pani ima jutsata rurashqa kanqanta. Peru ¿imatataq congregacionchö kaqkunaqa musyayänan?

“TSËCHÖ KËKAQKUNAPA PUNTANCHÖ JUTSA RURAQKUNATA CORREGI”

16. ¿Pikunapaqtan Pablu parlëkan 1 Timoteu 5:20 textuchö “tsëchö këkaqkunapa puntanchö” nirqa?

¹⁶ (Leyi 1 Timoteu 5:20). Apostol Pablum anciänu mayin Timoteuta nirqan, “tsëchö këkaqkunapa puntanchö” jutsa ruraqta correginampaq. “Tsëchö këkaqkunapa puntanchö” nirqa, höraqa manam congregacionchö llapan kaqkunapaqtsu parlëkan, sinöqa tsë wawqi o pani jutsata ruranqanta musyaqkunapaq o jutsata rurashqa kaq willanqan kaqkunallapaqmi. Tsëmi anciänukunaqa, tsë asuntuta musyaq kaqkunallata willayänan jutsa ruraqta corregishqa kayanqanta.

17. ¿Imanirtan anciänukunaqa juk wawqi o pani jutsata rurashqa kanqanta congregacionchö willakuyanman, y imanötan tsëta rurayanqanqa yanapakun?

¹⁷ Peru höraqa congregacionchö llapan kaqkunam juk pani o juk wawqi jutsata ruranqanta musyayan o tiempu pasanqanmannö musyariyan. Tsënö kaptinqa, “tsëchö këkaqkunapa puntanchö” nirqa, congregacionchö llapan kaqkunapaqmi parlëkan. Tsëmi anciänukunaqa wawqi panikunata congregacionchö willayänan tsë jutsa ruraqta corregishqa kayanqanta. ¿Imapaqtan willakuyanqanqa yanapakun? Apostol Pablum nirqan, “wakinkunapis tsëpita yachakuyänampaq” o tsënö jutsa rurëman mana ishkiyänampaq.

18. ¿Imatataq anciänukuna rurayanman jutsata ruraq wawqi o pani 18 watanta manaraq cumpliptinqa? (Rikäri fötuta).

¹⁸ Peru ¿imatataq anciänukuna rurayanman  jutsata ruraq wawqi o pani 18 watanta manaraq cumpliptinqa? Ishkaq anciänukunatam akrayänan jutsa ruraqwan y Testïgu papäninkunawan b parlayänampaq. Anciänukunaqa papäninkunatam tapuyänan wamrankunata arrepentikunampaq imanö yanapëkäyanqanta. Papäninkuna consejayanqanta cäsukur tsë wamra corregikur qallaptinqa, tsë ishkan anciänukunam decidiyanqa tsë asuntuta kimaq anciänukunaraq atiendiyänan mana necesitanqanta. Y yarpänantsikmi Jehovä Diosnintsikqa, wamrankunata kuyëllapa corregiyänampaq papäninkunata churashqa kanqanta (Deut. 6:6, 7; Prov. 6:20; 22:6; Efes. 6:2-4). Tsëpitanam anciänukunaqa papäninkunawan höra höra parlayänan y yanaparnin sïguiyänampaqmi niyänan. Peru jutsata ruraq wamra mana cäsukuptin y mana arrepentikuptinqa, ¿imatataq congregacionchö anciänukuna rurayanman? Kimaq anciänukunatam akrayänan tsë jutsata ruraq wamrawan y Testïgu papäninkunawan parlayänampaq.

‘JEHOVÄQA ALLÄPA KUYAKOQ Y LLAKIPÄKOQMI’

19. ¿Imanötan anciänukunaqa Jehovänö kayanqanta rikätsikuyan jutsa ruraqta yanapayanqan höra?

¹⁹ Jutsa ruraqta yanapaq kiman anciänukunaqa congregacion limpiu kanantam procurayänan, tsëpaqmi Jehoväqa pëkunata churashqa (1 Cor. 5:7). Tsënö kaptimpis, llapan puëdiyanqanmannömi jutsa ruraqta yanapayänan arrepentikunampaq, y confiakuyänanmi arrepentikunampaq kaqman. Tsëta rurarmi Jehovä Diosnintsiknö “kuyakoq y llakipäkoq” kayanqanta rikätsikuyanqa (Sant. 5:11). Pensarishun edäna këkarnin apostol Juan kënö ninqanman: “Kuyë wamralläkuna, jutsata mana rurayänëkipaqmi qamkunaman këkunata qellqëkämü. Peru mëqantsikpis jutsata rurashqaqa, Teytapa lädunchö këkaq alli kaqta ruraq Jesucristum yanapamantsik” (1 Juan 2:1).

20. ¿Imatataq qateqninchö yachakushun?

²⁰ Peru höraqa, jutsa ruraqkunaqa manam arrepentikuyta munayantsu, tsëmi congregacionpita rakiyänan. ¿Imatataq anciänukunaqa tsë cäsuchö rurayan? Tsëtam qateqninchö yachakushun.