1. Imëyaqpis kawakunapaq Jehovä änimanqantsikman pensanqantsikqa, ¿imanötan yanapamantsik?

 TEYTANTSIK Jehoväqa, cäsukoqkunataqa ‘imëyaqpis kawakunantsikpaqmi’ änimantsik (Rom. 6:23). Tsëman pensarqa, Jehovä Diostam mas kuyantsik. Pëqa kuyamarnintsikmi, pëpita rakikäkurinata mana munar, imëyaqpis kawakunapaq änimantsik.

2. Mana wanurna kawakunantsikpaq Diosnintsik änimanqantsikqa, ¿imanötan yanapamantsik?

² Imëyaqpis kawanapaq Diosnintsik änimanqantsikqa, imëka mana allikunapa pasarpis alli tsarakunapaqmi yanapamantsik. Hasta chikimaqnintsikkuna wanutsimënintsikta munayaptimpis, Jehovä Diosnintsikta sirwitaqa manam dejashuntsu. Wanutsimashqapis, Jehovä Diosnintsikqa mana wanurna kawakunapaqmi kawatsimäshun (Juan 5:28, 29; 1 Cor. 15:55-58; Heb. 2:15). ¿Imanirtan següru këkantsik mana wanurna kawanantsikpaq kaqta? Yachakurishun imanir següru kanqantsikta.

3. ¿Imanirtan següru këkantsik Jehovä Diosqa imëyaqpis kawatsimënintsikta puëdinqanta? (Salmus 102:12, 24, 27).

³ Musyantsikmi Jehoväqa imëyaqpis kawatsimënintsikta puëdinqanta. ¿Imanirtan següru këkantsik? Pëlla kawatsimaqnintsik kaptin y imëyaqpis kawaq Dios kaptinmi (Sal. 36:9). Juk ishkë versïculukunata leyirishun Jehoväqa imëpitapis y imëyaqpis kawaq Dios kanqanta musyanapaq. Salmus 90:2 textuchömi nimantsik Jehoväqa, “imëpitapis y imëyaqpis” kawaq Dios kanqanta. Tsënöllam, Salmus librupa 102 capïtulunchöpis nimantsik (leyi Salmus 102:12, 24, 27).  Y Jehoväpaq parlarmi Habacucpis kënö nirqan: “Teyta Jehovä, qamqa mana ushakaqmi kanki. Teyta Dios, qamqa limpiu Diosmi kanki y manam imëpis ushakankitsu” (Hab. 1:12).

4. ¿Imanirtan yarpachakushwantsu Diosnintsik imëyaqpis kawaq kanqanta mana entiendirpis?

⁴ Qampaqqa, ¿sasaraqku o ajaraqku “imëyaqpis mana wanushpa kawaq Dios kanqanta” creinëki? (Is. 40:28). Wakinkunapaqpis tsëta creiyänanqa manam fäciltsu. Elihü jutiyoq nunam, Diospaq kënö nirqan: “Ëka wata kawanqantapis manam musyëta puëdintsiktsu” (Job 36:26). Peru mana creinqantsikpitaqa, manam nita puëdintsiktsu imapis mana kanqanta. Këllaman pensarishun: manam musyantsiktsu luz imanö funcionanqanta, peru mana musyarpis, luz kanqantaqa creintsikmi. Tsënöllam, nunakunaqa entiendiyantsu Jehovä imë kawar qallanqanta ni imëyaq kawanampaq kaqta. Peru ¿tsëta mana entiendirtsuraq Diosqa manam imëyaqpis kawëta puëdintsu nishwan? Manam. Mana entiendishqapis, Diosqa imëyaqpis kawëta puëdinmi (Rom. 11:33-36). Kamamaqnintsik Diosqa, ciëluchö llapan rikanqantsikkuna, Intipis o Rupaypis y estrëllakunapis manaraq kaptinmi kawarqanna. Tsëmi Bibliachöqa kënö nimantsik: “Teyta Diosqa poderninwanmi patsata kamashqa”. Y kënöpis ninmi: “Ciëlukunata[m] mashtashqa” (Jer. 51:15; Hëch. 17:24). Kananqa rikärishun imëyaqpis kawatsimënintsikta Diosnintsik puëdinqanta.

5. Jehovä mandanqanta cäsukurqa, ¿Adanwan Ëva wanuyanmantsuraq karqan?

⁵ Nunallatam Teyta Diosqa imëyaqpis kawanampaq kamarqan, peru Patsachö llapan kamanqankunaqa tiempuwanqa wanuyänanmi karqan. Peru imëyaqpis kawakunampaqqa, Adanqa Jehovä Diostam cäsukunan karqan. Jehovämi kënö mandarqan: “Ima alli kanqanta y ima mana alli kanqanta musyatsikoq plantapa frütantaqa ama mikunkitsu, tsë plantapa frütanta mikurqa, mikunqëki junaqmi wanunki o wañunki” (Gen. 2:17). Jehovä ninqanta cäsukushqa karqa, Adanwan Ëvaqa manam wanuyanmantsu karqan. Y Jehoväqa capazchi tiempuwanqa, “kawatsikoq plantapa frütanta” mikuyänanta permitinman karqan. Tsëta mikurqa, mana wanuypam “imëyaqpis” kawakuyanman karqan (Gen. 3:22). b

6, 7. (1) ¿Ima pruëbakunawantan musyantsik imëpis mana wanunapaq Diosnintsik kamamanqantsikta? (2) Mana wanuypana imëyaqpis kawakurqa, ¿ima rurëtataq munanki? (Dibüjuta rikäri).

 ⁶ Cientïficukunam niyan llapan kawanqantsik tiempuchö yachakunqantsikpitapis mas atskataraq yachakuyta y yarpëta puëdinqantsikta. 2010 watachömi juk revista parlarqan, mëtsika informacionta peqantsikchö o umantsikchö katsita puëdinqantsikta, tsë informacionqa 3 millon hörakuna grabashqa videukunanömi kanman. Tsë videukunataqa 300 watakunaran rikëta ushashwan, peru tsëtsika videukunapis peqantsikpaq capaz wallkalla kanman. Tsëwanmi musyantsik 70 o 80 watakuna kawanqantsik tiempu yachakunqantsikkunapitapis, mas atskataraq yachakunapaq Jehovä Dios peqantsikta kamashqa kanqanta (Sal. 90:10).

⁷ Manam tsëllatsu. Jehovä Diosnintsikqa kamamarquntsik imëyaqpis kawakuyta munaqtam. Tsëmi Palabranchö kënö nimantsik: “Nunakunapa shonqunmampis imëyaqpis kawakuyta munayänampaqmi churashqa” (Ecl. 3:11). Tsëmi wanuytaqa alläpa mantsëkuntsik (1 Cor. 15:26). Këllaman pensarishun: ima qeshyawampis grävi qeshyarqa, ¿“wanukushaqpis” nirku jampikuntsiktsu? Manam. Wanuyta mantsarmi, doctorkunaman ëwantsik y jampikunata upuntsik. Y juk familiantsik jövin kar o mayor karpis wanuriptinqa, alläpam llakikuntsik. Atska watakuna pasaptimpis llakïkantsikran (Juan 11:32, 33). Tsëqa, wallka tiempulla kawanapaq kamamashqantsik karqa, Teyta Diosnintsik manachi imëyaqpis kawakuy munaqta y imëyaqpis kawakuy puëdeqta kamamashwantsu karqan. Diosnintsik imëyaqpis kawatsimënintsikta puëdinqanta creinapaqqa, maskunaran  kan. Rikärishun munanqan cumplikänampaq Diosnintsik imakunata rurashqa kanqanta y rurëkämunqanta.

8. Jehovä rurëta munanqampaqqa, ¿ima nintan Isaïas 55:11?

⁸ Adanwan Ëva jutsata rurar nunakunata wanuyman condenashqa kayaptimpis, Jehovä Diosnintsikqa rurëta munanqanta ruranqallam (leyi Isaïas 55:11). Diosnintsikqa munan imëyaqpis kawakunatam. ¿Imanötan musyantsik? Tsëtaqa musyantsik kikin parlashqa kaptin y cumplinampaq rurëkanqankunata musyarmi.

9. ¿Imatataq Diosnintsik änikushqa? (Daniel 12:2, 13).

⁹ Diosnintsikqa änikushqa wanushqakunata kawaritsimunampaq y imëyaqpis kawakuyänanta permitinampaqmi (Hëch. 24:15; Tïtu 1:1, 2). Jobpis musyarqanmi wanushqakunata kawaritsimuyta Jehovä alläpa munanqanta (Job 14:14, 15). Danielpis musyarqanmi wanushqakunataqa Teyta Dios kawaritsimunampaq kaqta y imëyaqpis kawatsinampaq kaqta (Sal. 37:29; leyi Daniel 12:2, 13). Kë Patsachö Jesus kawanqan witsan judïukunapis, sirweqninkunata Jehovä ‘imëyaqpis kawatsita’ puëdinampaq kaqtaqa musyayarqanmi (Lüc. 10:25; 18:18). Wanushqakuna kawariyämunampaq kaqtaqa, Jesusqa mëtsika kutim parlarqan, y kikintapis wanushqa këkaptinmi Diosnintsik kawaritsimurqan (Mat. 19:29; 22:31, 32; Lüc. 18:30; Juan 11:25).

10. Unë witsan wanushqakunata Jehovä kawaritsimunqanta musyar, ¿imapitataq següru këkantsik? (Dibüjuta rikäri).

¹⁰ Jehovällam kawatsimantsik y pëllam wanushqakunatapis kawatsimuyta puëdin. Willakoqnin Elïastam yanaparqan Sarepta markachö viudapa wamranta kawaritsinampaq (1 Rëy. 17:21-23). Tsënöllam willakoqnin Eliseutapis yanaparqan Sunem markachö warmipa wamranta kawaritsinampaq (2 Rëy. 4:18-20, 34-37). Tsëkunawanmi musyantsik wanushqakunata kawaritsimunampaq Teyta Diosnintsik poderyoq kanqanta. Y kë Patsachö këkarmi Jesus willakurqan wanushqakunata kawaritsimunampaq Teyta Dios poderninwan yanapanqanta (Juan 11:23-25, 43, 44). Kananqa, Jesus ciëluchönam këkan y ‘ciëluchö y patsachö imëkata rikänampaqmi Teyta Diospita carguta chaskishqa’. Tsë carguta chaskishqa karmi, llapan wanushqakunata kawaritsimunqa. “Sepultürachö këkaqkunaqa qayanqanta” wiyarmi kawariyämunqa imëyaqpis kawakuyänampaq (Mat. 28:18; Juan 5:25-29).

11. ¿Imanötan vïdanwan Jesus pagakunqan yanapamantsik imëyaqpis kawakunapaq?

¹¹ ¿Imanirtan Jehoväqa wamran wanunanta permitirqan? Kikin Jesusmi kënö nimantsik: “Nunakunata alläpa kuyarmi Teyta Diosqa japallan Tsurinta pëkunarëkur entregarqan. Pëman markäkoqkuna o yärakoqkuna mana ushakäyänampaq, sinöqa imëyaqpis kawëta tariyänampaq” (Juan 3:16). Jutsantsikpita perdonamäpaq y imëyaqpis kawakunapaqmi, Diosnintsikqa wamrampa vïdanwan pagakurqan (Mat. 20:28). Tsëtam apostol Pablu kënö entienditsimantsik: “Juk nunarëkurlla wanuy chämunqannömi, wanushqakuna kawariyämunampaq kaqpis juk nunarëkurlla kanqa. Adanrëkur llapankuna wanuykäyanqannöllam, Cristurëkurpis llapankuna kawariyämunqa” (1 Cor. 15:21, 22).

12. ¿Imanöraq änimanqantsikta Jehovä cumplimunqa?

¹² ¿Imata mañakuyänampaqtan qateqninkunata Jesus nirqan? Diospa Gobiernun shamunampaq y munënin kë Patsachö rurakänampaqmi (Mat. 6:9, 10). Tsëta mañakurqa,  imëyaqpis kawakuyta munayänampaq kaqtapis mañakuyänanmi karqan. Tsëta cumplimunampaqmi Jehoväqa, Tsurin Jesusta Gobernanti churashqa y 144.000 nunakunatam pëwan mandakayämunampaq juntëkan (Apoc. 5:9, 10).

13. ¿Imatataq kanan witsan Jehovä rurëkan, y imatataq noqantsik ruranantsik?

¹³ Kanan witsanqa, “pï nunapis yupëta mana puëdinqan mëtsika” nunakunatam Jehovä Dios juntëkan y Gobiernunchö imanö kawakuyänampaq kaqtam yachëkätsin (Apoc. 7:9, 10; Sant. 2:8). Kë munduchö nunakuna chikinakurlla y guërrata rurarlla kawakuyaptimpis, tsë mëtsika nunakunaqa manam chikinakuyantsu y juknöllam kawakuyan; espädankunata arädupa puntanman tikratsishqa cuentanam kawëkäyan (Miq. 4:3). Mëtsikaq nunakunata wanutsir guërrakunachö pelyayänampa rantinmi, nunakunata yachëkätsiyan rasumpa kaq Diospita y ruramunampaq kaqkunapita. Tsënömi yanapëkäyan ‘rasumpa alli kawakuyta’ tariyänampaq (1 Tim. 6:19). Diospa Gobiernunchö yanapakuyanqanrëkur, capaz familiankuna chikiyanqa o mikuyänampaq pishipakuyanqa, peru Jehovä Diosnintsikqa manam llapan wanayanqankunata faltatsintsu (Mat. 6:25, 30-33; Lüc. 18:29, 30). Tsëkunawanmi cläru musyantsik Diospa Gobiernunqa rasumpa kanqanta y llapan ruramunampaq kaqta Jehovä cumplinampaq kaqta.

14, 15. ¿Imanöraq cumplikanqa wanuyta chipyëpa ushakätsinampaq Jehovä änikunqan?

¹⁴ Jesusqa ciëlupitanam gobernëkämun y Jehovä llapan änikunqantam cumplimunqa (2 Cor. 1:20). 1914 watapitanam, chikeqninkunata dominëkan (Sal. 110:1, 2). Y ichikllachönam Jesuswan 144.000 nunakunaqa, chikeqninkunata y Patsachö llapan mana alli nunakunata ushakäratsiyanqa (Apoc. 6:2).

¹⁵ Mil Watakunapa gobernamunqan witsanmi, Jesusqa wanushqakunata kawaritsimunqa, y nunakunatam jutsannaq këman chäyänampaq yanapanqa. Tsë nunakunaqa ultimu kaq pruëbata pasarirmi, alli nunatanöna Jehovä rikaptin, ‘kë patsata herenciatanö’ chaskiyanqa, y “tsëchömi imëyaqpis alli kawakuyanqa” (Sal. 37:10, 11, 29). Y “ultimu kaq chikimaqnintsik wanuypis, pasëpam ushakanqa” (1 Cor. 15:26). Tsëta musyarqa, ¡alläpam kushikuntsik!

16. ¿Imëyaqpis kawakuyta munarllaku Jehovä Diosnintsikta sirwishwan?

¹⁶ Këchö yachakurinqantsiknömi, mana wanuypa kawakunantsikpaqqa, atska pruëbakuna kan y Teyta Diospa Palabranchömi qellqarëkan. Mana wanuypa kawëta shuyaranqantsikqa yanapamantsik kë ushanan tiempukunachö alli tsarakunapaqmi. Peru Jehovä Diosnintsikta kushitsita munarqa, manam Pëta ni Jesusta sirwita dejanantsiktsu. Y manam imëyaqpis kawakuyta munarllatsu sirwinantsik, sinöqa llapan shonquntsikwan kuyarninmi (2 Cor. 5:14, 15). Tsënö kuyarmi, Jesus ruranqanta rurashun y shuyaranqantsikkunapita pï nunatapis parlapäshun (Rom. 10:13-15). Kikintsikllapaq imata munanqantsiktapis dejarirmi, llapankunapaq alli nuna kanantsik. Tsënö kashqaqa, Jehoväqa imëyaqpis amïguntsik këtam munanqa (Heb. 13:16).

17. Mana wanuypana kawakuyta munarqa, ¿imatataq cada ünu ruranantsik? (Mateu 7:13, 14).

¹⁷ ¿Y noqantsikqa? ¿Mana wanurna o wañurna kawakuyta puëdishuntsuraq? Jehovä Diosnintsikqa änimarquntsiknam y kananqa kikintsikpitanam kanqa. Imëyaqpis kawakuyta munarqa, Jehovä mandamanqantsiknömi kawakunantsik (leyi Mateu 7:13, 14). Peru mana wanurna kawakushqaqa, ¿imanöraq vïdantsik kanqa? Tsëtam qateqnin kaq yachatsikuychö yachakurishun.