1. ¿Imanirtan Abrahan shuyaranqanqa següru cumplikänan karqan?

 JEHOVÄMI amïgun Abrahanta änishqa karqan, juk kastan kanampaq y tsë kastanwan Patsachö llapan nunakunata bendicinampaq (Gen. 15:5; 22:18). Abrahanqa Jehovä Diosman alli markäkur o yärakurmi äninqanta cumplinampaq kaqta següru karqan. Tsënö següru këkarpis, Abrahanqa 100 watayoqnam karqan y warminnam 90 watayoq karqan y wamrankunaqa manam karqantsu (Gen. 21:1-7). Peru Bibliachömi Abrahanpaq kënö nin: “Markäkurmi o yärakurmi mëtsika nunakunapa awilun këta shuyararqan, Teyta Dios [...] nishqa kanqannö” (Rom. 4:18). Abrahan shuyaranqanqa cumplikarqanmi; wamran Isaacmi yurikurqan. Peru ¿imanirtan Abrahanqa Jehovä äninqan cumplikänampaq kaqta següru karqan?

2. ¿Imanirtan Abrahanqa següru karqan Jehovä äninqan cumplikänampaq kaqta?

² Abrahanqa Jehovä Diostam alli reqeq y äninqanta cumplinampaq kaqtam ‘següru karqan’ (Rom. 4:21). Pëman markäkuptinmi o yärakuptinmi, Jehoväqa Abrahanpaq nirqan alli ruraq kanqanta y amïgun kanqanta (Sant. 2:23). Romänus 4:18 ninqannömi, shuyaranqankuna cumplikanqanta següru kanampaqqa, Abrahantaqa markäkoq kanqan yanaparqan. Kananqa yachakurishun, Diosnintsik änikunqankunata shuyarëpaq Romänus librupa pitsqa kaq capïtulun ninqanta.

3. ¿Imanötan apostol Pablu entienditsikurqan Diosnintsik änikunqanta shuyarëpaq?

³ Pabluqa entienditsikurqan, Diosnintsik änikunqanta shuyaranqantsikpita mana llakikunapaq kaqtam (Rom. 5:5). Tsënöllam entienditsimantsik, tiempu pasanqanmannö Diosnintsik änikunqanta mas shuyaränapaq kaqta. Kananqa yachakurishun Romänus 5:1 a 5 textupita, y tsëta yachakuykar pensashun änikunqankunata cumplimunampaq kaqman mas següru kanapaq imanö yanapamanqantsikta. Tsënöllam yachakushun,  maslla shuyaränantsikpaq imata ruranantsikpaq kaqta. Peru puntataqa yachakurishun, shuyaranqantsikpita imanir mana llakikunapaq kaqta apostol Pablu parlanqanta.

4. ¿Imapaqtan Romänus 5:1 y 2 textuchö parlan?

⁴ (Leyi Romänus 5:1, 2). Apostol Pabluqa Römachö këkaq cristiänukunatam tsënö parlaparqan. Pëkunaqa Jehoväpita y Jesuspita yachakurirmi, markäkuyarqan o yärakuyarqan y cristiänu tikrayarqan. Tsënö markäkoq kayanqampitam Diosnintsikqa alli ruraq nunatanö rikarqan y santu espïritunwan akrarqan. Tsëpita patsëqa, Diosnintsik änikunqankunatam shuyaräyarqan y shuyaräyanqanqa cumplikänanmi karqan.

5. ¿Imatataq ciëlupaq akrashqakuna shuyaräyan?

⁵ Tsëpita tiempuwannam apostol Pabluqa, Ëfesu congregacionchö ciëlupaq akrashqakunata nirqan imata shuyaräyanqanta. Pëqa nirqan “limpiu nunakunapaq alli bendicionkunata herenciatanö” chaskiyänampaq kaqtam (Efes. 1:18). Y tsë bendicionta mëchö chaskiyänampaq kaqtanam, Colösas congregacionchö cristiänukunata kënö nirqan: “Tsëtaqa rurëkäyanki qamkunapaq ciëluchö këkaq bendicionta shuyararmi” (Col. 1:4, 5). Rikärinqantsiknömi, ciëlupaq akrashqakunaqa kawariramurnin imëyaqpis ciëluchö kawëta shuyaräyan, tsëchömi Cristuwan gobernayanqa (1 Tes. 4:13-17; Apoc. 20:6).

6. Ciëlupaq akrashqa juk wawqiqa ¿ima nirqantan shuyaranqampaq?

⁶ Ciëlupaq akrashqa cristiänukunaqa shuyaräyanqanta alläpam valorayan. Këllaman pensarishun: 1991 watachömi Frederick Franz wawqi kënö nirqan: “Shuyaräyanqäqa cumplikanqam, y llapäkuna 144.000 nunakunapaqmi cada ünupaq cumplikanqa y pensayanqäpitapis masmi kanqa”. Y mëtsika watapa Jehoväta mana dejëpa sirwirnin, ¿imanötan sientikurqan? Kikinmi kënö nin: “Shuyaräyanqätaqa manam qonqayarqötsu. Tsëpa rantinqa, [...] kananqa imëpitapis masmi valorayä. Tsëtaqa manam imëpis qonqayämantsu,  mëtsika millon watakunapis shuyarëkäyäshaqllam. Kananqa imëpitapis masmi tsë shuyaräyanqäta valorä”.

7, 8. ¿Mëchö kawakuytataq Diosnintsikpa mëtsika sirweqninkuna shuyaräyan? (Romänus 8:20, 21).

⁷ Jehoväpa mëtsika sirweqninkunam, Diosnintsikpa Gobiernun gobernamuptin, Abrahannöpis kë Patsachö imëyaqpis kushishqa kawakuyta shuyaräyan (Heb. 11:8-10, 13). Tsëpaqmi apostol Pablupis parlarqan (leyi Romänus 8:20, 21). Bibliapita yachakur qallaptikiqa, ¿Diosnintsik imata änikunqantan masqa gustashurqëki? ¿Nunakuna jutsapita libri kayänampaq y jutsannaqna kayänampaq kaqku? ¿Kushikurqëkiku kuyashqa kastëkikuna y amïguykikuna kawarkamurnin Shumaq Patsachö kawayänampaq kaqta musyarir? Diosnintsik tsëkunata änikushqa kaptinmi, alläpa shumaq kawakuyta shuyarëkanki.

⁸ Llapantsikmi ciëluchö o kë Patsachö karpis, mana wanuypa shumaq kawakuyta shuyarantsik. Tsë shuyaranqantsikmanqa tiempu pasanqanmannömi maslla confiakuyta puëdintsik. ¿Imatataq rurashwan cumplikänampaq kaqman maslla confiakunapaq? Tsëta musyanapaqqa apostol Pablu qellqanqanmi yanapamäshun. Tsëchö parlanqanmi yanapamäshun, Diosnintsik änikunqankunata shuyaranqantsikpita mana llakikunapaq y cumplikänampaq kaqta següru kanapaq.

9, 10. ¿Imakuna pasamänapaq kaqtataq apostol Pablunöpis musyantsik? (Romänus 5:3; rikäri fötukunata).

⁹ (Leyi Romänus 5:3). Apostol Pabluqa nirqan, imëka problëmakunapa pasanqantsikqa Diosnintsik änikunqankunata cumplimunampaq kaqman maslla confiakunapaq yanapamanqantsiktam. Rasumpa kaqchöqa, llapan cristiänukunam imëka problëmakunapa pasantsik. Tesalönica congregacionchö cristiänukunata Pablu ninqanllaman pensarishun. Kënömi nirqan: “Qamkunawan këkarqa, imëka sufrimientukunapa pasanantsikpaq kaqtam niyarqaq, y musyayanqëkinöpis tsënömi pasashqa” (1 Tes. 3:4). Y Corintuchö  cristiänukunatanam kënö nirqan: “Asia provinciachö këkar sufrimientukunapa pasayanqäta musyayänëkitam munayä [...]. Tsëchöqa aguantëta puëdiyanqäpitapis masmi sufriyarqä, tsëmi kawayänäpaq o mana kawayänäpaq kaqtapis musyayarqätsu” (2 Cor. 1:8; 11:23-27).

¹⁰ Kanan tiempupis cristiänukunaqa musyantsikmi imëka mana allikunapa pasanapaq kaqta (2 Tim. 3:12). ¿Ima problëmakunapatan pasarqunki Jesusman markäkunqëkipita y mandakunqannö kawanqëkipita? Capazchi amïguykikuna o familiëkikuna qampita burlakuyashqa, o mana alli tratayäshurqunki. ¿Honrädu kanqëkipitaku trabäjuchö problëmapa pasarqunki? (Heb. 13:18). ¿Diosnintsik änikunqankunata yachatsikunqëkipitaku autoridäkuna chikiyäshunki? Imëka mana allikunapa pasarpis, Pablu ninqannömi kushikunantsik. Peru ¿imanirtan kushikushwan?

11. ¿Imanirtan problëmakunapa pasarnin alli aguantanapaq decidïdu këkänantsik?

¹¹ Problëmakunapa pasarninqa kushikuntsik, alli aguantanapaq Dios yanapamänapaq kaqta musyarmi. Romänus 5:3 textuchömi kënö nin: “Noqantsikqa musyantsikmi sufrimientukunapa pasanqantsikqa, alli aguantanapaq yanapamanqantsikta”. Cristiänukunaqa musyantsikmi mana allikunapa pasanapaq kaqta, tsëmi aguantanapaq decidïdu këkänantsik. Alli aguantarllam Diosnintsik änimanqantsik bendiciontaqa chaskishun. Manam Jesus parlanqan rumi rumi chakraman ishkeq muru cuenta nunakunanöqa këta munantsiktsu. Tsë nunakunanömi wakin nunakunaqa Diosnintsikpita shumaq yachakurirpis, problëmakunapa pasayanqan hörakunaqa Diosnintsikta sirwita dejariyan (Mat. 13:5, 6, 20, 21). Problëmakunapa pasëtaqa manam gustantsiktsu, peru tsëkunapa pasanqantsikmi yanapamantsik alli aguantanapaq. Këpita maslla parlarishun.

12. ¿Imanötan yanapamantsik alli aguantanqantsik?

¹² Discïpulu Santiägum nirqan aguantanqantsikqa alläpa yanapamanqantsikta. Kënömi nirqan: “Alli tsarakuyanqëkiqa logranampaq kaqta logratsun, tsënöpa llapanchö complëtu y alli kayänëkipaq, y imachöpis mana pishipäyänëkipaq” (Sant. 1:2-4). Tsëqa, ¿imanötan yanapamantsik alli aguantanqantsik? Mas pacienciayoq kanapaq, Diosnintsikman markäkunapaq o yärakunapaq y pëman mas confiakunapaqmi. Peru ¿ima maskunachötan alli aguantanqantsik yanapamantsik?

13, 14. Problëmakunapa pasar alli aguantashqaqa, ¿imanötan Diosnintsik rikämantsik, y imanötan aguantanqantsik yanapamantsik Dios änimanqantsikta mas shuyaränapaq? (Romänus 5:4).

¹³ (Leyi Romänus 5:4). Apostol Pabluqa nirqan, problëmakunapa pasarnin alli aguantanqantsikqa “Teyta Diospa rikëninchö alli kanapaq” yanapamanqantsiktam (Rom. 5:4). Tsëwanqa manam problëmakunapa pasashqa Jehovä kushikunqantatsu nikantsik, sinöqa aguantanqantsikpita kushikunqantam. ¿Manaku alläpa kushikuntsik mana dejanqantsikpita y alli aguantanqantsikpita Jehovä kushishqa kanqanta musyar? (Sal. 5:12).

¹⁴ Abrahanllaman pensarishun. Pëtaqa imëka problëmakunapa pasar alli tsarakunqampitam, Diosnintsikqa alli ruraq nunatanö y amïguntanö rikarqan (Gen. 15:6; Rom. 4:13, 22). Tsënömi noqantsikwampis pasanqa. Diosnintsikpa rikënimpaqqa alli kashun, manam pëpaq llapan ruranqantsikpitatsu ni congregacionchö ima carguyoqpis kanqantsikpitatsu, sinöqa mana allikunapa pasarnin alli aguantanqantsikpita y pëta mana dejanqantsikpitam. Y tsëtaqa llapantsikmi rurëta puëdintsik; ima edäyoq karpis, imëka problëmapa pasarpis o ima rurëta yacharpis o mana yacharpis. ¿Kanan höraku  imëka problëmapa pasëkanki? Alli tsarakuptikiqa, Jehovämi amïguntanö rikäshunki. Imëka problëmakunapa pasar alli tsarakunqantsikpita, Jehovä kushishqa këkanqanta musyarqa, änimanqantsikkunatam maslla shuyaräshun.

15. ¿Imanö mastan apostol Pablu entienditsikurqan y imatataq capaz tapukushwan?

¹⁵ Rikärinqantsiknömi, apostol Pabluqa nirqan mana allikunapa pasar aguantarninqa, Diospa rikëninchö alli kanantsikpaq kaqta. Peru kananqa kënö ninqanman pensarishun: “Diospa rikëninchö alli kanqantsiknam, änikunqanta shuyänapaq yanapamantsik, y änikunqanta shuyararqa manam llakikushuntsu” (Rom. 5:4, 5). Tsëta manaraq nirmi, Romänus 5:2 textuchö romänu cristiänukunata apostol Pablu kënö nirqan: “Teyta Diospita puëdeq këta chaskinantsik tiemputa shuyararmi alläpa kushikuntsik”. Tsënö ninqanman pensar capazchi kënö tapukushwan: “Tsë cristiänukunaqa Dios änikunqanta shuyarëkäyarqannam, tsëqa, ¿imanirtan Pabluqa nirqan Dios änikunqanta yapë shuyaräyänampaq?”.

16. ¿Imanötan juk nuna maslla creinman Bibliachö Dios änikunqan rasumpa cumplinampaq kaqman? Willakaramuy. (Rikäri fötukunata).

¹⁶ Apostol Pabluqa entienditsikurqan Dios änikunqankuna cumplikänampaq kaqman tiempu pasanqanmannö mas confiakunapaq kaqtam. Këllaman pensarishun: capazchi pillapis Biblia willakunqankunata manaraq musyaptiki parlapäshurqëki kë Patsa juk Shumaq Patsaman tikranampaq kaqta. Capazchi tsëta wiyarirqa, cumplikänampaq kaqta creirqëkillatsu. Peru Jehoväpita mas yachakur y änikunqankunata Bibliachö mas leyirqa, capazchi creir qallëkurqëki tsë änikunqankuna rasumpa cumplikänampaq kaqta.

17. Bautizakunqëki witsampitaqa, ¿mas segürunaku kanki änikunqankunata Diosnintsik cumplimunampaq kaqta?

¹⁷ Bautizakurinqëkipitaqa Diospita mas yachakur y mas alli cristiänu tikrarmi Diosnintsik änikunqankunataqa maslla shuyaranki (Heb. 5: 13–6:1). Capazchi Romänus 5:2 a 4 ninqannö, imëka mana allikunapa pasarqunki y tsëkunachö alli aguantarnin cuentata qokurqunki Jehoväpa rikëninchö alli këkanqëkita. Tsëta musyarmi, änikunqankunata cumplimunampaq kaqmampis maslla confiakunki. Kananqa Diosnintsik änikunqankuna rasumpa cumplinampaq kaqtam llapan shonquykiwan creinki, y tsënö creinqëkitaqa cada junaq kawanqëkichömi rikätsikunki. Këllaman pensarishun: familiëkitam mas alli tratanki, imata decidirpis Jehovätaran puntata yarpanki y tiempuykitapis Jehoväta sirwinëkipaqmi alli patsätsinki.

18. ¿Imanötan Jehoväqa änikunqanta cumplinampaq kaqta seguramantsik?

¹⁸ Änikunqanta shuyaränapaq Diospa rikëninchö alli kanqantsik yanapamanqantsikta nirirmi, apostol Pabluqa nirqan tsë shuyaranqantsikqa cumplikänampaq kaqta. Tsëta segurarmi cristiänukunata kënö nirqan: “Änikunqanta shuyararqa manam llakikushuntsu. Awmi, Teyta Diosqa kuyamanqantsikta musyanapaqmi, santu espïritunta chaskinantsikta permitishqa” (Rom. 5:5). Tsënö ninqanwanmi següru këkantsik shuyaranqantsikqa rasumpa cumplikänampaq kaqta.

19. ¿Imapitataq següru këkantsik?

¹⁹ ¿Shuyaranqantsikqa cumplikanqatsuraq? Jehovämi Abrahanta änirqan bendicinampaq, tsëpitanam alli nunatanö rikarqan y amïgun karqan. Y Abrahan shuyaranqanqa cumplikarqanmi. Diospa Palabranmi kënö nin: “Abrahanqa pacienciawan shuyaranqampita[m] tsë änikuyta chaskirqan” (Heb. 6:15; 11:9, 18; Rom. 4:20-22). Noqantsikpis Jehovä Diosnintsikta Abrahannö mana dejëpa sirwirqa, manam änikunqanta shuyaranqantsikpita llakikushuntsu. Diosnintsikqa llapan änikunqantam cumplimunqa. Shuyaranqantsikqa rasumpam kanqa, y tsëta musyarmi kushishqa sientikuntsik (Rom. 12:12). Apostol Pablum kënö nirqan: “Änikunqanta shuyaräyänëkipaq yanapayäshoqniki Teyta Dios, pëman markäkuyanqëkirëkur o yärakuyanqëkirëkur, llapan shonquykikunawan kushikuyänëkipaq y yamë kayänëkipaq yanapëkuyäshuy, tsënöpa santu espïritu yanapayäshuptiki änikunqanman masraq confiakuyänëkipaq” (Rom. 15:13).