1, 2. ¿Imanirtan Jesus wanunqanta yarpäna reunionman cada wata ëwantsik?

 NOQANTSIKRËKUR Jesus wanunqampitaqa cäsi 2.000 watanönam pasarishqa. Pë wanunqampitam imëyaqpis kawakuyta puëdishun. Jesusqa prësuyänan paqasmi wanunqanta yarpäyänampaq tantata y vïnuta utilizarnin, juk sencïllu reunionta rurarqan. Y qateqninkunatam mandarqan pë ruranqannölla wanunqanta imëpis yarpäyänampaq (1 Cor. 11:23-26).

² Jehoväpa sirweqninkunaqa Jesusta kuyarmi, mandakunqanta cäsukuntsik (Juan 14:15). Jesus wanunqantaqa mas agradecikuntsik Jesus wanunqan killachömi. Tsëmi tiemputa rakintsik Diosnintsikman mañakunapaq y Jesus imanir wanunqanman yarpachakunapaq. Tsënöllam tsë killachöqa, tiemputa maslla rakintsik yachatsikunantsikpaq y puëdinqantsikmannö nunakunata tsë shumaq reunionman invitanapaq. Y ima pasakuptimpis, manam tsë reunionmanqa faltantsiktsu.

3. ¿Imatataq këchö yachakushun?

³ Jehoväpa sirweqninkunaqa, Jesus wanunqanta yarpänantsikpaq imëpis kallpachakurquntsikmi. Tsëmi këchöqa yachakushun: 1) Jesus mandakunqannölla wanunqanta yarpanqantsikta, 2) wakin nunakunata tsë reunionman invitanqantsikta y 3) ima pasakuptimpis tsë reunionchö kanantsikpaq kallpachakunqantsikta.

4. (1) Jesus wanunqanta yarpäna reunionchöqa, ¿imakunatataq cada wata entienditsimantsik? (Lücas 22:19, 20). (2) ¿Imanirtan tsëkunata entiendiqa alläpa shumaq?

⁴ Jesus wanunqanta yarpäna reunionchöqa cada watam juk discursuta wiyantsik. Tsëchömi yachatsimantsik noqantsikrëkur Jesus imanir wanunqanta, juk nuna wanunqanllawan mëtsikaq nunakunata jutsankunapita Diosnintsik perdonanqanta, tantatawan vïnuta pikuna mikuyanqanta y tantawan vïnu imata rikätsikunqanta (leyi Lücas 22:19, 20). Tsënöllam tsë discursuchö yarpätsimantsik Patsachö kawaqpaq kaqkuna bendicionkunata chaskir, kushishqa kawakuyänampaq kaqta (Is. 35:5, 6; 65:17, 21-23). Tsëkunata entiendiqa, alläpa shumaqmi y mana kaqpaqqa manam churashwantsu. Mëtsika millon nunakunam Jesus imanir wanunqanta mana entiendir agradecikuyantsu. Y wakinkunaqa, manam Jesus mandakunqannötsu wanunqanta yarpäyan.

5. Cäsi llapan apostolkuna wanuriyaptinqa, ¿imanönatan nunakuna Jesus wanunqanta yarpäyaq?

⁵ Cäsi llapan apostolkuna wanuriyaptinmi, mana alli cristiänukuna congregacionkunaman yëkur qallëkuyarqan (Mat. 13:24-27, 37-39). Y qatiyänanta munarmi, cristiänukunata “llutankunata” yachatsiyarqan (Hëch. 20:29, 30). Y “llutankunata” yachatsikurmi niyan, jutsantsikrëkur Jesusqa “juk kutilla” mana wanushqa kanqanta. Y Bibliachö mana nikaptinmi, Cristuqa kutin kutinraq wanunan precisanqanta niyarqan (Heb. 9:27, 28). Kanan witsanqa, mëtsikaq nunakunam tsënö yachatsikuyanqanta creiyan. Tsëmi cada semäna o cada junaq misa wiyakoq ëwayan. Pëkunaqa creiyan tsë misa höra Jesuspa cuerpunman tanta tikranqanta y vïnuna Jesuspa yawarninman tikranqantam, y pensayanmi cada misa kaptin, Jesuspa cuerpun y yawarnin tsëchö këkanqanta. Peru wakin religiösukunaqa manam seguïdutsu Jesus wanunqanta yarpäyan, y tsë religionchö kaq nunakunaqa manam entiendiyantsu Jesus imanir wanunqanta. Capazchi kënö tapukuyan: “¿Rasumpatsuraq Diosqa Jesus wanunqanrëkur jutsäkunapita perdonamanqa?”. ¿Imanirtan tsënö tapukuyan? Pëkunataqa creitsiyashqa, jutsankunapita Dios perdonanampaq Jesus wanunqanqa mana välinqantam. Peru Jesuspa rasumpa qateqninkunaqa, ¿imatataq rurayashqa?

6. ¿Imatataq Bibliata estudiaqkuna 1872 watachö entiendiyarqan?

⁶ 1870 watachömi, juk grüpu nunakuna Bibliata estudiar qallëkuyarqan. Pëkunapa dirigeqninkunaqa Charles Rüssellmi karqan. Pëkunaqa entiendita munayarqan Jesus imanir wanushqa kanqanta y Jesus wanunqanta imanö yarpäna kanqantam. 1872 watachönam, Bibliata estudiar entiendiyarqan llapan nunakunapa jutsankunapita Jesus wanushqa kanqanta. Y tsë yachakuyanqanta llapan nunakuna musyayänanta munarmi librukunawan, periödicukunawan y revistakunawan willakuyarqan. Tsëpita ichik tiempullatanam punta cristiänukuna rurayanqannö, Jesus wanunqanta cada wata yarpar qallëkuyarqan.

7. Bibliata estudiaq cristiänukuna Bibliapita alli yachakuyanqanqa, ¿imanötan yanapamantsik?

⁷ Tsë grüpu cristiänukuna Bibliata alli estudiayanqanqa, ¿imanötan yanapamantsik? Pëkuna yachakuyanqantaqa Jehovä bendicirqanmi, tsënöpam kananqa Jesus imanir wanunqanta y imata ruramunampaq kaqta alli entiendintsik (1 Juan 2:1, 2). Tsënöllam entiendintsik, juk grüpu nunakuna mana ushakaq kawëyoq ciëluchö kayänampaq kaqta y mëtsika millon nunakuna kë Patsachö  imëyaqpis kawakuyänampaq kaqta. Cada ünuta Jehovä kuyamanqantsikman y Jesus wanunqan imanö yanapamanqantsikman alli pensarmi, Jehovä Diosnintsikta mas kuyantsik (1 Pëd. 3:18; 1 Juan 4:9). Tsëmi Jehoväpa unë sirweqninkuna rurayanqannölla, llapan nunakunata invitantsik Jesus wanunqanta yarpäna reunionman shayämunampaq. Tsë reuniontaqa rurantsik Jesus mandakunqannöllam.

8. ¿Imatataq Jehoväpa sirweqninkunaqa rurayashqa Jesus wanunqanta yarpäna reunionman nunakunata invitayänampaq? (Rikäri fötukunata).

⁸ Jehoväpa sirweqninkunaqa mëtsika watakunapanam Jesus wanunqanta yarpäna reunionman nunakunata invitëkantsik. 1881 watam, Estädus Unïduschö kë revistawan wawqi panikunata invitayarqan Pensilvaniachö këkaq Allegheny sitiuchö Jesus wanunqanta yarpäna reunionman ëwayänampaq. Tsëpitanam cada congregacionta niyarqan Jesus wanunqanta yarpäna reunionta rurayänampaq. Y 1940 watam marzu killachö, llapan publicadorkunata niyarqan munaq kaqtaqa Jesus wanunqanta yarpäna reunionman nunakunata invitayänampaq. Y 1960 watam, Betel wayipita congregacionkunaman invitacionkunata apatsiyarqan, tsëwan nunakunata invitayänampaq. Tsëpita patsëqa, mëtsika millon invitacionkunatam nunakunata dejapurquntsik Jesus wanunqanta yarpäna reunionpaq. ¿Imanirtan tsënö invitakunapaq kallpachakuntsik?

9, 10. Jesus wanunqanta yarpäna reunionmanqa, ¿pikunatataq invitantsik? (Juan 3:16).

⁹ ¿Imanirtan Jesus wanunqanta yarpäna  reunionman wakin nunakunata invitantsik? Jehoväwan Jesus llapantsikpaq rurayämunqankunata musyayänanta munarmi (leyi Juan 3:16). Y ¿kë watallaraq shamoqkunata tsë reunion imanö yanapanantataq munantsik? Jehoväta maslla reqita munayänampaq y sirweqnin tikrayänampaq yanapanantam munantsik. Peru manam pëkunallatatsu tsë reunionmanqa invitashun.

¹⁰ Jehoväta sirwita dejashqa kaqkunatapis Jesus wanunqanta yarpäna reunionmanqa invitantsikmi. Tsëmanqa invitantsik Jehovä Diosnintsik alläpa kuyanqanta yarpäyänampaqmi. Y alläpam kushikuntsik tsë reunionman wakinkuna shayämuptin. Tsë reunionchömi, yarpäriyan Jehoväta sirwirnin kushishqa kashqa kayanqanta. Rikärishun Mönicata b pasanqanta. Pëqa COVID-19 qeshya kanqan witsanmi, Diosnintsikpita yachatsikur yapë qallarqan. Y Jesus wanunqanta yarpäna reunionman 2021 watachö ëwarirmi, kënö nirqan: “Kë wataqa Jesus wanunqanta yarpäna reunionqa noqapaq alläpa shumaqmi kashqa. 20 watapanam Diosnintsikpita yachatsikushqatsu karqä, y kë wataran Diosnintsikpita yachatsikur qallarqö y Jesus wanunqanta yarpäna reunionman invitakurqö. Jehoväwan Jesus noqapaq rurayämunqampitaqa manam imanö agradecikuyta musyätsu, tsëmi llapan shonqüwan nunakunata invitarqö” (Sal. 103:1-4). Invitakunqantsikta nunakuna chaskikuyaptin o mana chaskikuyaptimpis, rurëkanqantsikta Jehovä valoranqanta musyarmi llapan puëdinqantsikmannö invitakuntsik.

11. ¿Imanötan Jehoväqa bendicimushqa Jesus wanunqanta yarpäna reunionman invitakunqantsikta? (Ageu 2:7).

¹¹ Jesus wanunqanta yarpäna reunionman invitakunantsiktaqa Jehovä bendicimushqam. Këllaman pensarishun: 2021 wataqa, COVID-19 qeshya kaptinmi Jesus wanunqanta yarpäna reunionpaq invitakunanqa fäciltsu karqan. Peru 21.367.603 nunakunam tsë reunionta wiyayarqan. Tsëqa, entëru munduchö Testïgukuna kayanqampitapis ishkë kuti masmi. Awmi, Jehoväqa masqa valoran nunakunatam y manam mëtsikaq kayanqantatsu (Lüc. 15:7; 1 Tim. 2:3, 4). Tsëwanmi musyantsik Jesus wanunqanta yarpäna reunionman invitakunqantsikwan alli shonquyoq nunakunata tarinantsikpaq Jehovä yanapëkamanqantsikta (leyi Ageu 2:7).

12. ¿Imakuna pasakuptintaq Jesus wanunqanta yarpäna reunionta rurananqa fäciltsu kanman? (Rikäri fötuta).

¹² Jesusqa willakurqannam kë ushanan tiempukunachöqa imëka problëmakunapa pasanapaq kaqta. Familiantsikkuna michäkuyänampaq kaqta, nunakuna chikimänapaq kaqta, guërrakuna y muyakoq qeshyakuna kanampaq kaqtam nirqan (Mat. 10:36; Mar. 13:9; Lüc. 21:10, 11). Tsëkuna pasakuptinqa, Jesus wanunqanta yarpäna reunionta rurananqa manam fäciltsu. ¿Imatataq tsënöpa pasaq wawqi panikuna rurayashqa, y imanötan Jehovä yanapashqa?

13. ¿Imanötan Jehoväqa Jesus wanunqanta yarpäna reunionta ruranampaq wawqi Artiom kallpachakunqampita bendicirqan?

¹³ Carcelchö këkar. Jehoväta sirwiyanqanrëkur wakin wawqikuna carcelchö këkarpis, Jesus wanunqanta yarpäna reunionta rurayänampaqqa kallpachakuyanmi. Wawqi Artiom pasanqanta rikärishun. 2020 wata Jesus wanunqanta yarpäna witsanqa, carcelchömi këkarqan, y takshalla cuartuchömi pitsqaq kayarqan. Tsënö këkarpis, Jesus wanunqanta yarpäna reunionta ruranampaqqa  tarirqanmi tantatawan vïnuta. Peru prësu mayinkunaqa cigärrutam shoquyaq y mana alli palabrakunatam parlayaq. ¿Imatataq Artiom rurarqan? Prësu mayinkunatam nirqan tsë hörachö mana alli palabrakunata mana parlayänampaq ni cigärruta mana shoquyänampaq. Prësu mayinkunaqa ninqantam cäsuyarqan. Artiom-mi kënö ninqanta willakun: “Jesus wanunqanta yarpäna reunion imanö kanqantam entienditsiyashqëki”. Mana munëkarpis, Jesus wanunqanta yarpäna reunionta ruranqanta rikarmi, masllata musyëta munar tapupäyarqan.

14. ¿Imatataq Jehoväpa testïgunkuna rurayarqan COVID-19 qeshya kanqan witsan Jesus wanunqanta yarpäna reunionta rurayänampaq?

¹⁴ COVID-19 qeshya kanqan witsan. Tsë qeshyarëkur, Jesus wanunqanta yarpäna reunionpaq juntakëta mana puëdirpis, Jehoväpa testïgunkunaqa rurayarqanllam. c Y cada congregacionchömi tsë reunionta Internetpa rurayarqan. Peru Internet mana kanqan nacionkunachöqa, ¿imatataq rurayarqan? Wakin nacionkunachöqa, televisionpa o radiupam tsë discursuta wiyayarqan. Y mas karu  kaq sitiukunachö këkaq wawqi panikunapaqmi, sucursalkunaqa 500 idiömapitapis maschö tsë discursuta grabatsiyarqan. Y wakin wawqikunam tsë grabacionta chätsiyarqan.

15. ¿Imatataq Sue jutiyoq warmipita yachakuntsik?

¹⁵ Familiakuna michäkuyaptin. Wakinkunapaqqa familiankuna michäkuyaptinmi, Jesus wanunqanta yarpäna reunionta wiyakuyänanqa fäciltsu kashqa. Tsëmi pasarqan Bibliapita yachakuykaq Sue jutiyoq warmita. 2021 watam, Jesus wanunqanta yarpäna reunionpaq juk junaq pishikaptin, Sueqa Bibliapita yachatseqninta nirqan familian michäkuptin Jesus wanunqanta yarpäna reunionta wiyakuyta mana puëdinampaq kaqta. Tsënam Bibliapita yachatseqninqa, Lücas 22:44 textuta leyiparqan. Y allim entienditsirqan tsënö problëmakunapa pasarqa, Jesus ruranqanta rurë y Jehovä yanapamänapaq kaqman confiakur Jehoväman mañakunantsik mas alli kanqanta. Tsënam Sueqa waränin junaq tantatawan vïnuta alistarqan, y jw.org päginachömi qoyakunapa o wärëkunapa yachatsikayämunqan progrämata wiyarqan. Y tsë tardillam cuartunman yëkuykur, Jesus wanunqanta yarpäna reunionta telëfunupa wiyarqan. Y waräninnam Bibliapita yachatseqninman kënö nir qellqarqan: “Qanyan parlapämanqëkiqa alläpam yanapamashqa. Jesus wanunqanta yarpäna reunionta wiyakunäpaqqa imëkatam rurarqä, y Jehovämi yanapamashqa. Alläpa kushishqam këkä y alläpam agradecikü”. Tsënö problëmapa pasëkarqa, ¿Jehovä yanapashunëkipaq kaqman confiakunkiku?

16. ¿Imanirtan confiakuntsik Jesus wanunqanta yarpäna reunionta ruranapaq kallpachakushqa Jehovä bendicimänapaq kaqta? (Romänus 8:31, 32).

¹⁶ Wamran wanunqanta yarpäna reunionta ruranantsikpaq kallpachakunqantsikpitaqa Jehoväqa alläpam kushikun. Noqantsikrëkur wanunqampita agradecikushqaqa, Jehoväqa bendicimäshunmi (leyi Romänus 8:31, 32). Ama kë watapis Jesus wanunqanta Yarpäna reunionman ni imanöpapis faltashuntsu. Y tsë killakunachö Jehovä Diosnintsikpaq masta rurashun.