1, 2. (1) ¿Imatataq Jehoväqa cuentachö katsin Jesus Wanunqanta Yarpäna reunionman ëwayaptin? (Rikäri jana qaranchö këkaq fötuta). (2) ¿Imapitataq kë yachatsikïchö yachakushun?

ENTËRU patsachömi Jesus Wanunqanta Yarpäna reunionmanqa mëtsikaq nunakuna ëwayan. Peru Jehoväqa manam atska nunakuna ëwayanqanllatatsu rikan, sinöqa tsë reunionman imanir ëwayanqantam rikan. Y wata wata ëwaqkunatapis rikanmi. Wakinqa hasta michëkäyaptimpis ëwayanmi. Wakinnam cada semäna reunionkunam ëwëta mana puëdirpis, Jesus Wanunqanta Yarpäna reunionmanqa ëwayan. Jina tsëllaraq ëwaqkunatapis Jehoväqa cuentachömi katsin.

² Jesus Wanunqanta Yarpäna reunionman mëtsikaq ëwaqkunata rikarqa alläpachi Jehoväqa kushikun (Lüc. 22:19). Peru pëpaqqa manam ëkaq ëwayanqantsu masqa precisan, sinöqa tsë reunionman imanir ëwayanqanmi. Kë yachatsikïchömi kë tapukïpita yachakushun: ¿Imanirtaq Jesus Wanunqanta Yarpäna reunionllamantsu ëwantsik, sinöqa Jehovä alistamunqan cada semäna reunionkunamampis? Rikärishun reunionkunaman imanir ëwanqantsikta.

3, 4. (1) ¿Imanirtaq reunionkunaman ëwantsik? (2)  Reunionkunaman ëwarqa, ¿imanö kanqantsiktataq rikätsikuntsik? (3) 1 Corintius 11:23-26 textu ninqannöpis, ¿imanirtaq Jesus Wanunqanta Yarpänä reunionmanqa faltëta munantsiktsu?

³ Reunionkunachöqa Jehovä Diostam adorantsik. Jina tsë reunionkunachömi Jehoväqa yachatsimantsik. Peru orgullösu nunakunaqa pipis yachatsinanta mana wanayanqantam  pensayan (3 Juan 9). Noqantsikqa, Jehovä y markan imëpis yachatsimänatam munantsik (Is. 30:20; Juan 6:45).

⁴ Reunionkunamanqa humildi karmi ëwantsik, porqui Diosnintsik yachatsimänata munanqantsiktam rikätsikuntsik. Y Jesus Wanunqanta Yarpäna reunionmanqa ëwantsik, manam testïgu karllatsu sinöqa humildi karmi Jesus kënö mandakunqanta cäsukïta munantsik: “Këta rurar sïguiyë noqata yarpäyämarnï” (leyi 1 Corintius 11:23-26). Kë reunionqa Jehovä alläpa kuyamanqantsiktam yarpätsimantsik, tsëmi pëman mas confiakunapaq yanapamantsik. Tsënö kaptimpis Jehoväqa musyanmi watachö juk kutilla änimuta y consuëluta mana wananqantsikta, tsëmi cada semäna reunionkuna kanampaq patsätsimushqa y ëwanapaqmi mandamantsik. Peru humildi kanqantsikmi yanapamäshun tsëta cäsukunapaq. Porqui reunionman ëwanapaq y preparakunapaqqa tiempuntsiktam rakinantsik.

5. ¿Imanirtaq wakin nunakunaqa Jehovä invitanqanta chaskikuyan?

⁵ Mëtsikaq nunakunam humildi karnin Jehovä yachatsinanta munarnin, invitanqanta chaskikuyan (Is. 50:4). Puntataqa Jesus Wanunqanta Yarpäna reunionmanmi ëwayan, tsëpitanam cada semäna reunionkunaman ëwar qallëkuyan (Zac. 8:20-23). Llapantsiktam gustamantsik reunionkunachö Diospita yachakïqa, porqui tsëmi shoqamantsik y yanapamantsik (Sal. 40:17). Awmi, reunionkunachö Jehoväwan Jesus yachatsimänapaq invitamanqantsikta chaskikunqantsikwanqa manam imapis igualantsu (Mat. 17:5; 18:20; 28:20).

6. ¿Imanirtaq juk nuna Jesus Wanunqanta Yarpäna reunionman ëwarqan? Willakaramï.

⁶ Cada watam Jesus Wanunqanta Yarpäna reunionpaqqa llapan nunakunata invitëta procurantsik. Y mëtsikaq humildi nunakunam tsë invitacionta chaskikurnin ëwayashqa. Juk ejempluta rikärishun. Juk wawqim, Jesus Wanunqanta Yarpäna reunionpaq invitacionta juk nunata entregarqan. Kë nunaqa ëwëta mana puëdinampaq kaqtam nirqan. Peru tsënö nikarpis ëwarqanmi, tsëmi invitaq wawqiqa reunionchö rikëkur alläpa espantakurqan. Imanö chaskiyanqanmi tsë nunataqa alläpa gustarqan, tsëmi llapan reunionkunaman ëwar qallëkurqan. Juk watachö kima kutillam reunionman faltarqan. ¿Imataq tsë nunata yanaparqan Jesus Wanunqanta Yarpäna reunionman y wakin reunionkunaman ëwanampaq? Tsë nunata invitaq wawqim kënö nirqan: “Kë nunaqa alläpa humildim, tsëmi ëwarqan”. Këmi rikätsimantsik tsë nunata Jehovä markanman apamunqanta. Y kananqa Jehovätam tsë nunaqa sirwikan (2 Sam. 22:28; Juan 6:44).

7. Reunionkunachö yachakunqantsik y Bibliata leyinqantsikqa, ¿imanö kanapaqtaq yanapamantsik?

⁷ Reunionkunachö yachakunqantsik y Bibliata leyinqantsikmi, humildi kanantsikpaq yanapamantsik. Y Jesus Wanunqanta Yarpäna semänakunam, Jesus humildi karnin noqantsikrëkur wanunqanta reunionkunachö yachakuntsik. Jina wanunqampita y kawarimunqampita Bibliachö leyinapaqmi animamantsik. Tsëmi yanapamäshun noqantsikrëkur Jesus wanunqampita mas agradecikunapaq. Y agradecïdu kanqantsikmi yanapamäshun Jesusnö humildi kanantsikpaq y Diospa voluntäninta ruranapaq (Lüc. 22:41, 42).

8. ¿Imanötaq Jesusqa valienti kanqanta rikätsikurqan?

⁸ Wanutsiyänan junaqmi Jesusqa valienti kanqanta rikätsikurqan. Noqantsikpis Jesusnömi valienti këta munantsik. Pëqa alleqmi  musyarqan chikeqninkunaqa despreciarnin y astarnin wanutsiyänampaq kaqta (Mat. 20:17-19). Tsëta musyëkarpis decidïdum karqan wanunampaq. Tsëmi Getsemanï huertachö këkarnin apostolninkunata kënö nirqan: “Sharkuyë, aku ëwakushun. ¡Rikäyë! Rantikamaqnïqa këchönam këkan” (Mat. 26:36, 46). Y prësuyänampaq mëtsikaq nunakuna chäriyaptinmi, mas puntaman witirir pï kanqanta willarqan. Y soldädukunatam apostolninkunata libri jaqiriyänampaq nirqan (Juan 18:3-8). Tsëchömi valienti kanqanta rikätsikurqan. Jina kanampis ciëlupaq akrashqakuna y kë Patsachö kawaqkunaqa, Jesusnö valienti kanantsikpaqmi kallpachakïkantsik.

9. (1) ¿Imanirtaq reunionkunaman ëwanapaq valorta wanantsik? (2) ¿Imanötaq valienti kanqantsik prësurëkaq cristiänu mayintsikkunata yanapan?

⁹ Itsa reunionkunaman seguïdu ëwëta puëdintsiktsu. Tsëqa valoryoq këtam wanantsik. Wakin wawqikuna y panikunaqa qeshyayanmi, llakishqam o desanimädum sientikuyan. Wakintanam familiankuna o gobiernukuna michäyan. Jehoväta sirwiyanqanrëkur prësurëkaq cristiänu mayintsikkunaman pensarishun. ¿Valienti kanqantsikqa kë cristiänu mayintsikkunata yanapantsuraq? Awmi (Heb. 13:3). Problëmakunapa pasëkarpis Jehoväta sirwir sïguinqantsikta musyarninqa, Jehoväman mas confiakuyänampaq y mas valoryoq kayänampaqmi kë cristiänu mayintsikkunata yanapanqa. Tsëmi apostol Pabluta pasarqan. Pëqa Römachö prësu këkarmi creikoq mayinkuna valorwan Jehoväta sirwiyanqanta musyarir alläpa kushikurqan (Filip. 1:3-5, 12-14). Tsëmi cristiänu mayinkunapaq juk cartata escribirqan. Tsë cartachömi nirqan ëllukëta mana jaqiyänampaq. Jina kënömi nirqan: “Familianö kuyanakïnikikuna sïguitsun” (Heb. 10:24, 25; 13:1).

10, 11. (1) ¿Jesus Wanunqanta Yarpäna reunionmanqa pikunatataq invitanantsik? (2) Efesius 1:7 textuqa, ¿imanötaq tsëta ruranapaq yanapamantsik?

¹⁰ Jina Jesus Wanunqanta Yarpäna reunionman familiantsikkunata, trabajaq mayintsikkunata y vecïnuntsikkunata invitarninmi valienti kanqantsikta rikätsikuntsik. Tsëtaqa rurantsik Jehoväwan Jesus noqantsikrëkur rurayanqampita agradecikurninmi. Jina Jesus wanunqanrëkur Jehoväpa perdonninta pëkunapis chaskiyänantam munantsik (leyi Efesius 1:7; Rev. 22:17).

¹¹ Jina reunionkunaman ëwarninqa kuyakoq kanqantsiktam rikätsikuntsik. Tsëtam Jehoväwan Jesusqa pipitapis masqa rikätsikuyashqa.

12. (1) ¿Reunionkunaqa imapaqtaq yanapamantsik? (2) 2 Corintius 5:14, 15 textuqa, ¿imata ruranapaqtaq yanapamantsik?

¹² Jehovätawan Jesusta kuyarninmi reunionkunamanqa ëwantsik. Y tsëchömi mas  kuyakoq kanapaq yachakuntsik. Porqui reunionkunachöqa, Jehoväwan Jesus noqantsikpaq rurayanqampitam yarpätsimantsik (Rom. 5:8). Jesus Wanunqanta Yarpäna reunionqa, Jehoväwan Jesus alläpa kuyakoq kayanqantam yarpätsimantsik, porqui llapan nunakunapaqmi wanurqan, hasta pë wanunqanta mana valoraq nunakunapaqpis. Noqantsikqa Jesus wanunqampitaqa alläpam agradecikuntsik, tsëmi cada junaq Jesusnö këta procurantsik (leyi 2 Corintius 5:14, 15). Jinamampis noqantsikrëkur tsurin wanunanta permitinqampitam Jehovätaqa alabantsik, y tsëtaqa rurantsik reunionkunachö parlakurninmi.

13. ¿Imanötaq Jehoväta y Jesusta kuyanqantsikta rikätsikuntsik? Willakaramï.

¹³ Jehoväta y Jesusta alläpa kuyanqantsiktaqa rikätsikuntsik fäcil mana kaptimpis pëkunarëkur imëkata rurarninmi. Por ejemplu reunionkunaman ëwanapaqqa imëkatam ruranantsik. Hasta trabajanqantsikpita utishqa këkarpis ëwantsikmi. Juk kaq reunionnintsikqa ushë semänakunam. Y wakin nunakuna descansakïkäyaptimpis noqantsikqa mana faltashpam ëwantsik. Reunionkunaman ëwanapaq kallpachakunqantsiktaqa Jehoväqa cuentachömi katsin y alläpam kushikun (Mar. 12:41-44).

14. ¿Imatataq Jesuspita yachakuntsik?

¹⁴ Jesusqa wakinkunata kuyarninmi imëkapa pasarqan y sufrirqan. Noqantsikpis tsëpitaqa yachakïta puëdintsikmi. Jesusqa decidïdum karqan discïpulunkunarëkur wanunampaq. Peru manam tsëllawantsu kuyanqanta rikätsikurqan, sinöqa imëpis pëkunapaq yarpachakurninmi. Por ejemplu juk kutichö utishqa y llakishqa këkarpis discïpulunkunawanqa ëllukarqanmi (Lüc. 22:39-46). Awmi, wakinkunata imanö yanapanampaq kaqmanmi masqa yarpachakurqan (Mat. 20:28). Jehoväta y cristiänu mayintsikkunata kuyarninqa, Jesus Wanunqanta Yarpäna reunionman y wakin reunionkunamampis manam faltashuntsu.

15. ¿Pikunatataq masqa yanapanantsik?

¹⁵ Jehoväpa testïgunkunaqa entëru patsachömi juk familianölla kantsik. Tsëmi llapan puëdinqantsikmannö nunakunata invitantsik pëkunapis Diosta kushishqa sirwiyänampaq.  Peru masqa yanapëta munantsik Diospa kaqchö qelanashqa këkaqkunatam (Gäl. 6:10). Y pëkunata kuyanqantsiktaqa rikätsikushun, reunionkunaman shayämunampaq y masqa Jesus Wanunqanta Yarpäna reunionman ëwayänampaq animarninmi. Jehoväwan Jesus kushikuyanqannöllam, qelanashqakuna congregacionman kutiyämuptinqa noqantsikpis alläpa kushikuntsik (Mat. 18:14).

16. (1) ¿Imata ruranapaqtaq juknintsik juknintsik animanakunantsik y imanirtaq mana faltëpa reunionkunaman ëwanantsik? (2) ¿Imanirtaq kë witsanqa Juan 3:16 textu ninqanman yarpänantsik?

¹⁶ Jesus Wanunqanta Yarpäna reunionqa viernis 19 de abril killam kanqa. Tsë reunionman shayämunampaqmi llapan nunakunata invitashun (rikäri “ Llapan nunakunata invitashun” nishqan recuadruta). Jina tsëpitaqa, juknintsik juknintsikmi reunionkunaman mana faltëpa ëwanantsikpaq animanakunantsik. Porqui ushakë junaqqa këllachönam këkan. Y tsë reunionkunam yanapamäshun imëpis humildi, valienti y kuyakoq kanantsikpaq (1 Tes. 5:8-11). Jehoväwan Jesus alläpa kuyamanqantsikpita agradecikunqantsikta imëpis rikätsikushun (leyi Juan 3:16).