1. ¿Imatataq bautizakushqa ollqukuna rurayanman llapan rurayanqampis allilla yarqunampaq?

 GOBERNANTI Davidmi Salomonta kënö nirqan: “Imatapis mana mantsakuypa ruranëkipaqmi valienti kanëki” (1 Rëy. 2:1-3). Llapan bautizakushqa ollqukunam kë consëjuta cäsukuyänan. Llapan rurayanqampis alli yarqunampaqqa, Jehovä mandakunqankunata y consëjunkunatam cada junaq cäsukuyänan (Lüc. 2:52). ¿Imanirtan jövin wawqikunaqa Diospa kaqchö poqu cristiänu kayänampaq kallpachakuyanman?

2, 3. ¿Imanirtan jövin wawqikuna Diospa kaqchö poqu cristiänu kayänampaq kallpachakuyanman?

² Cristiänu ollqukunaqa, familiankunachö y congregacionchömi imëka rurëyoq kayan. Jövin karqa, capazchi tiempu pasanqanmannö imëkachö yanapakuyta munanki. ¿Pensarqunkiku precursor këta, siervu ministerial këta, anciänu këta, o casakuyta y wamrayoq këta? (Efes. 6:4; 1 Tim. 3:1). Tsëkunata logranëkipaq y llapan ruranqëkipis allilla yarqunampaqqa, Diospa kaqchömi poqu cristiänu kanëki. b

³ Peru ¿imaraq yanapashunki Diospa kaqchö poqu cristiänu kanëkipaq? ¿Ima rurëkunatataq alli yachakunkiman? ¿Imatataq kananllapitana yachakunkiman llapan ruranqëkipis allilla yarqunampaq?

4. ¿Mëchötan tarinkiman Diospa kaqchö poqu cristiänukunata? (Rikäri fötutawan dibüjukunata).

⁴ Diospa kaqchö poqu cristiänukunapita yachakuy.  Tsëpaqqa Diospa sirweqninkunata cuidaq y Diosta kuyaq nunakunapaq Biblia willakunqankunapitam yachakunkiman. Familiëkichöpis y congregacionchöpis kayanchi Diospa kaqchö poqushqa cristiänukunaqa (Heb. 13:7). Jesuspitanäqa masran yachakuyta puëdinki (1 Pëd. 2:21). Pëkunapita yachakurqa, imanö kayanqanman alli pensë (Heb. 12:1, 2). Tsëpitana pëkunanölla ruranëkipaq kallpachakuy.

5. ¿Imatataq rurankiman alli pensëta yachanëkipaq, y imanirtan alli pensëta yachakunkiman? (Salmus 119:9).

⁵ Alli pensëta yachakuy y tsënö pensëta ama dejëtsu (Prov. 3:21). Alli pensëta yachaq nunakunaqa imatapis manaraq decidirmi alliraq pensayan. Tsëmi qampis kallpachakunëki alli pensëta yachanëkipaq y tsënö pensëta mana dejanëkipaq. ¿Imanirtan alli pensëta yachakunkiman? Diosnintsikta mana sirweq jövinkunaqa kikinkuna pensayanqannö y munayanqannöllam imatapis rurakuyan (Prov. 7:7; 29:11). Tsënöllam televisionta, pelïculakunata, o Internetchö imatapis rikanqëki o wiyanqëkiqa alli pensëta yachakunëkipaq yanapashunkitsu. Tsëqa, ¿imatataq rurankiman alli pensëta yachanëkipaq? Puntataqa, Bibliachö këkaq consëjukunatam yachakunëki y pensanëkim tsë consëjukunata qampaq Jehovä imanir qellqatsimushqa kanqanta. Tsënö pensarirnam, imata decidirpis tsë consëju ninqanmannö decidinëki. Tsënö ruraptikim Jehoväqa kushikunqa (leyi Salmus 119:9). Alli pensëta yachanqëkiqa yanapashunki, Diospa kaqchö poqu cristiänu kanëkipaqmi (Prov. 2:11, 12; Heb. 5:14). ¿Imakunachötan alli pensëta yachanqëki yanapashunki? Ishkëllata rikärishun. 1) Panikunata imanö tratanëkipaq y 2) imanö vistikunëkipaq y imanö altsapäkunëkipaq.

6. Alli pensëta yachaq jövinqa, ¿imanötan panikunata respetanqanta rikätsikunman?

⁶ Alli pensëta yachanqëkim panikunata respetanëkipaq yanapashunki. Këllaman pensarishun: capaz juk pani gustashunkiman y maslla reqita munankiman. Peru ¿respetakoq këtsuraq kanman tsë paniwan casakuyta mana pensashqa këkar enamorëpa parlapanqëki, mensäjikunata mandapanqëki o imatapis qarapanqëki? ¿Imataraq pani pensanqa? Pëwan casakuyta munanqëkitam pensanqa.  Tsëmi casakuyta mana munëkarqa tsëkunata ruranëkitsu (1 Tim. 5:1, 2). O capaz juk paniwan parlashqa kankiman casakuyänëkipaq, peru ¿allitsuraq kanman ishkallëki puriyanqëki? Manam. Tsë panitam mana allichö quedëkätsinki. Tsëmi pitapis mayorta ninëki yanaqäyäshunëkipaq (1 Cor. 6:18).

7. Alli pensëta yachaq jövinqa, ¿imanötan vistikunman y altsapäkunman?

⁷ Jehovä pensanqannö pensaq kanqantaqa, juk jövin rikätsikun imanö vistikunqanwan y altsapäkunqanwanmi. Röpakunata ruramoqkunaqa manam Jehoväta respetayantsu y jukwan jukwanmi kakuyan. Tsëmi ollqukunapaq röpakunataqa, qarankunaman laqaraqta rurayämun warminö rikäkuyänampaq. Juk jövin poqu cristiänu kanampaq kallpachakuykarqa, Bibliachö consëjukunatam cäsukunan y congregacionchö alli vistikoq y alli altsapäkoq wawqikunapitam yachakunan. Kënömi tapukunan: “¿Kënö vistikurnin y altsapäkurninqa wakinkuna imanö sientikuyanqanta respetëkätsuraq? ¿Imanö vistikunqäwan y altsapäkunqäwanqa cläruku rikakun Diospa sirweqnin kanqäta?” (1 Cor. 10:31-33; Tïtu 2:6). Alli pensëta yachaq jövinkunataqa wawqi panikunam respetayan, y Jehoväpis kuyanmi.

8. ¿Imanötan juk jövin wawqi rikätsikunman confiakuypaq kanqanta?

⁸ Confiakuypaq kë. Confiakuypaq karqa, llapan mandayäshunqëkitam cumplinki (Lüc. 16:10). Jesuspita yachakuy. Pëqa manam ruranampaq kaqta dejarirqantsu. Tsëpa rantinqa, Teytan Jehovä llapan mandanqantam mana fäcil këkaptimpis cumplirqan. Nunakunatam kuyarqan, y masqa qateqninkunatam kuyarqan, y pëkunarëkur wanunampaqmi listu këkarqan (Juan 13:1). Qampis Jesusnömi kallpachakunëki llapan mandayäshunqëkita alli cumplinëkipaq. Mandayäshunqëkita rurëta mana yacharqa, humildim kanëki y yanapayäshunëkipaqmi mayor kaqkunata mañakunëki. Ama ichik ruranqëkikunallawanqa conformakuytsu (Rom. 12:11). Tsëpa rantinqa, llapan mandayäshunqëkita cumpli, ‘Teyta Jehoväpaqnö rurë y ama nunakunapaqnöqa’ (Col. 3:23). Y yarpänëkim jutsasapa kanqëkita, tsëmi humildi kanëki y imatapis pantarninqa manam jukkunataqa culpatsanëkitsu (Prov. 11:2).

9. ¿Imanirtan jövin wawqikunaqa imëka rurëta yachakuyanman?

⁹ Diospa kaqchö poqu cristiänu këta munarqa, imëka rurëtam yachakunëki. Tsëkunata yachanqëkim yanapashunki congregacionchö yanapakunëkipaq, gastuykikunapaq trabäjuta tarinëkipaq, tsë trabäjullachö atska tiempu kanëkipaq, familiëkita manteninëkipaq y wakinkunawan alli kawakunëkipaq. Wakinllata rikärishun.

10, 11. ¿Imanirtan qellqëta y leyita yachanqanqa kikin jövinpaq y congregacionpaqpis alli kanqa? (Salmus 1:1-3; rikäri fötuta).

¹⁰ Leyita y qellqëta alli yachakuy. Diospa Palabranta cada junaq leyeq y tsë leyinqanman  pensaq nunaqa, kushishqa kanqanta y llapan ruranqampis alli yarqunqantam Bibliachöqa nin (leyi Salmus 1:1-3). Diospa Palabranta leyirmi Jehovä imanö pensanqanta musyan, y tsëmi yanapanqa imata rurëta munarpis alliraq pensanampaq (Prov. 1:3, 4). Tsënö pensëta yachaq ollqukunatam congregacionchöqa wanantsik. ¿Imanir?

¹¹ Congregacionchö wawqi panikunaqa yachatsiyänanta y Bibliawan consejayänantam wanayan (Tïtu 1:9). Tsëmi leyita y qellqëta yacharqa shumaq yachatsikuyta puëdinki, reunionkunachö parlakuyta puëdinki y wakinkunatam Jehoväman mas markäkuyänampaq o yärakuyänampaq yanapëta puëdinki. Tsënöllam estudiarpis, reunionkunachö y asamblëakunachö yachatsikayämuptimpis apuntëta puëdinki. Tsëmi yanapashunki Jehoväman mas markäkunëkipaq, y wakinkunatapis yanapanëkipaq.

12. ¿Imaraq yanapashunki wakinkunawan shumaq parlanëkipaq?

¹² Wakinkunawan shumaq parlëta yachakuy. Ollqu kaq cristiänukunapaqqa wakinkunawan shumaq parlëta yachayänanqa alläpam precisan. Parlapäyaptinmi shumaq wiyayänan, imata pensayanqanta y imanö sientikuyanqantam entiendiyänan (Prov. 20:5). Tsëmi wakinkunawan parlarqa imanö parlapäshunqëkita, cäran imanö këkanqanta y cuerpunta imanö kuyutsinqanta alkäbu kanëki. Tsëtaqa yachakunki pëkunawan mas tiempu parlakurninmi. Peru Internetllapa, celularllapa o mensäjillapa parlaparninqa, manam imata pensayanqanta ni imanö sientikuyanqanta musyëta puëdinkitsu. Tsëmi kikinkunawan tinkur parlanëkipaq kallpachakunëki (2 Juan 12).

13. ¿Ima mastataq jövin wawqikuna yachakuyanman? (1 Timoteu 5:8; rikäri fötuta).

¹³ Kikiki mantenikuyta yachakuy. Diospa kaqchö poqushqa cristiänukunaqa manam wakinkuna manteniyänanta shuyaräyantsu y kikinkunam familiankunatapis manteniyan (leyi 1 Timoteu 5:8). Wakin nacionkunachö jövinkunaqa imëka rurëtapis papäninkunapita o wakin familiankunapitam yachakuyan. O wakinkunaqa rurëta gustayanqankunatam juk ishkë wata estudiariyan. Imanö kaptimpis, wananqëkikunapaq tarinëkipaqqa ima rurëllatapis yachakunëkim (Hëch. 18:2, 3; 20:34; Efes. 4:28). Alli trabajë y ruranëkipaq kaqkunataqa ushanqëkiyaq rurë, ama ichik ichik rurapärirllaqa dejaritsu. Tsënöpam wakinkunaqa alli trabajaq nunatanö reqiyäshunki, trabäjutapis mas rasmi tarinki y manam qarquriyäshunkitsu. Këchö imanö kanëkipaq y imakunata ruranëkipaq yachakunqantsikkunam yanapashunki, warë warantin imata  rurarpis alli cumplinëkipaq. ¿Imakunachötan yanapashunki? Rikärishun.

14. ¿Imaraq juk jövin wawqita yanapanqa Jehoväta llapan tiempunwan sirwinampaq?

¹⁴ Jehovätam llapan tiempuykiwan sirwita puëdinki. Kanan witsan Diospa kaqchö mëtsikaq poqushqa cristiänukunaqa, jövin kayanqampitam precursor regular kayarqan. Precursor karninqa, tukuyläya wawqikunawanmi trabajëta yachakunki y qellënikitapis manam llutaqa gastankitsu (Filip. 4:11-13). ¿Imanirtan precursor auxiliar kankitsu? Tsëmi yanapashunki precursor regular kanëkipaq. Y precursor regular karnam juk rurëkunachöpis llapan tiempuykiwan yanapakuyta puëdinki. Capaz yanapakunkiman Diosnintsikta adoranantsik wayikuna rurëchö o Betel wayikunachö.

15, 16. ¿Imatataq juk jövin wawqi ruranman siervu ministerial o anciänu kanampaq?

¹⁵ Siervu ministerial o anciänu këtam puëdinki. Bautizakushqa llapan ollqukunam kallpachakuyänan congregacionchö anciänu kayänampaq. Anciänu karnin wawqi panikunata yanapayänampaq kallpachakoqkunapaqqa Bibliachö nin, ‘alläpa alli rurëta’ rurëkäyanqantam (1 Tim. 3:1). Anciänu kanëkipaqqa puntataqa siervu ministerialnam kanëki. Siervu ministerialkunaqa anciänukunatam imëka rurëchö yanapayan. Anciänukuna y siervu ministerialkunaqa wawqi panikunatam humildäwan yanapayan y Diospitam gänas gänaslla yachatsikuyan. Juk jövinqa, siervu ministerialkunapaq Biblia ninqanta cumplirqa, 17 o 19 watayoqlla këkarpis siervu ministerial këtam puëdin. Y siervu ministerialkunanam 20 watayoqlla këkarpis anciänu këta puëdiyan.

¹⁶ Siervu ministerialkuna y anciänukuna imanö kayänampaqqa Bibliachömi willakun. Bibliachö mandakunqantaqa cumpliyänan, masqa Jehoväta, familiankunata y wawqi panikunata kuyarmi (1 Tim. 3:1-13; Tïtu 1:6-9; 1 Pëd. 5:2, 3). Siervu ministerial o anciänu këta munarqa, pëkunapaq Bibliachö imata mandakunqantam cada ünuta entiendinëki y mëqantapis cumplita mana puëdirqa yanapashunëkipaqmi Jehoväta mañakunëki. c

17. ¿Imanötan jövin wawqikunaqa alistakuyanman alli qowa y familianta alli dirigeq kayänampaq? (Rikäri fötuta).

¹⁷ Casakuyta y familiëkipaq alli dirigeqnin këtam puëdinki. Jesus ninqannöpis wakin wawqikunaqa soltërullaraq këtam decidiyan (Mat. 19:12). Peru casakuyta decidirqa,  alli qowa o runa y familiëkita alli dirigeq kanëkipaqmi kallpachakunëki (1 Cor. 11:3). Jehoväqa shuyaran qowakuna warminkunata kuyayänanta, wanayanqankunapaq trabajayänanta, kushishqata sientikatsiyänanta y Diospa kaqchö yanapayänantam (Efes. 5:28, 29). Këchö yachakurinqantsiknömi, alli qowa o runa kanëkipaq y familiëkita alli diriginëkipaqqa yanapashunki, alli pensëta yachanqëki, warmikunata respetanqëki y confiakuypaq kanqëki.

18. ¿Imanötan juk jövin wawqi kananllapitana alli papä këta yachakunman?

¹⁸ Wamrayoq këtam puëdinki. Casakuptikiqa, capazchi wamrëkipis karinqa. Tsëmi alli papä kanëkipaqqa, Jehovä imanö kanqampita yachakunqëki yanapashunki (Efes. 6:4). Jehoväqa manam penqakurqantsu Tsurin Jesusta, “këmi kuyë Tsurï, pëpaqmi alläpa kushikü” nita (Mar. 1:11). Papä karqa yachakunëkim wamrëkikunata “kuyaqmi” nita, y allikunata rurayanqampitam felicitänëki. Jehovä imanö kanqampita yachakoq papäkunaqa wamrankunatam yanapayan Diospa kaqchö poqu cristiänu kayänampaq. ¿Imanötan kananllapitana yachakunkiman alli papä kanëkipaq? Familiëkita y wawqi panikunatam kuyanëki y kuyanqëkitam rikätsikunëki y valoranëkim (Juan 15:9). Tsënö kuyakoq kanqëkiqa manam casakuptikillatsu ni wamrayoq kaptikillatsu yanapashunki, tsëpa rantinqa kananllapitanam Jehoväqa imëkachöpis yanapakunëkita permitishunki y familiëkipaq y congregacionpaqpis juk bendicionmi kanki.

19, 20. ¿Imatataq juk jövin wawqi ruranman Diospa kaqchö poqu cristiänu kanampaq? (Rikäri jana qaranchö këkaq fötukunata).

¹⁹ Jövin, manam watakuna pasaptinllatsu poqu cristiänu këman chanki. Tsëpaqqa, poqu cristiänukunapitam alli pensëta, confiakuypaq këta y imëka rurëta yachakunëki. Y imëka carguchö yanapakunëkipaqmi kananllapitana alistakunëki.

²⁰ Capazchi llapan ruranëkipaq kaqkunaman pensarqa, rurëta mana puëdinëkipaq kaqta pensanki. Peru ama qelanäkuritsu, ¡logrëta puëdinkim y Jehovämi yanapashunki! (Is. 41:10, 13). Congregacionchö wawqi panikunapis yanapayäshunëkipaqmi listu këkäyan. Jehovä munanqannö nuna karqa, imëpis kushishqam kawakunki. Jövin wawqillä, alläpam kuyayaq y poqu cristiänu kanëkipaq llapan kallpachakunqëkichö Jehovä bendecïkushunëkitam munayä (Prov. 22:4).