¿Listuku këkanki “kë patsata” herenciatanö chaskinëkipaq?
JESUS kënö ninqan cumplikänantam shuyarëkantsik: “Kushikuyätsun yachanëpaq kaqkuna, pëkunam kë patsata chaskiyanqa” (Mat. 5:5). Ciëlupaq akrashqakunaqa kë Patsata herenciatanö chaskiyanqa, Jesuswan juntu kë Patsaman gobernamurmi (Apoc. 5:10; 20:6). Peru mëtsikaq nunakunam kë Patsachö imëyaqpis kawakuyta shuyaräyan. Pëkunaqa jutsannaqmi kayanqa, kushishqa y yamëmi kawakuyanqa. Peru tsënö kawakuyänampaqqa atska trabäjutaran rurayänan. ¿Imakunata? Kimallata rikärishun: 1) kë Patsa shumaq kanampaqmi alli trabajayänan, 2) kawarimoqkunatam atiendiyänan y 3) yachatsiyänan. Tsëmi Shumaq Patsachö rasumpa kawëta munarqa, kananllapitana imata ruranantsikpaq kaqta rikätsikunantsik.
¿LISTUKU KËKANKI PATSATA SHUMAQ HUERTAMAN TIKRATSICHÖ YANAPAKUNËKIPAQ?
Diosnintsikmi nunakunata mandarqan patsaman juntayänampaq y entëru Patsata poderninchö katsiyänampaq. Tsënö mandarqa nikarqan tiempuwanqa entëru Patsa juk shumaq huertaman tikranampaq kaqtam (Gen. 1:28). Imëyaqpis mana wanuypa kawakoqkunaqa tsëtam cumpliyänan. Armagedon pasariptinqa, manam kë Patsachö Eden huertanö juk sitiu kanqatsu, tsëllatana jatunyätsiyänampaq. Eden huertaqa, mëtsika watakunanam pasashqa. Kë Patsata shumaqyätsiyänampaqqa, nunakuna malograyanqantam altsayänan y limpiayänan. ¡Mëtsika trabäjum rurëpaq kanqa!
Israelïtakunapis allim trabajayarqan. Babiloniachö 70 watapa kashqa kayaptinmi, markankunaqa puntatanönatsu karqan. Peru Jehovä yanapaptinmi altsayarqan y shumaqmi karqan. Isaïas kënö ninqanmi cumplikarqan: “Tsunyaq sitiutam Eden huertatanö tikratsishaq, y tsunyaq pampatam noqa Jehoväpa huertätanö tikratsishaq” (Is. 51:3). Israelïtakunaqa alli trabajarmi, markankunata shumaqman tikratsiyarqan. Tsënöllam kë Patsata herenciatanö chaskeqkunapis Jehovä yanapaptin, entëru Patsata shumaqman tikratsiyanqa. Peru tsëchö yanapakuyta munanqëkitaqa, kanan witsan ruranqëkikunawanmi rikätsikunëki.
¿Imakunatataq rurankiman? Wayikitam shumaq churapakushqata y limpiuta katsinëki, vecïnuykikuna mana limpiapakuyaptimpis waqtapapis limpiutam katsinëki. Y masllata rurëta munarqa, Diosnintsikta adoranqantsik wayita y Asamblëa ruranqantsik localkunata altsapakuychö y limpiapakuychömi yanapakunkiman. Mas yanapakuyta munarqa, desgraciakuna kaptin yanapakunëkipaqmi apuntakunkiman. Tsëkunata rurarmi rikätsikunki necesitëkaqkunata rasumpa yanapëta munanqëkita. Allichi kanman kënö tapukunqëki: “Shumaq Patsachö kawanäta Jehovä permitimaptinqa, ¿imallachöpis yanapakunäpaq ima rurëllatapis kanan yachakümantsuraq?”.
¿LISTUKU KËKANKI KAWARIMOQKUNATA ATIENDINËKIPAQ?
Jairupa warmi wamranta kawarkatsimurmi, Jesusqa mandakurqan mikuynin qarayänampaq (Mar. 5:42, 43). 12 watayoqllaraq wamrata atiendinanqa manachi sasatsu o ajatsu karqan. Peru shamoq tiempuchö kawarimoqkunata atiendinanqa manachi fäciltsu kanqa. Jesusmi kënö nirqan: “Sepultürachö këkaqkunaqa qayanqanta wiyar[mi] tsëpita yarqayämunqa” (Juan 5:28, 29). Mëtsikaqmi kawariyämunqa. Bibliaqa manam llapantatsu willamantsik imanö kanampaq kaqta. Peru kawarimoqkunaqa mikuyta, posädata y röpatam necesitäyanqa. Tsë tiempuchö yanapakuyta munanqëkitaqa, ¿puëdinkimantsuraq kananllapitana rikätsikuyta? Kë tapukuykunaman pensarishun.
¿Imatataq kananllapitana rurankiman kë Patsata herenciatanö chaskinëkipaq listu këkanqëkita rikätsikunëkipaq?
Congregacionkunata watukaq wawqi visitayäshunëkipaq kaqta willakarayämuptinqa, ¿apuntakuyta puëdinkimantsuraq mikuynin invitanëkipaq? Capaz juk betelïtata mandariyanman juk sitiuchöna yanapakunampaq o congregacionkunata watukaqkunata niriyanman congregacionkunata watukar manana yanapakunampaq. Tsëqa, ¿puëdinkimantsuraq quedakuyänampaq cuartunkuna ashita? Y markëkichö asamblëa kaptinqa, ¿asamblëa manaraq qallaptin o ushariptimpis yanapakunkimantsuraq? O ¿asamblëaman karupita shamoqkunata shuyëta o posadatsita puëdinkimantsuraq?
¿LISTUKU KËKANKI KAWARIMOQKUNATA YACHATSINËKIPAQ?
Hëchus 24:15 ninqanta leyirmi pensantsik mëtsika millon nunakuna kawariyämunampaq kaqta. Pëkunaqa cäsi llapanmi Jehoväpitaqa yachakuyashqatsu, peru Shumaq Patsachöqa yachakuyta puëdiyanqam. a Pëkunataqa yachatsiyanqa unëpana Jehovä Diosnintsikta sirwishqa kaqkunam (Is. 11:9). Euröpachö, Sudamëricachö y Africachö yachatsikushqa Charlotte jutiyoq panim, tsë tiempu chäramunantaqa alläpa shuyarëkan. Kushishqam kënö nin: “Kawarimoqkunata yachatsitaqa alläpam shuyarëkä. Unë witsanchö kawaq nunakunapaq leyirqa kënömi pensä: ‘Jehoväpita yachakushqa karqa, manachi tsënö mana alliqa kawakuyanmantsu karqan’. Jehoväpita mana yachakushqa karnin mana alli kawakuyanqanta entienditsinäpaqmi tsë tiemputa alläpa shuyarëkä”.
Jehovä Diospa unë sirweqninkunatapis Jehoväpitaqa yachatsishunmi. Danieltam yachatsishun qellqanqankuna imanö cumplikanqanta, pëqa manam entiendirqantsu tsë qellqanqankunata (Dan. 12:8). Rut-tawan Noemïtanam entienditsishun pëkunapa kastankunapita Mesïas o Cristu yurishqa kanqanta. Entëru Patsachö nunakunata Jehoväpita yachatsiqa shumaqmi kanqa. Tsë tiempuchöqa manam ni pï mana allikunata ruranapaq nimäshuntsu ni mana conviëneqkunachö tiempuntsikta ushashuntsu.
¿Imanötan kananllapitana rikätsikunkiman tsë tiempuchö yachatsikuyta munanqëkita? Seguïdum yachatsikunëki y alli yachatsikoq kanëkipaqmi kallpachakunëki (Mat. 24:14). Edäna karpis manam yarpachakunëkitsu, llapan puëdinqëkimannömi ruranëki. Kanan witsan alli yanapakurqa, kawarimoqkunata yachatsinëkipaqmi listu këkanki.
Peru ¿rasumpaku kë Patsata herenciatanö chaskita munanki? ¿Kushikunkiku kë Patsa shumaq kanampaq yanapakuyta pensar, kawarimoqkunata atiendinëkipaq kaqta y yachatsinëkipaq kaqta pensar? Kanan tiempuchö alli yanapakurqa, tsë tiempuchö yanapakunëkipaqmi listu këkanki. Kanan tiempuchö ruranqantsik trabäjutanöllam Shumaq Patsachöpis rurashun.
a 2022 wata septiembri killa kaq Täpakoq revistachö “‘Allita rurayänampaqmi’ mëtsikaqta yanapayan” neq yachatsikuyta leyiri.
