1. ¿Imanötan Jehoväqa sirweqninkuna mañakuyanqanta contestan?

 ¿MUSYARQËKIKU sirweqninkuna mañakuyaptin yanapanampaq Diosnintsik utilizäshuynikita puëdinqanta? Anciänu, siervu ministerial, precursor o publicador kaptikipis o jövin, mayor, ollqu o warmi kaptikipis utilizäshuynikitaqa puëdinmi. Mana allikunapa pasarnin yanapëkunampaq Jehoväman mañakuyaptinqa, anciänukunata y wakin sirweqninkunatam utilizan yanapanampaq (Col. 4:11). Jehovä Diosnintsik tsënö utilizämashqa y wawqintsikkunata panintsikkunata yanaparqa, alläpam kushikuntsik. ¿Imëtan yanapakushwan? Muyakoq y wanutsikoq qeshya yapë kaptin, ima desgraciapapis pasayaptin o nunakuna chikir qatikachämashqam.

2. Muyakoq y wanutsikoq qeshya kaptinqa, ¿imanirtan wawqi panintsikkunata yanapananqa fäciltsu kanman?

² Muyakoq y wanutsikoq qeshya yapë kaptinqa, manam wawqi panintsikkunata yanapëqa fäciltsu kanqa. Manam wayinkunaman watukëta puëdishuntsu ni pishipakuykaqkunata mikoq shayämunampaq invitëta puëdishuntsu. Y familiantsik qeshyaptimpis, wakinkunata yanapëtaqa manam puëdishuntsu. Peru imëkanöpapis yanapëtaqa munantsikmi, y yanapakushqaqa Jehovä Diosnintsikqa alläpam kushikunqa (Prov. 3:27; 19:17). Tsëqa, ¿imanötan yanapakushwan?

3. ¿Imatataq yachakuntsik Desipa congregacionninchö anciänukuna rurayanqampita? (Jeremïas 23:4).

³ ¿Imatataq anciänukuna rurayanman? Anciänu karqa,  congregacionnikichö wawqikunata y panikunatam alli reqinëki (leyi Jeremïas 23:4). Punta kaq yachatsikuychö parlanqantsik pani Desim b kënö nin: “Yachatsikuyänäpaq grüpüchöqa, anciänukunaqa noqawampis y wakin turi nanakunawampis o ñañakunawampis seguïdum yachatsikoq yarquyaq, y juk rurëkunatapis noqakunawan juntum rurayaq”. Tsënö alli reqinakushqa karmi, anciänukunaqa COVID-19 qeshya kanqan witsan Desita mas fäcil-lla yanapëta puëdiyarqan. Desipaqa tsë qeshyawanmi wakin familiankuna wanuyarqan.

4. ¿Imanirtan anciänukunaqa Desita fäcil-lla yanapayarqan, y imatataq anciänukuna yachakuyanman?

⁴ Desim kënö nin: “Anciänukunawanqa amïgunam kayarqä, tsëmi imanö sientikunqäta y yarpachakunqätaqa mana mantsakushpa willarqä”. ¿Imatataq anciänukuna yachakuyanman? Mana allikunapa manaraq pasayanqan hörakunam wawqi panikunapa amïgunkuna këta procurayänan y seguïdum watukarëkäyänan. Muyakoq y wanutsikoq qeshya yapë kaptin wayinkunaman watukëta mana puëdirqa, juknöpapis parlarëkäyänanmi. Desim kënö nin: “Höraqa juk junaqllachömi, atskaq anciänukuna qayayämaq o mensäjita mandayämaq. Mandayämanqan textukunaqa, musyanqä textukuna karpis allim yanapamarqan”.

5. ¿Imanötan anciänukunaqa musyayanman wawqi panikuna imakunapa pasëkäyanqanta, y imanötan yanapayanman?

⁵ ¿Imanötan anciänukuna musyayanman wawqi panikuna imapa pasëkäyanqanta? Tsëpaqqa yachëllapam tapupäyänan (Prov. 20:5). ¿Mikuynintsuraq o medicïnantsuraq pishikan? ¿Trabäjupitatsuraq o arrendayanqan wayipitatsuraq qarquyta munëkäyan? ¿Gobiernukuna entregayanqan yanapakuykunata chaskiyänampaqtsuraq yanapariyänanta munëkäyan? Panintsik Desitaqa, wawqi panikunam pishipakunqankunachö yanapayarqan. Peru masqa yarpan anciänukuna shumaq parlapäyanqanta y Bibliawan yanapayanqantam. Desim kënö nin: “Anciänukunaqa noqawan juntum Diosnintsikman seguïdu mañakayämoq. Manam yarpätsu imata niyanqanta, peru alli sientikunqätaqa yarpämi. Jehovä imëka kënö nikämaqtanö sientirqä: ‘Manam japallëkitsu këkanki’” (Is. 41:10, 13).

6. ¿Imanötan congregacionchö wakin kaqkunaqa yanapakuyta puëdiyanman? (Fötukunata rikäri).

⁶ ¿Imanötan congregacionchö wawqi panikunaqa yanapakuyanman? Awmi, mana  allikunapa pasëkaqtaqa anciänukunam puntata yanapayänan. Peru Diosnintsikqa llapantsiktam mandamantsik mana allikunapa pasëkaqkunata yanapanantsikpaq (Gäl. 6:10). Qeshyëkaqkunaqa, imanöllapis yanaparinqantsiktaqa alläpam agradecikuyan. Tsëmi wamrakunaqa tarjëtakunata o dibüjukunata apatsita puëdiyan. Jövin kaqkunanam rantipakurnin o juk rurëkunachöpis yanapakuyta puëdiyan. Y wakin kaqkunanam imallatapis cocinarirnin qeshyëkaqkunapaq wayinkunaman aparapuyanman. Muyakoq y wanutsikoq qeshya kanqan witsanqa llapantsikmi animanakuyta necesitantsik. Tsëmi alli kanman Diosnintsikta adoranantsik wayichö këkar o videuconferenciapa karpis, reunion ushariptinqa juk rätu mas quedakunantsik. Tsënöpam wakinkunawan shumaq parlakurishun. Y anciänukunapis animariyänantaqa necesitäyanmi. Muyakoq y wanutsikoq qeshya yapë kanqan witsanqa pëkunaqa alläpa ocupädum kayan, tsëmi wakinkunaqa agradecikurnin tarjëtakunata pëkunapaq mandayan. Llapantsikmi Diosnintsikpa Palabran kënö consejamanqantsikta cäsukunantsik: “Jukniki juknikikuna kallpayoq kayänëkipaq y alli këkäyänëkipaq yanapanakur këkäyë” (1 Tes. 5:11).

7. Ima desgraciapis pasakuptin, ¿imanötan nunakuna quedariyanman?

⁷ Nunakunapa vïdanqa, ima desgraciapis pasaptinqa rasllam o sasllam cambiarin. Imëkankunata o wayinkunatapis oqrariyanmanmi y hasta familiankunapis wanukunmanmi. Tsënö desgraciakunaqa, wawqintsikkunata y panintsikkunatapis pasanmi. Peru ¿imanötan yanapashwan?

8. ¿Imatataq anciänukuna y teytakunapis rurayanman desgraciakuna manaraq pasakuptin?

⁸ ¿Imatataq anciänukuna rurayanman? Anciänukuna, qamkunam wawqi panikunata yachatsiyänëki ima desgraciapis pasakuptin imata rurayänampaq y imallatapis willarëkäyäshunëkipaq. Punta kaq yachatsikuychö parlanqantsik panintsik Margaretmi kënö nin: “Reunionchömi anciänukuna yarpatsiyämarqan peligru tiempullachöraq këkäyanqäta y ninaqa imë höra karpis prendiramunampaq kaqta. Yarpätsiyämarqanmi, wayïkunapita yarqukuyänäpaq autoridäkuna mandayämaptinqa, jinan höra cäsukurnin yarquyänäpaq. Tsënö yarpatsiyämanqanqa alläpa allim karqan”. Pitsqa semäna pasariptinllam ninaqa bosquikunata ushar qallëkurqan y alläpa peligrösum karqan. Qamkunapis teytakuna, Diosnintsikta familiëkikunawan adorayanqëki hörachö, parlayë ima desgraciapis pasakuptin imata rurayänëkipaq kaqta. Qamkunapis y wamrëkikunapis puntallapitana alistakushqa karqa, manam desgraciakuna pasakunqan hörakuna mantsakäyankitsu.

9. ¿Imatataq anciänukuna rurayanman juk desgracia manaraq pasakuptin y pasakuriptimpis?

⁹ Congregacionnikichö juk grüputa dirigirqa, grüpuykichö këkaqkunapa telëfununkunapa nümerunta y direccionninkunata juk listachö actualizäduta katsi. Tsëwanmi desgracia pasakunqan hörakuna, wawqikunata y panikunata raslla o saslla qayarinki imanö këkäyanqanta musyanëkipaq. Tsë listataqa anciänupura rurayanqanta rikaq anciänuta entreguë, pënam ima desgraciapis kaptin congregacionkunata watukaq wawqita willarinqa. Llapëkikunam yanapanakuyänëki. Bosquita y wayikunata nina ushariptin panintsik Margaretpa congregacionninta y wakin congregacionkunata watukaq wawqim anciänukunata yanaparnin 36 hörakunapa mana punuypa trabajarqan (2 Cor. 11:27). Tsënöpam, wayinkunapita ëwakushqa 450 wawqi panikunapaq posädankuna tariyarqan.

10. ¿Imanirtan anciänukunaqa wawqi panikunata alli cuidayänan? (Juan 21:15).

¹⁰ Desgraciapa pasashqa wawqi panikunataqa,  Diosnintsikta sirwir sïguiyänampaq y alli sientikuyänampaqmi anciänukuna yanapayänan (1 Pëd. 5:2). Ima desgraciapis pasakuptinqa puntataqa alli següru sitiuchö kayänampaq, mikuyninkuna, röpankuna y posädankuna kanampaqmi yanapayänan. Desgraciapa pasashqa wawqi panikunataqa atska tiempuparan yanapayänan Diosnintsikta sirwir sïguiyänampaq y alli sientikuyänampaq (leyi Juan 21:15). Sucursalta rikaqnö yanapakoq wawqi Haroldmi, desgraciakunapa pasashqa wawqi panikunawan parlarqan. Y kënömi nin: “Alli sientikuyänampaqqa atska tiempuran pasanqa. Allinö sientikurpis peligrupa pasayanqan hörata, wanukushqa familiankunata o kuyayanqan cösasninkunata yarparmi llakikuyanqa. Tsënöqa sientikuyan manam markäkuyninkuna o yärakuyninkuna pishiptintsu, sinöqa desgraciapa pasashqa karmi”.

11. Desgraciapa pasashqakunaqa, ¿juk tiempupa imanö yanapanantsiktaraq necesitäyanqa?

¹¹ Anciänukunaqa, “waqaqkunawan waqayë” neq consëjutam imëpis yarpäyänan (Rom. 12:15). Anciänukuna, desgraciapa pasashqakunata yarpätsiyë, Jehovä y wawqi panikunapis alläpa kuyayanqanta. Desgraciapa pasashqakunata yanapayë Diosnintsikman mañakuyänampaq, Bibliapita yachakuyänampaq, reunionkunaman ëwayänampaq y yachatsikoq yarquyänampaq. Y teyta kaqkunatapis yarpätsiyë, wamrankunata yanapar sïguiyänampaq y Diosnintsikwan amïgu kanqantsiktaqa ima desgraciapis mana ushakätsinqanta yarpäyänampaq. Qamkunapis teytakuna, wamrëkikunata entienditsiyë Jehoväqa imëpis amïgunkuna kanampaq kaqta y mana dejanampaq kaqta. Tsënölla yarpätsiyë familiankuna cuenta entëru Patsachö wawqi panikuna yanapayänampaq listu këkäyanqanta (1 Pëd. 2:17).

12. Congregacionchö kaqkunaqa, ¿imanötan yanapakuyta puëdiyan? (Fötuta rikäri).

¹² ¿Imanötan congregacionchö wawqi panikunaqa yanapakuyanman? Markëkichö o amänu markachö desgracia pasakushqa kaptinqa, imanö yanapakunëkipaq kaqta anciänukunata tapuy. Capaz yanapakunkiman wayinnaq quedashqakunata y yanapakoq shamushqakunata posadatsirnin o mikuywan o juk cösaskunawampis. Karu markachö desgracia pasakushqa kaptimpis yanapakuytaqa puëdinkim. ¿Imanö? Qellënikiwanmi y desgraciapa pasashqakunapaq Diosnintsikman mañakurninmi (2 Cor. 1:8-11; 8:2-5). Karu markata yanapakoq viajëta puëdirqa, anciänukunata tapuy. Yanapakunëkipaq permitiyäshurnikiqa, capazchi puntataqa alliraq  yachatsiyäshunki imanö y mëchö mas alli yanapakunëkipaq.

13. Yachatsikunantsikta autoridäkuna michäkuyanqan markakunachö wawqi panikunaqa, ¿imakunapatan pasayan?

¹³ Yachatsikunantsikta autoridäkuna michäkuyanqan markakunachö wawqi panintsikkunaqa alläpam sufriyan. Manam mikuyänampaq mikuyninkuna kantsu, qeshyayanmi y hasta familiankunam wanukuyan. Y autoridäkuna chikiyaptinmi, anciänukunaqa libri parlapärita puëdiyantsu. Tsëmi pasarqan wawqintsik Andreita. Yachatsikuyänampaq grüpuchö këkaq panipaqa manam mikunampaq karqantsu, y tsënö këkarmi accidentäkurirqan. Tsëmi atska kuti operayarqan y manam trabajëta puëdirqantsu. Peru Testïgukunata autoridäkuna chikikäyaptin, muyakoq y wanutsikoq qeshya këkaptimpis, wawqintsikkunaqa tsë panita yanapayarqanmi, y Jehoväqa musyarqanmi imakunapa pasëkäyanqanta.

14. ¿Imanötan anciänukunaqa rikätsikuyan Jehoväman confiakuyanqanta?

¹⁴ ¿Imatataq anciänukuna rurayanman? Andreiqa Jehovä Diosnintsikmanmi mañakurqan y puëdinqanmannömi yanapakurqan. ¿Imanötan mañakunqanta Jehovä contestarqan? Yanapëta puëdeq wawqikunata y panikunatam utilizarqan tsë panita yanapayänampaq. Wakinkunam, atiendikuy tocanqan hörakuna doctorman apayarqan y wakinkunanam qellëninkunawan yanapayarqan. Valienti kayanqanta y yanapakuyanqantaqa Jehovä bendicirqanmi (Heb. 13:16). Anciänukuna, këtam yarpäyänëki: autoridäkuna chikimashqaqa, rurayänëkipaq kaqta rurayänampaqmi wakin wawqikunata niyänëki (Jer. 36:5, 6). Peru masqa, Jehovämanmi confiakuyänëki. Pëmi yanapayäshunki wawqi panikunata shumaq yanapayänëkipaq.

15. Nunakuna o autoridäkuna chikimanqantsik tiempuchöqa, ¿imatataq rurashwan juknölla kanantsikpaq?

¹⁵ ¿Imanötan congregacionchö wawqi panikunaqa yanapakuyanman? Nunakuna o autoridäkuna chikir qatikachämanqantsik tiempuqa capazchi wallka grüpulla juntakëta puëdishun. Tsëmi wawqintsikkunawan o panintsikkunawan ofendinakushqa karqa perdonanakunantsik, tsënöpa llapantsikpis tranquïlu kanapaq. Satanaswanmi pelyanantsikqa y manam wawqintsikkunawantsu ni panintsikkunawantsu (Prov. 19:11; Efes. 4:26). Wakinkunata yanapëtaqa ama qelanäshuntsu, empëñu empëñulla yanapashun (Tïtu 3:14). Andreipa grüpunchö panintsikta yanapaq  wawqikuna y panikunaqa llapankunapis yanapakushqa karmi kushishqa sientikuyarqan, y juk familianölla këmanmi chäyarqan (Sal. 133:1).

16. Colosensis 4:3 y 18 ninqannö, ¿imatataq rurashwan autoridäkuna chikir qatikachëkaq wawqikunapaq?

¹⁶ Mëtsikaq wawqi panintsikkunatam autoridäkuna chikir qatikachëkäyan y wakinkunataqa prësurëkätsiyanmi. Pëkunapaq y familiankunapaq Diosnintsikman mañakushun. Tsënölla mañakushun salorninkuna asuntuchö y juiciuchö yanapaq wawqikuna Diosnintsikman confiakur sïguiyänampaq (leyi Colosensis 4:3, 18). c Pëkunapaq Diosnintsikman mañakunqantsikqa alläpam yanapan, ama mana kaqpaqqa churashuntsu (2 Tes. 3:1, 2; 1 Tim. 2:1, 2).

17. ¿Imanötan alistakushwan autoridäkuna chikir qatikachämanqantsik tiempupaq?

¹⁷ Familiëkikunawan alistakuyë autoridäkuna chikir qatikachämanqantsik tiempupaq (Hëch. 14:22). Ama pensayëtsu mana allikuna pasayäshunëkipaq kaqtaqa. Sinöqa Jehoväpa amïgun këta procurayë y wamrëkikunatapis tsëta yachatsiyë. Mana allikunapa pasar llakikuyanqëki hörakunaqa, Jehoväta llapan shonquykikunawan willayë (Sal. 62:7, 8). Familiëkikunawan parlayë Jehoväman imanir confiakuyanqëkita. d Imanömi ima desgraciapaqpis puntallapitana alistakuntsik, tsënölla wamrëkikunata yachatsiyë autoridäkuna chikir qatikachämanqantsik tiempupaq y yachatsiyë Jehoväman confiakuyänampaq. Tsëmi autoridäkuna chikir qatikachämashqaqa valienti kayanqa y manam mantsakuyanqatsu.

18. Shamoq tiempuchöqa, ¿imanöraq kawakushun?

¹⁸ Yamë kanapaq Diosnintsik yanapamashqam kushishqa sientikuntsik (Filip. 4:6, 7). Jehovämi yanapamantsik muyakoq y wanutsikoq qeshya kaptin, desgraciakunapa pasar o autoridäkuna chikir qatikachämashqa tranquïlu sientikunapaq. Y anciänukunatam utilizan yanapamänantsikpaq, tsënöllam noqantsiktapis nimantsik wakinkunata yanapanapaq. Yamë kanapaq Diosnintsik yanapamashqam shamoq tiempuchö imëka mana allikunapa pasarpis o hasta ‘alläpa sufrimientuta’ pasarpis alli tsarakushun (Mat. 24:21). Tsë tiempuchöqa, manam mantsakänantsiktsu, sinöqa tranquïlum kanantsik y wakinkunatapis tranquïlu kayänampaqmi yanapanantsik. Peru alläpa sufrimientu pasariptinqa, llapantsikpis kushishqanam kawakushun, manam mana allikuna pasakunampaq kaqta mantsapakushunnatsu. Tsë tiempuchöqa, Diosnintsik munanqannömi llapantsikpis tranquïlu y kushishqa imëyaqpis kawakushun (Is. 26:3, 4).