1, 2. (1) ¿Wanunqanta imanö yarpäyänantataq Jesusqa munan? (2) ¿Imatataq Jesuspita yachakushun?

ITSA yarpanki Jesus Wanunqanta Yarpäna reunion cada wata imanö kanqanta, porqui tsë reunionqa sencïllullam. Peru tsënö kaptimpis wakinkuna itsa kënö tapukuyan: “Jesus Wanunqanta Yarpäna reunion këkaptinqa, ¿imanirtaq tsë reunionqa alläpa sencïllulla?”.

² Kë patsachö këkarninmi Jesusqa fäcil y cläru entiendipaqnölla Diospita yachatsikurqan (Mat. 7:28, 29). Jina tsënöllam wanunqanta yarpë reunion sencïllulla kananta munarqan, tsëmi imanö ruranapaq kaqta nirqan. Tsë reunionchö Jesus imata ruranqanta y imata ninqampita masllata yachakushun. Tsëmi yanapamäshun humildi, valienti y kuyakoq kanqanta maslla entiendinapaq. Jinamampis pënö kanapaq imata ruranapaq kaqtam yachakushun.

3. Mateu 26:26-28 textukuna ninqannö, ¿imanötaq Jesus Wanunqanta Yarpäna reunionqa karqan, y tantawan vïnuqa imatataq rikätsikun?

³ Jesusqa 11 apostolninkunawanmi wanunqanta yarpäyänampaq reunionta patsätsirqan. Tsëpaqqa levadürannaq tantata y Pascua fiestachö utilizäyanqan vïnutam utilizarqan (leyi Mateu 26:26-28). Tsëchömi apostolninkunata nirqan levadürannaq tanta, cuerpun cuenta kanqanta y vïnunam yawarnin cuenta kanqanta. Apostolninkunaqa manachi espantakuyarqantsu tsë mushoq celebracionta tsënö sencïllullata ruranqampitaqa.

4. ¿Wanunqanta yarpänapaq reunion imanö kanampaq kaqtataq Jesus rikätsikurqan?

 ⁴ Kima watapana Diospa Gobiernumpita Jesus yachatsikïkaptin ima pasakunqanta yarpärishun. Amïgun Läzarupa, Martapa y Marïapa wayinchö këkarmi Diospita yachatsir pëkunata qallëkurqan. Marta tsëchö këkarnimpis, Jesuspaq imëkäta cocinakurninmi ocupädu këkarqan. Tsëmi Jesusqa Martata kuyëllapa consejarqan alläpa ocupäda mana kanampaq. Porqui Diospita yachatsikunqanta wiyëmi masqa precisarqan (Lüc. 10:40-42). Wanunampaq ichikllana pishikaptinmi, Martata ninqannölla Jesusqa juk sencïllulla cënata patsätsirqan. ¿Imatataq tsëqa Jesuspita yachatsimantsik? Rikärishun.

5. Wanunqanta yarpë reunion sencïllulla kanqampita, ¿imatataq Jesuspita yachakuntsik? Y Filipensis 2:5-8 textuqa, ¿imatataq tsëpaq yachatsikun?

⁵ Jesusqa ruranqankunawan y imata ninqankunawanmi humildi kanqanta rikätsikurqan. Jina wanutsiyänampaq ichikllana pishikaptimpis humildi kanqantam rikätsikurqan (Mat. 11:29). Awmi, ni pipis mana ruranqantam ichikllachöna ruranan karqan. Y musyarqanmi Jehovä kawaritsimunampaq kaqta y mandakoq kanampaq carguta chaskinampaq kaqta. Tsënö këkarpis Jesusqa manam alabayänanta munarqantsu, tsëmi jatun celebraciontaqa rurarqantsu. Tsëmi apostolninkunata nirqan watachö juk kuti wanunqanta juk sencïllu reunionta rurar yarpäyänampaq kaqta (Juan 13:15; 1 Cor. 11:23-25). Tsënöpam rikätsikurqan alläpa humildi kanqanta. Mandakoqnintsik tsënö kanqanqa alläpa kushikïpaqmi (leyi Filipensis 2:5-8).

6. Imëka mana allikunapa pasëkarpis, ¿imanötaq Jesusnö humildi kanqantsikta rikätsikuntsik?

⁶ Jina Jesusnö humildi kanqantsiktaqa rikätsikuntsik kikintsikpa biennintsikta ashinantsikpa rantin, wakinkunapa bienninta ashirninmi (Filip. 2:3, 4). Wanutsiyänampaq tsariyänan paqas Jesus imata ruranqanman yarpäshun. Alläpa sufritsir wanutsiyänampaq kaqta musyëkarpis, discïpulunkuna imanö sientikuyanqanmanmi masqa yarpachakurqan. Tsëmi yachatsirnin, animarnin y shoqarnin yanaparqan (Juan 14:25-31). Tsëta rurarmi rikätsikurqan kikinllaman yarparäkunampa rantin wakinkunapaq mas yarpachakunqanta. Awmi, Jesuspitaqa humildi këtam yachakuntsik.

7. Jesusqa, ¿imanötaq valienti kanqanta rikätsikurqan?

⁷ Wanunqanta yarpänapaq reunionta patsätsinqan paqasmi, Jesusqa rikätsikurqan valienti kanqanta. ¿Imanötaq tsëta rikätsikurqan? “Diostam ofendishqa” nirnin tumpar wanutsiyänampaq kaqta musyëkarpis, Diospa voluntäninta cumplinampaqmi decidïdu këkarqan (Mat. 26:65, 66; Lücas 22:41, 42). Wanunqanyaq alli tsarakurmi rikätsikurqan, Diospa jutin respetashqa kanampaq y pëlla mandakoq kanampaq derëchuyoq kanqanta. Y jutsankunapita arrepentikoq nunakuna mana wanushpa kawayänampaqmi yanapakurqan. Jinamampis valienti kanqanqa discïpulunkunatam yanaparqan ichikllachöna pruëbakunapa pasarnin alli tsarakuyänampaq.

8. (1) ¿Imatataq Jesusqa apostolninkunata nirqan? (2) ¿Imanötaq Jesuspa discïpulunkunaqa valienti kayanqanta rikätsikuyarqan?

⁸ Jina Jesusqa valienti kanqantaqa rikätsikurqan kikimpa problëmankunallaman yarparäkunampa rantin, apostolninkuna imanö sientikuyanqanman mas yarpachakurninmi. Tsëmi Jüdasta qarqurirnin, juk sencïllulla reunionta patsätsirqan. Tsë celebracionqa ciëlupaq akrashqa kaqkunatam yarpätsinan karqan, yawarninta ramanqampita ima bendicionkunata chaskiyänampaq kaqta y mushoq conträtuman yëkushqa kayanqanta (1 Cor. 10:16, 17). Y Diosllata mana jaqipa sirwiyänampaq y ciëluchö kawayänampaq premiuta chaskiyänampaq kaqtam Jesusqa nirqan (Juan 15:12-15). Jina ima pruëbakunapa pasayänampaq kaqtapis nirqanmi. Tsëmi, pënö valienti karnin alli tsarakuyänampaq kaqta nirqan (Juan 16:1-4a, 33). Y mëtsika  watakuna pasariptinnam, discïpulunkunaqa listu këkäyarqan creikoq mayinkunata yanapayanqanrëkur sufriyänampaq. Tsënömi rikätsikuyarqan Jesusnö valienti kayanqanta (Heb. 10:33, 34).

9. ¿Imakunachötaq Jesusnö valienti kanqantsikta rikätsikuntsik?

⁹ Noqantsikpis Jesusnölla valienti kanqantsiktaqa rikätsikuntsik, wawqintsikkunata y panintsikkunata yanaparninmi. Porqui höraqa culpannaq wakin wawqintsik panintsikkunatam carcelariyan. Tsëmi Diosman pëkunapaq mañakurnin yanapëta puëdintsik, y puëdirninqa autoridäkunachö y cortikunachö defendirmi yanapëta puëdintsik (Filip. 1:14; Heb. 13:19). Juknöpaqa valienti kanqantsikta rikätsikïta puëdintsik, Diospa Gobiernumpita mana mantsakushpa imëpis yachatsikurninmi (Hëch. 14:3). Y nunakuna chikir qatikachämashqa o contrantsik churakäyaptimpis Jesusnöllam decidïdu këkantsik Diospita yachatsikur sïguinapaq. Peru mantsakunqantsik höraqa, ¿imataraq rurashun? Rikärishun.

10. ¿Imatataq ruranantsik Jesus Wanunqanta Yarpäna semänakuna, y imanötaq tsëqa yanapamäshun?

¹⁰ Jina Jesus noqantsikrëkur wanunqampita bendicionkunata chaskinapaq kaqman yarpanqantsikmi, mas valienti kanapaq yanapamäshun (Juan 3:16; Efes. 1:7). Jesus noqantsikrëkur wanunqampita mas agradecikunapaqmi, Wanunqanta Yarpë semänakunachö Bibliata leyinqantsik yanapamäshun. Tsëmi Jesus Wanunqanta Yarpäna witsan leyinqantsik textukunaman yarpachakunantsik. Jesus Wanunqanta Yarpäna reunionman ëwarqa, tantawan vïnu imata rikätsikunqantam mas entiendishun. Jina  noqantsikrëkur wanunqantapis masmi valorashun. Jesuswan Jehovä noqantsikpaq y familiantsikkunapaq rurayanqanta valorarninqa, masmi confiakushun änimanqantsik bendicionkunaman. Jinamampis ushananyaq alli tsarakunapaqmi yanapamäshun (Heb. 12:3).

11, 12. ¿Këyaqqa imatataq Jesuspita yachakurquntsik?

¹¹ Wanunqanta yarpänapaq reunionqa, Jesus wanunqan alläpa valoryoq kanqantam yarpätsimantsik. Jina yarpätsimantsikmi humildi y valienti kanqantapis. Tsënö kanqampitaqa alläpam agradecikuntsik. Porqui kananqa Mandakoq kaq sacerdöti karmi noqantsikpaq Diosman rogakun (Heb. 7:24, 25). Tsëkunapita agradecikunapaqqa, Jesus mandakunqannöllam pë wanunqanta yarpänantsik (Lüc. 22:19, 20). Tsëtaqa cada wata judïukunapa calendariunchö 14 de nisan nishqan fëchachömi yarpantsik. Tsë celebracionmi imapitapis mas precisaqqa.

¹² Jina Jesus Wanunqanta Yarpäna reunionqa, Jesus imanir wanunqantam rikätsimantsik. Y tsëtaqa kë patsachö këkarmi rikätsikurqan. Tsëta rikärishun.

13. Juan 15:9 y 1 Juan 4:8-10 textukunaqa, ¿imanötaq Jehoväwan Jesus kuyakoq kayanqanta rikätsikun, y tsënö kayanqanqa pikunatataq yanapan?

¹³ Jehovä kuyamanqantsiktam, Jesusqa imëkata ruranqanchö rikätsikurqan (leyi Juan 15:9; 1 Juan 4:8-10). Tsëmi Jesusqa alläpa kuyamarnintsik noqantsikrëkur wanurqan. Jehoväwan Jesus kuyamarnintsik rurayanqankunaqa, ciëlupaq akrashqa kaqkunata y Patsachö kawanapaq kaqkunatam alläpa yanapamantsik (Juan 10:16; 1 Juan 2:2). Jina Jesusqa qateqninkunata kuyanqanta y cuentaman churanqantam rikätsikurqan, Wanunqanta yarpäyänampaq patsätsinqan paqas.

14. ¿Imanötaq Jesusqa qateqninkunata kuyanqanta rikätsikurqan?

¹⁴ Rikanqantsiknöpis, ciëlupaq akrashqa qateqninkunatam Jesusqa nirqan juk sencïllulla reunionta rurarnin wanunqanta yarpäyänampaq. Y tsënöllam tsë wanunqanta yarparnin cada wata imakunapa pasëkar o mëchö këkar hasta carcelchö këkarpis yarpäyan (Rev. 2:10). Tsëta rurarqa Jesus mandakunqantam cumplikäyan.

15, 16. ¿Imanötaq wakin cristiänukunaqa Jesus wanunqanta yarpäyashqa? Willakaramï.

¹⁵ Jehoväpa testïgunkunaqa llapan puëdiyanqanmannömi, Jesus Wanunqanta Yarpäna reunionta rurarnin sïguiyan. Y problëmakuna kaptin fäcil mana kaptimpis, Jesus ninqannöllam rurayan. Wawqi Harold King ruranqanta rikärishun. Chïna nacionchö carcelarëkarmi, Jesus wanunqanta yarpänampaq tukïnöpa kallpachakurqan. Kapunqanllawanmi tanta y vïnuta rurarqan. Jinamampis imë celebranampaq kaqtam alli tantiyarqan. Y tsë junaq chäriptinqa llawiranqan cuartullachömi japallanlla cantarqan, mañakurqan y discursuta rurarqan.

¹⁶ Juk ejemplu masta rikärishun. Segunda Guërra Mundial witsanmi, juk panikuna campos de concentracion nishqanchö llawiräyarqan. Tsëchömi vïdankunata peligruman churëkarpis Jesuspa wanïninta yarpäyarqan. Tsë reunionta rurë sencïllulla kaptinmi panikunaqa pakëllapa rurëta puëdiyarqan. Kënömi niyan: “Llapäkuna shäkïkurmi, tantata y vïnuta churayänäpaq juk bancuta yulaq tëlatawan churayarqä. Y wakinkuna cuentata mana qokuyänampaqmi vëlallawan aktsikuyarqä. Tsëta rurayanqämi yanapayämarqan  Jehovällata sirwiyänäpaq äniyanqanta yapë yarpäyänäpaq”. ¡Kë panikuna tsënö rurayanqanqa Jehoväman alläpa confiakuyanqantam rikätsikuyarqan! Kë ejemplukunam rikätsikun Jesus alläpa kuyamanqantsikta. Porqui wanïninta yarpänapaqqa, sencïllulla reunionta ruranapaqmi mandamarquntsik.

17. ¿Imatataq tapukunantsik?

¹⁷ Jesus Wanunqanta Yarpäna semänakunaqa, kënömi tapukunantsik: “¿Imanötaq Jesusnö kuyakoq kanqäta rikätsiküman? ¿Kikïllaman yarparänäpa rantinku cristiänu mayïkunaman yarparä? ¿Wakinkuna imatapis allillata rurayänantaku shuyarä?”. Noqantsikpis Jesus ruranqannölla rurashun, wakinkunapaq imëpis yarpachakurnin (1 Pëd. 3:8).

18, 19. (1) ¿Jesus Wanunqanta Yarpäna reunionta manana rurarnimpis imatataq sïqa imëpis yarpäshun? (2) Y qamqa, ¿imanö kanëkipaqtaq procuranki?

¹⁸ Ichik tiempullachönam Jesus Wanunqanta Yarpäna reunionta rurashunnatsu. Jatun sufrimientu witsanmi ciëlupaq akrashqakunata Jesus apakunqa. Y tsëpita patsëmi, Jesus Wanunqanta Yarpäna reuniontaqa rurashunnatsu (1 Cor. 11:26; Mat. 24:31).

¹⁹ Jesus Wanunqanta Yarpäna reunionta manana rurarnimpis, yarpäshunmi Jesusnöqa ni pï nunapis humildi, valienti y kuyakoq mana kanqanta. Awmi, tsë celebracionchö kashqa kaqkunaqa mushoq patsachö kawarimoqkunatam imanö kashqa kanqanta willayanqa. Tsëta musyayanqanqa alläpachi yanapanqa. Jina kanampis Jesus Wanunqanta Yarpäna reunion yanapamänapaqqa Jesusnö humildi, valienti y kuyakoq këtam procuranantsik. Tsëta rurashqaqa Jehovämi bendicimäshun (2 Pëd. 1:10, 11).