Papänïwan mamänïqa catölicum kayarqan. Peru Diospa jutin Jehovä kanqanta Bibliachö yachakurirqa, Testïgum tikrariyarqan. Y papänïqa manam Jesuspa imäginninkunata ruraqnatsu. Tsëpa rantinqa carpintëru karmi, reunionkunata rurayänäpaq wayïkunapa primer pïsunta altsarqan. San Juan del Monti markachöqa, tsëmi reunionta rurayänäpaq punta kaq wayi karqan. Tsëqa Filipïnaschömi këkan, Manïla niyanqan sitiuchö.

Noqaqa 1952 watam yurikurqä. Papänïkunaqa mayor kaq chuskun wawqïkunata y kiman panïkunata yachatsiyanqannöllam, noqatapis Jehoväpita yachatsiyämarqan. Y jatunyaptïnam, papänïqa cada junaq Bibliata leyinäpaq animamaq y publicacionkunawanmi Bibliapita yachatsimaq. Höraqa papänïkunaqa congregacionkunata watukaqkunata y betelïtakunatam wayïkunachö quedatsiyaq. Y pëkunaqa imëkatam willayämaq y animayämaq. Tsëkunam yanapamarqan Jehoväta sirwinäpaq.

Papänïwan mamänïmi yanapayämarqan Diosnintsikman maslla markäkunäpaq o yärakunäpaq. 1971 watachömi, mamänï wanukuskiptin, papänïwan precursor kayarqä. Peru 1973 watachömi, 20 watayoq këkaptï papänïpis wanukurqan. Tsëmi alläpa llakikurqä y pïnïpis mana kanqantam sientirqä. Peru Diosnintsik änikunqankunaman yarpanqämi yanapamarqan alläpa mana llakikunäpaq y Diosnintsikta mana dejanäpaq (Heb. 6:19). Papänï wanukunqampita ichik tiempullatanam precursor especial kanäpaq churayämarqan y alläpa karuchö këkaq Coron islamanmi mandayämarqan, tsëqa këkan Palawan provinciachömi.

Coron markamanqa 21 watayoq këkarmi charqä. Tsë karu islachöqa manam luzpis, yakupis, cärrupis ni mötupis alläpaqa karqantsu. Jatun markachö yachakashqa kaptïmi, noqapaqqa tsëchö këqa fäciltsu karqan. Tsë islachöqa wallkaqllam Testïgukuna kayaq, tsëmi yachatsikunäpaqqa compañërü kaqtsu y japallämi yachatsikoq  kä. Qallanan killaqa manam fäciltsu karqan; alläpam familiäkunata y amïgükunata llakeq kä. Y weqillana nawïwan y alläpa llakishqam estrëllakunata cada paqas rikaraq kä. Yanapakuykanqäta dejarirmi wayïta kutikuyta munaq kä.

Llakishqa kanqä hörakunam, imanö sientikunqäta Jehoväta willaq kä. Bibliachö y publicacionkunachö leyinqäkunamanmi pensaq kä. Tsënöllam Salmus 19:14 textu ninqanmampis pensaq kä. Diosnintsik ‘tsapämaqnï qaqa cuenta’ y “salvamaqnï” kanampaqqa, masllam pensanä karqan llapan ruranqankunaman y imanö kanqanman. Tsënöllam yanapamarqan La Atalaya revistachö “Usted nunca está solo” a neq yachatsikuypis. Tsëtam kutin kutin leyirqä. Tsë hörakunatam provechaq kä Jehoväman mañakunäpaq, estudianäpaq y yachakunqäkunaman alli pensanäpaq.

Coron islaman chanqäpita ichik tiempullatanam anciänu kanäpaq churayämarqan. Tsë sitiuchöqa japallämi anciänu karqä, tsëmi Diospa Gobiernumpita Yachatsikunapaq, Bibliapita Yachakunapaq y Täpakoq revistapita Yachakunapaq reunionkunata y Yachatsikunapaq Diospa Escuëlanta llapan semänakuna dirigeq kä y llapan semänakunam discursaq kä. Tsënö ocupädu kanqämi yanapamarqan alläpa mana llakikunäpaq.

Coron islachö yachatsikuyqa alläpa shumaqmi kaq, y tiempuwanqa mëtsikaqmi bautizakuyarqan. Peru wakin markakunaman chänanqa manam fäciltsu karqan. Tsëmi höraqa chakipa ëwar mediu diaraq chaq kä y manam musyaqtsu kä mëchö posadakunäpaq kaqta. Tsënöllam yachatsikuyänäpaq atska islakuna kaq. Tsë islakunaman chänäpaqqa, mana alli tiempu këkaptimpis bötiwanmi seguïdu viajaq kä. ¡Y manam nadëtaqa yacharqätsu! Tsënö kaptimpis, Jehovämi cuidamarqan y yanapamarqan. Y tiempuwanmi cuentata qokurqä juk markakunachö yanapakunäpaq Jehovä yachëkätsimanqanta.

1978 watachömi, Papüa Nueva Guinëa nacionman mandayämarqan. Tsëqa Australiapa norti kaq lädunchömi këkan. Papüa Nueva Guinëa nacionqa Espäña nacionnö jatunmi y atska jirkakunayoqmi. Tsë nacionchö kima millonnö nunakuna karpis, ochocientuspitapis mas idiömakunatam parlayan. Tsënö karpis, pidgin de Nueva Guinëa o tok pisin niyanqan idiömatapis llapankunam parlayaq.

Puntataqa Port Moresby markamanmi inglesta parlaq congregacionman mandayämarqan. Peru tsëchö ichik tiempullaraq këkaptïmi, tok pisin idiömata parlaq congregacionmanna mandayämarqan y tsë idiömatam yachakur qallëkurqä. Cada yachakunqä palabrakunatam Diospita yachatsikurnin utilizaq kä, tsëmi yanapamarqan tsë idiömata raslla o saslla yachakunäpaq. Ichik tiempullachömi tok pisin idiömachö discursëtana puëdirqä. Y Papüa Nueva Guinëa nacionchö juk watapis manaraq kaptïmi, congregacionkunata watukanäpaq churarayämarqan. ¡Tsëtaqa manam creirirqätsu! Y atska provinciakunachö tok pisin idiömata parlaq congregacionkunatam visitanä karqan.

Tsë nacionchö congregacionkunaqa alläpa karuchömi karqan, tsëmi asamblëakunataqa atska sitiukunachö patsätseq kä y seguïdum viajaq kä. Qallananllachöqa manam tsë nacionta reqirqätsu,  idiömankunata parlëta yacharqätsu, ni costumbrinkunata musyarqätsu; tsëmi japallä sientikoq kä. Y atska jirkakuna kaptinmi, chakipa ëwëtaqa puëdeqtsu kä. Tsëmi congregacionkunaman chänäpaqqa, cada semäna avionwan viajaq kä. Höraqa juk jaqrash avionchömi japallä viajaq kä. Bötiwan viajaqnöpis mantsapakurmi viajaq kä.

Wallkaq nunakunallam telëfunuyoq kayaq. Tsëmi congregacionkunaman willakunäpaqqa, cartataraq apatseq kä. Peru höraqa cartapis manaraq chaptinmi puntata chäreq kä, tsëmi Testïgukunata tarinäpaqqa nunakunataraq tapukoq kä. Y wawqi panikunawan tinkuriyaptïqa, alläpa kushishqam chaskiyämaq. Tsënö chaskiyämaptinmi rurëkanqäkunata alläpa valoraq kä. Jehoväqa tukuynöpam yanapamashqa y mas kuyamanqantam sientirqö.

Bougainville islachö punta kaq reunionchö këkaptïmi, juk wawqi warminwan alläpa kushishqa saludayämarqan, y “¿yarpäyämankiku?” nirmi tapuyämarqan. ¡Noqaqa reqirirqämi! Pëkunataqa Port Moresby markachö këkarmi Bibliapita parlaparqä y juk tiempupam yachatsishqa karqä. Peru tsëpitaqa, tsë markachö täkoq juk wawqinam yachatsir sïguirqan. ¡Pëkunaqa bautizakushqanam kayänaq! Papüa Nueva Guinëachö kima watapa kanqä witsanchö mëtsika bendicionkunata chaskinqäpitaqa, tsëmi juk bendicion karqan.

Coron islapitaqa 1978 watam ëwakurqä. Peru manaraq ëwakurmi Adel jutiyoq alläpa shumaq y trabajadöra panita reqirqä. Adelpaqa Samuelwan Shirleymi wamrankuna karqan. Adelqa precursöram kaq y mamänintam cuidaq. Tsëmi 1981 wata mäyu killachö Filipïnasta kutirqä Adelwan casakunäpaq. Casakurirnam precursor regular kayarqä y familiäkunata cuidayarqä.

Familiayoq këkaptïpis, 1983 watachömi precursor especial kanäpaq yapë churayämarqan. Y Palawan provinciachö këkaq Linapacan islamanmi mandayämarqan. Tsë islachöqa manam jukllëllapis Testïgu karqantsu, tsënö këkaptimpis familiäwanmi tsë islaman ëwakuyarqä. Tsëchö juk watapanö këkäyaptïmi, Adelpa maman wanukurqan. Y alläpa mana llakikuyänäpaqqa yanapayämarqan Diospita yachatsikurnin ocupädu kayanqämi. Mëtsikaq nunakunatam Bibliapita yachatsiyarqä, y reunionta rurayänäpaqmi wayita wanayarqä. Tsëmi takshalla wayita rurayarqä. Tsë islaman chäyanqäpita kima wata pasariptinqa, ¡110 nunakunam Jesus wanunqanta yarpäna reunionman shayämurqan! Tsë reunionman shamoqkunapitaqa mëtsikaqmi ëwakuskiyaptïna bautizakuyarqan.

1986 watachömi Culion islamanna mandayämarqan, tsëchöqa lepra qeshyayoqkunam mëtsika kayaq. Tsë witsankunam, Adeltapis precursöra especial kanampaq churayarqan. Leprawan qeshyaq nunakunataqa mantsayaqmi kayä, tsëmi Bibliapita yachatsita mantsayaq kayä. Peru tsë sitiukunachö täkoq Testïgukunam niyämarqan tsë nunakunaqa tratamientuta chaskishqa kayanqanta y mana muyayämänampaq o mana shukuyämänampaq kaqta. Tsë nunakunaqa, wakinkunaqa juk panipa wayinmanmi reunion wiyakoq shayämoq, y tiempuwanqa yachakäriyarqämi. Tsë nunakunaqa  pensayaq nuna mayinkuna mana kuyayanqanta y hasta Diospis mana kuyanqantam. Tsë nunakunata Diospita yachatsiqa alläpa shumaqmi karqan. Y alläpam kushikuyaq shamoq tiempuchö alli saloryoq kayänampaq kaqta musyar (Lüc. 5:12, 13).

Culion islachö Samuelwan Shirley yachakäyänanta munarmi, ishkaq shipash panikunata invitayarqä pëkunawan Diospita yachatsikuyänampaq. Pëkunaqa wamra mayinkunatam yachatsiyaq y noqakunanam papäninkunata yachatsiyaq kayä. Tsënö rurarmi 11 familiakunata yachatsiyarqä, y pöcu tiempullachömi juk congregacion formakärirqan.

Qallananchöqa, noqallam tsë sitiuchö anciänu karqä. Tsëmi sucursalpita niyämarqan Culion markachö öchu publicadorkunapaq y Marily markachö nuëvi publicadorkunapaq reunionkunata ruranäpaq. Marily markaman chäyänäpaqqa, kima höraparan lamarpa viajayaq kayä. Tsëchö reunionta usharirnam, Halsey markachö nunakunata Bibliapita yachatsiyänäpaq jirkakunapa pasar atska hörakunapa chakipa ëwayaq kayä.

Marily markachö y Halsey markachöpis mëtsikaqmi Testïgu tikrayarqan, y ishkan markachömi Diosta adoranantsik wayikunata rurayarqä. Linapacan markachö wawqi panikuna rurayanqannömi, tsëchöpis wawqi panikuna materialkunata churayämurqan y alli trabajayarqan. Marily markachö localmanqa 200 nunakunam yëkuyaq y asamblëata rurëta munarqa jatunyäratsitam puëdiyaq.

Wamräkuna jatunyäriyaptinnam 1993 watachö, Filipïnaschö congregacionkunata watukayänäpaq churayämarqan. Tsëpitanam Escuëla de Entrenamiento Ministerialchö yachatsikoq kanäta munar, yachakunäpaq 2000 watachö tsë escuëlaman invitayämarqan. Noqaqa yachatsikuyta mana yachanäpaq kaqtam pensarqä. Peru Adelmi, Jehovä yanapamaptin alli cumplinäpaq kaqta nimar animamarqan (Filip. 4:13). Adelqa rasumpa kaqllatam nikämarqan. Pëqa qeshyapäkuykarpis, Jehovä yanapaptinmi ruranampaq kaqkunata alli cumpleq.

2006 watachömi, Escuëla de Entrenamiento Ministerialchö yachatsikuykaptï, warmïta willariyarqan parkinson qeshyawan qeshyëkanqanta. Tsëta  musyarirqa, alläpam yarpachakuyarqä. Tsëmi warmïta nirqä, salorninta cuidayänärëkur yanapakuykayanqäta dejayänäpaq, peru pëqa kënömi nimarqan: “Ama tsëtaqa rurashuntsu. Tsëpa rantinqa, seguïdu atiendimänampaq juk doctorta ashimuy. Y segürum këkä yanapakurnin sïguinapaq Jehovä yanapamänapaq kaqta”. Adelqa qeshyëkarpis, seis watapam mana quejakuypa Jehoväta sirwir sïguirqan. Y purita mana puëdirnam, sïlla de ruëdaman jamëkurllana yachatsikoq. Y parlëta puëdinqan hörakunaqa, juk ishkë palabrakunallatapis reunionchö parlakoqmi. Imëkapa pasëkarpis Jehoväta sirwir sïguinqampitam wawqi panikunaqa agradecikur mensäjita seguïdu mandayämoq. Warmïqa 2013 watachömi wanukurqan. Pëqa alläpa kuyakoq warmim karqan y 30 watapam allipa yanapamarqan. Pë wanuriptinqa, yapëmi alläpa llakishqa sientikurqä y pipis mana kuyamanqanta pensarqä.

Warmï wanukuriptimpis, pë munanqannömi yanapakur sïguirqä. Ocupädu kanqämi yanapamarqan japallä mana sientikunäpaq. 2014 watapita 2017 watayaqmi Testïgukuna yachatsikuyänanta michäkoq nacionkunachö tagälu idiömata parlaq congregacionkunata watukarqä. Tsëpitanam tsë idiömata parlaq congregacionkunata visitarqä Taiwanchö, Estädus Unïduschö y Canadächö. 2019 watachömi, India y Tailandia nacionkunachö Diospa Gobiernumpita Yachatsikoqkunapaq Escuëlachö ingles idiömachö yachatsikurqä. Tsëkunachö yanapakurqa, alläpa kushishqam sientikurqä. Jehoväta mas sirwirmi, mas kushishqa sientikoq kä.

Mëchöpis wawqi panikunawanmi fäcil-lla yachakäreq kä. Y ëwakur pëkunata dejananqa manam fäciltsu karqan. Peru tsë hörakunam yachakurqä llapan shonqüwan Jehoväman confiakuyta. Jehoväqa imëpis yanapamashqam, tsëmi mëchö yanapakunäpaq niyämaptimpis mantsapakoqnatsu kä. Kananqa Filipïnas nacionchömi precursor especialnö yanapakuykä y congregacionchö wawqi panikunaqa familiä cuentam kayan y allim cuidayäman. Tsënöllam alläpa kushishqa sientikü Samuelwan Shirleypis mamänin ruranqanta qatirnin, Jehovä Diosnintsikta sirwir sïguiyanqampita (3 Juan 4).

Rasunmi, imëka mana allipam pasarqö. Rikarqömi warmï qeshyarnin alläpa sufreqta y wanukoqta. Tsënöllam cambiukuna kaptin, yachakänanqa fäciltsu karqan. Peru Jehovä Diosqa imëpis yanapamänampaqmi lädüchö këkashqa (Hëch. 17:27). ‘Jehoväpa poderninqa manam [imëpis] ushakantsu’, tsëmi sirweqninkunataqa mëchö kayaptimpis o ima problëmapa pasayaptimpis yanapan y kallpayoqta tikratsin (Is. 59:1). Alläpam agradecikü tsapämaq qaqa cuenta Jehovä kanqampita y yanapamänampaq imëpis noqawan këkanqampita. Japalläqa manam imëpis karqötsu.