¿Ultimu yarqamoq Täpakoq revistakunata leyirqunkiku? ¿Puëdinkimantsuraq kë tapukuykunata contestëta?:

¿Imanötaq ciëlupaq akrashqakunata rikashwan?

Diosman markäkuyanqampita o yärakuyanqampita yachakuyta puëdirpis, manam alläpa alabapantsiktsu. Manam ‘wakinkunata alabapaqkunatsu’ kantsik (Jüd. 16). Manam ciëluta ëwayänampaq kaqpita tapupantsiktsu (w20.01, pägina 28).

¿Imanirtaq següru këkantsik noqantsikman Jehovä yarpanqanta?

Bibliachöqa nin, manaraqpis yurikushqa reqimanqantsikta y mañakunqantsikta wiyanqantam. Peru manam tsëllatsu, Pëqa musyanmi shonquntsikchö ima kanqanta y imata pensëkanqantsikta. Y ruranqantsikwanqa llakitsintsik o kushitsintsikmi (1 Crón. 28:9; Prov. 27:11). Jina Pëta reqinapaqmi permitimarquntsik (w20.02, pägina 12).

¿Imëtan parlakunantsik o upällalla kakunantsik?

Jehoväta mañakurnin parlarqa kushikuntsikmi. Mana alliman chätsinampaq kaqta rurëkaqta pillatapis rikarqa parlapänantsikmi. Creikoqkunata rikaqkunapis wawqi panikunata consejayanmi. Manam gobiernukuna michäkuyanqan nacionchö Diospita imanö yachatsikunqantsikta willakuntsiktsu ni tapukuntsiktsu. Wakinkuna mana musyayänampaq kaqtaqa manam parlantsiktsu (w20.03, päginakuna 20 y 21).

Joel librupaq 2 kaq capïtulunchö y Revelacion librupa 9 kaq capïtulunchö pinteq kurukuna o chukllushkunaqa, ¿imakunachötan jukläya kayan?

Joel 2:20 a 29 ninqanchöqa, chukllushkunata Dios karuman apakunqanta y ima mana allitapis rurayanqanta altsanampaq kaqtam nin. Tsëpitanam sirweqninkunata poderninwan yanapan. Tsëqa Israel nacionman Babiloniapita tröpakuna yëkuyanqanchömi cumplikarqan. Revelacion 9:1 a 11 ninqanchönam, imëka mana allikunata Dios ushakätsinampaq kaqta, mëtsika chukllushkunanöran ciëlupaq akrashqakuna willakuyanqanta, y tsëta wiyarnin mana alli nunakuna cölerakuyanqanta rikätsikun (w20.04, päginakuna 3 a 6).

Kanan witsanqa, ¿pitan “uma läduchö gobiernu”?

Rusia y yanapaqnin nacionkunam. Tsë nacionkunachö gobiernukunaqa, Diospa sirweqkuna yachatsikuyänantam michäkuyashqa y chikir sufritsiyashqa. Uma läduchö gobiernuqa ura läduchö gobiernuwan pleyturllam imëpis këkäyan (w20.05, päginakuna 12 y 13).

Imanö kanqantsikchö Diospa podernin yanapamänapaqqa, ¿Gälatas 5:22 y 23 textullachöku këkan?

Manam. Diospa poderninqa alli kaqta ruraq kanapaq y juk asuntukunachö munanqannö kanapaqpis yanapamantsikmi (Efes. 5:8, 9) (w20.06, pägina 17).

¿Imanirtan Internetman fötukunata o videukunata churanqantsik y noqantsikpaq qellqanqantsikqa mana alli kanman?

Tsëkunata rurashqaqa, humildi kanqantsikta rikätsikunantsikpa rantinmi, allishtukuykaq cuenta këkashwan (w20.07, päginakuna 6 y 7).

¿Imatatan yachakuntsik pescädu tsareqkunapita?

Pescädu tsarita yachaqkunaqa, imë y mëchö pescäduta tsariyänampaq höram trabajayan, imawan tsariyänampaq kaqtam alli musyayan y ima pasakuptimpis mana mantsakushpam trabajayan (w20.09, pägina 5).

¿Imanötan Bibliapita yachakuykaqkunata Jehoväta mas kuyayänampaq yanapashwan?

Bibliata llapan junaqkuna leyiyänampaq, leyiyanqanman yarpachakuyänampaq y Diosman mañakuyänampaqmi yachatsinantsik (w20.11, pägina 4).

‘Cristuchöpis llapankunam kawëta chaskiyanqa’ nirqa, ¿pikunapaqwantan Pablu parlëkarqan? (1 Cor. 15:22).

Apostol Pabluqa manam llapan wanushqa nunakuna kawariyämunampaqtsu parlëkarqan. “Llapankuna” nirqa, ciëlupaq akrashqakunallapaqmi parlëkarqan, “Cristu Jesuswan juknölla këkaq santuyätsishqa kaqkunapaq” (1 Cor. 1:2; 15:18) (w20.12, päginakuna 5 y 6).

“Ushanan kaq trompëta tocashqa këkaptin” “nawita qemtsirir kicharillachö” ciëlupaq akrashqa kawarimoqkunaqa, ¿imatatan rurayanqa? (1 Cor. 15:51-53).

Jesuswanmi fiërrupita värankunawan nacionkunata juzgayanqa (Rev. 2:26, 27) (w20.12, päginakuna 12 y 13).