1, 2. (1) Jesus imanö kawanqanman y yachatsikunqanman pensarqa, ¿imanöraq sientikushwan? (2) ¿Imatataq yachakushun?

 FAMILIANTSIKTA wanupakurqa, alläpam llakintsik. Wanuriptinllaqa, imanö sufriyanqanta yarparmi alläpa llakikuntsik. Peru tiempu pasariptinqa capaz yarpantsik kushishqa kanapaq yanapamanqantsikta, imatapis yachatsimanqantsikta, noqantsikpaq imatapis ruramunqanta, parlapämanqantsikta o asitsimanqantsikta.

² Tsënöllam, Jesus imanö sufrinqampaq y wanunqampaq Bibliachö leyirqa llakikuntsik. Tsënö pasanqankunataqa masqa leyintsik Jesus wanunqanta yarpäna witsanmi y wanunqan imanö yanapamanqantsikmanmi pensantsik (1 Cor. 11:24, 25). Peru Jesus kë Patsachö këkar ruranqankunaman y ninqankunaman pensarninqa, alläpam kushikuntsik. Tsënöllam kushikuntsik kanan witsan rurëkämunqankunaman y shamoq tiempuchö ruramunampaq kaqkunaman pensar. Këchömi yachakushun, Jesus ruranqankunaman y kuyamanqantsikman pensanapaq, tsëmi agradecikunapaq yanapamäshun.

3. ¿Imanirtan noqantsikrëkur Jesus wanunqampita agradecikushwan?

³ Kë Patsachö këkar Jesus imanö kawanqanman y wanunqanman pensanqantsikmi yanapamantsik agradecikunapaq. Jesusqa kë Patsachö këkarmi, nunakunata yachatsirqan Diospa Gobiernun imëka allikunata ruramunampaq kaqta, y tsëkunata musyarqa noqantsikpis alläpam kushikuntsik. Alläpam agradecikuntsik Jehoväpa y Jesuspa amïgun kanapaq noqantsikrëkur Jesus wanunqan yanapamanqantsikta. Jesus wanunqanman markäkur o yärakurqa, mana wanuypam kawakuyta puëdishun y wanushqa familiantsikkunawampis  kawariyämuptinmi tinkushun (Juan 5:28, 29; Rom. 6:23). Rasumpa kaqchöqa, tsë llapan bendicionta chaskitaqa manam merecintsiktsu. Diosnintsikta y Jesustaqa manachi imanö paguëtapis puëdishwantsu (Rom. 5:8, 20, 21). Tsënö karpis, ¿imatataq rurashwan agradecikunqantsikta rikätsikunapaq?

4. ¿Imatataq Marïa rurarqan Jesus ruranqampita agradecikurnin? (Rikäri dibüjuta).

⁴ Pensarishun Marïa Magdalëna jutiyoq judïa warmiman. Pëqa siëti demoniukunayoq karmi alläpa sufrirqan. Capazchi pensarqan manana alliyänampaq kaqta. Peru tsë demoniukunata Jesus qarquriptinqa, alläpachi agradecikurqan. Tsënö agradecikurmi, Jesus yachatsikuptinqa tiempunta rakirqan yanapanampaq, y imëka kapunqankunawanmi yanaparqan (Lüc. 8:1-3). Pëpaq Jesus ruranqampita alläpa agradecikurpis, Marïaqa capazchi entiendirqantsu llapan nunakunapaq Jesus ichikllachöna imata ruranampaq kaqta. Jesusqa, “pëman markäkoqkuna o yärakoqkuna” imëyaqpis kawakuyta puëdiyänampaqmi wanunan karqan (Juan 3:16). Tsëta mana entiendirpis, Marïaqa agradecikoq karmi Jesusta dejarqantsu. Qeruchö clavarëkaptinmi, tsëchö quedakurqan Jesusta y wakinkunata yanapanampaq (Juan 19:25). Y Jesus pamparëkaptinnam, Marïaqa ishkaq warmikunawan ëwayarqan shumaq pukutaq o mushkoq plantakunawan aceitita takurkur Jesuspa ayanta llushiyänampaq (Mar. 16:1, 2). Tsënö kanqampitaqa, Jehoväqa Marïata bendicirqanmi. Pëmi permitirqan kawarimushqana Jesuswan tinkunampaq y parlanampaq. ¡Marïaqa alläpachi kushikurqan Jehovä tsënö bendicinqampita! Jehoväqa wakin discïpulukunallatam tsëta permitirqan (Juan 20:11-18).

5. ¿Imanötan agradecikushwan Jehoväwan Jesus noqantsikpaq rurayämunqampita?

⁵ Noqantsikpis Jehoväwan Jesus rurayämunqampitaqa agradecikuyta puëdintsikmi. ¿Imanö? Diosnintsikpita yachatsikunapaq tiempuntsikta rakirmi, hasta kallpantsikwan y qellënintsikwampis yanapakushwanmi.  Y Diosnintsikta adoranantsik wayikunata altsayaptinqa yanapakunapaqmi änikunantsik.

6. ¿Imanirtan nintsik noqantsikrëkur Jesus wanunqanqa juk shumaq qarë kanqanta?

⁶ Jehoväwan Jesus alläpa kuyamanqantsikman pensarmi, pëkunatapis llapan shonquntsikwan kuyantsik (1 Juan 4:10, 19). Y cada nunapaq Jesus wanunqanta entiendirnäqa, masran kuyantsik. Apostol Pablupis tsëpitam agradecikurqan y Galaciachö këkaq cristiänukunatam nirqan Diospa Tsurinqa alläpa kuyarnin pëpaq wanushqa kanqanta (Gäl. 2:20). Llapan nunakunapaq Jesus wanushqa kaptinmi, Jehoväqa qamtapis amïgun kanëkita permitishunki (Juan 6:44). ¿Manaku alläpa agradecikunki alli nunatanö rikäshurniki y amïgun kanëkita munarnin Jehoväqa Wamrampa vïdanwan pagakunqampita? ¿Manaku tsëta musyarqa Jehovätawan Jesusta mas kuyanki? Tsëmi llapantsikpis kënö tapukunantsik: “Tsënö kuyëkäyämaptinqa, ¿imatataq ruräman?”.

7. Fötuchö rikanqantsiknö, ¿imanötan rikätsikushwan Jehovätawan Jesusta kuyanqantsikta? (2 Corintius 5:14, 15; 6:1, 2).

⁷ Jehovätawan Jesusta kuyanqantsikmi yanapamantsik wakin nunakunata kuyanapaq (leyi 2 Corintius 5:14, 15; 6:1, 2). Nunakunata kuyanqantsiktaqa rikätsikuntsik llapankunata Diosnintsikpita yachatsirninmi. Tsëmi ima kastapita kayaptin, ima costumbriyoq kayaptin, rïcu o waktsa kayaptimpis llapankunata yachatsintsik. Tsënömi Jehovä munanqanta rurantsik. Jehoväqa, “llapan nunakuna salvakuyänanta y rasumpa kaqta cläru yachakuyänantam munan” (1 Tim. 2:4).

8. ¿Imanötan rikätsikuntsik wawqi panintsikkunata kuyanqantsikta?

⁸ Tsënöllam Jehovätawan Jesusta kuyanqantsiktaqa rikätsikuntsik wawqi panintsikkunata  kuyarnin (1 Juan 4:21). Tsëmi mana allikunapa pasayaptinqa, pëkunapaq yarpachakuntsik y yanapantsik. Familiankuna wanukuptinqa shoqantsik, qeshyayaptinqa watukaq ëwantsik y llakikuy qeshyëwan qeshyayaptinqa llapan puëdinqantsikmannömi yanapantsik (2 Cor. 1:3-7; 1 Tes. 5:11, 14). Tsënöllam pëkunapaq Jehovä Diosnintsikman mañakuntsik. Tsëtaqa rurantsik, ‘alli ruraq nuna mañakunqanqa alläpa poderyoq’ kanqanta musyarmi (Sant. 5:16).

9. ¿Imanö mastan wawqi panintsikkunata kuyanqantsikta rikätsikushwan?

⁹ Wawqi panintsikkunata kuyanqantsiktaqa rikätsikuntsik pëkunawan yamë y alli kawakurninmi. Tsëmi ofendimashqaqa, Jehovänö perdonëkuntsik. Këllaman pensarishun: jutsantsikpita perdonamänapaq Wamran wanunanta Jehovä permitikaptinqa, ¿manatsuraq noqantsikqa ofendimaqnintsik wawqintsikta o panintsikta perdonëkushwan? Manam Jesus willakunqan esclävunöqa këta munantsiktsu. Tsë esclävuqa, atska qellëtam patronninta debirqan y patronninqa perdonarmi cobrarqannatsu, peru tsë esclävuqa manam esclävu mayinta debinqampita perdonëta munarqantsu (Mat. 18:23-35). Tsënö këkaptinqa, ¿imatataq rurankiman juk wawqiwan o paniwan ofendinakushqa karqa? Jesus wanunqanta yarpänapaq junaq manaraq chämuptinmi, tsë asuntuta arreglayänëki y perdonanakuyänëki (Mat. 5:23, 24). Tsëta rurarqa, Jehovätawan Jesusta llapan shonquykiwan kuyanqëkitam rikätsikunki.

10, 11. ¿Imanötan anciänukunaqa Jehoväta y Jesusta kuyayanqanta rikätsikuyanman? (1 Pëdru 5:1, 2).

¹⁰ Jehovätawan Jesusta llapan shonqunkunawan kuyayanqantaqa anciänukunam mas rikätsikuyänan. Y tsëtaqa rurayänan Jesuspa qateqninkunata shumaq cuidarninmi (leyi 1 Pëdru 5:1, 2). Tsëtam Jesusqa Pëdruta cläru entienditsirqan. Kima kutipa negashqa kaptinmi, Jesusqa Pëdruta kuyëkanqanllata entienditsita munarqan. Y tsëpitanam tapurqan, “Juanpa tsurin Simon, ¿kuyamankiku?” nir. Pëdruqa imëkatachi rurëta munarqan Jesusta kuyanqanta rikätsinampaq. Peru Jesusqa kënömi nirqan: “Üshalläkunata mitsi” (Juan 21:15-17). Tsëpita patsëmi, Pëdruqa Jesuspa qateqninkunata shumaq cuidarqan. Tsënömi rikätsikurqan Jesusta kuyanqanta.

¹¹ ¿Imanötan anciänukunaqa Jesus wanunqanta yarpäna witsanchö Pëdruta Jesus ninqanta cäsukuyanman? Jehovätawan Jesusta kuyayanqantaqa rikätsikuyanqa, cristiänu mayinkunata maslla watukar y Jehoväta sirwita dejashqakunata yanaparmi (Ezeq. 34:11, 12). Tsënöllam yanapayanman Bibliapita yachakuykaqkunata y Jesus wanunqanta yarpäna reunionman tsëllaraq shamushqakunata. Pëkunataqa rikäyänan Jesuspa qateqnintanönam y kushishqa sientikuyänantam procurayänan.

12. Wanutsiyänampaq prësuyanqan paqas Jesus ninqanqa, ¿imanötan yanapamantsik valienti kanantsikpaq? (Juan 16:32, 33).

¹² Wanutsiyänampaq prësuyänan paqasmi, Jesusqa qateqninkunata kënö nirqan: “Kë munduchöqa imëkatam sufriyanki, peru ¡valienti kayë! Noqaqa vencishqämi kë munduchö imëka mana allikunata” (leyi Juan 16:32, 33). Chikeqninkuna wanutsiyänan këkaptimpis, ¿imatan Jesusta yanaparqan valienti kanampaq? Jehoväman confiakunqanmi. Y Jesusqa musyarqanmi qateqninkunatapis chikir sufritsiyänampaq kaqta, tsëmi cuidëkunampaq Jehoväman mañakurqan (Juan 17:11). ¿Imanirtan tsënö  mañakunqanqa valienti kanapaq yanapamantsik? Chikimaqnintsikkunapitapis Diosnintsik Jehovä mas poderösu kaptinmi (1 Juan 4:4). Jehoväqa llapantam musyëkan. Y segürum këkantsik Jehovä yanapamashqa, imëka problëmapa pasarpis valienti kanapaq kaqta.

13. ¿Imanötan Arimatëapita Josëqa valienti kanqanta rikätsikurqan?

¹³ Judïukuna alläpa respetayanqan Arimatëapita Josëllaman pensarishun. Pëqa Judïukunapa Jatun Cortinchömi trabajarqan. Peru Jesus kë Patsachö kanqan witsanqa, manam valientitsu karqan. Juanmi willakun, “judïukunata mantsar pakëllapa Jesuspa qateqnin tikrashqa” kanqanta (Juan 19:38). Diospa Gobiernumpita yachatsikunqanta gustarpis, Josëqa manam willakurqantsu Jesusman markäkunqanta o yärakunqanta. Capazchi willakurqantsu nunakuna manana respetayänampaq kaqta mantsakur. Imanö kaptimpis, Bibliaqa willakun Jesus wanuriptinqa valienti kanqantam. Kënömi nin: “Arimatëapita Josë jutiyoq nuna[m] valorta tsarirkur Pilätuman ëwar Jesuspa ayanta mañakurqan” (Mar. 15:42, 43). Tsëpitaqa llapan nunakunanam musyayarqan Jesusman Josë markäkunqanta o yärakunqanta.

14. Wakinkuna parlamänata mantsapakurqa, ¿imatataq rurashwan?

¹⁴ ¿Qampis Arimatëapita Josënöku wakinkuna parlayäshunëkita mantsapakunki? ¿Escuëlachö o trabäjuchö karpis penqakurku Jehoväpa testïgun kanqëkita willakunkitsu? ¿Mantsapakurku publicador këta o bautizakuyta decidinkiraqtsu? Ama wakinkuna parlayäshunëkita mantsapakurnin alli kaq rurëta dejëtsu. Jehoväta mañakuy yanapashunëkipaq y munanqanta ruranëkipaq. Mañakunqëkita imanö contestamunqanta rikarmi, mas valienti tikranki (Is. 41:10, 13).

15. ¿Imanötan Jesuspa qateqninkunata yanaparqan Jesus kawarimushqa kanqanta musyayanqan? (Lücas 24:52, 53).

¹⁵ Jesusta wanuratsiyaptinqa, qateqninkunaqa alläpa llakishqam quedariyarqan. ¿Imanöraq qamqa sientikunkiman karqan? Jesuspa qateqninkunaqa amïgunkunata wanutsishqa kayaptinmi alläpa llakikuyarqan y shuyaräyanqankuna mana cumplikänampaq kaqtam pensayarqan (Lüc. 24:17-21). Peru Jesusqa kawariramurmi yuripurqan y llapan pasakunqankuna Biblia ninqannölla cumplikanqantam entienditsirqan. Y yachatsikuyänampaqmi mandarqan (Lüc. 24:26, 27, 45-48). Y Jesus kawarimunqampita 40 junaqta  ciëluta ëwakunan junaqpaqqa, qateqninkunaqa alläpa kushishqanam këkäyarqan. Pëkunaqa kushikuyarqan Jesus kawarimunqanta musyar y mandanqanta cumpliyänampaq yanapanampaq kaqta musyarmi. Tsënö kushishqa kayanqanmi yanaparqan Jehoväta mana dejëpa alabayänampaq (leyi Lücas 24:52, 53; Hëch. 5:42).

16. ¿Imanötan Jesuspa qateqninkuna rurayanqanta rurashwan?

¹⁶ Y noqantsikqa, ¿imanöraq Jesuspa qateqninkuna rurayanqanta rurashwan? Llapan junaqkuna Jehovä Diosnintsikta kushishqa sirwirninmi, y tsëtaqa ruranantsik manam Jesus wanunqanta yarpäna killallachötsu. Imëpis kushishqa sirwinapaqqa, Diosnintsikpa Gobiernuntam puntaman churanantsik. Këllaman pensarishun: wakin wawqi panikunaqa mas yachatsikuyänampaq, reunionkunaman mana faltayänampaq y familiankunawan cada semäna Diosnintsikpita yachakuyänampaqmi juk hörakunana y mas mënusna trabajayänampaq patsätsiyashqa. Y wakinkunanam, congregacionchö yanapakuyänampaq y hasta Testïgukuna mana kanqan markakunachö yachatsikuyänampaq gustayanqan rurëkunata dejayashqa. Rasunmi, tsëkunata rurëqa manam fäciltsu kanqa. Peru Jehoväqa änimantsik Gobiernunta puntaman churashqaqa, bendicimänapaqmi (Prov. 10:22; Mat. 6:32, 33).

17. ¿Imatataq ruranantsik Jesus wanunqanta yarpäna killachö? (Rikäri fötuta).

¹⁷ Jesus wanunqanta yarpäna reunionqa martis 4 de abrilmi kanqa y tsë junaq chäramunantaqa alläpam shuyarëkantsik. Peru Jesus kë Patsachö ruranqankunaman, y pëpis y Jehoväpis kuyamanqantsikman pensanapaqqa manam tsë junaqtaraqtsu shuyaränantsik. Jesus wanunqanta yarpäna killata alli provechashun tsëkunaman pensanapaq. Tsëpaqqa, capaz yachakunkiman Mushoq Patsachö Kawaqkunapaq Bibliachö masllata musyanapaq B12 ninqanchö “Ultimu semäna Jesus patsachö kanqan” neq yachatsikuyninta. Agradecikunëkipaq, mas kuyakoq kanëkipaq, valienti kanëkipaq y kushishqa kanëkipaq yanapashoqniki yachatsikuykunata yachakuy. Y pensë agradecikoq kanqëkita imanö rikätsikunëkipaq kaqta. Yarpë, Jesus wanunqanta yarpäna killachö llapan ruranqantsikkunataqa Jesusqa alläpam valoran (Apoc. 2:19).