1. Rasumpa arrepentikoq nunaqa, ¿imatataq ruran?

 IMATAPIS mana allita rurarirqa arrepentikunantsikmi. Peru ¿imatataq ruran rasumpa arrepentikoq nunaqa? Ruranqan jutsatam chikir qallëkun, tsë jutsa rurëtam dejarin y imëpis manana ruranampaqmi decidin. Tsëtam Biblia entienditsikun rasumpa arrepentikuypaq parlarnin (leyiri Bibliachö palabrakunata entiendinapaq neqchö “arrepentikuy” neqta).

2. ¿Imanirtan arrepentikuypaq yachakunantsik? (Nehemïas 8:9-11).

² Llapantsikmi jutsasapa karnin cada junaq mana allikunata rurantsik, tsëmi rasumpa arrepentikuy imanö kanqanta alli musyanantsik. Adanpita y Ëvapita yurikushqa karmi jutsasapa kantsik y wanuntsik (Rom. 3:23; 5:12). Y tsëpitaqa manam ni pipis librakuyta puëdintsu. Tsëmi Jehovä Diosnintsikman alli markäkoq o yärakoq nunakunapis, Pablu ruranqannö, jutsa mana dominanampaq alliraq kallpachakuyarqan (Rom. 7:21-24). Peru jutsasapa kanqantsikpitaqa manam llakikurlla kakunantsiktsu. Jehovä Diosnintsikqa kuyakoq Diosmi y kushishqa kanantsiktam munan. Pensarishun Nehemïas kawanqan tiempuchö judïukunaman (leyi Nehemïas 8:9-11). Jehoväqa manam munarqantsu jutsata rurayanqampita llakishqalla kakuyänanta, tsëpa rantinqa kushishqa sirwiyänantam munarqan. Jehoväqa musyanmi arrepentikurirqa, kushishqa kanantsikpaq kaqta, tsëmi rasumpa arrepentikuy imanö kanqanta yachatsimarquntsik. Jutsata ruranqantsikpita arrepentikushqaqa, Jehoväqa perdonamantsikmi.

3. ¿Imakunatataq këchö yachakushun?

³ Këchömi arrepentikuy asuntupaq kimallata yachakurishun. Juk, arrepentikuy asuntupaq israelïtakunata Jehovä  yachatsinqanta. Ishkë, arrepentikuyänampaq nunakunata Jehovä imanö yanapanqanta. Y kima, Jesuspa qateqninkuna arrepentikuy asuntupaq yachakuyanqanta.

ARREPENTIKUY ASUNTUPAQMI ISRAELÏTAKUNATA JEHOVÄ YACHATSIRQAN

4. ¿Imanötan Jehoväqa israelïtakunata yachatsirqan arrepentikuyänampaq?

⁴ Sirweqnin kayänampaq israelïtakunata Jehovä akrarirqa, pëkunawanmi juk acuerduta rurarqan mana allikunapita tsapänampaq y imëpis bendicinampaq. Peru tsëpaqqa, leyninkunatam cäsukuyänan karqan. Tsëmi Jehovä kënö nirqan: “Qamkunata willayanqaq mandakuykunaqa manam sasa o aja cumplinantsu, y manam qamkunapita karuchötsu këkan” (Deut. 30:11, 16). Peru Jehoväta mana cäsukuyaptin o santukunata adorayaptinqa, Jehoväqa mananam yanapanannatsu karqan y alläpam sufriyänan karqan. Y Jehoväta dejarirqa, ¿mananatsuraq yapëqa sirweqnin këta puëdiyanman karqan? Manam. Leychöqa nirqan Jehoväman kutita y mandakunqankunata cäsukuyta puëdiyänampaq kaqtam (Deut. 30:1-3, 17-20). Juk parlakuychöqa, arrepentikuytam puëdiyänan karqan. Tsënöpam Jehoväman kutita y bendicionninta chaskita puëdiyanman karqan.

5. ¿Imanötan Jehoväqa sirweqninkunata mana dejashqa kanqanta rikätsikurqan? (2 Rëyes 17:13, 14).

⁵ Peru israelïtakunaqa kutin kutinmi Jehoväta cäsukuyarqantsu; santukunatam adorayarqan y imëka mana allikunatam rurayarqan. Tsëkunata rurayanqampitam alläpa sufriyarqan. Y ¿Jehovä Diosnintsikqa dejarirqanku? Manam. Arrepentikuyänanta y pëman kutiyänanta munarmi willakoqninkunata kutin kutin mandarqan (leyi 2 Rëyes 17:13, 14).

6. ¿Imanötan Jehoväqa sirweqninkunata yanaparqan arrepentikuyänampaq? (Rikäri dibüjukunata).

⁶ Jehoväqa corregikuyänanta munarmi, sirweqninkunaman willakoqninkunata seguïdu mandarqan. Jeremïastam kënö ninampaq mandarqan: “Mana alli portakoq Israelpita nunakuna, noqaman kutiyämuy […]. Mana dejakoq karmi qamkunawanqa cölerashqanatsu kashaq y mana allikunata rurayanqëkitaqa  manam yarpäshaqnatsu. Tsënö kanampaqqa, noqa Jehovä Diospa conträ churakäyanqëkita ama negayëtsu” (Jer. 3:12, 13). Joeltanam kënö ninampaq mandarqan: “Llapan shonquykikunawan noqaman kutiyämuy” (Joel 2:12, 13). Isaïastanam kënö ninampaq mandarqan: “Imëpis limpiu kayänëkipaq kallpachakuyë. Ama rikënïchö mana allikunata rurayënatsu, y mana alli rurëkunata dejayë” (Is. 1:16-19). Y Ezequieltanam kënö ninampaq mandarqan: “Noqaqa manam kushikütsu mana alli kanqampita juk nuna wanuptin, tsëpa rantinqa, mana alli rurëkunata dejananta y kawakunantam munä”. “Pï nunapis wanuptinqa manam kushikütsu. Mana alli rurëkunata dejaskir, alli kaqtana rurayë y kawakuyë” (Ezeq. 18:23, 32). Jehovä Diosnintsikqa nunakuna imëyaqpis kushishqa kawakuyänantam munan, tsëmi jutsata rurayanqampita arrepentikuyaptinqa alläpa kushikun. Peru Jehoväqa, ¿jutsata ruraq nuna arrepentikunantaraqku shuyaran yanapanampaq? Manam. Ejemplukunata rikärishun.

7. ¿Imatataq Jehoväqa sirweqninkunata yachatsirqan warminta perdonanampaq Osëasta mandanqanwan?

⁷ ¿Imanötan Jehoväqa sirweqninkunata entienditsirqan arrepentikuyänampaq? Willakoqnin Osëasta pasanqampaq parlarishun. Warmin Gömerqa adulteriu jutsatam rurarqan, tsëmi juk ollqukunawan ëwakurqan. ¿Jehoväqa tsë warmita dejarirqanku? Manam. Shonqunchö imanö kanqanta musyarmi Osëasta kënö mandarqan: “Imanömi noqa Jehovä, santukunata sirwikäyaptin y päsaspita qarëkunata rurëkäyaptimpis, sirwimaqnïkunata kuyëta dejarqötsu, tsënöllam qampis jukwan jukwan oqllanakushqa y juk ollqukuna kuyayanqan warmikita yapë kuyanëki” (Os. 3:1; Prov. 16:2). Gömerqa manam adulteriu jutsata dejashqaraqtsu karqan. Tsënö këkaptimpis, Jehovämi Osëasta mandarqan perdonanampaq y pëwan sïguinampaq. a Kë ejempluwanmi Jehoväqa sirweqninkunata entienditsirqan alläpa jutsata rurëkäyaptimpis mana dejarishqa kanqanta y kuyarnin sïguinqanta. Tsëmi arrepentikuyänanta y cambiayänanta munar willakoqninkunata kutin kutin mandarqan. Tsëwanmi entiendintsik jutsata ruraq nuna shonqunchö imanö kanqanta Jehovä musyanqanta y yanapanqanta (Prov. 17:3). Këpita masllata yachakurishun.

¿IMANÖTAN JEHOVÄQA ARREPENTIKUYÄNAMPAQ NUNAKUNATA YANAPAN?

8. ¿Imanötan Jehoväqa Cainta yanaparqan arrepentikunampaq? (Genesis 4:3-7; rikäri dibüjuta).

⁸ Adanwan Ëva jutsata rurayashqa kayaptinmi, wamrankuna Cainqa jutsa ruraqllana yurikurqan. Pëpaqmi Bibliachöqa nin “ruranqankuna mana alli” kanqanta (1 Juan 3:12). Tsëchi Jehoväqa, qarëkunata rupatsiptin chaskirqantsu. Y Cainqa corregikunampa rantinmi, “alläpa cölerakur mana alli sientikurqan”. ¿Imatataq Jehovä rurarqan? Cambiananta munarmi corregirqan (leyi Genesis 4:3-7). Jehoväqa kuyëllapam entienditsirqan allikunata ruraptinqa bendicinampaq kaqta, peru mana cambiarqa mana allikunaman chänampaq kaqta. Peru Cainqa, arrepentikunampaq Jehovä yanapëkaptimpis manam chaskikurqantsu. Tsënö kanqanta rikar, ¿imatataq Jehovä rurarqan? ¿“Kananqa mananam pitapis arrepentikunampaq yanapashaqnatsu” nirku pensarqan? Manam.

9. ¿Imanötan Jehoväqa Davidta yanaparqan arrepentikunampaq?

 ⁹ Jehoväqa alläpam gobernanti Davidta kuyarqan. Tsëmi nirqan: “Davidtam shonqüpaqtanö tarirqö” (Hëch. 13:22). Tsënö kuyëkaptimpis, Davidqa alläpa jutsatam rurarqan: casäda warmiwanmi kakurqan y qowantam o runantam wanuratsirqan. Moises Qellqanqan Leywan juzgayaptinqa, Davidqa wanunanmi karqan (Lev. 20:10; Nüm. 35:31). Peru Jehoväqa alläpa kuyakoq karmi, David manaraq arrepentikuptimpis Natanta mandarqan yanapanampaq. b Natanqa shumaq parlaparmi entienditsirqan alläpa jutsata rurashqa kanqanta. Y Davidqa entiendirirmi arrepentikurqan (2 Sam. 12:1-14). Jutsata ruranqampita alläpa llakikurmi juk salmuta qellqarqan (Sal. 51, qallanan kaq). Tsë salmusmi jutsata ruraq nunakunata mëtsika tiempupa consolashqa y arrepentikuyänampaq yanapashqa. ¿Manaku alläpa kushikuntsik arrepentikunampaq Davidta Jehovä yanapanqampita?

10. ¿Imanötan sientikunki Jehovä Diosnintsik pacienciakoq y perdonakoq kanqanta musyar?

¹⁰ Jehoväqa llapan jutsakunatam chikin (Sal. 5:4, 5). Tsënö karpis, musyanmi jutsasapa kanqantsikta, tsëmi kuyamarnintsik jutsata vencinapaq yanapamantsik. Alläpa jutsakunata ruraq nunakunatapis arrepentikuyänampaq y amïgun kayänampaqmi yanapan. ¿Manaku tsëta musyar alläpa kushikuntsik? Tsëqa, ¿imatataq rurashwan jutsa rurëman mana ishkinapaq y jutsata rurashqa karqa jinan höra arrepentikunapaq? Tsëpaqqa yanapamäshun Diosnintsik alläpa pacienciakoq y perdonakoq kanqanman pensanqantsikmi. Kananqa yachakurishun arrepentikuy asuntupaq Jesuspa qateqninkuna yachakuyanqanta.

JESUSPA QATEQNINKUNA ARREPENTIKUY ASUNTUPAQ YACHAKUYANQAN

11, 12. ¿Ima igualatsikuywantan Jesus entienditsikurqan Jehovä Diosnintsik perdonakoq kanqanta? (Rikäri dibüjuta).

¹¹ Akranqan nuna chämunanna kaptinmi, Jehoväqa Bautizakoq Juanta mandarqan arrepentikuyänampaq nunakunata yachatsinampaq. Tsëpitanam kikin Jesucristupis  arrepentikuyänampaq nunakunata yachatsirqan (Mat. 3:1, 2; 4:17).

¹² Jesusqa nunakunatam alli entienditsirqan, jutsa ruraqkunata perdonanampaq Teytan Jehovä listu këkanqanta. Tsëtaqa entienditsikurqan wayimpita ëwakoq jövinpaq cuentakurmi. Tsë jövinqa wayimpita ëwakurmi mana allikunata rurar lluta kawakurqan. Peru tsëpitam mana allita rurëkanqanta cuentata qokurir wayinta kutirqan. ¿Y papäninqa chaskirqanku? Jesusmi kënö nirqan: “Papäninqa karullataraq ëwëkaqta rikëkurmi alläpa llakipar cörripa ëwarqan, y waqurkur o makallarkurmi kuyëpa mutsar chaskirqan”. Tsë jövinqa papänintam ninan karqan juk trabajadornintanö chaskinampaq. Peru papäninqa perdonarqanmi, y familianmanmi yapë chaskirqan. Y kënömi nirqan: “Kë tsurïqa [...] oqrakashqa këkanqampitam kutimushqa” (Lüc. 15:11-32). Jesusqa kë Patsaman manaraq shamurchi cläru rikarqan, Teytan Jehoväqa arrepentikoq nunakunata llakiparnin perdonanqanta. Tsëchi tsë jövinpaq willakurnin shumaq entienditsikurqan Teytantsik Jehoväqa alläpa llakipäkoq kanqanta.

13, 14. ¿Imatataq apostol Pëdru yachakurqan arrepentikuy asuntupaq, y imanötan tsëta yachatsikurqan? (Rikäri dibüjukunata).

¹³ Apostol Pëdruqa Jesuspitam yachakurqan arrepentikuypaq y perdonakuy asuntupaq. Pëdruqa atska kutim mana allikunata rurarqan, y Jesusqa imëpis perdonaqmi. Këllaman pensarishun: juk kutim, kima kutipa Jesusta negarqan, tsëpitam alläpa mana alli sientikurqan (Mat. 26:34, 35, 69-75). Peru Jesusqa wanunqampita kawariramurmi Pëdruta yuripurqan; capazchi japallanta yuripurqan (Lüc. 24:33, 34; 1 Cor. 15:3-5). Jesusqa allim musyarqan Pëdru arrepentikushqa kanqanta. Tsëchi yuripurqan, consolarqan y perdonashqa kanqanta nirqan (leyiri Biblia de estudiuchö Marcus 16:7 textuta y nötanchö “Pedro” neqta).

¹⁴ Pëdruqa arrepentikurqanmi y rikarqanmi  Jesus perdonanqanta. Tsëmi tsë asuntupaq wakinkunatapis yachatsita puëdirqan. Tsëpita tiempu pasariptinmi Pentecostes Fiestachö mëtsikaq judïukunata parlaparqan, y nirqanmi Diospa Akrashqanta pëkuna wanutsishqa kayanqanta. Tsëpitam kuyëllapa kënö nirqan: “Arrepentikuyë, y jutsëkikunapita perdonashqa kayänëkipaq Teyta Diosman kutiyë, tsënöpa kikin Teyta Jehoväpita yamë këta tariyänëkipaq” (Hëch. 3:14, 15, 17, 19). Tsënö nirqa, Pëdru entienditsikuykarqan arrepentikoq nunaqa mana alli pensëninta cambianan, mana alli rurëkunata dejanan y Dios munanqannöna allikunata ruranan precisanqantam. Nirqanmi rasumpa arrepentikuyaptinqa, jutsankunata imëka borrareq o ushakäratseq cuenta Diosnintsik qonqëkunampaq kaqta. Tsëpita tiempuwannam kënö nir entienditsikurqan: “Jehoväqa [...] mana ni pï ushakänanta munar y llapankuna arrepentikuyänanta munarmi, qamkunawan pacienciakur këkan” (2 Pëd. 3:9). Alläpa jutsata rurashqa karpis, ¡alläpam kushikuntsik Jehovä perdonamänapaq kaqta musyar!

15, 16. (1) ¿Imanötan apostol Pablu yachakurqan rasumpa perdonakuy imanö kanqanta? (1 Timoteu 1:12-15). (2) ¿Imatataq qateqninchö yachakushun?

¹⁵ Tarsupita Saulupis alläpa jutsakunatam rurarqan. Pëqa cristiänukunatam chikirqan y mana allim tratarqan. Capazchi Sauluta reqeqkunaqa pensayarqan, imëpis mana cambianampaq kaqta. Peru Jesuswan Jehoväqa manam tsënötsu pensayarqan. Pëkunaqa musyayarqanmi Saulu cambianampaq kaqta. Tsëmi Jesusqa kënö nirqan: “Tsë nunataqa, juk nacion nunakunaman, gobernaqkunaman y Israelpa tsurinkunaman, jutïta chätsir yanapakunampaqmi akrarqö” (Hëch. 9:15). Tsëmi milagruta rurarnin Sauluta yanaparqan arrepentikunampaq (Hëch. 7:58–8:3; 9:1-9, 17-20). Tiempuwannam Sauluqa cristiänu tikrarirqan, y apostol Pablu nirnam reqiyarqan. Pëqa alläpam Jesustawan Jehoväta agradecikurqan alli y llakipäkoq kayanqampita y shumaq tratayanqampita (leyi 1 Timoteu 1:12-15). Tsëmi alläpa agradecikurnin kënö nirqan: ‘¿Alli kar arrepentikunëkipaq Teyta Dios yanapëkäshunqëkitaku desprecianki?’ (Rom. 2:4).

¹⁶ Peru juk kutim apostol Pabluqa musyarirqan Corintu congregacionchö juk wawqi alläpa jutsata rurëkanqanta. ¿Imanötan tsë problëmata arreglarqan? Tsë problëmata arreglanqanwanmi musyantsik Jehoväqa pitapis kuyanqanta, correginqanta y llakipanqanta. Tsëtaqa qateqnin kaq yachatsikuychömi maslla yachakurishun.