YOMARAQA ishkan turinkunawanmi, Marcëluwan y Hiverwan, Guatemäla nacionpa takshalla markanchö täkuyan. Yomaram Testïgukunawan Bibliapita yachakur qallëkurqan, y tsëpitanam ishkan turinkunapis yachakur qallëkuyarqan. Peru kimampis wiskum kayan y manam braillita leyita yachayarqantsu, tsëmi yachakuyänanqa fäciltsu karqan. Bibliapita yachatseqninllam pärrafukunata y textukunata leyipaq.

Pëkunaqa manam japallankunalla viajëta puëdiyaqtsu, tsëmi reunionkunaman ëwayänampaqqa fäciltsu karqan. Diospita Yachatsikunantsik Wayiqa, pëkuna täkuyanqampita 40 minütuschöran karqan. Tsëmi congregacionpita wawqikunaqa trukanakuypa reunionkunaman apayaq. Y reunionkunachö discursunkuna tocar qallëkuptinqa, wawqikunam yachatsiyaq dememoria parlakuyänampaq.

2019 wata mäyu killam, markankunachöna reunionkunata rurar qallëkuyarqan, y juk wawqim warminwan tsë markata ëwakurqan yanapakunampaq. Pëkunaqa precursormi kayarqan. Pëkunam mana yachëkarpis, kimankunata brailli leyita yachatsiyarqan. Tsëpaqqa, braillita leyina imanö kanqanta musyayänampaqmi bibliotëcaman yachakoq ëwayaq.

Yomara, Marcëlu y Hiverqa juk ishkë killakunallatam brailli leyita yachakuriyarqan. Tsënöpam Jehovä Diosnintsikpita maslla yachakuyarqan. a Kananqa kimankunapis precursor regularmi kayan, y Marcëluqa siervu ministerialmi. Pëkunaqa semänachö atska kutim Diosnintsikpita yachatsikuyan. Y pëkunata rikarmi, wakinkunapis pëkunanö yachatsikuyta munayan.

Kimankunapis alläpam agradecikuyan congregacionpita wawqi panikuna yanapayanqampita y kuyayanqampita. Yomaram kënö nin: “Reqiyanqä junaqpitam, turi nanakuna rasumpa kuyayämanqanta rikäyarqö”. Marcëlunam kënö nin: “Congregacionchöqa alli amïgükunam kapayäman y kananqa entëru Patsachö kuyakoq wawqi panikunawanmi juntu kayä”. Yomarawan turinkunaqa, alläpam shuyarëkäyan kë Patsata Diosnintsik Shumaq Patsaman tikratsinan junaq chäramunanta (Sal. 37:10, 11; Is. 35:5).