¿Ultimu yarqamoq Täpakoq revistakunata leyirqunkiku? ¿Puëdinkimantsuraq kë tapukuykunata contestëta?:

¿Imanötan yanapamantsik Jehoväman mañakunapaq, nimanqantsikta wiyanapaq y pëman pensanapaq tiemputa rakinqantsik?

Imata decidirpis allitam decidishun, mas alli yachatsikoqmi kashun, markäkuynintsik o yärakuynintsikpis masmi kanqa y Jehovätapis masmi kuyashun (w22.01, päginakuna 30 y 31).

¿Imanirtan Jehoväman y sirweqninkunata diriginampaq churanqan nunakunaman confiakushwan?

Kananllapitanam, Diosnintsik imatapis ruranqankunaman confiakunantsik. Jehoväpa sirweqninkunata dirigeqkuna y anciänukuna nimanqantsiktam cäsukunantsik. Kananllapitana cäsukurqa, alläpa sufrimientu kanqan witsampis mas fäcil-llanam cäsukushun imanir mandëkämanqantsikta mana musyarpis (w22.02, päginakuna 4 a 6).

¿Imanirtan Zacarïasta juk angel nirqan gobernador Zorobabelpa makinchö plomädata rikänampaq kaqta? (Zac. 4:8-10).

Tsëwanmi musyëkätsirqan templuta rurëta ushayänampaq kaqta y sencïllulla karpis Jehovä munanqannö kanampaq kaqta (w22.03, päginakuna 16 y 17).

¿Imanötan parlakuyta yachanqantsikta alli utilizashwan? (1 Tim. 4:12).

Diosnintsikpita yachatsikurmi kuyakuypa y respëtuwan parlakushwan, reunionkunachömi gänas gänaslla cantashwan y tapukayämuptin parlakushwan, wakinkunatam animashwan y manam pitapis llakitsipaqa parlapashwantsu (w22.04, päginakuna 6 a 9).

¿Imanirtan Apocalipsis 13:1, 2 versïculukunachö ninqan mantsëpaq chukaru animalqa, Daniel librupa 7 kaq capïtulunchö ninqan mantsanëpaq chusku animalkunata o gobiernukunata rikätsikun?

Apocalipsis librupa 13 kaq capïtulunchö ninqan mantsëpaq chukaru animalqa, manam Römanö juk gobiernullatatsu rikätsikun, sinöqa unëpitana nunakunata dominaq gobiernukunatam (w22.05, pägina 9).

Jehovä justiciata ruraq kanqanman confiakurqa, ¿imatataq rurashwan pï karpis ofendimashqa?

Ofendimashqa, insultamashqa o ima mana allitapis ruramashqaqa, manam cölerakunantsiktsu ni pëkunawan cölerashqallaqa kakunantsiktsu. Tsëpa rantinqa, Jehoväpa makinchömi tsë asuntuta dejarinantsik. Pëqa jutsasapa kanqantsikrëkur imëka sufrimientupa pasanqantsikta altsaramunqa (w22.06, päginakuna 10 y 11).

Reunionchö juk wawqi Diosnintsikman mañakurqa, ¿imatataq yarpänan?

Tsë höraqa manam consejanantsu, ni imatapis willakunantsu ni “mëtsika palabrakunata” utilizänantsu (Mat. 6:7) (w22.07, päginakuna 24 y 25).

¿Imapitataq “mana allikunata rurashqa” kaqkunaqa kawariramur ‘juzgashqa kayanqa’? (Juan 5:29).

Pëkunataqa manam unë rurayanqankunapitatsu Diosnintsik juzgar condenanqa, sinöqa kawariramurna imanö portakuyanqanta y rurayanqankunatam rikanqa, y mana alli kayaptinqa condenanqam (w22.09, pägina 18).

1922 wata septiembri killachö rurakaq asamblëachöqa, ¿imatataq wawqi Joseph Rutherford willakurqan?

Estädus Unïdus nacionchömi Ohiochö këkaq Cedar Point sitiuchö rurakaq asamblëachö kënö nirqan: “¡Rikäyë, Gobernaqqa gobernëkämunnam! Y qamkunam musyatsikoqninkuna kayanki. Tsëqa, willakuyë, willakuyë, willakuyë Gobernaqpita y Gobiernumpita” (w22.10, päginakuna 3 a 5).

Isaïas librupa 30 kaq capïtulun ninqannö, ¿imanötan kima formapa Diosnintsik yanapamantsik imëkapa pasarpis alli tsarakunapaq?

Tsë capïtuluchömi nimantsik 1) mañakunqantsikta Diosnintsik wiyanqanta y contestamunqanta, 2) dirigimanqantsikta y 3) kanan witsan bendicimanqantsikta y shamoq tiempuchöpis bendicimänapaq kaqta (w22.11, pägina 9).

¿Imanirtan nintsik Salmus 37:10, 11 y 29 versïculukunachö ninqanqa unë tiempuchö cumplikanqanta y shamoq tiempuchö cumplikänampaq kaqta?

Tsë versïculukunachö ninqanwanmi musyantsik Israelchö kushishqa y yamë kawakuyanqanta y masqa Salomon gobernanqan witsan. Shumaq Patsapaq parlarmi Jesusqa 11 kaq versïculu ninqanta parlarqan (Mat. 5:5; Lüc. 23:43) (w22.12, päginakuna 8 a 10 y 14).