1, 2. (1) ¿Imëtan masraq juk kuyashqa kastantsik o amïguntsik wanukunqanta yarpantsik? (2) ¿Imatataq Jesus mandakurqan manaraq wanutsiyanqan paqas?

 KUYASHQA kastantsik o amïguntsik wanukuykuptinqa, mëtsika watakuna pasaptimpis yarparëkantsikllam. Wanunqan junaq cada watatsämuptinmi, masraq yarpantsik.

² Cada watam, entëru Patsachö mëtsika millon nunakuna juntakantsik Jesucristu wanunqan junaqta yarpänapaq (1 Pëd. 1:8). Jutsapita y wanuypita libramänapaq noqantsikrëkur wanunqanta yarpänapaqmi juntakantsik (Mat. 20:28). Jesusqa, wanunqan junaqta qateqninkuna yarpäyänantam munarqan. Manaraq wanutsiyanqan paqasmi, juk cënata patsätsirqan y kënö mandakurqan: “Këta rurar sïguiyë noqata yarpäyämarnï” (Lüc. 22:19). *

3. ¿Imatataq këchö yachakushun?

³ Jesus Wanunqanta Yarpäna reunionman mëtsika millon ëwaq nunakunapitaqa, cäsi llapanmi Patsachö kawayanqa, peru wallkaqllam ciëluta ëwayanqa. Këchöqa, ciëluchö o Patsachö täräyänan kaptimpis, Jesus Wanunqanta Yarpäna reunionman imanir ëwëta munayanqantam rikäshun. Jina tsë reunionman ëwanqantsik imanö yanapamanqantsiktam yachakushun. Puntataqa, ciëlupa ëwaqpaq kaqkuna tsë reunionman imanir ëwayanqampita parlarishun.

4. ¿Imanirtan Jesus Wanunqanta Yarpäna reunionchö ciëlupaq akrashqakuna tantata mikuyan y vïnuta upuyan?

⁴ Juk: ciëlupaq akrashqakunaqa, Jesus Wanunqanta Yarpäna reunionman cada wata ëwayan, tantata mikuyänampaq y vïnuta upuyänampaqmi. Tsëta imanir mikuyanqanta y upuyanqanta musyanapaqqa, manaraq wanutsiyanqan paqas Jesus imata ruranqanta yarpärishun. Pascua fiestata celebrar usharirmi, Señorpa Cënanta Jesus patsätsirqan. Mana dejaq chunka juk apostolninkunatam, tantata mikuyänampaq y vïnuta upuyänampaq makyarqan. Ishkë conträtupaqmi pëkunata parlaparqan: mushoq conträtupaq y juk Gobiernu conträtupaq (Lüc. 22:19, 20, 28-30). * Tsë conträtukunaqa, apostolkuna y yupashqalla cristiänukuna ciëluchö reykuna y sacerdötikuna kayänampaqmi karqan (Rev. 5:10; 14:1). Patsallachöraq këkaq ciëlupaq akrashqakunaqa, tsë ishkan conträtukunachömi këkäyan. Tsëmi Jesus Wanunqanta Yarpäna reunionchö, pëkunalla tantata mikuyan y vïnuta upuyan.

5. Ciëlupaq akrashqa nunakunaqa, ¿imata chaskiyänampaq kaqtataq shuyaräyan?

⁵ Ishkë: ciëlupaq akrashqakunaqa, Jesus Wanunqanta Yarpäna reunionman ëwayan ciëluchö täräyänampaq kaqta yarpäyänampaqmi. Jehoväqa, mana wanoq y mana ushakaq kayänampaqmi permitinqa. Y pëkunaqa, Jesucristuwan y ciëlupaq akrashqa 144.000 nunakunapita ciëluchöna këkaqkunawanmi Jehoväta sirwiyanqa (1 Cor. 15:51-53; 1 Juan 3:2). Ciëlupaq akrashqa nunakunaqa, Jehoväta tsënö sirwiyänampaq kaqtam següru këkäyan. Peru ciëluchö kawayänampaqqa, wanukuyanqanyaqmi Jehoväta sirwiyänan (2 Tim. 4:7, 8). Ciëluchö kawayänampaq kaqta musyarmi, alläpa kushikuyan (Tïtu 2:13). ¿Y juk üshakuna cuenta kaq wakin mëtsikaq nunakunaqa? (Juan 10:16). ¿Imanirtan Jesus Wanunqanta Yarpäna reunionman ëwayan? Rikärishun.

6. ¿Imanirtan Patsachö kawaqpaq kaqkuna Jesus Wanunqanta Yarpäna reunionman cada wata ëwayan?

⁶ Juk: wakin kaq üshakunaqa o juk parlakuychöqa, Patsachö täräyänampaq kaq nunakunaqa, Jesus Wanunqanta Yarpäna reunionman ëwayan rikäyänanllapaqmi y manam tantata mikuyänampaq y vïnuta upuyänampaqtsu. 1938 watapitam, Patsachö täräyänampaq kaqta shuyaraqkunata tsë reunionman ëwayänampaq niyarqan. 1938 wata abril killapaq La Torre del Vigía revistachömi, “Patsachö täraqpaq kaqkuna tsë reunionman ëwayänan y tsëchö rurayanqanta rikäyänan allilla kanqanta” nirqan. Jina kënöpis nirqanmi: “Tsë junaqqa, pëkunapaqpis alläpa kushikuypaq junaqmi kanman”. Imanömi casakoqkuna invitayanqanman rikaq nunakuna kushishqa ëwayan, tsënöllam Patsachö kawayänampaq kaq nunakunapis, Jesus Wanunqanta Yarpäna reunionchö rurayänampaq kaqta rikaq kushishqa ëwayan.

7. ¿Imanirtan Jesus Wanunqanta Yarpäna reunionchö yachatsikäyämunampaq kaqta Patsachö kawaqpaq kaqkuna wiyëta munayan?

⁷ Ishkë: Patsachö täräyänampaq kaqkunapis, Dios äninqanmanmi yarpäyan. Tsë paqas yachatsikuyanqantaqa wiyëta munayan, waranqa watapa Jesuswan ciëluchö këkaq 144.000 nunakuna gobernarnin,  nunakunapaq imata rurayänampaq kaqta wiyëta munarmi. Jesucristu gobernamuptinmi, pëwan gobernaq nunakunaqa, Patsata juk Shumaq Huertaman tikratsiyänampaq y imachöpis pantaq manana kayänampaq nunakunata yanapayanqa. Jesus Wanunqanta Yarpäna reunionman mëtsika millon ëwaq nunakunaqa, Isaïas 35:5 y 6; 65:21 a 23 y Revelacion 21:3 y 4 ninqankunachö Dios änikunqan cumplikänantam kushishqa shuyaräyan. Shumaq Patsachöna kuyashqa kastankunawan tinkuyänampaq kaqta musyarmi, Jehoväta sirwir sïguiyänampaq kallpachakuyan (Mat. 24:13; Gäl. 6:9).

8. ¿Ima masrëkurtan Patsachö kawaqpaq kaqkuna Jesus Wanunqanta Yarpäna reunionman ëwayan?

⁸ Kima: jina Patsachö kawayänampaq kaqkunaqa, Jesus Wanunqanta Yarpäna reunionman ëwayan, ciëlupaq akrashqakunata kuyarnin y pëkunata yanapayänampaq listu këkäyanqanta rikätsikuyta munarmi. Ciëlupaq akrashqakuna y Patsachö kawayänampaq kaqkuna juk familianölla kayänampaq kaqtam, Diospa Palabranchö nishqana karqan. Tsënö kanampaq kaqta Dios ima willatsikunqan rikätsikunqanta rikärishun.

9. Zacarïas 8:23 ninqannöpis, ¿imanötan ciëlupaq akrashqakunata Patsachö kawayänampaq kaqkuna rikäyan?

⁹ (Leyi Zacarïas 8:23). Tsëchö Dios ninqanmi rikätsikun, ciëlupaq akrashqa wawqinkunata y paninkunata, Patsachö täräyänampaq kaqkuna alläpa kuyayanqanta. “Judá nación juk nunata” y “qamkunawan” ninqanqa, Patsallachöraq këkaq ciëlupaq akrashqakunapaqmi parlëkan (Rom. 2:28, 29). “Jinantin nacionpita karpis y ima idiömata parlaq karpis chunka nunakunam” ninqanqa, Patsachö kawayänampaq kaq nunakunapaqmi parlëkan. Pëkunaqa, ciëluta ëwaqkunapitam tsaripakurkuyan. Juk parlakuychöqa, mana dejëpam pëkunata yanapayan y Jehovätam juntu adorayan. Tsëmi, Jesus Wanunqanta Yarpäna paqasqa, ciëlupaq akrashqakunata yanaqäyan y pëkunawan juk familianölla kayanqanta rikätsikuyan.

10. Ezequiel 37:15 a 19, 24 y 25 ninqanchö musyatsikunqan cumplikänampaqqa, ¿imatataq Jehovä rurashqa?

¹⁰ (Leyi Ezequiel 37:15-19, 24, 25). Ciëlupaq akrashqakuna y Patsachö täräyänampaq kaqkuna juk nunanölla trabajayänampaq yanaparmi, Jehoväqa tsëchö ninqanta cumplitsishqa. Dios willatsikunqanqa, ishkë qerupaqmi parlan. Ciëluchö kawayänampaq kaqkunaqa, Judäpita qerum kayan (tsë kastapitam Israelpaq reykunata akrayaq). Y Patsachö täräyänampaq kaqta shuyaraqkunanam, Efrainpita qerunö kayan. * Jehoväqa, tsë ishkan grüpu nunakuna juk qerulla kayänampaqmi choqpanan karqan. Tsëqa, ishkan grüpukuna juk familianölla reyninkuna Jesucristuta sirwiyänampaq kaqtam rikätsikun. Ciëlupaq akrashqakuna y Patsachö kawayänampaq kaqkunaqa, ‘juk grüpulla y juk mitseqyoqlla’ karmi, Jesus Wanunqanta Yarpäna reunionchö juntu kayan (Juan 10:16).

11. Mateu 25:31 a 36 y 40 ninqanchö ‘üshakunaqa’, ¿imanötan Cristupa Patsallachöraq këkaq wawqinkunata yanapayan?

¹¹ (Leyi Mateu 25:31-36, 40). Kë igualatsikuychö ‘üshakunapaq’ parlarqa, alli kaqta ruraq nunakunapaq y Patsachö täräyänampaq kaqkunapaqmi parlëkan. Ciëlupaq akrashqa Cristupa wawqinkunatam, kë Patsachö Diospita willakuyänampaq y yachatsikuyänampaq mana dejëpa yanapayan (Mat. 24:14; 28:19, 20).

12, 13. ¿Ima maskunata rurartan Cristupa ciëlupaq akrashqa wawqinkunata yanapantsik?

 ¹² Jesus Wanunqanta Yarpäna reunionpaq juk ishkë semänakuna pishikaptinmi, Patsachö kawayänampaq shuyaraqkunaqa, Cristupa ciëlupaq akrashqa wawqinkunata yanapayan. Tsëtaqa rurayan, Jesus Wanunqanta Yarpäna paqaspaq nunakunata entëru Patsachö invitarninmi. (Rikäri, “ ¿Patsätsipakuykankinaku Jesus Wanunqanta Yarpäna reunion witsampaq?” neqta). Congregacionninkunachö ciëlupaq akrashqakuna mana kaptimpis, Jesus Wanunqanta Yarpäna reunionpaqqa entëru Patsachömi alistapakuyan. Cristupa wawqinkunata tsënö yanaparmi, Patsachö kawaqpaq kaqkunaqa kushishqa kayan. Ciëlupaq akrashqakunata yanaparnin kikin Jesusta yanapëkaq cuenta kayanqantam yarpäyan (Mat. 25:37-40).

¹³ Ciëluchö o Patsachö kawanantsik kaptimpis, ¿imanirtan Jesus Wanunqanta Yarpäna reunionman ëwantsik?

14. ¿Imanötan Jehoväwan Jesus alläpa kuyamanqantsikta rikätsimarquntsik?

¹⁴ Jehoväwan Jesus kuyamanqantsikta agradecikurmi. Jehoväqa imëkanöpam kuyamanqantsikta rikätsimarquntsik. Peru masqa, noqantsikrëkur Tsurin sufrinanta y wanunanta permitirninmi (Juan 3:16). Jesuspis noqantsikrëkur wanurmi kuyamanqantsikta rikätsimarquntsik (Juan 15:13). Kuyamarnintsik noqantsikrëkur rurayanqampitaqa, manam imëpis paguëta puëdishuntsu. Tsënö kaptimpis, imanö kawanqantsikwanmi agradecikunqantsikta rikätsikushwan (Col. 3:15). Jesus Wanunqanta Yarpäna reunionman ëwarmi, pëkunata kuyanqantsikta y agradecikunqantsikta rikätsikuntsik.

15. ¿Imanirtan ciëluta ëwayänampaq kaq y Patsachö kawayänampaq kaqkunaqa Jesus wanunqampita alläpa agradecikuyan?

¹⁵ Jutsapita y wanuypita salvamanqantsikrëkurmi (Mat. 20:28). Ciëlupaq akrashqakunaqa, Jesus wanunqanrëkur ciëluta ëwayänan kaptinmi agradecikuyan. Cristu wanunqanman markäkuyaptin o yärakuyaptinmi, Jehoväqa pëkunata jutsannaqtanö rikan y wamrankunatanö chaskin (Rom. 5:1; 8:15-17, 23). Y Patsachö kawaqpaq kaqkunaqa Diospa rikëninchö alli kayänampaq, pëta sirwiyänampaq y “alläpa jatun sufrimientukunapita” kawëkar yarquyänampaq Cristu wanunqan yanapayanqampitam agradecikuyan (Rev. 7:13-15). Tsë ishkan grüpu nunakunaqa, Jesus Wanunqanta Yarpäna reunionman ëwarmi agradecikuyanqanta rikätsikuyan.

16. ¿Imanir mastan Jesus Wanunqanta Yarpäna reunionman ëwantsik?

¹⁶ Jesusta wiyakuyta munarmi. Mëchö kawanantsikpaq kaptimpis, wanunqanta yarpäna reunionta patsätsirnin Jesus kënö mandakunqantam wiyakuntsik: “Këta rurar sïguiyë noqata yarpäyämarnï” (1 Cor. 11:23, 24).

17. ¿Imanirtan Jesus Wanunqanta Yarpäna reunionman ëwanqantsikqa Jehoväwan mas alli amïgu kanapaq yanapamantsik?

¹⁷ Jehoväwan mas amïgu kanapaqmi yanapamantsik (Sant. 4:8). Rikanqantsiknömi, Jesus Wanunqanta Yarpäna reunionman ëwarqa, Jehovä änimanqantsikman y alläpa kuyamanqantsikman yarpänapaq yanapamantsik (Jer. 29:11; 1 Juan 4:8-10). Jehovä änimanqantsikta cumplimunampaq y imëpis kuyamänapaq kaqtaqa segürum këkantsik. Këkunaman yarpachakushqaqa, Jehoväta  mas kuyanapaq y pëwan mas alli amïgu kanapaqmi yanapamäshun (Rom. 8:38, 39).

18. ¿Imanötan yanapamantsik Jesus ruranqankunaman yarpachakunqantsik?

¹⁸ Jesus ruranqannölla ruranapaqmi yanapamantsik (1 Pëd. 2:21). Jesus Wanunqanta Yarpäna reunionpaq juk ishkë junaqkuna pishikaptinmi, Patsachö këkar Jesus imakunata ruranqankunapita, wanunqampita y kawarimunqampita Bibliachö leyintsik. Tsëpitanam, Jesus Wanunqanta Yarpäna reunion paqas yachatsikayämunqanchö, Jesus alläpa kuyamanqantsikta yarpätsimantsik (Efes. 5:2; 1 Juan 3:16). Noqantsikrëkur Jesus ruranqampita leyinqantsik y pënö kanapaq kallpachakunqantsikmi, pë kawanqannö kawar sïguinapaq yanapamantsik (1 Juan 2:6).

19. ¿Imatataq ruranantsik Diospa kuyakuyninchö imëpis kanapaq?

¹⁹ Diospa kuyakuyninchö imëpis kanapaqmi yanapamantsik (Jüd. 20, 21). Pëta wiyakunapaq, jutinta respetatsinapaq y kushishqa kanampaq puëdinqantsikmannö kallpachakurmi, kuyakuyninchö imëpis këkantsik (Prov. 27:11; Mat. 6:9; 1 Juan 5:3). Jesus Wanunqanta Yarpäna reunionman ëwanqantsikmi, rurënintsikkunawan Jehoväta cada junaq kënö ninapaq yanapamantsik: “¡Qampa amïguykim imëyaqpis këta munä!”.

20. ¿Imakunarëkurtan Jesus Wanunqanta Yarpäna reunionman ëwantsik?

²⁰ Ciëluchö o Patsachö kawana kaptimpis, Jesus Wanunqanta Yarpäna reunionman cada wata ëwanapaqqa imëkatam yachakurquntsik. Tsë reunionmanqa cada wata juntakantsik, kuyashqa familiantsiktanö Jesusta yarpänapaqmi. Y masqa, alläpa kuyamarnintsik jutsapita y wanuypita salvamänapaq Tsurin wanunanta Jehovä permitinqantam yarpantsik. Kë wataqa, viernis 15 de abril paqasmi Jesus wanunqanta yarpäshun. Jehovätawan wamranta kuyarmi, Jesus Wanunqan Yarpäna reunionman imatapis dejëkur ëwashun.