2023 WATAM mierculis 18 de enëru jw.org päginachö willakayämurqan wawqintsikkuna Gage Fleegle y Jeffrey Winder Jehoväpa Testïgunkunata Pushaqkunapitana kayanqanta. Ishkampis mëtsika watapam Jehoväta mana dejëpa sirwikäyan.

Pensilvaniachö (Estädus Unïdus) inti o rupay jeqanan läduchömi wawqintsik Fleegleqa wamra kanqan witsankuna kawarqan. Pëtaqa teytankunam Jehoväpita yachatsiyarqan. Y jövinllaraq këkaptinmi Diospita yachatsikoqkunata wanayanqan juk taksha markaman ëwakuyarqan. Tsëpita ichik tiempu pasarinqanllachömi, 20 de noviembri killa 1988 watachö bautizakurirqan.

Teytankunaqa imëpis niyaq Jehoväta llapan tiempunwan sirwinampaqmi. Y congregacionkunata watukaqkunata y betelïtakunatam wayinkunaman invitayaq. Tsënöpam cuentata qokurqan tsë wawqikuna alläpa kushishqa kayanqanta. Bautizakunqampita ichik tiempu pasarinqanllachömi, 1989 wata primëru de setiembrichö precursor regularna karqan. Tsëpita ishkë wata pasariptinllam, 12 watayoq kanqan witsan munanqanta cumplirirqan. ¿Imata? 1991 wata octubri killachömi Brooklyn Betelchö yanapakur qallëkurqan.

Tsëchömi librukunata rurayanqanchö 8 watapa trabajarqan, tsëpitanam niyarqan Diospita Yachatsikunqantsikta dirigeqkunachö yanapakunampaq. Tsë witsankunaqa rüsu idiömata parlaq congregacionchömi karqan. 2006 watachönam Nadiawan casakurqan y kananyaqmi Betelchö yanapakuykäyan. Y yanapakuyarqan Portugues idiömachömi y tsëpitanam 10 watapitapis mas español idiömachö. Wawqi Fleegleqa yanapakurqan Diospita Yachatsikunqantsikta dirigeqkunachö, Yachakunapaq kaqta  Rikaqkunachö, Entëru Patsachö Diospita Yachatsikuyta Rikaqkunachö y 2022 wata marzu killachönam churayarqan Jehoväpa Testïgunkunata Pushaqkunapita Yachatsikuyta Rikaqkunachö yanapakunampaq.

Wawqi Winderqa, Murriëta (California) markachömi winarqan. Teytankunaqa testïgu karmi Diospita alli yachatsiyarqan. 1986 wata 29 de marzuchömi bautizakurqan, y tsëpita juk killa pasariptinllam precursor auxiliar karqan y alläpa gustarmi tsë wata 1 de octubri killa precursor regularna karqan.

Wawqi Winderqa jövin këkarmi, Betelchö trabajaq wawqinkunata visitaq ëwarqan. Tsëmi pëpis Betelchö yanapakuyta munarqan, y edäninta cumplirirmi Betelpaq solicitudta llenarqan. Y 1990 wata mäyu killam Wallkill Betelchö trabajanampaq invitariyarqan.

Tsëchöqa imëkachömi yanapakurqan. Yanapakurqanmi limpiapakuyänan grüpuchö, aciendata rikaqkunachö y Betelta rikäyänan oficïnachö. 1997 watachömi Angelawan casakurqan y kananyaqmi Betelchö yanapakuykäyan. 2014 watanam Warwicktana ëwakuyarqan y Jehoväpa testïgunkunapa principal oficïnanta rurayaptinmi yanapakurqan. 2016 watanam Pattersontana ëwakuyarqan y Centro Educativo de la Watchtower neqchöna yanapakurqa, tsëchömi audiuta y videukunata rikaqkunachöna yanapakurqan. Chusku wata pasariptinnam Warwickta kutikurqan, y Yanapakoqkunata Rikaqkuna oficïnachönam yanapakurqan. Y 2022 watanam Jehoväpa Testïgunkunata pushaqkuna trabajayanqan Yanapakoqkunata Rikaqkunachöna trabajarqan.

Kë wawqikunaqa Jehoväpa bendicionninmi kayan (Efes. 4:8). Y rurëkäyanqankunachö bendicïkunampaqmi Jehoväman mañakuntsik.