Manam. Bibliachö ni unë witsan pasakunqankunata willakoq librukunachöpis manam tsë yachatsikuypaqqa parlantsu.

Peru kë versïculupaqqa mëtsika Bibliakunachömi, apostol Pablu kawanqan witsanqa, wanushqakunarëkur wakin nunakuna bautizakuyanqanta yachatsikuyan. Tsënö entienditsikoq Bibliaqa, Nueva Traducción Viviente Bibliam. Tsëchömi kënö nin: “Wanushqakuna mana kawariyämunan këkaptinqa, ¿imapaqtan nunakuna bautizakuyan wanushqakunapaq?”.

Bibliapita parlaq ishkaq yachaq nunakuna qellqayanqanta rikärishun. Gregory Lockwood nunam nirqan, “wanushqa nunapa rantin” juk nuna bautizakuyta puëdinqan yachatsikuyqa, “ni Bibliachö ni unë rurayanqannö” mana kanqanta. Tsënöllam Gordon Fee profesorpis nirqan: “Tsënö bautizakuypaqqa manam unë witsan pasakunqankunata willakoq librukuna ni Bibliachöpis willakuntsu. Y NT [Nuëvu Testamentuchöqa] manam tsë asuntupaq ni imatapis nintsu”. Manash unë kaq cristiänukuna ni apostolkuna wanuriyanqanchö yureq religionkunachöpis tsëtaqa yachatsikuyarqantsu.

Jesusmi kënö nirqan: ‘Ëwayë y qatimaqnïkuna tikrayänampaq llapan nacionkunapita nunakunata [...] bautizatsiyë, y llapan mandayanqaqkunata wiyakuyänampaq yachatsiyë’ (Mat. 28:19, 20). Tsëmi juk nuna bautizakunampaqqa, Jehoväpita y Jesuspitaraq yachakunan y pëkunata cäsukunan. Clärum këkan, wanushqakunaqa manam tsëta rurëta puëdiyantsu. Y manam kawëkaqkunapis wanushqakunapa rantin yachakuyta puëdiyantsu (Ecl. 9:5, 10; Juan 4:1; 1 Cor. 1:14-16).

Tsëqa, ¿ima nitatan apostol Pablu munëkarqan 1 Corintius 15:29 textuchöqa?

Corintu markachö wakin cristiänukunaqa manam wanushqakuna kawariyämunampaq kaqman creiyaqtsu (1 Cor. 15:12). ¿Imanötan apostol Pablu yanaparqan? Pëmi kënö nin: “Llapan junaqkunam wanïpita peligruchö kä”. Pëqa kawëkarqanllaraqmi, peru imëka mana allikunapa pasarpis, wanurqa Jesusnö kawarimunampaq kaqmanmi markäkurqan o yärakurqan (1 Cor. 15:30-32, 42-44).

Corintu markachö ciëlupaq akrashqa cristiänukunaqa, mana allikunapam pasayänan karqan y wanur-raqmi kawariyämunan karqan. ‘Cristu Jesuschö bautizakïqa’ “wanïninchö bautizashqa” kë ninanmi (Rom. 6:3). Y “wanïninchö bautizashqa” kayänampaqqa, Jesucristunömi mana allikunapa pasayänan karqan y ciëluchö kawariyänampaqmi puntata wanuyänanraq karqan.

Bautizakunqampita ishkë watapitapis mas pasanqanchöran, Jesusqa ishkë apostolninkunata kënö nirqan: “Bautizakunqä bautismuwanmi qamkunapis bautizashqa kayanki” (Mar. 10:38, 39). Jesusqa manam tsë höratsu bautizakuykarqan. Tsëchö ninqanwanqa rikätsimantsik, Jehovä Diosta wanuyanqanyaq sirwiyänampaq kaqtam. Tsëpaqmi apostol Pablupis nirqan, ciëlupaq akrashqakuna Jesucristunö sufrir-raq pë chaskinqan premiuta chaskiyänampaq kaqta (Rom. 8:16, 17; 2 Cor. 4:17). Tsëqa mana allikunapam pasayänan karqan y wanurninraqmi kawariyänan karqan ciëluchö kawayänampaq.

Tsëmi apostol Pablu ninqanqa kënö kanman: “Mana tsëqa, ¿imataraq rurayanqa wanushqa nunakuna kayänampaq bautizakoq kaqkuna? Sitsun wanushqa kaqkuna ni imanöpapis mana sharkatsimushqatsu kayanqa, tsëqa, ¿imanirtaq pëkunapis bautizakuyan pëkunawan yupashqa kayänampaq?”.