1-3. (1) ¿Imanirtaq alläpa precisaq karqan 33 wata Pentecostes fiesta? (2) ¿Profëta Joel imata willakunqantaq tsë junaqchö cumplikärirqan? (Rikäri kë yachatsikïpa qallananchö këkaq dibüjuta.)

ALLÄPA precisaq y kushikïpaq junaqmi karqan, porqui Pentecostes fiestatam Jerusalenchö celebrëkäyarqan. Tsë junaqqa karqan 33 wata domingu qoyam. Cada wata trïgu cosëcha qallariptinmi tsë fiestataqa celebrayaq. Mandakoq sacerdötiqa imëpis apayanqan sacrificiutam rurar qallëkurqan. Tsëpitanam las nuëvimampanö, punta yarqoq trïgupita rurashqa ishkë tantakunata sacrificiuta rurarqan. Tsë tantakunata Jehoväta qonampaqqa, sacerdötiqa wakman këmanmi kuyutseq (Levïticu 23:15-20).

² Unë witsankunapitam costumbri kaq ishkë tantakunata Jehoväta qoyänan. Tsë qarëqa shamoq tiempuchö juk precisaq pasakunampaq kaqtam rikätsikoq. Y tsë pasakunampaq kaqqa cumplikärirqan 33 wata Pentecostes fiestachömi. Tsë junaqmi Jerusalenchö Jesuspa 120 discïpulunkuna juk cuartuchö juntakëkur mañakïkäyarqan (Hëchus 1:13-15). Tsëchö  pasakunqanqa cumplikärirqan 800 wata unëna profëta Joel willakunqanmi (Joel 2:28-32; Hëchus 2:16-21). Peru ¿imataq pasakurqan?

³ (Leyi Hëchus 2:2-4.) Tsë 33 wata Pentecostes fiestachömi, Jesuspa 120 discïpulunkunata Jehovä santu espïritunwan akrarirqan (Hëchus 1:8) (rikäri “Maslla entiendinapaq” neq recuadruta). Tsënö akrarinqanchönam, mas tardipëpana mëtsikaq nunakuna discïpulukuna këkäyanqanman charnin qallëkuyarqan y discïpulukunaqa tsë rikäyanqampita y wiyayanqampitam willakur qallëkuyarqan. Apostol Pëdrum tsë nunakunata entienditsirqan tsë pasakunqanqa alläpa precisanqanta. Tsëpitanam kënö nirqan: “Mana alli rureniquicunata dejariyë, y bautisacuyë Jesucristurecur jutsequicunapita Dios perdonecuyäshunequipaq. Tsenam Santu Espirituta qamcunatapis qoycuyäshunqui”. Tsë junaqmi kima waranqanö nunakuna bautizakuyarqan y santu espïrituta chaskiyarqan (Hëchus 2:37, 38, 41, noqakunam yanayätsiyarqü).

4. (1) ¿Imanirtaq 33 wata Pentecosteschö pasakunqanta precisaqpaq churanantsik? (2) ¿Ima masraq unëpis tsë junaqllachö itsa pasakurqan? (Rikäri kë yachatsikïpa ushananchö këkaq willakïta.)

⁴ ¿Imatataq rikätsikoq qoyanqan tantawan mandakoq sacerdötiqa? Mandakoq sacerdötiqa Jesustam rikätsikoq. Y ishkan tantakunanam santu espïrituwan akrashqa Jesuspa discïpulukunata rikätsikoq. Pëkunam jutsasapa nunakunapita akrashqa kayarqan. Pëkunapaqmi Bibliaqa, “cosechacho punta caq miquino” kayanqanta nin (Santiägu 1:18). Diosmi wamrankunatanöna chaskishqa y ciëluchö Jesuswan Diospa Gobiernunchö mandakuyänampaqmi akrashqa (1 Pëdru 2:9, NM). Tsë gobiernutam Jehoväqa utilizanqa wiyakoq nunakunata imëka allikunata qonampaq. Tsëmi Shumaq Patsachö o ciëluchö kawanantsik kaptimpis 33 wata Pentecosteschö pasakunqanta precisaqpaq churanantsik ^[1] (rikäri kë yachatsikïpa ushananchö këkaq willakïta).

5. ¿Imanirtaq musyantsik juk cristiänuta ciëluta ëwanampaq Dios akraptinqa imëkakunaraq mana pasakunqanta?

⁵ Jerusalenchö 120 discïpulukunaqa alleq clärum musyayarqan tsë precisaq junaqchö Jehovä santu espïritunwan akrëkanqanta. Llapankunam rikäyarqan peqankunachö imëka qallunö nina këkanqanta. Jinamampis, llapankunam juk idiömakunata parlëta puëdiyarqan (Hëchus 2:6-12). Peru juk cristiänuta ciëluta ëwanampaq santu espïritunwan Dios akraptinqa, manam tsë kutichönötsu imëkaraq pasakun. ¿Imanirtaq tsënö nintsik? Tantiyarinapaq, tsë junaqllachömi mëtsika waranqa nunakunata ciëluta ëwayänampaq Diosqa santu espïritunwan akrarqan, peru Bibliaqa manam willakuntsu peqankunaman imëka qallunö nina shamunqanta. Bautizakuriyaptinmi Diosqa akrarirqan (Hëchus 2:38). Jina manam wakintaqa bautizakuyanqan höratsu akrarqan. Samariachö täraq cristiänukunataqa, bautizakuyanqampita unëtaraqmi akrarqan (Hëchus 8:14-17). Y Corneliutawan wayinchö këkaqkunatanam manaraq bautizakuyaptin akrarqan (Hëchus 10:44-48).

6. (1) ¿Imatataq llapan akrashqakuna chaskiyan? (2) ¿Imapaqtaq tsë chaskiyanqan santu espïritu yanapan?

⁶ Wakin cristiänukunaqa rasmi cuentata  qokuriyan Dios akranqanta, peru wakinkunaqa ichikllapa ichikllapam cuentata qokuyan. Tsënö kaptimpis, ciëluta ëwaqpaq kaqkunaqa llapanmi santu espïrituta chaskiyan. Tsëmi apostol Pablu kënö nirqan: “Santu Espiritunta chasquirir[mi], señalashqa cuenta quecayanqui pellapaqna cayänequipaq. Tse Santu Espiritum Teyta Diospita erensiata chasquinantsicpaq garantia quecan” (Efesius 1:13, 14, noqakunam yanayätsiyarqü). Rikanqantsiknömi ciëlupaq akrashqakunataqa santu espïritunta Jehovä qon. ¿Imapaqtaq tsëqa yanapan? Ciëluta ëwayänampaq akrashqa kayanqanta següru kayänampaqmi. Tsëmi apostol Pabluqa nirqan, tsë chaskiyanqan santu espïrituqa ciëluchö kawayänampaq juk “garantia” cuenta kanqanta (leyi 2 Corintius 1:21, 22; 5:5).

7. ¿Imatataq ciëlupaq akrashqa cristiänu ruranman ciëluta ëwanampaq?

⁷ Juk cristiänuta ciëluta ëwanampaq Dios akrariptinqa, ¿ciëluta ëwanampaq segürunaku? Manam, invitacionta chaskinqanmi següruqa. Tsëmi apostol Pëdru kënö nirqan: “Gayamangantsicchö mas firmi tsaracunapag cada vez mas allilla llapan shongontsicwan shumag yarpachacurnin cawacushun. Tsaycunata rasumpa cumplir cawacurga mananam jutsaman ishquiyanquinatsu. Tsaynö cawacuyangayquipitam janag patsa cieluchö Salvamagnintsic Señor Jesucristopa mana ni imay ushacag Mandacuy Reynonchöpis alläpa cuyayarniqui cushishga chasquiyäshunqui” (noqakunam yanayätsiyarqü, 2 Pëdru 1:10, 11, NTCN). Rikanqantsiknömi, ciëlupaq akrashqa cada cristiänu sinchikunan Jehovä ninqanta cumplinampaq. Ciëluta ëwanampaq invitacionta chaskishqa karpis, Jehovä munanqanta cumplirllam ëwëta puëdinqa (Hebrëus 3:1, NM; Apocalipsis 2:10).

8, 9. (1) ¿Imanirtaq mëtsikaq cristiänukuna entiendiyantsu juk cristiänuta santu espïritunwan Dios akrariptin ima pasakunqanta? (2) ¿Imanötaq juk cristiänu musyan ciëluta ëwanampaq Dios akranqanta?

⁸ Kanan witsanqa mëtsikaq cristiänukunam entiendita puëdiyantsu, juk cristiänuta santu espïritunwan Dios akrariptin ima pasakunqanta. Tsëtaqa entiendiyantsu, ciëlupaq mana akrashqa karmi. Jinamampis Patsachö kawayänampaqmi nunakunataqa Diosnintsik kamashqa (Genesis 1:28; Salmu 37:29). Peru wakinkunataqa akrashqa ciëluta ëwayänampaq y tsëchö rey y sacerdöti kayänampaqmi. Jehovä santu espïritunwan akrariptinqa pensëninkunatam cambiariyan. Tsëpita patsëqa ciëluchö kawayänampaq kaqllatanam shuyaräyan (leyi Efesius 1:18 *).

⁹ Peru ¿imanötaq juk cristiänu musyan Dios akranqanta? Römachö këkaq  ciëlupaq akrashqa cristiänukunata Pablu ninqanman yarpärishun. Kënömi nirqan: “Mananam munantsu juc esclabuno peta mantsacunantsicta. Antis ricamantsic pepa wamran cuentatanam. Y Santu Espiritum yanapamantsic Diosta ‘Papällä’ ninapaq. Tse Santu Espiritullam shonquntsiccho cäyitsimantsic Diospa wamrancunana cashqantsicta” (Romänus 1:7; 8:15, 16, noqakunam yanayätsiyarqü). Rikanqantsiknömi Diosqa santu espïritunta utilizan ciëluchö Jesuswan gobernanampaq akrashqa kanqanta juk cristiänuta musyatsinampaq (1 Tesalonicensis 2:12).

10. ¿Imapaqtaq 1 Juan 2:27 textu parlëkan ciëlupaq akrashqakunaqa manam wanayantsu pipis yachatsinantaraq nirninqa?

¹⁰ Ciëluta ëwayänampaq invitacionta chaskeq cristiänukunaqa manam wanayantsu jukraq willananta. Tsëtaqa kikin Jehovämi alleq musyatsin. Tsëmi ciëlupaq akrashqa kaqkunata apostol Juan kënö nirqan: “Qamkunataqa kikinmi akrayäshurqunki, tsëtaqa llapëkim musyayanki”. Jina tsëpitam kënö nirqan: “Pëpita akrashqa këta chaskiyanqëkiqa qamkunachömi këkan y manam wanayankitsu yachatsiyäshunëkitaraq” (1 Juan 2:20, 27, NM). Rasunmi, ciëlupaq kar o Patsapaq karpis llapantsikmi yachatsishqa këta wanantsik. Peru ciëlupaq akrashqa kaqkunaqa manam wanayantsu Dios akranqanta pipis musyatsinanta. Tsëta alleq cläru musyatsinampaqmi Jehoväqa imëkapitapis mas puëdeq kallpanta, santu espïritunta utilizan.

11, 12. (1) ¿Ima tapukïtaraq itsa rurakun ciëlupaq akrashqa cristiänu? (2) ¿Imapitataq ciëlupaq akrashqa cristiänukuna següru këkäyan?

¹¹ Juk cristiänu ciëlupaq invitacionta chaskirirqa alläpam cambiarin. Tsëmi Jesusqa nirqan, yapë yurikoqnö kanqanta (Juan 3:3, 5). Tsëpitanam kënö entienditsikurqan: “Ama mantsaquëtsu: ‘Presisanmi yape yuricuyänan’ nenqaqta. Bientoqa mepeqpis jepeqpis shamunmi, y wiyantsicmi shiushiuyaqta, peru manam musyantsictsu mepita shamonqanta ni meta ewanqanta. Tse cuentanollam Santu Espiritupita yuricoqcunaqa cayan” (Juan 3:7, 8). Rikanqantsiknömi ciëlupaq akrashqa cristiänu imanö sientikunqanta wakinkunata entienditsinanqa sasaraq ^[2] (rikäri kë yachatsikïpa ushananchö këkaq willakïta).

¹² Itsa ciëlupaq akrashqa cristiänuqa tapukunman wakinkunata akranampa rantin pëta imanir Dios akranqanta. Itsa yarpachakun rurëninta cumplita puëdinampaq o mana puëdinampaq kaqta. Peru tsënö këkarpis alleq clärum musyan ciëluchö kawanampaq Jehovä akranqantaqa. Tsëmi alläpa kushikun y agradecikun. Ciëlupaq akrashqakunaqa apostol Pëdrunömi sientikuyan. Pëmi kënö nirqan: “¡Alabashun Teyta Jesucristupa Papänin Dios Yayata! Pemi ancupämarnintsic, mushoq caweyoqta ticraratsimarqontsic, peman llapan shonquntsicwan marcäcur cushishqa cawacunantsicpaq. Tsepaqmi Teyta Jesucristuta wanushqanpita Diosnintsic cawaritsimushqa. Y sieluchomi wiñe cawe  erensiantsic quecatsin noqantsic chasquinantsicpaq. Tseqa manam cosascunanotsu ushacanqa, ni mapayar ismonqa” (1 Pëdru 1:3, 4). Ciëlupaq akrashqakuna kë palabrakunata leyirqa Jehovä parlapëkanqantam sientiyan.

13. (1) Juk cristiänuta ciëluta ëwanampaq santu espïritunwan Dios akrariptinqa, ¿imanötaq pensënin cambiarin? (2) ¿Imanirtaq tsë cristiänupa pensënin cambian?

¹³ Rikanqantsiknömi, juk cristiänuta ciëluta ëwanampaq santu espïritunwan Dios akrariptinqa pensënin cambiarin. Tsë invitacionta manaraq chaskirqa Patsachö imëyaqpis kawakïtam shuyararqan. Jina rikëtachi munarqan kë Patsa shumaq Paraïsuman tikraqta y imëka mana allikuna ushakaqta. Jina pensarqanchi wanushqa familiankuna y amïgunkuna kawarimuptin chaskita, wayin rurëta y kikin murunqan plantakunapa frütan mikïta (Isaïas 65:21-23). Peru ciëluta ëwanampaq Jehovä invitariptinqa tsënö pensëninqa cambiarinmi. ¿Imanir? Manam alläpa yarpachakur llakikuptintsu o Patsachö imëyaqpis kawakïqa ajayëpaq kanampaq kaqman pensaptintsu ni ciëluchö kawakïta illaqpita munariptintsu. Sinöqa Jehovä decidiptinmi. Ciëluta ëwanampaq juk cristiänuta invitarqa, Jehoväqa santu espïrituntam utilizan pensëninta cambiatsinampaq y ciëluchö kawëtana shuyaränampaq.

14. ¿Imatataq pensayan ciëlupaq akrashqakuna kë Patsachö kawëninkunapita?

¹⁴ Tsënö kaptinqa, ¿ciëluta ras ëwëta munartsuraq kë akrashqa cristiänukunaqa wanïta munayan? Manam. Pablum imanö sientikuyanqanta kënö nirqan: “Cay patsachö imayca ñacacuycunata päsarpis manam wanucuyman chaytaga munantsictsu. Tsaynö captinpis gloriachö mushog cuerputana chasquinapä cagta musyarnam wanuypitaga llaquicuntsicnatsu, sinöga shuyacuntsicnam mushog cuerpuyogna maynapis caycayta” (noqakunam yanayätsiyarqü, 2 Corintius 5:4, MTCS). Rikanqantsiknömi apostol Pabluqa nirqan wanïta mana munayanqanta. Tsëpa rantinqa kawëninkunatam alleq provechayan familiankunawan y amïgunkunawan Jehoväta kushishqa sirwiyänampaq. Peru imata rurarpis Jehovä äninqantaqa manam qonqayanqatsu (1 Corintius 15:53; 2 Pëdru 1:4; 1 Juan 3:2, 3; Apocalipsis 20:6).

15. ¿Imakunataq rikätsikuntsu juk cristiänu ciëlupaq akrashqa kanqanta?

¹⁵ Itsa pensanki ciëluman ëwanëkipaq Dios invitashunqëkita. Tsënö pensarqa kë tapukïkunata contestari: ¿Pasëpa kushishqaku y shonqupita patsëku yachatsikunki? ¿Pasëpaku gustashunki Bibliata estudië y “Dios Yayapa yachayninchö imayca pacaraycagnö” yachatsikïninkunata musyë? (1 Corintius 2:10, NTCN.) ¿Sientinkiku pitapis mana yanapanqannö yachatsikïchö Jehovä yanapashunqëkita? ¿Llapan kallpëkiwanku Jehoväpa munëninta ruranki? ¿Pasëpaku cristiänu mayikikunata kuyanki y Jehoväta sirwiyänampaq yanapëta munanki? ¿Kawënikichö Jehovä imanö yanapashunqëkita rikarqunkiku? Kë tapukïkunata “awmi” nir contestarqa, ¿ciëlupaq akrashqatsuraq kanki? Manam, porqui Jehoväpa llapan sirweqninkunam ciëlupaq mana akrashqa këkarpis tsënö sientikïta puëdiyan. Jehoväqa llapan sirweqninkunatam Patsapaq o ciëlupaq kayaptimpis santu espïritunta qoyta puëdin. Ciëlupaq akrashqa kanqëkita alleqlla mana musyanqëkiqa rikätsikun, mana akrashqa kanqëkitam. Ciëlupaq akrashqakunaqa, manam tapukuyantsu  ciëlupaq kayanqanta o mana kayanqanta, porqui pëkunaqa clärum musyayan akrashqa kayanqanta.

16. ¿Imanirtaq musyantsik santu espïrituta llapan chaskeqkuna ciëlupaq invitashqa mana kayanqanta?

¹⁶ Bibliaqa Jehoväpa mëtsika sirweqninkunapaqmi parlan ciëluta mana ëwayänan këkaptimpis, santu espïrituta chaskiyanqanta. Jukqa karqan bautizakoq Juanmi. Pëpaqmi Jesus nirqan alläpa precisaq nuna kanqanta, peru rey kanampaq ciëluta mana ëwanampaq kaqtam nirqan (Mateu 11:10, 11, NM). Rey Davidpis chaskirqanmi santu espïrituta (1 Samuel 16:13). Tsënöpam Jehoväpa sasa yachatsikïninkunata entiendirqan y Bibliapa wakin librunkunata qellqarqan (Marcus 12:36). Peru apostol Pëdrum nirqan, Davidqa ciëluta mana ëwashqa kanqanta (Hëchus 2:34). Jehovämi espïritunta utilizarqan kë nunakuna imëkata rurayänampaq, peru manam ciëluta ëwayänampaqqa invitarqantsu. ¿Mana alli sirweq y ciëluta ëwayänampaq mana sirwiyaptintsuraq invitarqantsu? Manam. Pëkunataqa shumaq huertaman tikrashqa Patsachö kawayänampaqmi kawaritsimunqa (Juan 5:28, 29; Hëchus 24:15).

17, 18. (1) ¿Jehoväpa kanan witsan mëtsikaq sirweqninkuna mëchö kawëtataq shuyaräyan? (2) ¿Ima tapukïkunataraq qateqnin kaq yachakïchö contestashun?

¹⁷ Jehoväta kanan witsan sirweqkunapitaqa mëtsikaqmi ciëluta ëwayanqatsu. Pëkunaqa Abrahannö, Davidnö, bautizakoq Juannö y wakinkunanömi Diospa Gobiernun mandakamuptin kë Patsachö kawëta shuyaräyan (Hebrëus 11:10). Y ciëluchöqa Jesucristuwanmi 144.000 reykuna kayanqa. Peru Bibliaqa willakun kë ushanan junaqkunachöqa ciëlupaq akrashqa kaqkunapitaqa kë Patsachö wallkaqllana kayänampaq kaqtam (Apocalipsis 12:17). Tsëmi tsë 144 milpitaqa cäsi llapanna wanurir ciëluta ëwakuyashqa.

¹⁸ Peru pipis ciëlupaq akrashqa kanqanta niptinqa, ¿imanöraq rikashwan kë Patsachö kawëta shuyaraq kaqkuna? Congregacionnintsikchö pipis tantata mikur y vïnuta upur qallëkuptinqa, ¿imanötaq tratashwan? Y “ciëlupaq akrashqam kä” neqkuna mas mirayaptinqa, ¿yarpachakushwantsuraq? Qateqnin kaq yachatsikïchömi kë tapukïkunata contestarishun.