1. ¿Imanirtaq bautizakïqa alläpa precisan? (Rikäri kë yachatsikïpa qallananchö këkaq fötuta).

BIBLIAPITA yachakïkaqkunaqa cada watam mëtsikaq bautizakuyan. Y masqa jövinkuna y wamrakunam. Itsa wakinkunaqa cristiänu familiachö winayashqa. Y qamqa jövin, ¿bautizakurqunkinaku? Tsënö kaptinqa alläpam kushikuyä. Porqui bautizakurninraqmi salvaciontaqa tarishun (Mat. 28:19, 20; 1 Pëd. 3:21).

2. ¿Imanirtaq Jehoväta sirwinëkipaq änikïta mantsakunkimantsu?

² Bautizakï atska bendicionkunata apamuptimpis, Diosta äninqëkita cumplinëkipaqqa kallpachakunëkiraqmi. Bautizakunqëki junaqmi kënö tapuyäshurqëki: “Noqantsikpaq Jesus wanunqanman markäkunqëkirëkur, ¿jutsata ruranqëkikunapita arrepentikurqunkinaku y Jehovällatana sirwinëkipaq änikurqunkinaku?” nirnin, y qamqa “awmi” nirmi contestarqëki. Bautizakurqa Jehoväta kuyanëkipaq y  munëninllatana ruranëkipaq änikushqa kanqëkitam rikätsikurqëki. Y tsënö rurarninqa alli kaqtam decidirqunki. Porqui Jehoväta mana sirwirninqa, Satanaspa munënintam rurëkankiman. Y pëqa manam salvakunëkita munantsu, sinöqa Jehoväpa Gobiernumpa contran churakänëkita y imëyaqpis kawakïta oqranëkitam munan.

3. Jehoväta sirwinëkipaq änikunqëkipita, ¿ima bendicionkunatataq chaskirqunki?

³ Pensari, Jehoväta sirwinëkipaq änikur bautizakunqëkipita bendicionkunata chaskinqëkiman. Kananqa kënö nïtam puëdinki: “Jehoväqa noqawanmi këkan, manam imatapis mantsashaqtsu. ¿Imataraq nuna ruramanman?” (Sal. 118:6). Jehoväpa amïgun këmi imapitapis mas alliqa.

4, 5. (1) ¿Imanirtaq Jehoväta äninqantsikta cumplinapaqqa kikintsik kallpachakunantsik? (2) ¿Imakunapataq llapantsikpis pasantsik?

⁴ Bautizäduna karqa, manam pensanëkitsu teytëkikuna Jehoväwan alli amïgu kayanqanrëkurllaqa, qampis alli amïgunna kanqëkitaqa. Jehoväwan amïgu këqa manam teytëkikunapita juk chakrata herenciatanö chaskïnötsu. Tsëmi teytëkikunawan juntu tärarnimpis, Jehoväwan amïgu kanëkipaqqa kikiki kallpachakunëki. ¿Imanirtaq tsëta alleq entiendinëki? Porqui manam musyantsiktsu tiempuwan imakunapa pasanëkipaq kaqta. Itsa bautizakurqëki wamrallaraq këkar, peru kanan jövinna kaptikiqa llapampis jukläyanachi y juknöpanachi sientikunkipis. Juk shipashmi kënö nirqan: “Wamra karninqa, escuëlachö cumpleäñuta celebrayaptin tortata mana mikurninqa Testïgu kanqantsikpita manam llakikuntsiktsu. Peru jövinna kashqa oqllanakï munë fuerti kaptinqa, Jehovä mandakunqankunata cäsukï imëpis biennintsikpaq kanqantam següru kanantsik”.

⁵ Manam jövinkunallatsu problëmakunapa pasayan, hasta mayorna kaq bautizakoqkunapis mana allikunapaqa pasayanmi. Itsa casädu kawëninkunachö, salor asuntuchö o trabäjuchöpis. Rasumpa kaqchöqa llapantsikpis imëkapam pasantsik, tsëmi Jehovällata sirwinantsikpaq änikunqantsikta pruëbaman churan (Sant. 1:12-14).

6. (1) ¿Imatataq Jehoväta änirqunki? (2) ¿Imatataq Filipensis 4:11-13 yachatsishunki?

⁶ Alleq tsarakunëkipaqqa yanapashunki, ima pasakuptimpis Jehovällata sirwinëkipaq äninkunqëkita yarpanqëkim. Tsënöpam qamqa Jehoväta sirwita jaqinkitsu, teytëkikuna o amïguïkikuna jaqiyaptimpis (Sal. 27:10). Tsëmi äninqëkita cumplinëkipaqqa, Jehoväta imëpis mañakunëki yanapëkushunëkipaq (leyi Filipensis 4:11-13).

7. ¿Ima ninantaq “respetakur y mantsakur” sïguiyë salvacionta lograyänëkipaq ninanqa?

⁷ Amïgun kanëkitam Jehoväqa munan. Peru amïgun këta sïguinëkipaq y salvacionta tarinëkipaqqa kallpachakunëkim. Tsëmi Filipensis 2:12 kënö nin: “Respetakur y mantsakur llapëkikuna trabajar sïguiyë salvacionta lograyänëkipaq”. Tsë ninanqa, Jehoväwan amïgu këniki sinchi kanampaq y problëmakunapa pasarpis pëllata sirwirnin sïguinëkipaqqa imata rurëkanqëkimanmi alleq pensanëki. Ama kikikillamanqa confiakïtsu. Yarpë, hasta unëpana Jehoväta sirweqkunapis wakinqa fallayashqam. Tsëqa, ¿imaraq yanapashunki salvacionta logranëkipaq?

8. (1) ¿Imatataq rurankiman Bibliata estudiarninqa? (2) ¿Imanirtaq alläpa precisan Bibliata alleq yachakunëki?

⁸ Jehoväpa amïgun kanapaqqa, parlapämanqantsiktam wiyanantsik y noqantsikpis parlapänantsikmi. Parlapämanqantsiktaqa wiyantsik Palabran Bibliata alleq yachakurninmi. Bibliata y publicacionkunatam leyinantsik y yachakunqantsikmanmi alleq pensanantsik. Yarpë, Bibliataqa leyinëki manam imatapis musyanëkillapaqtsu o escuëlachö exäminta qonëkipaqnöllatsu, sinöqa pasëupa ëwarnin reqipakoqnömi shumaq leyinëki. Jehovä imanö kanqantam mas y mas yachakunëki, tsëmi yanapashunki Diosman witinëkipaq, y pënam qamman mas witimunqa (Sant. 4:8).

9. ¿Ima yanapakïkunataq yanapashurqunki Bibliapita yachakunqëkichö?

⁹ Jehoväpa markanqa, Bibliapita alleq yachakunapaqmi tukï yanapakïkunata jorqamushqa. Rikärishun jw.org päginachö këkaq juk ishkë yanapakïkunallata. “Jóvenes” nishqanchömi tarinki, “Actividades para estudiar la Biblia” nishqanta, tsëmi yanapashunki Biblia willakunqankunapita mas alleq yachakunëkipaq. Jina guías de estudio “¿Qué enseña realmente la Biblia?” nishqampis yanapashunkim Jehoväman mas confiakunëkipaq y creinqëkikunapita alleq entienditsikunëkipaq. Y 2009 wata abril killa ¡Despertad! revistachö, “Los jóvenes preguntan. ¿Cómo disfrutar la lectura de la Biblia?” nishqampis yanapashunkim Bibliata mas alleq yachakunëkipaq. Salvacionta logranëkipaqqa alläpam precisan alleq estudianëki y yachakunqëkiman alleq pensanëki (leyi Salmus 119:105 *).

10. ¿Imanirtaq Jehoväman mañakunantsik alläpa precisan?

¹⁰ Rikanqantsiknöpis, Jehovä parlapämanqantsiktaqa wiyantsik Bibliapita yachakurninmi. Peru ¿imanötaq parlapashwan? Pëman mañakurninmi. Mañakïqa manam juk costumbrillatsu ni alli sientikunallapaqtsu, sinöqa Jehoväwan rasumpa  parlëmi. Pëqa munan parlapänëkitam (leyi Filipensis 4:6). ¿Yarpachakïyoqku këkanki? Bibliam kënö nishunki: “Nitishoqniki yarpachakïnikikunataqa Jehoväpa makinchö jaqirï” (Sal. 55:22). ¿Creinkiku Diosman mañakunqëki yanapashunëkipaq kaqta? Mëtsika cristiänu mayintsikkunam niyan alläpa yanapakunqanta. Y qamtapis yanapashunkim.

11. ¿Imanirtaq Jehoväta imëpis agradecikunkiman?

¹¹ Jehovämanqa imë hörapis mañakunantsikmi, y manam yanapamänantsikta munarninllatsu. Bibliaqa, “agradecikoq kayanqëkita rikätsikuyë” nimantsikmi (Col. 3:15). Itsa problëmakunapa pasarnin qonqarishwan mëtsika bendicionkunata chaskinqantsikta. Peru ¿imanirtaq decidinkitsu bendicionkunata chaskinqëkipita cada junaq kimallapitapis agradecikunëkipaq? 12 watayoqllaraq këkar bautizakushqa Abigail jutiyoq cristiänam kënö nin: “Imëpis agradecikunantsiktaqa Jehovä Diosllam merecin. Imëkata qaramanqantsikpitam imë hörapis agradecikunantsik. Juk kuti kënö niyaqta wiyanqämi alläpa gustaman: ‘Pensarishun, juk qoya riyarkamurnin rikärishwan qanyan junaq Jehoväta agradecikunqantsik kaqkunallata, ¿atskatsuraq o wallkallatsuraq kapamashwan?’”. *

12, 13. ¿Imanirtaq precisan Jehovä alläpa alli kanqanta kikiki rikanqëkiman pensanëki?

¹² Tukï problëmakunapa pasarnin tsarakunampaqmi rey Davidta Jehovä yanaparqan. David tsëta kikin rikashqa karmi kënö nirqan: “Kikikikuna rikäyë Jehovä imanö alli kanqanta. Jehoväman confiakoqqa kushishqam kanqa” (Sal. 34:8). Kë versïculuqa rikätsikun Jehovä alli kanqanta kikiki rikänëki precisanqantam. Bibliata o publicacionkunata leyirnin y reunionkunaman ëwarninqa, sirweqninkunata Diosnintsik imanö yanapanqantam wiyanki. Peru manam wiyanëkillatsu, sinöqa Jehovä imanö yanapëkäshunqëkitam kikiki rikänëki. ¿Sientirqunkinaku Jehovä alläpa alli kanqanta?

¹³ Jehoväqa alläpa alli karninmi sirweqnin kanantsikpaq y wamrampa qateqnin kanantsikpaq llapantsikta invitamarquntsik. Tsëmi Jesus kënö nirqan: “Manam pipis noqaman shamïta puëdintsu kachamaqnï Teyta noqaman mana apamuptinqa” (Juan 6:44). ¿Creinkiku kikin Jehovä markanman pushamushunqëkita? Itsa juk jövin kënö pensanman: “Jehoväqa teytäkunatam markanman yëkatsirqan, peru noqaqa pëkunallatam qatirqö”. Peru Jehoväta sirwinëkipaq änikur y bautizakurninqa pëwan amïgu kanqëkitam rikätsikurqunki. Y tsëpita patsëqa Jehoväqa reqishunkim. Tsëmi Bibliaqa kënö nin: “Sitsun pipis Diosta kuyan, tsëqa Diosqa pëta reqinmi” (1 Cor. 8:3). Jehoväpa markanchö kanqëkitaqa imëpis valorë.

14, 15. ¿Imanötaq Diospita yachatsikïqa pëman mas confiakunapaq yanapakun?

¹⁴ Jina Jehovä alli kanqantaqa rikankichi escuëlachö o Diospita yachatsikunqëkichö parlanëkipaq imanö yanapashunqëkichö. Wakinkunaqa estudiaq mayinkuna mana chaskikuyänampaq kaqta pensarnin itsa escuëlachö Diospita yachatsikïtaqa mantsakuyan. Y atska nunakunata parlapënäqa manachi fäciltsu kanman. Tsënö pasashuptikiqa, ¿imaraq yanapashunkiman?

 ¹⁵ Puntataqa, creinqëkipita imanir següru kanqëkiman pensë. Jw.org päginachö yanapakïkunata tarinki imaman y imanir creinqëkiman mas alleq pensanëkipaq y imanö entienditsikunëkipaq. ¿Manatsuraq tsëpita yachakurinëkipaq tiempïkita rakirinkiman? Creinqëkikunapita rasumpëpa següru kaptiki y alleq preparakuptikiqa Jehoväpita parlëqa gustashunkim (Jer. 20:8, 9).

16. ¿Imaraq yanapashunkiman creinqëkipita parlakïta mana mantsapakunëkipaq?

¹⁶ Itsa alleq preparakurnimpis, creinqëkipita wakinkunata parlapëtaqa mantsakunkiraq. 18 watayoq juk cristiänam kënö nin: “Imaman creinqätaqa musyämi, peru wakinta parlapëtaqa mantsapakümi”. Peru ¿imatataq ruran? Juk cösaskunapita parlëkarnin Bibliapita imallatapis nirinqan yanapanqantam willakun. Kënömi nin: “Yanaqïkunaqa imatapis rurayanqankunapitam mana mantsapakushpa parlayan. Y noqaqa, ¿imanir-raq creinqäkunapita parlakurita mantsapaküman? Tsëmi imatapis cuentakïkarnin, ‘juk junaq Bibliapita yachatsikïkaptïmi. . .’ nirirnin, cuentakïkanqäta parlarnin sïgui. Tsëmi wakinkunaqa musyëta munarnin tapurayäman Bibliapita imata yachatsikunqäta. Tsëmi mas fäcil-llana parlapäri. Jehoväpita imëpis parlarninqa kushishqam sientikü”.

17. ¿Imanirtaq creenciantsikkunapita mana mantsapakïpa parlanantsik precisan?

¹⁷ Wakinkunata respetaptiki y shumaq trataptikiqa, qamtapis shumaqmi tratayäshunki. Rikärishun wamrallaraq këkarnin bautizakushqa 17 watayoq Olivia jutiyoq shipash ninqanta: “Imapitapis parlakïkäyaptin Bibliapita parlariptïqa noqapita mana allita pensayänantam mantsaq kä”. Tsëpitanam juknöpana pensar qallëkurqan, y kënömi nin: “Mëtsikaq jövinkunam Testïgukunapita imatapis musyayantsu, y pëkuna reqiyanqan Testïgukunaqa noqantsikllam kantsik. Tsëmi imanö portakunqantsikpita bien chaskikuyanqa o manapis. Mantsapakurnin creenciantsikpita mana parlakushqa o mantsapakïkarlla parlakushqaqa Testïgu kanqantsikpita penqakunqantsiktam pensayanqa, o hasta mana allim tratamashwampis. Peru creinqantsikpita mana mantsakushpa parlakushqaqa respetamäshunmi”.

18. ¿Imatataq ruranëki salvacionta logranëkipaq?

¹⁸ Rikanqantsiknöpis salvacionta logranëkipaqqa kikikim kallpachakunëki; Bibliata leyinëki, yachakunqëkiman alleq pensanëki, Jehoväman mañakunëki y imanö bendicishunqëkiman pensanëki. Tsëkunam yanapashunki Jehoväpa amïgun kanqëkita mas següru kanëkipaq. Y tsënöpam creinqëkipita mana mantsapakushpa parlakunki (leyi Salmus 73:28 *).

19. ¿Imanirtaq salvacionta logranëkipaqqa kallpachakunëki?

¹⁹ Jesusmi kënö nirqan: “Pipis qepäta shamïta munaq kaqqa, amana kikimpaqqa kawatsunnatsu, sinöqa sufritsikoq qerunta katätsun y qatimar sïguitsun” (Mat. 16:24). Clärum këkan, Jesuspa qateqnin këqa, Jehoväta sirwinapaq änikur bautizakïmi. Y tsëta rurarqa mëtsika bendicionkunatam kanan witsan chaskinki, y shamoq tiempuchönam imëyaqpis kawakïta. Tsëqa jövin, ¡salvacionta logranëkipaq kallpachakurnin sïgui!