PROBLËMAKUNAPA pasar, ¿imëllapis japallëki sientikurqunkiku? ‘Alläpa mana alli y mana aguantëpaq tiempuchö’ kawarmi llakikuntsik y japallantsik sientikuntsik, peru manam japallantsiktsu këkantsik (2 Tim. 3:1). Bibliachöqa nimantsik “desgraciakunapa” o mana allikunapa pasanqantsik hörakuna, kuyakoq amïguntsikkuna yanapamänapaq kaqtam (Prov. 17:17).

Apostol Pabluqa congregacionkunata watukarmi atska kuti viajarqan, y amïgunkunam pëwan ëwayarqan y imëkachö yanapayarqan (Col. 4:7-11). Römachö carcelarëkaptimpis imëka wananqanchömi yanapayarqan: Epafrodïtum wananqan cösasninkunata y Filïpuspita wawqi panikuna apatsiyanqan cösaskunata carcelman apapurqan (Filip. 4:18). Y Tïquicunam, Pablu qellqanqan cartakunata congregacionkunaman aparqan (Col. 4:7). a Amïgunkuna yanapayaptinmi, Pabluqa wayichö prësu këkarpis y carcelchö këkarpis wawqi panikunata animëta dejarqantsu. Y noqantsikqa, ¿imanötan alli amïgu kashwan?

Kanan witsampis mëtsikaq wawqi panikunam rurayanqankunawan alli amïgu kayanqanta rikätsikuyan. Elisabet-ta, pasanqanta rikärishun. Pëqa Espäñapitam y precursöra regularmi. Doctorkunam Elisabet-ta willayarqan, mamänin cancer qeshyawan kanqanta. Tsëmi juk pani animanampaq textukunata mensäjipa mandaq. Elisabetmi kënö nin. “Tsë mensäjikunam yanapamarqan cada junaq aguantanäpaq y japallä mana këkanqäta yarpänäpaq” (Prov. 18:24).

Wawqi panikunawanqa mas amïgu kashun Diosta sirwiyanqanchö yanaparmi. ¿Puëdishwantsuraq juk edäna wawqita o panita reunionkunaman pushëta, pëkunawan Diospita yachatsikoq yarquyta o maskunachö yanapëta? Tsëkunata rurarmi juknintsik juknintsikpis maslla animanakushun (Rom. 1:12). Peru wakin wawqi panikunaqa manam wayinkunapita yarquyta puëdiyantsu, y pëkunapaqqa, ¿imanötan alli amïgu kashwan?

Wakin wawqi panikunaqa alläpa qeshyarmi o juk asunturëkurmi reunionkunaman ëwëta puëdiyantsu. Tsëmi wawqi Davidta pasarqan. Pëtaqa cancerwan qeshyaptinmi joqta killapa quimioterapiata rurayarqan. Tsë killakunaqa videollamädallapam reunionkunata warmin Lidiawan wiyakuyaq.

¿Imanötan Davidtawan Lidiata wawqi panikuna yanapayarqan? Cada reunion ushariptinmi, wakinkunaqa videollamädapa saludayaq y parlapäyaq. Y videollamädapa reunionkunachö parlakuyanqampitapis, felicitarmi mensäjita apatsiyaq. Amïgunkuna  kuyarnin tsëkunata rurayanqampitam, Davidwan Lidiaqa kushishqa sientikuyarqan.

¿Puëdishwantsuraq wayinkunapita yarquyta mana puëdeq wawqi panikunawan Diospita yachatsikuyta? Pëkunata yanapanapaqqa, tiempuntsiktam rakinantsik, tsënöpam pëkunapaq yarpachakunqantsikta cuentata qokuyanqa (Prov. 3:27). Pëkunawanqa cartapapis o telëfunupapis yachatsikuyta puëdintsikmi. Anciänukunapis, yachatsikoq yarqunapaq reunionta videollamädapa wiyayänampaqmi patsätsita puëdiyan. Davidwan Lidiaqa anciänukuna tsënö rurayanqampitam alläpa agradecikuyan. Davidmi kënö nin: “Imanö yachatsikunapaq niyämunqanta y Diosman mañakayämunqanta wiyë y juk rätullapis wawqi panikunawan juntu këkäyanqäta musyëqa alläpam animayämarqan”. Pillatapis Bibliapita estudiëkatsirqa capaz nishwan, wayimpita yarquyta mana puëdeq wawqipa o panipa wayinman yachakoq ëwanapaq. Peru tsëta ruranapaqqa alliraqmi imanö kayanqanta reqinantsik.

Wayinkunapita yarquyta mana puëdeq wawqi panikunawan mas tiempu karqa, masmi reqishun y amïgunkuna kashun. Nunakunata Bibliawan shumaq yachatsiyanqanta y Jehoväta sirwiyänampaq yanapayanqanta rikarmi, pëkunataqa alläpa valorantsik y respetantsik. Wawqi panikunata tsënö yanaparqa mas amïguyoqmi kashun (2 Cor. 6:13).

Pabluqa alläpam kushikurqan yanapanampaq amïgun Tïtu lädunchö këkanqampita (2 Cor. 7:5-7). Tïtu ruranqannömi, amïguntsikkunataqa pëkunawan juntu karnin y wanayanqankunachö yanaparnin animantsik y manam parlapanqantsikllawantsu (1 Juan 3:18).

Rusiachö wawqi panikuna imanö yanapanakuyanqampitam yachakuyta puëdintsik. Rikärishun wawqintsik Serguëita y warmin Tatiänata pasanqanta. Policïakunam wayinkunaman amälas yëkuyarqan y acusëta munarmi imëkankunata rikapakuyarqan y ashipakuyarqan, tsëpitanam tapupäyänampaq comisarïaman apayarqan. Y panintsik Tatiänatam puntataqa libri dejariyarqan. Serguëimi kënö cuentakun: “Warmï wayiman chäriptinllam juk valienti pani yanapanampaq chärirqan. Y tsëpitanam mas wawqi panikunapis churapakur yanapayänampaq chäriyarqan”.

Y kënöpis ninmi: “Proverbius 17:17 ninqanmi alläpa gustaman, tsëchömi nin: ‘Rasumpa amïgu karqa, imëpis kuyakoqllam këkanqa, y desgraciakunapa pasayanqan hörapis kuyakoq wawqinnömi dejantsu’. Autoridäkuna chikiyämaptinmi mas cläru rikä kë textu cumplikëkanqanta. Jehoväqa valienti amïgukunawanmi yanapamashqa y manam dejamashqatsu. Japallä karqa manachi aguantëta puëdïmantsu karqan”. b

Alläpa mana alli tiempuchömi kawantsik, tsëmi yanapamänapaq alli amïgukunata wanantsik. Y alläpa sufrimientu witsannäqa, masraqmi alli amïgukunata wanashun. Tsëmi kananllapitana alli amïgu kanapaq kallpachakunantsik (1 Pëd. 4:7, 8).