¿Ultimu yarqamoq Täpakoq revistakunata leyirqunkiku? ¿Puëdinkimantsuraq kë tapukuykunata contestëta?:

Pensënintsikta cambianapaqqa, ¿imatataq ruranantsik? (Rom. 12:2).

Manam nunakuna rikäyänanllapaqtsu allikunata ruranantsik. Tsëpa rantinqa, shonquntsikchö imanö kanqantsiktam cambianantsik, tsënöpa Jehoväpa rikënimpaq alli kanapaq. Tsëtaqa seguïdum ruranantsik (w23.01, päginakuna 8 y 9).

Biblia willakunqankuna cumplikëkanqampaq piwampis parlarninqa, ¿imanirtan cuidakunantsik y imatataq ruranantsik?

Imëkapis pasakunqankunata rikarqa, Biblia willakunqannölla pasakuykanqanta o mana pasakuykanqantam musyëta munantsik. Peru wawqi panintsikkunata juknöpa mana pensaratsinapaqmi, Biblia willakunqankuna cumplikëkanqampaq parlarqa cuidakunantsik. Publicacionkuna nimunqantam mas alkäbu kanantsik. Jehoväpa sirweqninkunata dirigeqkuna niyämunqannölla parlarqa, ‘juk pensëyoqllana’ kayänampaqmi wawqi panintsikkunata yanapashun (1 Cor. 1:10) (w23.02, pägina 16).

¿Imachötan jukläya Jesus bautizakunqanwan discïpulunkuna bautizakuyanqan?

Dios akranqan markachönam Jesusqa yurikurqan y Jehovällapaqnam karqan, tsëmi Jehovällatana sirwinampaq änikunanqa precisarqannatsu. Jesusqa jutsannaq nunam karqan, tsëmi precisarqannatsu arrepentikunan (w23.03, pägina 5).

¿Imatataq rurashwan reunionchö mas atskaq wawqikuna y panikuna parlakuyänampaq?

Wallkallata parlakunantsikpaqmi preparakushwan. Tsënöpam wakinkuna parlakuyänampaqpis tiempu tinkunqa. Tsënöllam atska asuntukunapitaqa parlashwantsu (w23.04, pägina 23).

¿Imatan Isaïas 35:8 textu parlanqan ‘Limpiu näniqa’?

Judïukunapaqqa, tsë näniqa kaq, Babiloniapita Israelman ëwaq nänim. Y kanan tiempuqa, ¿imatan tsë näni? 1919 watapaq mëtsika watakuna pishikaptinmi, Jehoväqa pëta kuyaq nunakunata utilizarqan tsë limpiu nänita alistayänampaq, tsëtaqa rurayarqan Bibliata traducir y imprimirmi. Noqantsikpis tsë ‘Limpiu Nänichö’ pureq cuentam këkantsik. Tsë nänichö karmi, Jehoväta shumaq adorëta puëdintsik, y shamoq tiempuchönam Gobiernun gobernamuptin mëtsika bendicionkunata chaskishun (w23.05, päginakuna 15 a 19).

¿Imanö warmikunapaqtan Proverbius librupa 9 kaq capïtulun parlan?

Proverbius librupa 9 kaq capïtulunqa ishkaq warmikunapaqmi parlan. Juk kaqqa imatapis mana entiendeq këtam rikätsikun, tsë warmi invitanqanta cäsukoqkunaqa, wanushqa o wañushqa cuentanam këkäyan. Juk kaq warmiqa yachaq këtam rikätsikun, tsë warmi invitakunqanta chaskikoqkunaqa kushishqam kawakuyan, y shamoq tiempuchöpis mana wanuypam kushishqa kawakuyanqa (Prov. 9:1, 6, 13, 18) (w23.06, päginakuna 22 a 24).

¿Imanötan humildi y llakipäkoq kanqanta Jehovä rikätsikurqan Lot-ta tratanqanchö?

Jehoväqa Sodöma markata ushakätsinan kaptinmi, Lot-ta mandarqan jirkakunapa qeshpir ëwakunampaq. Peru Lotqa Zoar markata ëwakuyänampaqmi mañakurqan. Tsëmi Jehoväqa Zoarta ëwakuyänanta permitirqan (w23.07, pägina 21).

¿Imatataq rurankiman qowëki o runëki pornografïata rikaptin?

Ama pensëtsu culpayoq kanqëkita. Tsëpa rantinqa Jehoväwan amïgu kanëkipaq kallpachakuy. Bibliachömi willakun, mana allikunapa pasarnin alläpa llakikoq warmikunapaq, peru imanö këkäyanqanta Jehoväta willarirqa mas tranquïlunam sientikuyarqan, y pëkunapitam yachakunkiman. Qowëkita o runëkita yanapë pornografïata rikëman yapë mana ishkinampaq (w23.08, päginakuna 14 a 17).

¿Imanötan alli pensëta yachanqantsik yanapamantsik creenciantsikkunapita mana allita parlayaptimpis mana cölerakunapaq?

Tapumanqantsikpita ofendikunantsikpa o creinqantsikpita burlakuykanqanta pensanantsikpa rantinmi, yarpachakurnin tapuykämanqantsikta cuentachö katsinantsik. Tsëmi yanapamäshun respëtuwan y tranquïlu contestanapaq (w23.09, pägina 17).

¿Imatataq yachakuntsik wakinkuna yanapayänanta Marïa permitinqampita?

Diospa Akrashqanta qeshpikunampaq kaqta musyarirmi, Marïaqa wakinkuna yanapayänanta permitirqan. Angel Gabrielwan Elisabetmi Diospa Palabranwan animayarqan. Tsënöllam noqantsiktapis wawqi panintsikkuna yanapamäshun (w23.10, pägina 15).

¿Imanötan Jehoväqa mañakunqantsikta contestamun?

Jehoväqa mañakunqantsikta wiyanampaqmi änimarquntsik, peru contestamunampaqqa imata rurëta munanqantam cuentachö katsin (Jer. 29:12). Tsë asuntullapaq mañakuyaptin juknöpa juknöpa contestamurpis yanapamäshunmi (w23.11, päginakuna 21 y 22).

Romänus 5:2 textuchö Dios änikunqampaq parlëkarqa, ¿imanirtan chusku kaq versïculuchöqa tsë asuntupaq yapë parlan?

Alli noticiakunapita parlapäriyaptinqa, capazchi juk nuna shumaq Patsachö kawëta shuyaranman. Peru imëka mana allikunapa pasar, aguantar y pëwan Jehovä kushishqa këkanqanta musyarmi, Dios änikunqan cumplikänampaq kaqmanqa masraq llapan shonqunwan confiakun (w23.12, päginakuna 12 y 13).