1. ¿Imapatan David pasëkarqan?

 ISRAELPA reynin Saul wanutsita munaptinmi, Davidqa qeshpir ëwakurqan. Mikunampaq imampis mana kaptinmi, Nob markaman yëkurirqan y pitsqa tantata mañakurqan (1 Sam. 21:1, 3). Tsëpitanam, pë y qatiraqnin nunakunaqa juk machëchö ratakuyarqan o tsinkakuyarqan (1 Sam. 22:1). ¿Imanirtan Davidqa tsënö këkarqan?

2. ¿Imatataq Saul rurëkarqan mana allichö ushanampaq? (1 Samuel 23:16, 17).

² Davidta pï më reqiyaptin y guërrakunachö mëtsika kuti ganashqa kaptinmi, Saulqa alläpa chikeq. Jina mana wiyakoq kanqanrëkur rey kananta Jehovä manana munanqanta, y pëpa rantin Israelta gobernanampaq Davidta akrashqa kanqantam musyarqan (leyi 1 Samuel 23:16, 17). Peru Israelta gobernaq kaptinmi, Saulpaqa mëtsika soldädunkuna y yanapaqninkuna kapurqan. Tsëmi Davidqa mana wanutsiyänampaq qeshpir ëwakurqan. ¿David rey kanampaq Jehovä ninqampa contran churakëta puëdinampaq kaqtatsuraq Saulqa pensarqan? (Is. 55:11). Bibliachöqa manam nintsu, peru Davidta rurëkanqanwan mana alliman ishkinampaq kaqqa, clärum këkarqan. Jehoväpa contran churakaqkunaqa, imëpis mana allichömi ushayan.

3. ¿Imanötan Davidqa këkarqan mana allikunapa pasëkarpis?

³ Davidqa humildi nunam karqan. Manam Israelpa reynin këtatsu ashirqan, sinöqa kikin Jehovämi akrarqan (1 Sam.  16:1, 12, 13). Tsëmi Saulqa Davidta alläpa chikirqan. Peru Davidqa, mana allikunapa pasanqankunapitaqa manam Jehovätatsu culparqan. Jina wallkalla mikuy-yoq karnin y machëkunachö ratakunan o tsinkakunan kaptimpis, manam cölerakurqantsu. Tsëpa rantinqa, itsachi machëkunachö kawëkarnin juk shumaq cancionta qellqarqan. Tsë cancionpa wakin letrankunam kanan yachakunapaq kaq versïculuchö këkan, kënömi nin: “Jehoväman confiakoqkunapaqa manam imankunapis pishinqatsu”. Tsëtam kë wata yarpäshun (Sal. 34:10, TNM).

4. ¿Ima tapukuykunatataq këchö rikäshun y imanirtan tsëkunapita yachakushwan?

⁴ Kanan witsampis, Jehoväpa sirweqninkunaqa mëtsikaqmi mikuyänampaq o jukkunapaqpis pishipakuyan. * Tsëqa, muyakoq o shukukoq qeshya kanqan witsanmi, masraq rikakashqa. Y ‘alläpa jatun sufrimientu’ chämunqanyaqqa, imëkapis peoranqam (Mat. 24:21). Tsërëkur kë chusku tapukuykunapita yachakurishun: ¿imanötan Davidpaqqa imampis pishirqantsu?, ¿imanirtan kapamanqantsikwan kushishqa kashwan?, ¿imanirtan següru këkantsik Jehovä cuidamänapaq kaqta? y ¿imatataq kanan ruranantsik shamoq tiempuchö alli tsarakunapaqqa?

5, 6. Diosta sirweqkunapaq imankunapis mana pishinampaq kaqta David ninqanta entiendinapaqqa, ¿imanötan Salmus 23:1 a 6 ninqan yanapamantsik?

⁵ Jehoväta sirweqkunapaqqa “manam imankunapis pishinqatsu” nirqa, ¿imapaqtan David parlëkarqan? Tsëta entiendinapaqqa, Salmus 23 ninqampita yachakunqantsikmi yanapamäshun. Tsë salmuta qellqarpis, Davidqa tsë palabrakunallatam utilizarqan (leyi Salmus 23:1-6). Davidmi tsë salmuchö kënö qellqarqan: “TEYTA DIOSMI mitsimaqnï. Manam imäpis pishipämanqatsu”. Tsë salmupa qateqnin kaq versïculunkunachömi, Diospaq ima mas välinqanta David qellqarqan. Tsëkunaqa, Jehovä mitseqnin kaptin  chaskinqan bendicionkunam karqan. Jehoväqa, allipa y mana allikunapa pasaptinmi, ‘kuyakuq karnin alli nänipa’ pusharqan. “Alli qewa kashqanchömi mitsiman” nirpis, Davidqa problëmannaq mana kanampaq kaqtaqa musyarqanmi. Itsa höraqa, jananchöna wanuy kaptinnöpis, kallpannaqnö karqan y chikeqninkuna kanampaq kaqtapis nirqanmi. Peru Jehovä mitseqnin kaptinmi, Davidqa “janächöna wanï kaptinpis manam mantsakütsu” nirqan.

⁶ Tsëqa, ¿imanötan Davidpaqa imampis pishirqantsu? Jehoväta sirwir sïguinampaq wananqankunaqa kapurqanmi. Kushishqaqa manam imëkayoq kanqampitatsu karqan. Davidqa wananqankunawan Jehovä yanapaptinmi, kushishqa këkarqan. Pëpaqqa Dios bendicinqan y pëpa rikëninchö mas alli kanqanmi masqa välirqan.

7. Lücas 21:20 a 24 ninqannö, ¿Judëachö punta cristiänukunaqa ima mana allikunapatan pasayarqan?

⁷ Tsë salmuchö David qellqanqampitaqa, imëkayoq këpaq mana yarpachakunapaqmi yachakuntsik. Kapamanqantsikkunawan kushishqa kanqantsikqa allillam. Peru tsëkunata puntaman churëpitam cuidakunantsik. Tsë consëjutaqa, Judëachö täraq punta cristiänukunam alli entiendiyarqan (leyi Lücas 21:20-24). Shamoq tiempuchö “mëtsika tröpakuna Jerusalenta cercarnin” jiruroq patsakäriyänampaq kaqtam, Jesusqa nishqana karqan. Tsëkuna pasakuptinqa, “jirkakunaman escapar ëwakuyë” nirqanmi. Tsëta rurarqa salvakuyänanmi karqan, peru imëkankunatam jaqiyänan karqan. Pasaq watakunachömi, La Atalaya juk revistachö kënö nirqan: “Jehovä yanapayänampaq y cuidayänampaq kaqman confiakurmi, wayinkunata, chakrankunata y imëkankunata jaqiriyarqan. Pëkunaqa, Diosta adorëtam imëkapitapis mas puntaman churayarqan”.

8. Judëachö punta cristiänukunata pasanqampitaqa, ¿imatataq yachakuntsik?

⁸ Judëachö punta cristiänukunata pasanqampitaqa, ¿imatataq yachakuntsik? La Atalaya revistapaq tsëllaraq parlanqantsikchömi, kënö nirqan: “Itsa cösasnintsikkunata imanö kuyanqantsik, markäkïnintsikta o yärakuynintsikta pruëbaman churanqa. ¿Kapamanqantsik cösaskunatatsuraq o Diosllata sirweqkunawan salvakuytatsuraq mas puntaman churashun? Itsa qeshpir ëwakushqaqa, imëkapa pasashun y llapan wananqantsikqa kapamäshuntsu. Judëachö punta cristiänukunanöllam, imata ruranapaqpis kananllapitana listu këkänantsik”. *

9. Hebreukunata apostol Pablu consejanqanqa, ¿imanötan qamta yanapashunki?

⁹ Këman pensarishun: punta cristiänukunapaqqa, ¿fäciltsuraq karqan cäsi llapanninkunata dejëkur juk sitiuchöna kawar qallayänanqa? Wanayanqankunata tariyänampaq Jehovä procurapunampaq kaqmanqa, llapan shonqunkunawanmi pëman confiakuyänan karqan. Peru Jerusalenta Röma nacion tröpakuna cercayänampaq pitsqa wata pishikaptinmi, apostol Pabluqa hebreukunata alläpa shumaq consëjuta yarpätsirqan. Kënömi nin: “Imanöpis kawayanqëkichöqa qellë kuyë katsuntsu, y kayäpushunqëki cösaskunallawan kushishqa kayë. Porqui pëqa kënömi nishqa: ‘Manam ni imëpis jaqirishqëkitsu, y manam ni imëpis qampita witikurishaqtsu’. Tsëmi kallpata tsarir kënö nita puëdintsik: ‘Jehovämi yanapamaqnï; manam mantsakäshaqtsu. ¿Imataraq nuna ruramanman?’” (Heb. 13:5, 6). Jerusalenta ushakätseq manaraq chäyaptin Pablu consejakunqannö kawëkaq cristiänukunapaqqa, mas fäcilchi karqan wallka cösaskunallawan juk sitiuchö yachakëqa. Segürum  këkäyarqan, wanayanqankunata Jehovä procurapunampaq kaqta. Apostol Pablu ninqanqa, noqantsikpis pëkunanölla confiakunapaqmi yanapamantsik.

10. ¿Imatataq apostol Pabluqa alli musyarqan?

¹⁰ Apostol Pabluqa Timoteutapis tsënöllam consejarqan, y tsë consëjuqa noqantsiktapis yanapamashwanmi. Pëmi kënö nirqan: “Tsëmi mikï y röpa kapamashqaqa, tsëkunallawan imëpis kushishqa kashun” (1 Tim. 6:8). Tsëqa, ¿gustamanqantsik mikuyta, shumaq wayichö tärëta y puëdikaptinqa shumaq röpata mana rantinapaq kaqtaku rikätsikun? Pabluqa manam tsëtatsu nikarqan. Tsëpa rantinqa, kapamanqantsikllawan kushishqa kanapaq kaqtam nikarqan (Filip. 4:12). Pabluqa allim musyarqan kapunqanllawan kawëta. Noqantsikpaqqa, manam kapamanqantsiktsu masqa välin, sinöqa Jehoväwan amïgu kanqantsikmi (Hab. 3:17, 18).

11. ¿Imatataq yachakuntsik israelïtakunata Moises ninqampita?

¹¹ Itsa noqantsik wananqantsikta pensanqantsikqa, Jehoväpa rikënimpaqqa mana wananqantsik kanman. Tsunyaq sitiukunapa israelïtakuna puriyanqampita 40 watakuna pasarinqanchö, Moises ima ninqanta rikärishun. Pëmi kënö nirqan: “Llapan ruranqantsikchömi TEYTA DIOS bendicionta qomarquntsik. Tsëmi chusku chunka (40) watanpi chusyaq jirkapa purishqapis yanapamashqantsik imapis mana pishipamänantsikpaq” (Deut. 2:7). Jehoväqa, 40 watapam manä mikuyta  qararqan. Y Egiptupita yarquyanqan röpankunapis manam ushakarqantsu (Deut. 8:3, 4). Itsa wakin israelïtakunaqa, kayäpunqankuna wallkalla kanqanta pensayarqan. Peru Moisesqa llapan wanayanqankuna kayäpunqantam yarpätsirqan. Wallkalla kapamashqapis, Jehoväpa bendicionnintanö rikashqa y tsëkunapita agradecikushqaqa, Pëqa alläpam kushikunqa.

12. ¿Imanötan musyantsik Jehoväman David chipyëpa confiakunqanta?

¹² Jehovä mana dejakoq kanqanta y pëta kuyaqkunapaq alläpa yarpachakunqantam Davidqa musyarqan. Vïdan peligruchö këkaptin Salmus 34 ninqanta qellqarqa, angelninwan tsapëkaq cuenta Jehovä këkanqanmanmi markäkurqan (Sal. 34:7). Davidqa, chikeqninkuna illaqpita yurirkuyänampaq kaptinnöpis, imëka täparëkaq soldädutawanmi Jehoväpa angelninta igualatsirqan. Pelyëta yacharnin y rey kanampaq kaqta Jehovä änishqa kaptimpis, manam chikeqninkunata warakanwan warakar o espädanwan tuksir ushakätsinampaq kaqmantsu markäkurqan (1 Sam. 16:13; 24:12). Tsëpa rantinqa, Diosman y angelnin pëta respetaqkunata salvanampaq kaqmanmi confiakurqan. Tsënö kaptimpis, noqantsikqa manam milagrukunawan salvamänantsikta shuyarantsiktsu. Peru Diosta sirweqkunaqa, ima mana alli pasamanqantsiktapis shamoq tiempuchö Diosnintsik chipyëpa altsaramunampaq kaqtam musyantsik.

13. ¿Imanirtan Magogpita Gog fäcil-lla ushakätsimänapaq kaqta pensanqa, peru imanirtan noqantsikqa mantsakänantsiktsu? (Rikäri jana qaranchö dibüjuta).

¹³ Shamoq tiempuchöqa, Jehovä cuidamänapaq markäkunqantsikmi pruëbaman churakanqa. Itsapis tsëtaqa pensashwan, Magogpita Gog o juk parlakuychöqa, juk grüpu nacionkuna ushakätsimënintsikta munayaptin. Tsë witsanqa, Jehovä salvamänapaq kaqtam següru kanantsik. Nacionkunapaqqa, mana ni pï defendeq üshakunanömi kashun (Ezeq. 38:10-12). Mana illapayoq y guërrapaq mana alistakushqa kanqantsikta musyarmi, fäcil-lla ushakätsimänantsikpaq kaqta pensayanqa. Noqantsikqa, Diosman markäkurmi imëka angelkuna salvamänapaq jiruroqnintsikchö këkäyanqantanö rikäshun. Peru pëkunaqa, manam tsëta musyayanqatsu. ¿Imanöraq Jehoväman mana markäkïkarqa nacionkuna tsëta rikäyanqa? ¡Imaraq mantsakäyanqa mëtsika tröpa angelkuna salvamaqnintsik shamoqta rikarnin! (Rev. 19:11, 14, 15).

14. ¿Imatataq rurashwan kananllapitana shamoq tiempuchö alli tsarakunapaq?

¹⁴ ¿Imatataq rurashwan kananllapitana shamoq tiempuchö alli tsarakunapaq? Manam cösasnintsikkunata alläpa kuyanantsiktsu. Yarpänantsikmi, cösasnintsikkunata dejëkur imë karpis ëwakunapaq kaqta. Jina kapamanqantsikllawanmi conformakunantsik y Jehoväwan amïgu kanqantsikpitam masqa kushikunantsik. Diosnintsikta mas reqinqantsikmi, Magogpita Gog ushakätsimënintsikta munaptin Pë salvamänapaq kaqta següru kanapaq yanapamäshun.

15. ¿Imanirtan mana allikunapa pasarpis Davidqa Jehovä yanapanampaq kaqman markäkurqan?

¹⁵ David mana allikunapa pasarnin, alli tsarakunampaq ima mas yanapanqanta rikärishun. Pëmi kënö nirqan: “Kuyakuq kashqanta musyayänëkipaq TEYTA DIOSMAN markäkuyë. Pëman markäkurqa kushishqam kawakuyanki” (Sal. 34:8). Këchö ninqanqa, Jehovä imëpis yanapanampaq kaqman David confiakunqantam rikätsikun. Pëqa imata ruranampaqpis,  Diosmanmi markäkurqan y Diosqa imëpis yanapëkarqanllam. Jövinllaraq këkarmi, Davidqa alläpa jatun Goliat jutiyoq nunawan pelyaq ëwarqan y kënö nirqan: “Kananmi makïman TEYTA DIOS churamushurqunki” (1 Sam. 17:46). Tiempuwannam sirweqnin këkaptimpis, Saulqa Davidta atska kuti wanutsita munarqan. Peru Davidtaqa, ‘Teyta Diosmi yanapëkarqan’ (1 Sam. 18:12). Puntatapis Jehovä yanapashqa kaptinmi, kanampis yanapanampaq kaqman markäkurqan. Këchö yachakunqantsikmi, pruëbakunapa pasarnin alli tsarakunapaq yanapamäshun.

16. ¿Imanötan musyashwan Jehovä alläpa alli kanqanta?

¹⁶ Dirigimänapaq Jehoväta kanankuna mas mañakurqa, shamoq tiempuchö yanapamänapaq kaqmanmi mas confiakushun. Këllaman pensarishun: asamblëapaq permïsukunapaq, reunionkunaman y Diospita mas yachatsikunapaq trabäjuntsikpita tempränu yarqunapaq patronnintsikta mañakunapaqqa, Jehovämanmi confiakunantsik. Itsa këkunata mañakushqa, trabäjupita qarquramashwan. Tsënö pasakuptinqa, ¿Jehovä imëpis mana dejamänapaq kaqta, noqantsikpita mana witikurinampaq kaqta y wananqantsikkunata procuramunampaq kaqman markäkuntsikku? (Heb. 13:5). Llapan tiempunkunawan Jehoväta mëtsikaq sirweqkunam, wanayanqan höra pë imanö yanapashqa kanqanta rikäyashqa. Jehoväqa mana dejakoqmi.

17. ¿Ima textutataq 2022 watachö yarpäshun, y imanirtan alläpa yanapamäshun?

¹⁷ Shamoq tiempuchö imëka mana allikuna pasakuptimpis, Jehovä yanapamashqaqa manam mantsakäshuntsu. Pëta imëpis puntaman churashqaqa, manam imëpis dejamäshuntsu. Tsë witsankuna alli tsarakunapaq kananllapitana alistakunapaq, y Jehovä mana dejamänapaq kaqman confiakunapaqmi, Salmus 34:10 ninqanta 2022 watachö yarpänapaq Testïgukunata Pushaqkuna akrayämushqa. Kënömi nin: “Jehoväman confiakoqkunapaqa manam imankunapis pishinqatsu”.