Apostol Pablum anciänu mayin Timoteuta kënö nirqan: “Teyta Diospa, Cristu Jesuspa y akrashqa angelkunapa rikëninchömi alli cläru mandaq, pimampis mana qaqashpa y llapankunata igualpa rikar, tsë ninqäkunata cäsukunëkipaq” (1 Tim. 5:21). Tsë ‘akrashqa angelkunaqa’, ¿pikunatan kayan?

Tsënö nirqa, ¿144 mil nunakunapaqtsuraq parlëkarqan? Manachi. Timoteuman Pablu cartakunqan witsanqa, manam ciëlupaq akrashqakunaqa kawariyämurqanraqtsu ni manam apostolkuna ni ciëlupaq wakin akrashqakunapis ciëluta ëwayarqanraqtsu. Tsëmi nintsik ‘akrashqa angelkunaqa’ 144 mil nunakuna mana kayanqanta (1 Cor. 15:50-54; 1 Tes. 4:13-17; 1 Juan 3:2).

¿O Diluviu witsanchö Diospa contran churakaq angelkunapaqtsuraq parlëkarqan? Manachi. Tsë angelkunaqa Satanastam yanapayarqan y demoniuman y Jesuspa chikeqninmanmi tikrayarqan (Gen. 6:2; Lüc. 8:30, 31; 2 Pëd. 2:4). Y shamoq tiempuchöqa, mankarëkaq uchkuman jitarkurmi tsë angelkunata mil watapa Jesus llawirätsinqa o wichqarätsinqa. Tsëpitanam Satanastawan juntu ushakäratsinqa (Jüd. 6; Apo. 20:1-3, 10).

1 Timoteu 5:21 textuchö ‘akrashqa angelkunapaq’ parlanqanchöqa, Teyta Diospaq y Jesucristupaqpis Pabluqa parlarqanmi. Tsëwanmi cuentata qokuntsik yanapakoq alli angelkunapaq parlëkanqanta.

Ciëluchöqa yupëtapis mana puëdipaq mëtsikaq alli angelkunam kayan (Heb. 12:22, 23). Y manam pensanantsiktsu Jehovä imatapis mandakuptinqa, llapan angelkunaraq rurayanqanta (Apo. 14:17, 18). Alli yarpashqaqa, juk angel-llatam Jehoväqa mandarqan 185 mil asiriu soldädukunata wanutsinampaq (2 Rëy. 19:35). Y Jesus ninqanwanmi entiendintsik, ‘jutsaman ishkitseqkunata y mana allita ruraq nunakunata Gobiernumpita rakinampaq’ juk grüpu angelkuna carguyoq kayanqanta (Mat. 13:39-41). Wakin angelkunanachi ciëlupaq “akrashqankunata juntayanqa” (Mat. 24:31). Y wakin angelkunanachi Salmus 91:11 textu ninqannö, mana allikunapita tsapämänantsikpaq carguyoq kayanqa (Mat. 18:10; igualaratsi Mateu 4:11 y Lücas 22:43 textukunatawan).

1 Timoteu 5:21 textuchö ‘akrashqa angelkunapaq’ Pablu parlarqa, capazchi congregacionkunachö yanapakoq angelkunapaq parlëkarqan. Tsënöqa nintsik anciänukunapaq y pëkunata respetayänampaq parlëkarnin tsënö nishqa kaptinmi. ¿Imatataq këpita anciänukuna yachakuyanman? Anciänukunaqa, “pimampis mana qaqashpa y llapankunata igualpa” rikarmi llapan rurayänampaq kaqkunata alli cumpliyänan, y alliraq mana musyapakurqa manam imatapis decidiyänantsu. ¿Imanirtan tsënö nintsik? Apostol Pablum anciänukunapaq nirqan “Teyta Diospa, Cristu Jesuspa y akrashqa angelkunapa” rikëninchö trabajëkäyanqanta. Tsënö nirqa nikan, llapan rurayanqanta Teyta Jehovä, Jesucristu y angelkuna rikëkäyanqantam. Tsënö ninqanwanmi cläru entiendintsik, congregacionkunachö yanapakuyänampaq angelkuna carguta chaskishqa kayanqanta. Tsë angelkunam Diospa sirweqninkunata cuidayan, yachatsikuyänampaq yanapayan y imatapis rikäyanqankunata Jehoväta willayan (Mat. 18:10; Apo. 14:6).