1. ¿Ima nirqantan Jesus lädunchö këkaq delincuentita? (Lücas 23:39-43).

 JESUSPIS y lädunchö këkaq ishkan delincuentikunapis wanuykäyarqannam (Lüc. 23:32, 33). Pëkunaqa manam Jesuspa qateqninkunatsu kayarqan, y Jesuspitam burlakushqa kayarqan (Mat. 27:44; Mar. 15:32). Peru juk kaqmi cuentata qokurir Jesusta kënö nirqan: “Jesus, gobernar qallëkur noqata yarpäramanki”. Tsënam Jesusqa, “kananmi qamta neq: noqawanmi Shumaq Patsachö kanki” nirqan (leyi Lücas 23:39-43). Manam musyantsiktsu Diospa Gobiernun chäramunampaq kaqtana tsë delincuenti creinqanta. Y Jesuspis manam nirqantsu Gobiernunman tsë delincuenti yëkunampaq kaqtaqa (Mat. 4:17). Tsë nunata Jesus parlaparqa, kë Patsa shumaq huertaman tikranampaq kaqtam parlapëkarqan. ¿Imanötan musyantsik?

2. ¿Imanirtan nintsik tsë arrepentikoq delincuentiqa judïu kashqa kanqanta?

² Tsë arrepentikoq delincuentiqa, capazchi judïu karqan. Tsë nunam delincuenti mayinta kënö tapurqan: “¿Qamqa manaku ichikllapis Diosta respetanki, kanan höra tsë castïgullata chaskikarpis?” (Lüc. 23:40). Judïukunaqa juk Diosllatam adorayaq, peru juk nacion nunakunaqa Dios nirmi mëtsika santukunata adorayaq (Ex. 20:2, 3; 1 Cor. 8:5, 6). Tsë delincuentikunaqa judïuchi kayarqan, manaqa delincuenti mayinta kënöchi tapunman karqan: “¿Qamqa manaku ichikllapis dioskunata mantsanki?”. Jesustaqa Diosnintsik mandamushqa karqan, “oqrakashqa üshakunanö këkaq Israel nunakunallamanmi” y manam juk nacion nunakunamantsu (Mat. 15:24). Y israelïtakunatam Diosnintsik musyatsishqa karqan wanushqakunata kawaritsimunampaq kaqta. Tsë arrepentikoq delincuentiqa, capazchi musyarqan Jesus wanuptinqa Jehovä kawaritsimunampaq y gobernamunampaq churanampaq kaqta. Y hasta creirqanchi kikin wanuptimpis, Diosnintsik kawaritsimunampaq kaqta.

3. Shumaq Patsapaq Jesus parlaptin, ¿imamanraq tsë delincuenti nuna pensarirqan? (Genesis 2:15).

 ³ Tsë delincuentiqa, judïu karchi musyarqan Adantawan Ëvata juk shumaq huertaman Jehovä churashqa kanqanta. Y Shumaq Patsapaq Jesus parlaptinqa, pensarirqanchi kë Patsa juk shumaq huertaman tikranampaq kaqta (leyi Genesis 2:15).

4. Delincuentita Jesus ninqanqa, ¿imamantan pensatsimashwan?

⁴ Mushoq Patsachö kawakuy imanö kanampaq kaqta musyanapaqqa, tsë delincuentita Jesus ninqanmanmi alli pensanantsik. Tsëpaqqa yanapamäshun, Salomon gobernanqan witsan nunakuna alläpa shumaq kawakuyanqanman pensanqantsikmi. Bibliaqa Jesuspaq nin ‘Salomonpitapis mas mejor’ gobernanti kanqantam. Tsëmi següru këkantsik Jesuswan yanapaqninkuna gobernayämuptinqa, kë Patsa shumaq huertaman tikranampaq kaqta (Mat. 12:42). Tsëmi wakin kaq ‘üshäkunaqa’, kananllapitana yachakuyänan Shumaq Patsachö imanö kawakuyänampaq kaqta (Juan 10:16).

5. ¿Shumaq Patsachö imanö kawakunapaq kaqtataq pensanki?

⁵ ¿Shumaq Patsachö imanö kawakunapaq kaqtataq pensanki? Capaz pensëkanki entëru Patsa Eden huertanö shumaq kanampaq kaqta (Gen. 2:7-9). O pensëkanki Diospa sirweqninkunapaq Miquëas kënö ninqanman: “Üvas plantankunapa y hïgus plantankunapa jawanchömi jamakuyanqa” (Miq. 4:3, 4). O pensëkanki mëtsika mikuy kanampaq kaqta parlaq textukunaman (Sal. 72:16; Is. 65:21, 22). ¿Mëtsika mishki mikuy-yoq mësaman jamëkur mikur mikur shumaq plantakunata y huertakunata rikëkaqnönaku këkanki? ¿Plantakuna y wëtakuna imanö pukutanqanta o mushkunqanta sienteqnönaku këkanki? ¿Amïguykikunawan, familiëkikunawan juntakëkur, asikur, parlar këkaqnönaku këkanki? Tsëchö këkaqkunaqa, capazchi wakinqa wanuyanqampita kawariyämushqakuna kayan. Kënö pensanqantsikqa rasumpam kanqa. Shumaq Patsachöqa tsë llapantam rikäshun. Peru trabajanapaqpis mëtsika trabäjum kanqa.

6. Shumaq Patsachöqa, ¿imataraq rurashun? (Dibüjuta rikäri).

⁶ Teytantsik Jehoväqa kamamarquntsik trabajarnin kushishqa kanapaqmi (Ecl. 2:24). Mil Watapa Jesus gobernamunqan witsanqa, mëtsika trabäjum kanqa. Alläpa sufrimientuta kawëkar pasashqa kaqkuna y mëtsika millon kawarimoqkunaqa röpata, mikuyta y wayitam necesitäyanqa. Tsë llapanchö yanaparmi alli trabajashun, peru kushishqam yanapakushun. Adantawan Ëvataqa, Jehovä Diosnintsik nirqan tsë churanqan huertata cuidayänampaqmi, peru noqantsikqa kë Patsa shumaq tikranampaqmi alli trabajashun.  Y mëtsika millon kawarimoq kaqkunatapis Jehoväpitam yachatsinantsik. Pëkunaqa Jehoväpita y ruramunampaq kaqpita manachi alläpaqa musyayarqantsu. Y Jehoväpa unë sirweqninkunatapis kawarkayämuptinqa, willanantsikmi pëkuna wanukuyanqanchöna llapan pasakunqankunata.

7. ¿Imapitataq següru këkantsik, y imanir?

⁷ Segürum këkantsik Shumaq Patsachöqa tranquïlu kawakunapaq kaqta, imëkantsikpis mana pishinampaq kaqta y imëkapis ordenädu kanampaq kaqta. ¿Imanötan tsëta musyantsik? Salomon gobernanqan witsanqa israelïtakuna alli kawakuyänampaqmi Jehovä yanaparqan. Tsëwanmi musyantsik Shumaq Patsachöpis tsënölla kanampaq kaqta.

8. ¿Imanötan Salmus 37:10, 11 y 29 ninqan unë witsan cumplikarqan? (Kë revistachö leyiri “Leyeqkuna tapukuyanqan” neq yachatsikuytapis).

⁸ Jehovä Dios yanapaptinmi, David qellqarqan Jehovä mandakunqanta cumpleq y yachaq gobernanti mandakuptin nunakuna imanö kawakuyänampaq kaqta (leyi Salmus 37:10, 11, 29). Nunakunata Shumaq Patsapaq parlaparqa, leyipantsik Salmus 37:11 ninqantam y tsëqa allim, hasta Jesuspis shamoq tiempuchö cumplikänan kaptinmi tsë textuwan yachatsikurqan (Mat. 5:5). Peru gobernanti David qellqanqanqa, Salomon gobernanqan witsampis cumplikarqanmi. Tsë witsanqa, israelïtakunaqa tranquïlum kawakuyaq, manam imankunapis pisheqtsu y “lichipis, mielpis” mëtsika kanqan markakunachömi kawayaq. Diosnintsikmi kënö nishqa karqan: “Mandakunqänö kawayaptikiqa, […] markëkikunachömi yamë kawakuyanki, punukurpis manam imatapis mantsayankitsu” (Lev. 20:24; 26:3, 6). Teyta Diosnintsik tsënö änikunqanqa, Salomon gobernanqan witsanmi cumplikarqan (1 Crön. 22:9; 29:26-28). Y Jehovämi änikurqan, mana allita ruraq nunakunapis manana kayänampaq kaqta (Sal. 37:10). Tsëmi Salmus 37:10, 11 y 29 ninqanqa, unë tiempuchöpis cumplikarqan y shamoq tiempuchöpis cumplikanqam.

9. Salomon imanö gobernanqanta rikëkurqa, ¿ima nirqantan Säba markapita gobernaq warmi?

⁹ Salomon gobernaptin israelïtakuna tranquïlu  kawakuyanqanta y imëkayoq kayanqantaqa, Säba markachö gobernaq warmitapis willayarqanmi. Tsëmi kikin rikëta munar, alläpa karuta Jerusalen markayaq ëwarqan (1 Rëy. 10:1). Y Salomonpa gobiernunchö imakunata rurayanqanta rikëkurnam, Salomonta kënö nirqan: “Kananmi musyarï willayämanqampitapis mas yachaq y mas kapoqyoq kanqëkita. Yachaq kar shumaq parlapanqëkita wiyarnin, ¡ima kushishqaraq yanapashoqnikikuna y sirwishoqnikikunapis kayan!” (1 Rëy. 10:6-8). Peru Jesucristu kë Patsaman gobernamuptin llapan nunakunapaq Jehovä ruramunampaq kaqtaqa, Salomon gobernanqanqa ichikllatam rikätsikurqan.

10. ¿Imanirtan Jesusqa Salomonpitapis mas alli kaq gobernanti?

¹⁰ Jesusqa Salomonpitapis mas alli kaq gobernantim. Salomonqa jutsasapa karmi, mana allikunata rurarnin Diosnintsikpa sirweqninkunata mana allikunaman chätsirqan. Peru Jesusqa jutsannaqmi y manam ni imëpis pantantsu (Lüc. 1:32; Heb. 4:14, 15). Satanasmi imëka pruëbakunaman churarqan, peru manam jutsata rurarqantsu. Y manam Diosnintsikpa sirweqninkunata jutsata rurarnin mana allikunaman chätsinqatsu. Tsëtaqa clärum Jesus rikätsikushqa. ¿Manaku alläpa kushikuntsik Jesucristu Gobernamaqnintsik kanqanta musyarnin?

11. ¿Pikunaraq Jesus gobernamuptin yanapayanqa?

¹¹ Jesustaqa 144.000 gobernantikunam yanapayämunqa. Pëkunawan juntum Jesusqa, llapan nunakunata cuidanqa y Jehovä Diosnintsik kë Patsapaq llapan munanqankunata rurayämunqa (Apoc. 14:1-3). Ciëlupaq akrashqa ollqukuna y warmikunaqa kë Patsallachöraq këkarqa, imëka pruëbakunapam pasayanqa. Tsëmi gobernamurqa, imanö sientikunqantsikta y imata necesitanqantsikta entiendimäshun. Peru ciëlupaq akrashqakunaqa, ¿imanöraq Jesusta yanapayanqa?

12. ¿Imata rurayänampaqtan 144.000 nunakunata Jehovä churanqa?

¹² Salomonqa juk nacionllachömi juk ishkë millon nunakunata gobernarqan. Peru Jesuswan 144.000 nunakunaqa entëru Patsachömi mëtsika millon nunakunata gobernayanqa, awmi, mëtsikam trabäjunkuna kanqa. Teyta Jehoväqa, ¡alläpa shumaq trabäjumanmi 144.000 nunakunata churanqa!

13. Jesuswan gobernamoqkunaqa, ¿imanöraq nunakunata yanapayämunqa?

¹³ Jesusnöllam, 144.000 nunakunapis gobernanti y sacerdöti kayanqa (Apoc. 5:10). Moises qellqanqan Leychömi sacerdötikunata mandaq, nunakunata salorninkuna asuntuchö yanapayänampaq y Diosnintsikpita yachatsiyänampaq. Y Bibliachömi nimantsik, ‘shamoq tiempuchö imëka allikunapa wäninlla o llantunlla’ ley kanqanta. Tsëmi pensantsik Jesuswan gobernamoqkunapis nunakunata salorninkuna asuntuchö yanapayänampaq kaqta y Diosnintsikpita yachatsiyänampaq kaqta (Heb. 10:1). Awmi, manam cläruqa musyantsiktsu kë gobernantikuna y sacerdötikunaqa, kë Patsachö këkaq nunakunawan imanö parlayänampaq kaqta. Peru imanö kaptimpis, segürum këkantsik Shumaq Patsachö kawaq nunakunata yanapayänampaqqa kikin Jehovä imanöpis patsätsimunampaq kaqta (Apoc. 21:3, 4).

14. ¿”Wallkaqlla üshakuna” y pëkunawan tsë ‘corralchö mana këkaq üshakunaqa’ juk kastaku kayan?

¹⁴ Jesusqa, pëwan gobernayämunampaq kaq nunakunatam “wallkaqlla üshakuna” nirqan  (Lüc. 12:32, nöta). Y parlarqanmi juk grüpu üshakunapaqpis. Pëkunapaqmi nirqan: “Kë corralchö mana këkaq üshäkunapis kapamanmi”. Tsë ishkan grüpu üshakunaqa o nunakunaqa, tsë kastallam kayan (Juan 10:16). Ishkan grüpupis juntum trabajayan y kë Patsa shumaq tikranampaqpis juntum trabajayanqa. Peru tsë tiempupaqqa, ‘wallkaqlla üshakunaqa’ ciëluchönam këkäyanqa. Y wakin kaq ‘üshakunaqa’ kë Patsachömi imëyaqpis kawakuyta shuyaräyanqa, peru Shumaq Patsachö kawëta munarqa imata karpis rurayänanran.

15. (1) ¿Imanötan kë Patsachö kawaqpaq kaqkunaqa Cristupa wawqinkunata yanapantsik? (2) ¿Imanötan qampis rurankiman tsë fötuchö rikëkanqëki wawqinö?

¹⁵ Tsë arrepentikoq delincuentiqa, manam Jesus äninqampita agradecikurnin imata rurëta munarpis puëdirqannatsu. Peru kë Patsachö kawëta shuyaraq kaqkunaqa, puëdintsikmi rurëta. ¿Imatataq rurashwan? Ciëlupaq akrashqakunatam shumaq tratashwan y yanapashwan. Jesusqa clärum nirqan pëkunata imanö tratanqantsikpita juzgashqa kanantsikpaq kaqta (Mat. 25:31-40). Tsënöllam yanapashwan Diosnintsikpita kushishqa yachatsikurnin y pëpa sirweqnin tikrayänampaq nunakunata yanaparnin (Mat. 28:18-20). Peru tsëpaqqa, alistayämunqan publicacionkunatam alli utilizänantsik, juk kaq publicacionqa ¡Manana wanurmi kushishqa kawakushun! neq librum. ¿Manaraqku pitapis Bibliapita yachëkatsinki? Tsënö kaptinqa, allichi procurankiman pillatapis Bibliapita yachatsita.

16. Shumaq Patsachö kawakunapaqqa, ¿imatataq kananllapitana yachakunantsik?

¹⁶ Manam Shumaq Patsachö kawëtaraqtsu shuyaränantsik Diosnintsik munanqannö nuna kanapaq. Kananllapitanam yachakunantsik parlanqantsikchö o ruranqantsikchöpis honrädu këta y Diosnintsikpa rurëninkunata puntaman churëta. Y manam Jehovä Diosnintsikta, qowantsikta o runantsikta, warmintsikta ni wawqi panintsikkunatapis dejanantsiktsu. Kë mana alli munduchö kawëkarpis Diosnintsik munanqannö nuna karqa, Shumaq Patsachöqa mas fäcilmi kanqa Diosnintsik munanqannö kawakuy. Y kananllapitanam alli yachakunantsik Shumaq Patsachönöna  kawakuyta. Kë revistachö leyiri “¿Listuku këkanki ‘kë Patsata herenciatanö chaskinëkipaq’?” neq yachatsikuyta.

17. ¿Imanirtan arrepentikushqana këkar jutsata ruranqantsikpita mana alli sientikunantsiktsu?

¹⁷ Jutsata ruranqantsikpita mana alli sientikurqa, tsënö sientikunqantsikta dejanapaqmi kallpachakunantsik. Y manam jutsantsikpita perdonamänapaq Jesus wanunqanrëkurqa, jutsata ardëpa ruranantsiktsu (Heb. 10:26-31). Peru jutsata ruranqantsikpita arrepentikushqana kar, Jehoväman mañakushqana kar, anciänukunata yanapamänapaq willashqana kar y tsë jutsata manana rurarqa, segürum kanantsik Jehovä perdonamashqantsikta (Is. 55:7; Hëch. 3:19). Yarpäshun, Jesusmi fariseukunata kënö nirqan: “Noqaqa manam allita ruraqkunarëkurtsu shamurqö, sinöqa jutsata ruraqkunarëkurmi” (Mat. 9:13). Awmi, Jesus wanunqanrëkurmi llapan jutsantsikpita Diosnintsik perdonamënintsikta puëdin.

18. Jesuspa lädunchö wanoq delincuenti nunawanqa, ¿imapitaraq parlakuriyankiman?

¹⁸ Këllaman pensarishun: Shumaq Patsachöna këkankiman y Jesus perdonanqan delincuenti nunawan parlëkankiman. Ishkëkipis kushishqachi niyankiman Jesus wanunqampita agradecïdu këkäyanqëkita. Capaz tapurinkiman, wanunampaqna këkar Jesus imanö kanqanta y Gobiernunchö këkar yarpärinampaq mañakuptin Jesus contestariptin imanö sientikunqanta. Y pënachi tapushunkiman, Satanas gobernanqan tiempupa ushëninchö kawakuy imanö kashqa kanqanta. Tsënö nunakunata Diosnintsikpa Palabrampita yachatsiqa, ¡alläpa shumaqchi kanqa! (Efes. 4:22-24).

19. ¿Imanirtan Shumaq Patsachö kawëqa ajayëpaqtsu kanqa? (Jana qaranchö këkaq dibüjuta rikäri).

¹⁹ Shumaq Patsachö kawëtaqa manam ajayäshuntsu. Tsëchöqa parlakunantsikpaq reqita munanqantsik nunakunam kayanqa y kushishqa trabajanapaqmi gustamanqantsik trabäjukuna kanqa. Peru tsëpitapis masqa, Teytantsik Jehovätam cada junaq mas reqishun y bendicionninta chaskishun. Pëpita y llapan kamanqankunapita yachakuytaqa manam ni imëpis ushashuntsu. Teytantsik Jehovätaqa cada junaqmi mas kuyashun. Tsëmi Jehovätawan Jesusta alläpa agradecikuntsik Shumaq Patsachö mana wanurna kawakunantsikpaq änimanqantsikta.