1, 2. (1) ¿Imatan jutsaqa, y imanötan vencishwan? (Leyiri “Maslla entiendinapaq” neqta). (2) ¿Imatataq këchö y qateqnin kaq yachatsikuykunachö yachakushun? (Leyiri 32 kaq päginachö “Kë revistata leyeqkunapaq” neqta).

 ¿JEHOVÄQA kuyashunkitsuraq? Tsëta musyanëkipaqqa, jutsapita y wanuypita salvamänapaq imakunata ruramunqankunatam yachakunëki. Jutsapitaqa a manam kikintsikllaqa salvakuyta puëdintsiktsu. Cada junaqmi mana allikunata rurantsik, y jutsasapa karmi wanuntsik (Rom. 5:12). Tsënö kaptimpis, manam alläpaqa yarpachakunantsiktsu. Jehovä Diosnintsik yanapamashqam, jutsataqa vencita puëdishun.

² Jehovä Diosnintsikqa nunakunata kuyarmi 6 mil watapanöna yanapëkan jutsata venciyänampaq. Jehoväqa kamanqan junaqpitam nunakunata alläpa kuyan, tsëmi jutsata venciyänanta munar imëkakunata ruramushqa. Pëqa musyanmi jutsaqa wanuyman chätsikunqanta y manam munantsu pï nunapis wanunanta, tsëpa rantinqa imëyaqpis kawakuyänantam munan (Rom. 6:23). Y ¡tsëtam qampaqpis munan! Këchömi kë kima tapukuykunapa respuestanta yachakurishun: 1) ¿Imatataq Jehovä änimarquntsik mana wanuypa kawakunapaq? 2) ¿Imatataq jutsasapa këkarpis unë nunakuna rurayarqan Jehoväta kushitsiyänampaq? Y 3) ¿imatataq Jesus rurashqa jutsapita y wanuypita salvamänapaq?

 ¿IMATATAQ NUNAKUNATA JEHOVÄ ÄNIRQAN?

3. ¿Imanötan Adanwan Ëvaqa jutsa ruraq tikrayarqan?

³ Jehovä Diosnintsikqa Adantawan Ëvata kamarqan kushishqa kawakuyänampaqmi. Tsëmi juk shumaq huertaman churarqan, casädu kawakuyänanta permitirqan y entëru Patsata shumaq huertaman tikratsiyänampaq y wamrankuna kanampaq mandarqan. Peru alli kawakuyänampaqqa, Jehovä Diosnintsik mandanqanllatam cäsukuyänan karqan, y mana cäsukurqa wanuyänanmi karqan. Peru musyanqantsiknöpis, Jehoväta, Adanta y Ëvata mana kuyaq juk mana alli angelmi, Adantawan Ëvata jutsaman ishkiratsirqan. Pëkunaqa Jehoväman confiakuyänampa rantinmi, tsë mana alli angel ninqanta cäsur jutsata rurayarqan. Tsëmi Jehovä ninqannölla awkinyäyarqan y wanuyarqan (Gen. 1:28, 29; 2:8, 9, 16-18; 3:1-6, 17-19, 24; 5:5).

4. ¿Imanirtan Jehoväqa jutsata alläpa chikin, y imanötan yanapamantsik jutsata vencinapaq? (Romänus 8:20, 21).

⁴ ¿Imanirtan Jehoväqa Bibliaman qellqatsirqan, Adanwan Ëva jutsata rurayanqanta? Tsëtaqa qellqatsirqan jutsata alläpa chikinqanta musyanapaqmi. Jutsaqa Teytantsik Jehoväpitam rakimantsik y wanuymanmi chätsimantsik (Is. 59:2). Tsëmi Satanasqa jutsa rurëtaqa alläpa gustan, tsënöpam Adantawan Ëvata jutsaman ishkitsirqan y noqantsiktapis jutsa rurëmanmi ishkitsimënintsikta munan. Adantawan Ëvata jutsaman ishkiratsirqa, capazchi Satanasqa pensarqan änikunqankunata Jehovä cumplita manana puëdinampaq kaqta. Peru manam musyarqantsu Jehovä Diosnintsik alläpa kuyakoq kanqantaqa. Diosnintsikqa manam cambiashqatsu nunakunapaq rurëta munanqanta. Tsëmi nunakunata alläpa kuyarnin tsë hörallachöna änikurqan jutsapita y wanuypita libranampaq (leyi Romänus 8:20, 21). Jehoväqa musyarqanmi, wakin nunakuna pëta kuyayänampaq kaqta y jutsata venciyänampaq pëta ashiyänampaq kaqta. Tsëmi amïgun kayänanta permitinan karqan, tsënöpa jutsa y wanuyta venciyänampaq. ¿Imanötan tsëtaqa ruranan karqan?

5. ¿Imanötan y imëtan Jehoväqa änikurqan nunakunata jutsapita y wanuypita libranampaq? (Genesis 3:15).

⁵ (Leyi Genesis 3:15). Nunakunata jutsapita y wanuypita libranampaqmi Jehoväqa tsë hörallana Satanasta condenarirqan. Tsëpitam änikurqan warmipa juk Kastan Satanasta ushakätsinampaq kaqta y Edenchö pasakunqankunata altsanampaq kaqta (1 Juan 3:8). Tsënö kaptimpis, puntataqa warmipa Kastantam Satanas sufritsinan y wanutsinan karqan. Jehoväqa tsëta rikar alläpa llakikunan kaptimpis, mëtsika millon nunakunata jutsapita y wanuypita librananrëkurmi aguantanan karqan.

¿IMATATAQ JUTSASAPA KËKARPIS UNË NUNAKUNA RURAYARQAN JEHOVÄPA AMÏGUN KËTA MUNAR?

6. ¿Imatataq Abelwan Noëqa rurayarqan Jehoväpa amïgun këta munar?

⁶ ¿Imanötan jutsasapa nunakunaqa Jehoväpa amïgun këta puëdiyanman karqan? Tsëtaqa tiempu pasanqanmannömi kikin Jehovä ichikllapa ichikllapa entienditsikurqan. Jehovä Diosman puntata markäkoq o yärakoq nunaqa karqan, Adanpa y Ëvapa wamran Abelmi. Pëqa Jehoväta kuyar y amïgun këta munarmi ‘üshankunapa punta yureq wawankunata’ Jehoväpaq rupatsirqan. Y “Jehoväqa kushishqam chaskirqan Abelta y ruranqan qarëta” (Gen. 4:4). Tiempuwannam Jehoväman confiakoq wakin nunakunapis, Jehoväpaq qarëkunata rupatsiyarqan, tsëtam Noëpis rurarqan. Y Jehoväqa tsë nunakuna  rurayanqantam kushishqa chaskirqan (Gen. 8:20, 21). Tsëwanmi musyantsik jutsasapa karpis nunakunaqa, Jehovä Diosnintsik munanqanta rurar amïgun këta puëdiyanqanta. b

7. ¿Imatataq cläru entiendintsik wamranta rupatsinampaq Abrahan decidinqampita?

⁷ Jehovämi, amïgun Abrahanta nirqan wamran Isaacta rupatsinampaq. Tsëta rurananqa manachi Abrahanpaqqa fäciltsu karqan. Tsënö kaptimpis, Jehoväta cäsukurmi wamranta rupatsinampaq decidirqan. Peru wanutsinanna këkaptinmi Jehovä Diosnintsik micharqan. Tsëta Abrahan ruranqanwanmi entiendintsik, jutsasapa nunakunata salvanampaq kuyë Tsurin wanunanta kikin Jehovä permitinampaq kaqta (Gen. 22:1-18).

8. ¿Imatataq rikätsikurqan jutsata rurayanqampita israelïtakuna animalkunata rupatsiyanqan? (Levïticu 4:27-29; 17:11).

⁸ ¿Y imatataq israelïtakuna rurayänan karqan jutsata rurayanqampita perdonashqa kayänampaq? Jehovämi animalkunata rupatsiyänampaq mandarqan (leyi Levïticu 4:27-29; 17:11). Israelïtakuna animalkunata rupatsiyanqanqa rikätsikurqan, nunakunata salvanampaq kikin Jehovä ruramunampaq kaqtam. Diosnintsikmi willakoqninkunawan entienditsikurqan änikunqan Kasta o kuyë Tsurin nunakunarëkur sufrinampaq y wanunampaq kaqta. Pëqa jutsankunapita perdonta chaskiyänampaq wanoq üshanömi kanan karqan (Is. 53:1-12). Jehovä Diosnintsikqa nunakunata kuyarninmi jutsapita y wanuypita salvananrëkur kuyë Tsurin wanunanta permitirqan. ¡Qamtapis salvashunëkipaqmi Tsurin wanunanta permitirqan!

¿IMATATAQ JESUS RURARQAN NUNAKUNATA SALVANAMPAQ?

9. ¿Imatataq Bautizakoq Juan musyatsikurqan? (Hebrëus 9:22; 10:1-4, 12).

⁹ Bautizakoq Juanmi 29 watachö Jesusta rikëkur kënö nirqan: “¡Rikäyë, taqëmi nunakunapa jutsanta ushakätsinampaq Teyta Dios mandamunqan Orqu Üsha!” (Juan 1:29). Tsënömi Diosnintsikqa cläru musyatsikurqan tsë änikunqan Kastaqa Jesus kanqanta. Jesusmi nunakunata salvananrëkur wanunan karqan. Tsëwanmi nunakuna alläpa shuyaräyanqan cumplikänan karqan. ¡Jutsata y wanuytam venciyänan karqan! (Leyi Hebrëus 9:22; 10:1-4, 12).

10. ¿Imanötan Jesusqa rikätsikurqan jutsasapa nunakunata yanapanampaq kë Patsaman shamunqanta?

¹⁰ Jutsata rurarlla kawakoqkunaqa, wakinqa mana allim sientikuyaq, pëkunatam Jesus yanaparqan y qateqninkuna kayänampaq invitarqan. Pëqa musyarqanmi jutsata ruraqkunaqa alläpa sufriyanqanta. Tsëmi alläpa jutsata ruraq ollqukunata y warmikunatapis Diospita yachatseq. Pëkunapaqmi kënö nirqan: “Sänu këkaqkunaqa manam doctorta wanayantsu, peru qeshyëkaqkunam sïqa”. Y kënöpis nirqanmi: “Noqaqa manam allita ruraqkunarëkurtsu shamurqö, sinöqa jutsata ruraqkunarëkurmi” (Mat. 9:12, 13). Tsënö ninqantaqa ruranqankunawanmi rikätsikurqan. Këllaman pensarishun: weqinwan chakinta awipoq o paqapoq warmitam jutsankunapita perdonëkurqan (Lüc. 7:37-50). Samariapita warmitapis jukwan jukwan kakoqta musyëkarmi Diospita parlaparqan (Juan 4:7, 17-19, 25, 26). Y Jehoväqa hasta poderninwanmi Jesusta yanaparqan wanushqakunata  kawaritsinampaq, tsëmi ollqukunata, warmikunata y wamrakunata kawaritsirqan. Tsëwanmi wanuyman chätsikoq jutsata vencirqan (Mat. 11:5).

11. ¿Imanirtan alläpa jutsata ruraq nunakuna Jesusta yachanäyaq?

¹¹ Jesustaqa, llakipäkoq y alli kaptinmi, alläpa jutsata ruraq nunakunapis yachanäyaq (Lüc. 15:1, 2). Jesusqa pëman markäkuyanqampitam o yärakuyanqampitam nunakunata felicitaq y shumaq parlapaq (Lüc. 19:1-10). Jesus ruranqankunawanmi cläru entiendirintsik Teytantsik Jehovä alläpa llakipäkoq kanqanta (Juan 14:9). Jesusqa ruranqankunawan y parlanqankunawanmi cläru rikätsikurqan Jehovä kuyamanqantsikta, llakipäkoq kanqanta y jutsata vencinantsikpaq yanapamënintsikta munanqanta. Jesus kuyëllapa yanapaptinmi, hasta alläpa jutsata ruraq nunakunapis vïdankunachö cambiukunata rurayänampaq y qateqnin kayänampaq decidiyaq (Lüc. 5:27, 28).

12. ¿Imatataq Jesus musyarqan wanunampaq kaqpita?

¹² Jesusqa allim musyarqan kë Patsachö imakunapa pasanampaq kaqta. Atska kutim qateqninkunata nirqan traicionayänampaq y qeruchö wanutsiyänampaq kaqta (Mat. 17:22; 20:18, 19). Y Diospa willakoqninkuna y Bautizakoq Juan willakuyanqannöpis, Jesusqa musyarqanmi wanurqa, nunakunapa jutsankunata ushakätsinampaq kaqta y tukuyläya nunakuna qateqnin  tikrayänampaq kaqta (Juan 12:32). Jesusman markäkoqkuna o yärakoqkuna y ruranqanta ruraqkunaqa, Jehovä munanqantam rurëkäyan y jutsapitam salvakuyta puëdiyan (Rom. 6:14, 18, 22; Juan 8:32). Jesusqa valienti karmi nunakunarëkur wanunampaq listu këkarqan (Juan 10:17, 18).

13. ¿Imanötan Jesusta wanutsiyarqan, y imatataq wanunqanwan Jehoväpita yachakuntsik? (Rikäri dibüjukunata).

¹³ Jesustaqa traicionayarqan, prësuyarqan, insultayarqan, calumniayarqan, wanunampaq condenayarqan y maqarmi ushayarqan. Tsëpitanam wanutsiyänampaq soldädukuna qeruman clavayarqan. Tsë llapantam Jesusqa aguantarqan, y Jehoväpis alläpam llakikurqan Tsurinta sufreqta rikarnin. Peru alläpa kuyëkarpis y salvanampaq podernin këkaptimpis, manam salvarqantsu. ¿Imanirtan salvarqantsu? Nunakunata kuyarninmi. Jesusmi kënö nin: “Nunakunata alläpa kuyarmi Teyta Diosqa japallan Tsurinta pëkunarëkur entregarqan. Pëman markäkoqkuna o yärakoqkuna mana ushakäyänampaq, sinöqa imëyaqpis kawëta tariyänampaq” (Juan 3:16).

14. Jesus wanunqampita yachakurqa, ¿imatataq cläru entiendirinki?

¹⁴ Jehoväqa Tsurin Jesus wanunanta permitinqanwanmi cläru nikämantsik, Adanpita y Ëvapita yureq nunakunata kuyamanqantsikta. Y qamtapis alläpa kuyashunqëkitam nikäshunki. ¿Manaku alläpa kushikunki jutsapita y wanuypita librashunëkipaq Tsurin wanunanta permitinqampita? (1 Juan 4:9, 10). Pëqa cada ünutam yanapamënintsikta munan jutsata vencinapaq.

15. Jesus wanunqan yanapamänapaqqa, ¿imatataq ruranantsik?

¹⁵ Teytantsik Jehoväqa Tsurin wanunqanta valorarmi jutsantsikkunata perdonamantsik. Peru noqantsikqa, ¿imatataq ruranantsik? Bautizakoq Juanwan Jesucristum kënö niyarqan: “Arrepentikuyë, ciëluchö Gobiernuqa këllachönam këkan” (Mat. 3:1, 2; 4:17). Tsëmi jutsata rasumpa vencita munarqa y Jehoväpa amïgun këta munarqa, jutsata ruranqantsikkunapita arrepentikunantsik. Peru ¿imanötan arrepentikushwan? Y ¿imanötan Jehoväqa jutsasapa këkashqapis yanapamantsik? Tsëtam qateqninchö yachakurishun.