1, 2. Jesus pamparanqanchö këkaq warmikunata, ¿imatataq juk angel nirqan? Y ¿Jesusqa imatataq mandarqan?

33 WATA 16 de nisan junaqmi, Jesus pamparanqanman shumaq pukutaq o mushkoq qorakunawan y aceitikunawan ayanta llushiyänampaq llakishqa warmikuna chäriyan. Peru Jesuspa ayantaqa manam tariyantsu. Tsëchö këkäyaptinnam juk angel Jesus kawarishqana kanqanta willarir, kënö nin: “Puntëkikunatam pëqa Galilëa provinciaman ëwëkan. Tsëchömi rikäyanki” (Mat. 28:1-7; Lüc. 23:56; 24:10).

² Warmikuna ëwakïkäyaptinnam kikin Jesus yuririr kënö nirqan: “Ëwayë y wawqïkunata willayë Galilëa provinciaman ëwayänampaq, tsëchömi rikäyämanqa” (Mat. 28:10). Imatapis urgenti ninampaqchi Jesusqa tsëman qayatsirqan.

3, 4. ¿Imanötaq musyantsik Mateu 28:19, 20 Jesus mandakunqanqa apostolkunallapaq mana kanqanta? (Qaranchö dibüjuta rikäri).

³ (Leyi Mateu 28:16-20). Tsë patsätsinqan reunionchömi Jesusqa qateqninkunata kënö nirqan: “Ëwayë y qatimaqnïkuna tikrayänampaq llapan nacionkunapita nunakunata yachatsiyë. [...] Y llapan mandayanqaqkunata wiyakuyänampaq yachatsi[yë]”. Tsëta ruranapaqmi Jesusqa mandamantsik.

⁴ Jesusqa manam 11 apostolninkunallatatsu yachatsikuyänampaq mandarqan, sinöqa llapan sirweqninkunatam.  ¿Imanötaq tsëta musyantsik? Jesusta Galilëachö tariyänampaq warmikunata juk angel ninqanchömi. Tsë junaqchöqa pëman creeq warmikunapis kayarqanmi. Jina 1 Corintius 15:6 apostol Pablu nirqan, “500 wawqikunapita y panikunapitapis masta juk kuti yuripu[nqanta]”.

5. 1 Corintius 15:6 ninqanta Pablu qellqarqa, ¿pikuna y mëchö ëllukäyänampaqtaq nirqan?

⁵ Apostol Pablu tsënö nirqa, itsachi yarpëkarqan Mateu librupa 28 kaq capïtulunchö ninqanta. Tsëchöqa juk kuti Galilëachö atskaq juntakäyanqantam nimantsik. ¿Imanötaq musyantsik Galilëachö juntakäyanqanta? Musyanqantsiknöpis cäsi llapampis Jesuspa qateqninkunaqa Galilëapitam kayarqan. Jina atskaq kayaptinchi Galilëa jirkachö juntakäyänampaq nirqan. Y Jesusqa kawaririrllam 11 apostolninkunawan Jerusalenchö juntakäyarqan. Pëkunalla yachatsikuyänanta munarqa, tsëllachönachi mandanman karqan y manachi warmikunatawan y wakin qateqninkunatawanqa Galilëaman qayatsinmantsu karqan (Lüc. 24:33, 36).

6. Mateu 28:20 Jesus mandakunqanqa, ¿imanötaq kanan witsan cumplikëkan?

⁶ Jesusqa manam 11 apostolninkunalla yachatsikuyänampaqtsu mandakurqan. Tsëtaqa musyantsik Mateu 28:20 kënö ninqampitam: “Llapan junaqkunam qamkunawan këkäshaq imëkapis imanö këkanqampa ushëninyaq”. Jesus ninqannömi kanan witsanqa, mëtsikaq wawqi panikuna nunakunata yanapëkäyan bautizakuyänampaq. Cada watam, cäsi 300.000 nunakuna Jehoväpa testïgun kayänampaq bautizakuyan.

7. Kë yachatsikuychöqa, ¿imatataq yachakushun?

⁷ Mëtsikaq Bibliapita yachakoqkunam bautizakuyan, peru wakinkunaqa Jesuspa qateqnin këta mantsayanmi. Biblia ninqanta cäsukuyänampaq y bautizakuyänampaq yanapëtaqa munantsikmi. Tsënö karpis Bibliapita yachatsinqantsik nunakunaqa manam bautizakuyta munayantsu. Jehoväta kuyayänampaq y mas alli cristiänu kayanampaqmi kë yachatsikuychö yachakushun. Tsëta musyanqantsikqa yanapamäshun Bibliapita yachatsir sïguinapaq o manana yachatsinapaq kaqtam.

8. ¿Imanirtaq fäciltsu nunakunata yachatsiqa?

⁸ Jehoväqa kikinkuna munarnin Bibliata yachakoqkuna sirwiyänantam munan. Tsëmi Bibliapita yachakuykaqkunataqa yanapanantsik, teytannaqkunapa teytan y viudakunapa yanapaqnin Jehovä kanqanta rikäyänampaq (Sal. 68:5). Jehovä Diospita mas yachakurqa, kuyakuywan yanapanqanta rikarmi sirwita munayanqa. Tsënö kaptimpis wakin nunakunataqa manam teytankuna kuyayashqatsu, tsëmi fäciltsu Jehoväta kuyakoq teytankunatanö rikëqa (2 Tim. 3:1, 3). Bibliapita yachatsikurqa teyta Diosnintsik imanö kanqanta yachatsikushun. Jina kuyakoq Teyta Diosqa mana wanushpa kawakuyta tariyänantam munan.

9, 10. ¿Ima librukunawantaq yachatsikushun?

⁹ ¿Imakunatataq Biblia yachatsimantsik? Y “Dios Yayapa kuyakïninchö imëpis kawakuyë” neq librukunawan yachatsikushun. Bibliapita  yachakuykaqkunata yanapanapaqmi kë librukunata rurayämushqa. Yachatsimantsik librupa juk kaq capïtulunchömi kë tapukuykunapita yachakushun: ¿Diosnintsikqa yarpämantsiktsuraq, o manatsuraq?, ¿imanötaq Diosnintsik sientikun sufrimientukunapa pasashqa? y ¿puëdishwantsuraq Jehoväwan amïgu këta? Jina Bibliapita yachakoqkunataqa Dios Yayapa kuyakïninchö librum yanapanqa, Jehoväwan amïgu y pë munanqannö kawayänampaq. Atska kutina kë librukunawan yachatsikushqa karnimpis, Bibliapita yachatsinqantsikkunaman pensëkurninmi kikintsikraq yachakunantsik.

¹⁰ Yachatsikunapaq librukunapita mana tapumashqaqa, ¿imataraq ruranantsik? Kikinkuna yachakuyänampaq nirirmi, tsë ishkan yachatsikunapaq librukunawan yachatsir ushanantsik.

11. Bibliapita yachatsinqantsikkunawanqa, ¿imë y imanirtaq mañakur qallanantsik?

¹¹ Yachatsir qallanapaq mañakushun.  Bibliapita yachatsikurninqa, ¿imëtaq mañakur qallashwan? Yachatsikur qallanqantsik witsanllam mañakurqa qallanantsik. Diospa Palabrampita yachakuyta munarqa, pëman mañakuyänampaqmi yachatsinantsik. Wakin wawqi panikunaqa Diosman imanir mañakuyänampaq kaqtam Santiägu 1:5 ninqanta leyiyäpun: “Sitsun qamkunachö pipapis yachënin pishinqa, tsëqa Diosta mañakurnin sïguitsun”. Tsëpitanam kënö tapuriyan: “¿Imatataq ruranantsik Dios yanapamänapaq?”. Itsa kikinkuna, “mañakunantsikmi” nimashwan.

12. Biblia yachakoqkunapa mañakuyninkuna mas alli kanampaqqa, ¿imanötaq Salmus 139:2-4 yanapakun?

¹² Mañakuyänampaq yachatsishun. Shonqupita patsë mañakuyaptinqa Jehovä wiyanqanta niri. Jehoväqa ima pensanqantsiktapis musyannam, tsënö kaptimpis imanö sientikunqantsikta y pensanqantsikta willanapaqmi yachatsinantsik (leyi Salmus 139:2-4 *). Jina Diosman mañakunampaq nishun, tsënöpa mana alli pensëninta y rurëninta dejanampaq. Itsa wakinqa unëna Bibliapita yachakuykarpis Jehovä chikinqan fiestakunaman ëwëta dejayanraqtsu. Y mana alli kanqanta musyëkarpis paqwëqa dejayanraqtsu. Tsëmi Jehoväman mañakuyänampaq ninantsik, tsënöpa imanö sientikuyanqanta willayänampaq y mana allikunata chikiyänampaq (Sal. 97:10).

13. (1) ¿Imanirtaq raslla reunionkunaman invitashwan? (2) ¿Imatataq ruranantsik reunionkunachö yachakäyänampaq?

¹³ Bibliapita yachatsir qallanqantsikpita reunionkunaman ëwayänampaq invitashun. Tsëchö yachakuyanqanmi Jehoväta mas kuyayänampaq y mas alli cristiänu kayänampaq yanapanqa. Reunionkunaman ëwëta munayänampaqqa, ¿imanötaq reunionnïkuna? neq videuta rikäratsi. Allichi kanman puëdirninqa reunionkunaman pushanantsik. Y yachatseq ëwarninqa ama juk wawqi o juk panillawanqa ëwashuntsu. Tsënö rurashqaqa Bibliapita yachakuykaqkunaqa rasllam yachakäriyanqa wawqi panikunawan.

14. Mas alli cristiänu kayänampaqqa, ¿imaraq yanapanqa?

¹⁴ Yachatsinqantsik nunakuna mas alli cristiänu kayänampaqmi yanapëta munantsik (Efes. 4:13). Itsa pillapis Bibliapita yachakurqa kikinllaman mas yarpachakunqa. Peru Jehoväta mas reqirqa wakinkunata y wawqi panikunatapis yanapayanqam (Mat. 22:37-39). Jina mas nunakuna Bibliapita yachakuyänampaq, qellënintsikwan yanapakunapaq nirishun.

15. Biblia yachakuykaqkunata, ¿imanötaq yanapashwan mana allikunapa pasayaptin?

¹⁵ Bibliapita yachakuykaqkuna alli tsarakuyänampaq yanapashun. Këllaman pensarishun, Bibliapita yachakuykaq willaramashwan juk wawqi mana alli tratanqanta, ¿imataraq rurashwan? Imatapis manaraq rurarninmi Bibliataraq puntata leyirinantsik, tsëpitanam nirishwan tsë wawqita perdonanampaq y  ninqanman mana yarparäkunampaq (Mateu 18:15). Jina imanö parlapänampaq yacharatsishun. Y JW Library^®, LLAPAN PUBLICACIONKUNA Watchtower y jw.org^® mas yanapakuykunata tariyänampaq yacharatsishun. Manaraq bautizakuptin alli yachatsishqaqa, ima mana allikuna kaptimpis rasllam altsarinqa.

16. ¿Imanötaq yanapakun Bibliapita yachatsikoq juk wawqiwan ëwanqantsik?

¹⁶ Bibliapita yachatsikoq ëwarqa Congregacionkuna watukaqta y jukkunatapis invitashun. Tsëta rurashqaqa itsa 13 kaq pärrafuchö yachakunqantsiknö, wawqi panintsikkunaqa Bibliapita yachakuykaq nunakuna yanapëta puëdiyanqa. Itsa wakinqa ima viciutapis paqwëqa dejayanraqtsu, tsëqa allichi kanman tsënöpa pasaq wawqiwan yachatsikoq ëwanqantsikqa. Itsa imanö tsë viciu dejayanqanta willariptin Bibliapita yachakoqtapis yanaparinman. Ëwayanqëki wawqipa nöpanchö yachatsikuyta mantsakurqa, tsë wawqita niri pë yachatsikaramunampaq, tsënöpa tsë wawqi yachanqankunapita qampis yachakurinëkipaq. Tsënö rurashqaqa Biblia yachakoqkunaqa mas alli cristiänum kayanqa.

17, 18. ¿Imatataq cuentachö katsinantsik Biblia yachatsikuyta sïguinapaq o mana sïguinapaq?

¹⁷ Bibliapita yachakoqkuna Jehovä munanqannö rurar mana qallayaptinqa, ¿yachatsir sïguishwanku? Tsëpaqqa Bibliapita yachatsinqantsik nunakuna igual-lla mana kayanqantam yarpänantsik. Y këkunamanmi pensanantsik: “¿Bibliapita yachakoqqa Jehovä munanqannö kawanampaq kallpachakuykanku? ¿Yachakunqanmannöku kawëkan?” (Mat. 28:20). Bibliapita yachakoqkunachöqa, Jehovä munanqannö kawayänampaq kallpachakuyanqanmi cläru rikakänan.

¹⁸ Peru, ¿imataraq rurashun Biblia yachakoqkuna Jehovä munanqannö mana kawayaptinqa? Itsa wakin Bibliapita yachatsinqantsikkunaqa, Yachatsimantsik libru yachakuyta ushariyashqana y Dios Yayapa kuyakïninchö librutapis yachakur qallariyashqana, peru reunionkunaman y Jesus wanunqanta yarpäna reunionmampis ëwayanraqtsu. Jina munayanqan höralla yachakuyta munayan. Tsënö kaptinqa manana yachatseq ëwanapaq nishun. *

19. Bibliapita yachatsinqantsik bautizakuyta mana munaptinqa, ¿imataq nishwan y imatataq cuentachö katsishwan?

¹⁹ “¿Jehoväpa testïgun kanëkipaqqa imataq michäshunki?” neq tapukuywan  parlapar qallari. Unëna Bibliapita yachatsinqëki nuna nishunkiman: “Biblia yachakuytaqa munämi, peru manam testïgu kanäpaq bautizakuytaqa munätsu”, tsëqa ¿yachatsir sïguishwanku? Manam. Y jukna imanir mana kallpachakunqanta nirishunkiman, itsa wayin wayin yachatsikuyta mana puëdinampaq kaqta pensarnin. Imanö sientikuyanqanta musyarirqa, yachatsinqantsik nunakunata yanapanapaqmi yanapamäshun.

20. Bibliachö Hëchus 13:48 ninqan, ¿imanötaq yanapamäshun Bibliapita yachatsir sïguinapaq o manana yachatsinapaq?

²⁰ Ezequiel kawanqan witsanchönöllam, kanan witsan wakin Biblia yachakoqkunaqa kayan. Tsëmi Jehoväqa willakoqninta kënö nirqan: “Pëkunapaq qam këkanki arpata tocapar shipashta qotsupaq nunanömi. Tsëmi nishqëkita wiyëkarpis wiyakuyantsu” (Ezeq. 33:32). Kanan witsankunaqa, Bibliapita yachakoq nunakunata manana yachatsinapaq ninanqa itsa fäciltsu kanman (1 Cor. 7:29). Bibliapita yachatsinqantsik nuna yachakunqanmannö kawanampaq mana kallpachakuptinqa, jaqirïkur ‘imëyaqpis kawakïta chaskiyänampaq kallpachakïkaqkunata’ ashi (leyi Hëchus 13:48).

21. ¿Ima yachatsikuytataq 2020 watachöqa yarpäshun? ¿Imanirtaq yarpänantsik?

²¹ Nunakunata Jesuspa qateqnin kayänampaqqa, 2020 watachö yarpänapaq yachatsikuymi yanapamäshun. Tsëchöqa Galilëa jirkachö Jesus yachatsikunqanmi këkan, ‘Qatimaqnï tikrayänampaq nunakunata yachatsir bautizayë’ ninmi (Mat. 28:19).