1, 2. (1) ¿Imanötan Jehoväqa rikan jutsata rurarir mana arrepentikoqkunata? (2) ¿Imatataq Jehoväqa munan?

 JUTSATA ruraqkunataqa Jehoväqa alläpam chikin (Sal. 5:4-6). Pëqa munan Palabran Bibliachö mandakunqankunata cäsukunantsiktam. Awmi, musyanmi jutsasapa kanqantsikta y manam shuyarantsu llapantapis allillata ruranantsiktaqa (Sal. 130:3, 4). Tsënö kaptimpis Teyta Diosqa, pëta ‘mana respetaqkunata’ y imëka mana allikunata ruraqkunataqa chikinmi (Jüd. 4). Y Bibliachöqa clärum nin, tsënö nunakunata Armagedonchö ushakätsinampaq kaqta (2 Pëd. 3:7; Apo. 16:16).

² Tsënö kaptimpis, Jehovä Diosnintsikqa manam munantsu pï nunapis ushakänanta. Punta kaq yachatsikuykunachö yachakunqantsiknömi, Diosnintsikqa munan “llapankuna arrepentikuyänanta” (2 Pëd. 3:9). Tsëmi anciänukunaqa, Jehovä munanqannö, jutsa rurashqakunata yanapayan arrepentikuyänampaq y pëwan yapë amïgu kayänampaq. Peru wakinkunaqa manam cäsukuyantsu (Is. 6:9). Anciänukuna yanapëkäyaptimpis, manam cambiayantsu ni arrepentikuyantsu. Tsë cäsuchöqa, ¿imatataq anciänukuna rurayanman?

 “MANA ALLITA RURAQ NUNATA” CONGREGACIONPITA RAKIYË

3. (1) ¿Imatataq anciänukuna rurayanman pipis mana arrepentikuptin? (2) Juk wawqi o juk pani jutsata rurarir mana arrepentikuptinqa, ¿imanirtan nintsik kikin decidiptin congregacionpita rakiyanqanta?

³ ¿Imatataq anciänukuna rurayanman juk wawqi o juk pani jutsata rurarir mana arrepentikuptin? 1 Corintius 5:13 ninqantam rurayänan. Kënömi nin: “Qamkunachö këkaq mana allita ruraq nunata qarquyë” o rakiyë. ¿Anciänukunaqa kikinkuna munarku tsë jutsa ruraqta congregacionpita rakiyan? Manam. Tsëtaqa kikin jutsa ruraqmi decidikan consejayanqanta mana cäsukur, juk parlakuychöqa murunqantam cosechëkan (Gäl. 6:7). Arrepentikunampaq anciänukuna kutin kutin yanapëkäyaptimpis manam cäsukushqatsu (2 Rëy. 17:12-15). Y ruranqankunawanmi cläru rikätsikuykan Diosnintsik mandakunqankunata cäsukuyta manana munanqanta (Deut. 30:19, 20).

4. Pitapis congregacionpita rakirirqa, ¿imanirtan anciänukuna congregacionchö willakuyan?

⁴ Mana arrepentikoq wawqita o panita congregacionpita rakirirqa, anciänukunaqa congregacionchömi willakuyan Jehoväpa testïgun manana kanqanta. Tsënöqa willakuyan manam penqakatsita munartsu, sinöqa tsë jutsa ruraqwan mana juntakäyänampaqmi (1 Cor. 5:9-11). ¿Imanirtan Jehoväqa tsëta rurayänampaq mandakurqan? Apostol Pablum kënö nirqan: “¿Manaku musyayanki wallka levadüralla llapan masata poquratsinqanta?” (1 Cor. 5:6). Mana arrepentikoq wawqita o panita congregacionpita mana rakiyaptinqa, capazchi wakin wawqi panikunaqa pensayanman Jehovä mandakunqannö kawakunapaq kallpachakuyqa mana välinqanta (Prov. 13:20; 1 Cor. 15:33).

5. ¿Imatataq pensanantsiktsu congregacionpita rakishqa kaqkunapaq?

⁵ Peru ¿imanötan rikashwan congregacionpita rakishqa kaqkunata? Pëkunawan manana juntakarpis, manam pensanantsiktsu manana kutiyämunampaq kaqtaqa. Pëkunaqa oqrakashqa üshanömi këkäyan y imë karpis kutimuytam puëdiyan. Yarpänantsikmi, Jehovällatana sirwiyänampaq änikushqa kayanqanta. Tsënö änikushqa karpis, kananqa manam Jehovä munanqannötsu kawëkäyan, y mana arrepentikurqa imëyaqpis kawakuyänampaq kaqtam perdiriyanman (Ezeq. 18:31). Peru Jehovä Diosnintsik llakipänampaqqa tiempu kanran, y imë karpis kutiyämunampaq kaqmanmi confiakuntsik. Tsëqa, ¿imanötan anciänukuna yanapayanman congregacionpita rakishqa kaqkunata?

¿IMANÖTAN ANCIÄNUKUNA YANAPAYAN CONGREGACIONPITA RAKISHQA KAQKUNATA?

6. Pitapis congregacionpita rakirqa, ¿imakunatataq anciänukuna rurayan yanapayänampaq?

⁶ Pitapis congregacionpita rakirirqa, ¿imatataq anciänukuna rurayan? ¿Chipyëpaku qonqëkuyan y mananaku Jehoväman kutimunampaq yanapayan? ¡Manam! Congregacionchö manana kanampaq willayanqan höram, tsë kiman anciänukuna alli entienditsiyan kutimunampaq imakunata ruranampaq kaqta. Y niyanqam juk ishkë killakuna pasariptin yapë parlëta munayanqanta. Y “awmi” niptinqa, yapë parlayanqanchömi kuyëllapa animayänan arrepentikunampaq y congregacionman kutimunampaq. Peru ¿imatataq rurayanman mana arrepentikushqa kaptinqa? Tsënö kaptimpis, anciänukunaqa yapëkunachöpis parlar sïguiyänampaqmi patsätsiyänan.

7. Congregacionpita rakishqakunata yanaparninqa, ¿imanötan anciänukuna rikätsikuyan Jehovänö kayanqanta? (Jeremïas 3:12).

 ⁷ Anciänukunaqa Jehovänömi llakipäkoq kayänan congregacionpita rakishqakunata yanaparnin. Jehovä Diosnintsikqa manam, mana cäsukoq israelïtakunata dejarirqantsu y yanapanampaqqa manam arrepentikuyänantaraqtsu shuyararqan. Tsëpa rantinqa, manaraq arrepentikuyaptinmi yanaparqan. Y ishkë kaq yachatsikuychö yachakunqantsiknömi, Osëasta pasanqanwan alläpa llakipäkoq kanqanta entienditsirqan. Osëastam mandarqan, juk ollqukunallawanraq kakuykaptin warminta kutitsimunampaq y perdonanampaq (Os. 3:1; Mal. 3:7). Anciänukunapis Jehovänömi, congregacionpita rakishqakunata llapan shonqunkunawan yanapayänan arrepentikuyänampaq y congregacionman fäcil-lla kutiyämunampaq (leyi Jeremïas 3:12).

8. ¿Imata Jesus willakunqanwantan maslla entiendirintsik Jehovä llakipäkoq kanqanta? (Lücas 15:7).

⁸ Tsënöllam yarpänantsik, ishkë kaq yachatsikuychö oqrakashqa tsurinta papänin chaskinqampaq yachakunqantsikta. Papäninqa karullataraq shamuykaqta rikëkurmi, “alläpa llakipar cörripa ëwarqan, y waqurkur o makallarkurmi kuyëpa mutsar chaskirqan” (Lüc. 15:20). Perdontapis manaraq mañakuptinmi, kuyakoq teyta karnin kushishqa chaskirqan. Tsënöllam anciänukunapis congregacionpita rakishqa kaqkunata alläpa kuyayan, y kutimunampaqmi llapan puëdiyanqanmannö yanapayan (Lüc. 15:22-24, 32). Jutsa ruraq arrepentikurir kutimuptinqa, ¡ciëluchöpis y kë Patsachöpis alläpam kushikuyan! (Leyi Lücas 15:7).

9. Jutsata rurashqa kaqkunataqa, ¿imata rurayänampaqtan Jehovä nin?

⁹ Këyaqmi yachakurquntsik jutsa ruraqkunataqa sirweqnin kayänanta Jehovä mana permitinqanta, peru arrepentikur kutiyämunantaqa shuyaranqanta. Osëas 14:4 textuchömi arrepentikoqkunata kënö nin: “Mana alli këkäyanqëkipitam alliyätsiyashqëki, y manam traicionakoqnatsu kayanki. Mananam qamkunawan cölerashqanatsu këkä, tsëmi kikï munarnin qamkunata kuyayashqëki”. Tsëqa, ¿imapitataq anciänukuna alkäbu këkäyänan? Congregacionpita rakishqa kaqkuna arrepentikuyanqantam. Y ¿imatataq congregacionpita rakishqa kaqkuna rurayänan? Arrepentikuyänampaq y Jehoväman kutiyämunampaqqa, manam alläpa tiempu pasanantaraq shuyaräyänantsu.

10, 11. ¿Imanötan anciänukunaqa congregacionpita unëna rakishqa kaqkunata yanapayanman?

¹⁰ Y congregacionpita unëna rakishqa kaqkunataqa, ¿imanötan yanapayanman? Capazchi wakinkunaqa tsë rurayanqan jutsata dejayashqana, o wakinkunaqa yarpäyannatsu congregacionpita imanir rakishqa kayanqanta. Imanö kaptimpis, anciänukunam pëkunata ashiyänan y visitayänan. Y visitarninqa, pëkunawan juntum Diosnintsikman mañakuyta puëdiyan y congregacionman kutimunampaqmi animëta puëdiyan. Alläpa unëpana congregacionman mana shamushqa karqa, capazchi Bibliapita yapë yachatsiyänantaraq wananqa. Tsëmi congregacionman kutimuyta munaptinqa, manaraq kutimushqa kaptimpis, anciänukuna decidita puëdiyan Bibliapita pï yachatsinampaq kaqta. Peru këtam yarpänantsik: pï yachatsinampaq kaqtaqa anciänukunallam decidita puëdiyan.

 ¹¹ Anciänukunaqa Jehovänö llakipäkoq këtam munayan. Tsëmi congregacionpita rakishqakunata ashiyänampaq y puëdikaptinqa kutitsiyämunampaq kallpachakuyan. Congregacionpita rakishqa nuna arrepentikushqana kaptin y jutsa rurëta dejashqana kaptinqa, rasllam o sasllam congregacionman kutitsimuyta puëdiyan (2 Cor. 2:6-8).

12. (1) ¿Ima cäsukunachötan anciänukunaqa pitapis congregacionman manaraq chaskir alliraq rikäyänan? (2) ¿Imanirtan anciänukunaqa pensayänantsu juk jutsa ruraqta Jehovä Diosnintsik manana llakipänampaq kaqta? (Leyiri nötata).

¹² Tsënö kaptimpis, wakin cäsukunachöqa pitapis congregacionman manaraq chaskirmi, anciänukunaqa alliraq rikäyänan. Capazchi wakinkunataqa congregacionpita rakiriyarqan wamrakunata maltratashqa  y abusashqa kayaptin, Diospa contran churakashqa kayaptin o majampita rakikänanrëkur imëkata rurashqa kayaptin. Tsë cäsukunachöqa, alliran anciänukuna rikäyänan rasumpa arrepentikushqa o mana arrepentikushqa kanqanta (Mal. 2:14; 2 Tim. 3:6). Anciänukunaqa congregacionchö wawqi panikunatam alli cuidayänan. Tsënö kaptimpis, pï nunapis rasumpa arrepentikuptinqa y jutsa rurëta dejaptinqa, Jehovä Diosnintsik yapë chaskinampaq kaqtam yarpäyänan. Unë mana alli kashqa kaptimpis o alli musyëkar pitapis mana allita rurashqa kaptimpis, Jehovä Diosnintsikqa llakipanmi. Tsëmi wakin cäsukunachö alli rikarpis, anciänukunaqa pensayänantsu Jehovä manana perdonanampaq kaqtaqa (1 Pëd. 2:10). a

¿IMATATAQ CONGREGACIONCHÖ WAWQI PANIKUNA RURAYANMAN?

13. ¿Pikunawantan juntakëta puëdintsik y pikunawantan juntakëta puëdintsiknatsu?

¹³ Punta kaq yachatsikuychö yachakunqantsiknömi, jutsata ruranqampita juk wawqita o panita anciänukuna corregishqa karqa congregacionchö willakayämun. Tsë cäsuchöqa mana alli rurëta dejashqa kanqanta y arrepentikushqa kanqanta musyarmi juntakar sïguintsik (1 Tim. 5:20). Tsë wawqi o paniqa congregacionchömi sïguin y alli kaqta ruranampaq animayänantam wanan (Heb. 10:24, 25). Peru pitapis congregacionpita rakiriyaptinqa, mananam mikunqantsik hörallapis pëwan juntakantsiknatsu (1 Cor. 5:11).

14. Pitapis congregacionpita rakiyashqa kayaptinqa, ¿imatataq cada cristiänu decidinman Bibliawan yachatsishqa conciencian permitinqanmannö? (Rikäri fötukunata).

¹⁴ Tsënö nirqa, ¿congregacionpita rakishqa kaqkunata ni imanöpapis mana parlapänapaq  kaqtaku nikantsik? Manam. Pëkunawan juk hörakunachö mana juntakarpis, familiantsik o amïguntsik kashqa kaptinqa, reunionkunaman shamunampaqmi invitarita puëdintsik, peru invitanapaq o mana invitanapaqpis cada ünum Bibliawan yachatsishqa conciencian permitinqanmannö decidinantsik. ¿Y imatataq rurashwan reunionman shamuptinqa? Unëqa manam saludëta puëdeqtsu kantsik. Peru kananqa cada cristiänum Bibliawan yachatsishqa conciencian permitinqanmannö, saludanampaq o mana saludanampaqpis decidinan. Capazchi wakinkunaqa saludarnin o reunionkunaman chaskirnin alli sientikuyanqa. Tsënö kaptimpis, manam unëpaqa parlakur kakunantsiktsu ni juk rurëkunachöpis juntakänantsiktsu.

15. ¿Pikunapaqtan parlëkan 2 Juan 9 a 11 textuchö? (Leyiri “ ¿Apostol Juanwan Pabluqa tsë jutsallapaqku parlëkäyarqan?” neq recuadruta).

¹⁵ Peru capazchi kënö pensashwan: “¿Manaku pëkunata saludaq kaqqa, ‘mana allikunata ruranqanchö yanapëkan’?” (leyi 2 Juan 9-11). Juan libruqa parlëkan, Diospa contran churakashqakunapaq y mana allikunata rurayänampaq wakinkunata imëpis animaqkunapaqmi (Apo. 2:20). Sïkush juk nuna Dios yachatsikunqankunapa contran jukkunata yachatsin o jutsakunata rurayänampaq wakinkunata animan, tsëqa manam anciänukuna visitayänantsu. Awmi, kikin munarqa, cambiëta puëdinmi. Peru mana cambiaptinqa, manam saludanantsiktsu ni reunionkunamampis invitanantsiktsu.

JEHOVÄNÖ LLAKIPÄKOQ KASHUN

16, 17. (1) ¿Jutsata rurashqakuna imata rurayänantataq Jehovä shuyaran? (Ezequiel 18:32). (2) ¿Imanirtan anciänukunapaqqa nintsik Jehoväpa yanapaqnin cuenta kayanqanta?

¹⁶ Kë pitsqan yachatsikuykunachöqa yachakurquntsik, pï nunapis ushakänanta Jehovä Diosnintsik mana munanqantam (leyi Ezequiel 18:32). Jehoväqa munan jutsa ruraqkuna pëwan amishtayänantam (2 Cor. 5:20). Tsëmi pëpita rakikaqkunata arrepentikuyänampaq y pëman kutiyänampaq imëpis yanapashqa. Anciänukunam Jehoväpa yanapaqnin cuenta kayan, pëkunatam Jehoväqa churashqa jutsa ruraqkunata arrepentikuyänampaq yanapayänampaq (Rom. 2:4; 1 Cor. 3:9).

¹⁷ Jutsata ruraq nuna arrepentikuriptinqa, ciëluchömi alläpa kushikuyan. Tsënö kushikuyanqanman pensëqa, ¡alläpa shumaqmi! Teytantsik Jehoväqa alläpam kushikun oqrakashqa üshan congregacionman kutiramuptin. Tsënö këkaptinqa, pensar sïguishun Diosnintsik alläpa llakipäkoq y alli kanqanman. Tsëta rurarqa, masmi Jehoväta kuyashun (Lüc. 1:78).