¿Puntataqa mëchötaq Diosta adorayänan wayita utilizäyarqan?

DIOSTA adorayänan wayiqa, griëgu idiömachö sinagoga nishqan palabrapitam, y tsë palabraqa “asamblëa” o “ëllukäyanqan” ninanmi. Unëpita patsëmi judïu nunakunaqa tsë wayikunachö Diospita yachakuyänampaq reunionkunata rurayashqa y Jehoväta adorayänampaq utilizäyashqa. Bibliata escribiyanqan hebreu idiömachöqa manam tsë wayikunapaq parlantsu. Peru Griëgu Idiömachö Escribiyanqan Diospa Palabranchöqa willakun apostolkuna kawayanqan witsanchö kashqana kanqantam.

Atskaq estudiösu nunakunam niyan, Babiloniachö judïukuna prësu kayanqan witsan rurayanqanta. La Encyclopaedia Judaica nishqan librum kënö entienditsikun: “Karu markachö prësu këkaqkunam, Templuta ëwëta mana puëdir, y llakishqa sientikurnin Diospa Palabranta leyiyänampaq, itsa säbadu junaqchö juntakäyaq”. Itsachi judïukunaqa librina quedarirpis, Diosman mañakuyänampaq y Palabrampita yachakuyänampaqmi tsë wayikunachö juntakäyarqan, y patsakäyanqan sitiukunachö Diosta adorayänan wayita rurayarqan.

Apostolkuna kawayanqan witsanchöqa, Mediterräneuchö, Asiapa sur kaq lädunkunachö y Jerusalenchöqa Diosta adorayänan wayikunachömi judïukunaqa juntakäyaq. Universidad Hebrea de Jerusalen nishqanchö trabajaq Lee Levine jutiyoq profesormi kënö nin: “Tsë wayikunataqa utilizäyaq estudiayänampaq, mikuyänampaq, wakinkunata juzgayänampaq, ëlluyanqan qellëkunata churayänampaq y polïtica y wakin asuntukunapaq reunionta rurayänampaqmi”. Jina ninmi: “Masqa Diospita yachakuyänampaqmi ëllukäyaq”. Tsëchi Jesuspis tsëmanqa imëpis ëwaq, tsëchö këkaqkunata yachatsinampaq, consejanampaq y animanampaq (Mar. 1:21; 6:2; Lüc. 4:16). Y apostol Pablupis congregacionkuna patsakäriptinmi Diosta adorayänan wayikunachö yachatsikoq, porqui Diospita yachakïta munarmi tsëmanqa nunakuna ëwayaq. Tsëmi Pabluqa më markaman chärirpis, puntataqa Diosta adorayänan wayikunaman yachatsikoq ëwaq (Hëch. 17:1, 2; 18:4).