1. ¿Jehovä imanö kanqantataq pensanki?

 ¿IMËLLAPIS Jehovä imanö kanqanta pensarqunkiku? Mañakunqëki höraqa, ¿imanöraq Jehovä këkan? Mana rikashqapis Jehoväpaqqa Bibliachö nin, “intinö o rupaynö” kanqanta, ‘escüdu cuenta’ kanqanta y ‘ushakätsikoq ninanö’ kanqantam (Sal. 84:11; Heb. 12:29). Juk kutim Diospa willakoqnin Ezequiel Jehoväta rikarqan zafïru ruminöraq y turmanyënöraq chipapëkaqta (Ezeq. 1:26-28). Tsënö kanqanta pensarqa, capazchi espantakushwan o mantsashwampis.

2. ¿Imanirtan wakinkunapaqqa fäciltsu kanman Dios kuyanqanta creiyänan?

² Jehovätaqa manam rikantsiktsu, tsëmi höraqa fäciltsu kanman kuyamanqantsikta creinantsik. O capazchi imëka mana allikunapa pasarnin o teytannaq karnin, noqantsikpaq Dios yarparanqantaqa creishwantsu. Imanö kaptimpis, Teytantsik Jehoväqa imanö sientikunqantsikta y kë vïdachö imëkakunapa pasar imanö sientikunqantsikta allim entiendin. Y kuyamanqantsikta entienditsimänapaqmi, Diosnintsikqa Palabranchö imanö kanqanta willamantsik.

3. ¿Imanirtan këchö parlashun Jehoväpita y kuyakoq kanqampita?

³ Bibliachömi Jehoväpaq kënö nimantsik: “Diosqa kuyakuymi” (1 Juan 4:8). Tsënö ninqanwanmi entiendintsik, Jehoväqa kuyakoq karnin imëkatapis ruranqanta. Pëqa alläpa kuyakoqmi, tsëmi pëta mana kuyaqkunatapis kuyan (Mat. 5:44, 45). Këchömi yachakushun, Jehovä imanö kanqanta y kuyakoq kanqanta. Pëta mas reqirninqa, masmi kuyashun.

JEHOVÄQA ALLÄPAM KUYAMANTSIK

4. ¿Imanötan sientikunki Jehovä Diosnintsik alläpa kuyakoq kanqanta musyar? (Rikäri fötuta).

⁴ “Teyta Jehovä[qa] alläpa kuyakoq[mi]” (Sant. 5:11). Bibliachöqa Jehoväpaq nin, kuyakoq mamanö kanqantam (Is. 66: 12, 13). Juk kuyakoq mamaqa alläpam wamranta kuyan. Shumaqlla mellqarkurmi kuyëllapa parlapan. Waqaptinqa o imampis nanaptinqa jinan höram atiendin. Tsënöllam Jehoväpis, mana allikunapa pasarnin llakikunqantsik hörakuna läduntsikchö këkan. Tsëchi Salmus qellqaqqa Jehoväpaq kënö nirqan: “Alläpa yarpachakur imanö këtapis mana puëdiptimï, qamqa shoqamar yanapamarqëki” (Sal. 94:19).

5. ¿Qamqa imanötan entiendinki Jehovä alläpa kuyakoq kanqanta?

⁵ Jehoväqa alläpa kuyakoqmi (Sal. 103:8). Pantarnin mana allikunata rurashqapis Jehoväqa kuyëkämantsikllam. Israelïtakunaqa kutin kutinmi Jehoväta ofendiyarqan, peru arrepentikuyaptinqa kuyarqanllam. Juk kutim kënö nirqan: “Qamkuna noqapaq alläpa väleq kayaptikim qamkunata kuyä y alabashqa kayänëkita permitirqö” (Is. 43:4, 5). Kanampis Jehoväqa kuyakoqllam këkan. Israelïtakunata kuyanqannöllam noqantsiktapis kuyamantsik. Pantarnin jutsata rurashqapis, manam dejamantsiktsu. Arrepentikushqa y yanapamänata permitishqaqa kuyëkämantsikllam. Palabranchömi nimantsik imëkata rurashqapis perdonamänapaq kaqta (Is. 55:7). Bibliachöqa nin perdonamarnintsikqa, “yamë këta” tarinapaq yanapamanqantsiktam (Hëch. 3:19).

6. ¿Jehoväpaqqa imanötan kantsik? (Zacarïas 2:8).

⁶ (Leyi Zacarïas 2:8). Jehoväqa igualatsimantsik nawi nïñantawanmi. Nawintsiktaqa llapantsikmi alläpa cuidantsik. Tsëmi nawi nïñantawan Jehovä igualatsimarnintsikqa, kënö nikämaqnintsik cuenta nikan: “Pipis mana allita rurashurnikiqa, noqatam mana alli tratëkäman y alläpa kuyanqä kaqtam mana kaqpaq churëkan”. Jehoväqa alläpam kuyamantsik y yanapamënintsiktam munan, tsëmi llakikushqaqa pëpis llakikun. Tsëmi Jehovätaqa “nawi nïñëkitanö cuidëkallämë” nita puëdintsik (Sal. 17:8).

7. ¿Imanirtan Jehovä kuyamanqantsiktaqa creishwantsu?

⁷ Jehoväqa munan kuyashunqëkita següru kanëkitam. Peru imëka mana allikunapa pasarninqa, capazchi Jehovä kuyashunqëkitaqa creinkimannatsu. Tsëqa, ¿imataraq rurankiman Jehovä kuyashunqëkita següru kanëkipaq? Jesusta, ciëlupaq akrashqakunata y noqantsiktapis Jehovä imanö kuyamanqantsiktam yachakunkiman. Tsëta yachakurishun.

 JEHOVÄQA KUYAMANQANTSIKTAM NIMANTSIK

8. ¿Imanirtan Jesusqa següru karqan Teytan kuyanqanta?

⁸ Jehoväwan Jesusqa mëtsika watakunapam juntu kayashqa. Tsëmi pëkunaqa unïdu kayan y alläpa kuyanakuyan. Pëkuna juntu kayanqannöqa manam kë Patsachö ni ciëluchöpis ni pï kashqatsu. Mateu 17:5 textuchömi Jehoväqa Jesuspaq nirqan alläpa kuyanqanta. Peru manam, “pëpaqmi alläpa kushikü” nirqanllatsu, sinöqa alläpa kuyarninmi y ruranampaq kaqta cuentachö katsirmi llapankuna musyayänampaq, “pëmi kuyë Tsurï” nirqan (Efes. 1:7). Jesusqa llapan shonqunwanmi musyarqan Jehovä kuyanqanta. Tsëmi kutin kutin nirqan Teytan kuyanqanta (Juan 3:35; 10:17; 17:24).

9. ¿Ima versïculu ninqanwantan entiendintsik ciëlupaq akrashqakunata Jehovä kuyanqanta? (Romänus 5:5).

⁹ Jehoväqa ciëlupaq akrashqakunatapis kuyanqantam musyatsin (leyi Romänus 5:5). Kë versïculuqa griëgu idiömachö entienditsikun, Jehovä kuyakoq kanqanqa janantsikman shamoq mëtsika yakunö kanqantam. Tsëwanmi entiendintsik, ciëlupaq akrashqakunata Jehovä alläpa kuyanqanta. Pëkunaqa clärum musyayan ‘Teyta Dios kuyanqanta’ (Jüd. 1). Llapankunam apostol Juan ninqannö sientikuyan. Juanmi kënö nirqan: “¡Diospa tsurinkuna nir qayashqa kanantsikta permitirmi, Teytaqa alläpa kuyamanqantsikta rikätsimarquntsik!” (1 Juan 3:1). Peru ¿ciëlupaq akrashqakunallataku Jehoväqa kuyan? Manam, llapan sirweqninkunatam kuyan.

10. ¿Imanötan musyantsik Jehovä alläpa kuyamanqantsikta?

¹⁰ ¿Imanötan musyantsik Jehovä alläpa kuyamanqantsikta? Kuyë Tsurin noqantsikpaq wanushqa kaptinmi. Tsëwanmi Jehoväqa rikätsimarquntsik alläpa kuyamanqantsikta (Juan 3:16; Rom. 5:8). Jehovä Diosnintsikqa, jutsantsikpita perdonamënintsikta munar y amïgun kanantsikta munarmi kuyë Tsurin wanunanta permitirqan (1 Juan 4:10). Jehoväwan Jesus noqantsikrëkur rurayämunqankunaman mas pensarqa, allim entiendishun cada ünuta kuyamanqantsikta (Gäl. 2:20). Jehoväqa manam leyninta cumplita munarllatsu Tsurin wanunanta permitirqan, sinöqa kuyamarnintsikmi. Tsëmi Tsurin sufrinanta y wanunanta permitirqan.

11. ¿Imatataq Jeremïas 31:3 textupita yachakuntsik?

¹¹ Yachakurinqantsiknömi Jehoväqa, kuyamarnintsik imëkata ruramun y manam kuyamanqantsikllatatsu nimantsik (leyi Jeremïas 31:3). Kuyamarnintsikmi sirwinantsikta permitimantsik (igualaratsi Deuteronomiu 7:7 y 8 textukunatawan). Jehovä kuyamänataqa manam ni ima ni pï michëta puëdintsu (Rom. 8:38, 39). ¿Imanötan tsëta musyar sientikunki? Qateqnin pärrafukunachömi Salmus 23 ninqanta leyishun. Y leyikashqa pensë Jehovä kuyanqanta entiendirir, David imanö sientikunqanta y qampis imanö sientikunqëkita.

¿IMANÖTAN SIENTIKUNKI JEHOVÄ ALLÄPA KUYASHUNQËKITA MUSYAR?

12. ¿Imanöraq Salmus 23 ninqanta entienditsikamunkiman?

¹² (Leyi Salmus 23:1-6). Salmus librupa 23 kaq capïtulunchömi, Davidqa nin Jehovä kuyanqanta y cuidanqanta. Hasta nirqanmi alli amïgun kanqanta y juk alli mitsikoqnö cuidanqanta. Davidqa segürum karqan Jehovä yanapëkanqanta, tsëmi llapan shonqunwan pëman confiakoq. Davidqa musyarqanmi, hasta wanukunqanyaqpis Jehovä yanapanampaq kaqta. ¿Imanirtan Davidqa Diosnintsikman tsënö confiakurqan? Rikärishun.

13. ¿Imanirtan Davidqa musyarqan Jehovä cuidanampaq kaqta?

¹³ “Manam imäpis faltanqatsu”. Jehoväqa manam David wananqankunata imëpis faltatsirqantsu.  Tsëmi Davidqa Jehovä cuidanampaq kaqta alli musyaq. Tsënöllam musyaq pëwan kushishqa këkanqanta y amïgu kayanqanta. Tsëmi Davidqa següru karqan imëka pasakuptimpis, wananqantaqa Jehovä mana faltatsinampaq kaqta. Clärum musyaq imëkapa pasanqankuna o yarpachakunqankunaqa, Jehovä kuyanqanwan mana igualanqanta, tsëmi kushishqa y tranquïlu sientikoq (Sal. 16:11).

14. ¿Imanötan Jehoväqa kuyamarnintsik cuidamantsik?

¹⁴ Jehoväqa shumaqmi cuidamantsik, y mana allikunapa pasanqantsik hörakunanäqa masran cuidamantsik. Rikärishun 20 watapitapis masna Betelchö yanapakoq Claire a jutiyoq panintsikta pasanqanta. Pëmi willakun familian imëka mana allikunapa pasanqanta. Papäninmi, peqa o uma nanëwan alläpa grävi qeshyarirqan, juk nanantam o ñañantam congregacionpita qarquriyarqan y negociunkunachöpis fracasariyarqanmi, tsëmi wayinkunatapis perdiriyarqan. ¿Imanötan Jehoväqa cuidarqan? Panintsik Clairem kënö nin: “Jehoväqa manam familiäkuna cada junaq wanayanqankunata faltatsimurqantsu. Kutin kutinmi rikarqä pensanqäpitapis masta familiäkuna chaskiyanqanta. Jehovä shumaq cuidayämanqantaqa manam qonqätsu, seguïdum tsëkunaman pensä. Tsëmi yanapaman imëka mana allikunapa pasarpis alli tsarakunäpaq”.

15. ¿Imanirtan Davidqa kallpayoq sientikurqan? (Rikäri dibüjuta).

¹⁵ “Kallpayoqtam tikratsiman”. Davidqa imëka mana allikunapa pasarmi höra höraqa alläpa llakikoq (Sal. 18:4-6). Peru Jehovä kuyanqanta y cuidanqanta yarparmi kallpayoq tikraq. Davidqa sientirqan, alli qewaman y  atska yakuman üshankunata juk alli mitsikoq apaqnö, amïgun Jehovä yanapëkanqantam. Tsënöpam pëqa kallpayoq sientikurnin Jehoväta kushishqa sirwir sïguirqan (Sal. 18:28-32).

16. ¿Imanötan sientikurqunki kallpayoqta Jehovä tikratsishuptiki?

¹⁶ Imëka mana allikunapa pasarninqa, noqantsikpis kënömi nita puëdintsik: “Teyta Jehoväqa, alläpa kuyakoq karmi ushakätsimarquntsiktsu” (Lam. 3:22; Col. 1:11). Rachel jutiyoq panintsikta pasanqanta rikärishun. Pëqa alläpam llakikurqan COVID-19 qeshya witsan qowan o runan pëtapis y Jehovätapis dejariptin. ¿Imanötan panintsikta Jehovä yanaparqan? Pëmi kënö willakun: “Jehoväqa imëkatam ruramurqan, tsëwanmi cuentata qokurqä alläpa kuyamanqanta. Atskaq amïgükunam seguïdu watukayämaq, mikuynï apayämoq, shumaq mensäjikunata mandayämaq, shumaq textukunata leyipäyämaq, asitsiyämaq y Jehovä kuyamanqantam yarpätsiyämaq. Tsënö kuyakoq familiayoq kanqäpitaqa alläpam Jehoväta agradecikü”.

17. ¿Imanirtan Davidqa, manam “ni imatapis mantsashaqtsu” nirqan?

¹⁷ “Teyta Dios, noqawanmi këkanki, [...] manam ni imata mantsashaqtsu”. Davidpaqa mëtsikaqmi chikeqninkuna karqan y wanutsitam o wañutsitam munayarqan. Tsënö kaptimpis, Jehovä kuyanqanta musyarmi cuidanampaq kaqta següru karqan. Lädunchö këkanqantanömi sientirqan. Tsëmi kënö cantarqan: “[Dios] yanapamaptinmi imatapis mantsarqänatsu” (Sal. 34:4). Davidpaqa rasumpam vïdan peligruchö karqan, peru Jehovä kuyanqanta musyarmi imatapis mantsaqnatsu.

18. Imëka mana allikunapa pasanqantsik hörakuna, ¿imanötan Jehovä kuyamanqantsikta musyanqantsik yanapamantsik?

¹⁸ Mana allikunapa pasanqantsik hörakunaqa, ¿imanötan Jehovä kuyamanqantsikta musyanqantsik yanapamantsik? Susi jutiyoq precursöra panintsikta pasanqanta rikärishun. Pëqa qowanwan o runanwan alläpam llakikuyarqan wamrankuna wanutsikuriptin. Panintsikmi kënö nin: “Tsënö pasamashqaqa, manam imanö këta ni imata rurëta musyantsiktsu. Peru Jehovämi cuidayämashqa y yanapayämashqa”. 16 kaq pärrafuchö parlanqantsik panintsik Rachelnam kënö nin: “Juk paqasmi alläpa llakishqa y mantsakashqa këkarqä. Imanö këtapis mana puëdirmi, waqar Jehoväman mañakurqä. Y jinan höram, juk mama wamranta mellqarkur shoqaq cuenta Jehovä yanapëkämanqanta  sientirirqä. Tsëpitaqa tranquïlum punukärirqä. Tsënö pasamanqantaqa manam imëpis qonqashaqtsu”. Kananqa Tasos jutiyoq anciänuta pasanqanta rikärishun. Pëtaqa ejercituman ëwëta mana munaptinmi chusku watapa carcelayarqan. Wawqintsik Tasosmi Jehovä imanö cuidanqanta kënö willakun: “Wananqäkunapitapis mastam Jehoväpita chaskirqä y tsëta rikarmi pëman mas confiakurqä. Tsënöllam kallpanwan yanapamaptin, mantsëpaq sitiuchö këkarpis tranquïlu sientikurqä. Y cuentatam qokurqä, Pëman mas confiakurqa kuyamanqanta maslla sientinqäta. Tsëmi carcelchö këkarpis precursor regular kanäpaq decidirqä”.

KUYAKOQ DIOSNINTSIKPA MAS KUYË AMÏGUN TIKRASHUN

19. (1) Jehovä kuyamanqantsikta musyarqa, ¿imanöraq mañakushun? (2) ¿Jehovä kuyamanqantsikpaq parlaq mëqan textukunatan mas gustashunki? (Leyiri “ Jehovä kuyamanqantsikta entienditsikoq textukuna” ninqan recuadruta).

¹⁹ Wawqi panintsikkunata imanö yanapanqanta yachakunqantsikkunawanmi entiendintsik, Teyta Jehoväqa alläpa kuyakoq Dios kanqanta (2 Cor. 13:11). Pëqa llapantsikpaqmi cada ünupaq yarpachakun, y alläpa kuyamanqantsiktaqa segürum këkantsik (Sal. 32:10). Kuyamarnintsik yanapamanqantsikman pensanqantsikmi yanapamäshun amïguntsiktanö rikänapaq y lädunchö këkaqnö sientikunapaq. Tsëmi kuyamänantsikta wananqantsikta llapan shonquntsikwan willanantsik. Mañakurninqa imakunapaq yarpachakunqantsikta willashun. Y entiendimanqantsikta y yanapamänapaq kaqta següru kashun (Sal. 145:18, 19).

20. ¿Imanirtan Jehovä kuyamanqantsikta musyarqa pëta mas kuyantsik?

²⁰ Imanömi paqaspa alläpa alalanqan höra ninachö qoñükurir kushishqa sientikuntsik, tsënöllam Jehovä kuyamanqantsikta musyarninqa kushishqa sientikuntsik. Y manam dejëta munantsiktsu, Pëqa alläpam kuyamantsik. ¿Manaku Jehovä alläpa kuyamanqantsikta musyarninqa alläpa kushikuntsik? Llapantsikmi kënö nita munantsik: “Tsëmi pëtaqa kuyä” (Sal. 116:1).