1, 2. ¿Ima reunionmantaq 2018 wata mëtsikaq juntakäshun y imanirtaq tsë reunionqa alläpa precisan? (Rikäri kë yachatsikïpa qallananchö këkaq fötuta).

JESUS wanunqantaqa watachö juk kutillam yarpantsik. Tsëmi mëtsika millon Testïgukuna y mas nunakunapis, 2018 wata 31 de marzu Inti (Rupay) jeqar qallëkuptin tsë reunionpaq juntakar qallëkushun.

² Tsë precisaq reunionman mëtsika nunakuna entëru patsachö juntakäyanqanta rikarqa, Jehoväwan Jesus alläpachi kushikuyanqa. Bibliam willakurqanna, tukï nacionkunapita y tukï idiömata parlaq mëtsikaq nunakuna kënö niyänampaq kaqta: “Salvacionqa Diosnintsikpitam shamun, gobernar täkunachö tëkaqpita, y Achkaspita” (Rev. 7:9, 10). Alläpam kushikuntsik Jesus wanunqanta cada wata yarparnin Jehoväta y kikin Jesusta alabarnin.

3. ¿Ima tapukïkunatataq kë yachatsikïchö contestashun?

 ³ Kë yachatsikïchömi kë chusku tapukïkunata contestashun: Jesus Wanunqanta Yarpë yanapamänampaqqa, ¿imanötaq alistakushwan? ¿Imanirtaq Jesus Wanunqanta Yarpëqa yanapakun cristiänu mayintsikkunawan juk shonqulla kanantsikpaq? ¿Imanötaq yanapakushwan juk shonqulla kanantsikpaq? Y Jesus wanunqantaqa, ¿imëpis yarpëkäshunllatsuraq?

4. ¿Imanirtaq alläpa precisan Jesus Wanunqanta Yarpëman ëwanantsik?

⁴ Jesus Wanunqanta Yarpëman ëwanantsikqa alläpam precisan, porqui reunionkunaman ëwarninmi Jehoväta adorantsik. Jehoväwan Jesusqa rikarëkäyämunchi tsë precisaq reunionman ëwanqantsikta o mana ëwanqantsiktapis. Tsëmi ima cäsupis alläpa grävi mana kaptin o alläpa mana qeshyëkarninqa Jesus Wanunqanta Yarpëmanqa ëwanantsik. Reunionkuna noqantsikpaq alläpa precisanqanta rikätsikurninqa kallpachakïkantsik, kawë librupita jutintsik mana borrakänampaqmi (Mal. 3:16; Rev. 20:15).

5. Jesus Wanunqanta Yarpë junaq manaraq chämuptin, ¿imataraq rurashwan Dioswan amïgu kënintsik imanö këkanqanta musyanapaq?

⁵ Jesus Wanunqanta Yarpë junaq manaraq chämuptinmi, tiemputa rakinantsik Diosman mañakunapaq y imanö këkanqantsikman yarpachakunapaq (leyi 2 Corintius 13:5). Tsëta ruranantsik precisanqantam apostol Pablupis nirqan. Tsëmi kënö tapukunantsik: “¿Rasumpaku creï munëninta cumplinampaq këkanqä religionllata Jehovä akrashqa kanqanta? ¿Llapan puëdinqämannöku Diospita yachatsikïkä? ¿Ruranqäwan y parlanqäwan rikätsiköku ushanan junaqkunachöna kawëkanqäta y Satanaspa mandakïnin ushakëkanqantana? ¿Bautizakunqä witsanchönöllaku kanampis Jehoväman y Jesusman confiakïkä?” (Mat. 24:14; 2 Tim. 3:1; Heb. 3:14). Kë tapukïkunaman alleq pensanqantsikmi yanapamäshun, Jehoväwan amïgu kënintsik imanö këkanqanta musyanapaq.

6. (1) ¿Imata rurarllataq imëyaqpis kawakïta puëdishun? (2) ¿Imanötaq juk anciänu cada wata alistakun Jesus Wanunqanta Yarpëpaq? (3) ¿Imatataq tsë anciänupita yachakuntsik?

⁶ Jesus Wanunqanta Yarpëpaqqa juknöpaqa alistakushwan tsë asuntupaq publicacionkunachö leyirnin y yachakunqantsikman alleq pensarninmi (leyi Juan 3:16; 17:3). Imëyaqpis kawakïtaqa puëdishun Jehoväta alleq reqirnin y Jesusman chipyëpa confiakurninllam. Tsëmi Jesus Wanunqanta Yarpë witsankunaqa, pëkunata mas reqinapaq yanapamaqnintsik publicacionkunata leyinantsik. Unëpana anciänunö yanapakoq wawqi ruranqanta rikärishun. Unëpitanam Jesus wanunqampaq y Jehoväwan Jesus kuyamanqantsikpaq Täpakoq revistachö yarqamoq yachatsikïkunata rakin. Y cada watam Jesus Wanunqanta Yarpë tiempu chämoqnö kaptinqa leyin y tsë reunion alläpa precisaq kanqanman pensan. Y tsëpaq parlaq publicacionkunata y Bibliata leyirnin y yachakunqanman alleq pensarninqa, mana musyanqankunata cada wata mas yachakunqantam cuentata qokushqa. Peru tsëpitapis masqa Jehovätawan Jesusta mas kuyanqantam sientin. Y kë anciänunölla noqantsikpis rurarninqa masmi Jehovätawan Jesusta kuyashun y Jesus Wanunqanta Yarpëqa masmi yanapamäshun.

7. (1) Señorpa Cënanta patsätsinqan paqas, ¿imatataq Jesusqa mañakurqan? (2) ¿Imanötaq musyantsik Jesus mañakunqanta Jehovä contestamushqa kanqanta?

⁷ Señorpa Cënanta patsätsinqan paqasmi, Jesusqa teytanman mañakurqan qateqninkuna  juk shonqulla kayänampaq (leyi Juan 17:20, 21). Y tsënö mañakunqantaqa Jehoväqa contestamushqam. Porqui juk shonqulla kanqantsikqa, Jesus Wanunqanta Yarpëchömi cläru rikakun. Tsë paqasmi më tsë nacionchö tukïläya nunakuna juntakäyan y Jesusta Jehovä mandamunqanman creiyanqanta rikätsikuyan. Wakin nacionkunachö tukï color nunakuna juntakäyanqantaqa, manam seguïdutsu rikäyan y wakinkunaqa mana allitanömi rikäyan. Peru Jehoväwan Jesusqa alläpam kushikuyan tukï color nunakuna juntakäyaptin.

8. ¿Imatataq Ezequielta Jehovä willarqan?

⁸ Tukïläya nunakuna juk shonqulla kanantsikpaq kaqtaqa, Jehoväqa willakushqanam karqan. Ezequielmi qellqarqan ishkë qerukuna, jukllëllaman tikrarinampaq kaqta. Tsë qerukunaqa Judäpaq y Josëpaq qerukunam karqan (leyi Ezequiel 37:15-17 *). Tsëpaq entienditsikurmi 2016 wata juliu killa kaq Täpakoq revista “Leyeqkuna tapukuyanqan” neq yachatsikïchö kënö nirqan: “Ezequielwanmi Jehoväqa willatsikurqan, Änikunqan Patsaman sirweqninkuna [israelïtakuna] yëkuyänampaq y yapë juk markalla tikrayänampaq kaqta. Jinamampis, willakurqanmi kë ushanan junaqkunachö [sirweqninkuna] juk shonqulla y juk markalla kayänampaq kaqta”.

9. Ezequiel willakunqanqa, ¿imanötaq cläru rikakun Jesus wanunqanta cada wata yarpanqantsikchö?

⁹ Jehoväqa puntataqa 1919 watachömi, ‘Judäpaq qeruta’ o ciëlupaq akrashqakunata juk shonqulla kayänampaq patsäratsirqan. Y tsëpitanam, tiempu pasanqanmannö “Josëpaq qeru” o Patsachö imëyaqpis kawakïta shuyaraq kaqkuna ciëlupaq kaqkunaman juntakar qallëkuyarqan. Jehovämi änikushqa karqan tsë ishkan qerukunata jukllëllaman tikratsinampaq kaqta (Ezeq. 37:19). Y ninqannöllam, ciëlupaq kaqkunawan wakin kaq üshakunaqa juk kanchalla tikrayashqa (Juan 10:16; Zac. 8:23). Y kananqa tsë ishkan grüpukunam, Rey Jesucristupa mandädunchö kayan, y tsë Reypaqmi Jehoväqa Ezequiel libruchö “sirwimaqnï David” nirqan (Ezeq. 37:24, 25). Y Ezequiel qellqanqannömi, tsë ishkan grüpukuna juk shonqulla kayanqanqa cläru rikakun Jesus Wanunqanta Yarpëchö juntakäyaptin. Tsënö kaptimpis, ¿imataraq cada ünu rurashwan cristiänu mayintsikkunapita mana rakikäkurinapaq y juk shonqulla sïguinantsikpaq?

10. ¿Imataq yanapamantsik cristiänu mayintsikkunawan juk shonqulla kanantsikpaq?

¹⁰ Cristiänu mayintsikkunawan juk shonqulla kanantsikpaqqa humildim kanantsik. Jesusqa qateqninkunatam nirqan humildi kayänampaq (Mat. 23:12). Diosta mana sirweq nunakunaqa wakinkunapita mas precisaq kayanqantam imëpis pensayan. Peru noqantsikqa, humildi kanqantsikta rikätsikurmi congregacionta dirigeq wawqikunata respetanantsik. Cristiänukunawan juk shonqulla këta munarqa obedientim kanantsik. Jehovä Diosqa alläpam chikin orgullösukunata, peru humildi kaqkunataqa kuyanmi y bendicinmi (1 Pëd. 5:5).

11. ¿Imanötaq juk shonqulla kanantsikpaq yanapamantsik tantawan vïnu imata rikätsikunqanman alleq pensanqantsik?

¹¹ Jina juk shonqulla kanapaqqa yanapamäshun, Jesus Wanunqanta Yarpëchö utilizanqantsik tantawan vïnu imata rikätsikunqanman alleq pensanqantsikmi. Y tsëmanqa pensanantsik tsë precisaq junaq manaraq chämuptin, y masqa tsë reunion rurakanqan  paqasmi (1 Cor. 11:23-25). Musyanqantsiknöpis, tantaqa rikätsikun Jesuspa jutsannaq cuerpuntam y vïnunam ramanqan yawarninta. Peru manam tsëta musyanantsikllatsu precisan, sinöqa alleqmi entiendinantsik Jehoväwan Jesus kuyamanqantsikta. Porqui kuyamarnintsikmi Jehovä permitirqan kuyë wamran wanunanta, tsënöpa salvamänantsikpaq, jina Jesuspis kuyamarnintsikmi wanunampaq listu këkarqan. Tsëkunaman alleq pensanqantsikmi yanapamäshun Jehoväta y Jesusta mas kuyanapaq. Y Jehoväta tsënö kuyanqantsiknam yanapamäshun, cristiänu mayintsikkunawan juk shonqulla kanantsikpaq.

12. ¿Imatataq Jesus cläru entienditsikurqan juk reypaq y juk esclävupaq willakunqanchö?

¹² Jina juk shonqulla kanantsikpaqqa yanapamantsik ofendimaqnintsikkunata perdonanqantsikmi. Perdonakoq karninqa, Jesus wanunqanwan Jehovä perdonamanqantsikpita agradecikunqantsiktam rikätsikuntsik. Alleq pensashun Mateu 18:23-34 textuchö juk reypaq y juk esclävupaq willakurnin Jesus entienditsikunqanman. Tsëman pensarnin kënö tapukushun: “¿Tsë textu ninqan yanapamanku Jesus ninqannö ruranäpaq? ¿Rasku piñakurï cristiänu mayïkuna imallatapis rurariyaptin, o pacienciayoqku kä? ¿Ofendimaqnïkunata kushishqaku perdonëkü?”. Rasunmi, höraqa alläpa fuertipam ofendïkamashwan, y tsënö kaptinqa itsa perdonanantsikqa fäciltsu kanqa. Peru Jesus ninqanqa clärum rikätsimantsik perdonanantsikta Jehovä shuyaranqanta (leyi Mateu 18:35). Jesusqa clärum nirqan ofendimaqnintsikkunata mana perdonashqaqa, noqantsiktapis Jehovä mana perdonamänapaq kaqta. Tsëmi mana fäcil kaptimpis perdonëta procuranantsik. Jesus ninqanta cäsukurnin perdonakoq karqa, cristiänu mayintsikkunawan juk shonqullam kawakushun.

13. ¿Imanötaq juk shonqulla kawakunapaq yanapamantsik cristiänu mayintsikkunawan shumaq kawakïta procuranqantsik?

¹³ Cristiänu mayintsikkunata perdonarninqa, kushishqam pëkunawan kawakuntsik. Apostol Pabluqa nirqan, cristiänu mayintsikkunawan shumaq kawakïta shonqupita patsë procuranantsikpaqmi (Efes. 4:3). Jesus  Wanunqanta Yarpäna witsanchö y masqa tsë paqaschö, alleq yarpachakurishun cristiänu mayintsikkunawan imanö këkanqantsikta. Kënö tapukushun: “¿Mëqan cristiänu mayïtapis shonqüchö chikipëkäku? ¿Wakinkunaqa cläruku rikäyan cristiänu mayïkunawan shumaq kawakïta procuranqäta?”. Kë tapukïkunaman alleq pensanantsikqa alläpam precisan.

14. ¿Imanötaq rasumpa kuyanakur aguantanakunqantsikta rikätsikuntsik?

¹⁴ Jina Cristiänu mayintsikkunawan juk shonqulla kawakunapaqqa yanapamantsik, Jehovänö llapankunatapis kuyanqantsikmi (1 Juan 4:8). Ama imëpis kënöqa nishuntsu: “Alfin cristiänu mayintsik kanqanrëkur aguantashun”. Tsënö ninqantsikqa Pablu kënö ninqampa contranmi kanman: “Kuyanakuyanqëkirëkur jukniki juknikikuna aguantanakur [sïguiyë]” (Efes. 4:2). Pabluqa manam ‘aguantanakuyë’ nirqanllatsu, sinöqa “kuyanakuyanqëkirëkur” nirqanmi. Rasumpa kaqchöqa, mana kuyarpis aguantëtaqa puëdintsikmi, peru Jehoväqa munan shonqupita patsë kuyanantsiktam. Jehoväqa tukï niraq nunakunatam sirweqnin kayänampaq chaskishqa (Juan 6:44). Y ¿tsënö chaskïkaptintsuraq janan shonqulla kuyashwan? Kuyanantsikpaq Jehovä mandëkämashqaqa, kushishqam cristiänu mayintsikkunata kuyanantsik (1 Juan 4:20, 21).

15. Jesus wanunqanta yarpanqantsikqa, ¿imëtaq ultimu kaq kanqa?

¹⁵ Imë karpis Jesus Wanunqanta Yarpëtaqa jaqirishunmi. Tsëqa, ¿imëraq ultimu kaq kanqa? Ciëlupaq akrashqakunatam apostol Pabluqa kënö nirqan: “Señorpa wanïninta musyatsikur sïguikäyanki, hasta pë shamunqanyaq” (1 Cor. 11:26). Jina Jesuspis ushanan tiempukunapaq parlarninmi, imë chämunampaq o shamunampaq kaqta nirqan. Jatun sufrimientu chäramunampaq kaqtana parlanqanchömi kënö nirqan: “Tsënam, nunapa Tsurimpa señalnin ciëluchö yurimunqa, y patsachö llapan kastakunam shonqunkunachö nanatsikurnin kutakuyanqa, y ciëlu pukutë jananchö puëdeq këninwan y alläpa chipapäkur shamïkaqtam nunapa Tsurinta rikäyanqa. Y trompëtam sinchipa waqanqa y pëqa angelninkunatam kachamunqa y pëkunam pëpa akrashqankunata patsapa chuskun lädunkunapita ëlluyanqa, ciëlupa juk kuchumpita hasta juknin kuchunyaq” (Mat. 24:29-31). Jesusqa ‘akrashqankunataqa’ o ciëlupaq kaqkunataqa ëllunqa kë patsallachöraq këkaqkunata ciëluta apakurninmi. Tsëqa kanqa jatun sufrimientu qallariptin, peru Armagedon manaraq qallaptinmi. Armagedon guërrachöqa Jesusmi 144 mil akrashqankunawan Patsachö llapan gobiernukunata ushakätsiyämunqa (Rev. 17:12-14). Akrashqankunata Jesus apakunampaqna këkaptin wanunqanta yarpanqantsikmi ultimu kaqqa kanqa.

16. ¿Imanirtaq Jesus Wanunqanta Yarpëman kë wata faltëta munankitsu?

¹⁶ Musyanqantsiknöpis 2018 wataqa, 31 de marzum Jesus Wanunqanta Yarpäshun. Tsëman ëwëtaqa ama imanöpapis perdikushuntsu. Y Jehoväta mañakushun cristiänu mayintsikkunawan juk shonqulla kawakur sïguinapaq (leyi Salmus 133:1 *). Ama qonqashuntsu, Jesus wanunqanta juk kutillana yarpärinantsik tiempuqa chäramunampaqna kaqta. Y tsëyaqqa, tsë precisaq reunionchö juntakarnin cristiänu mayintsikkunawan kushishqa pasakunqantsikta precisaqpaq churashun.