1. 3 Juan 3, 4 ninqannö, ¿imata rurartan kushishqaqa kashun?

KËTA yarpë, rasumpa kaqta musyayänampaq yanapanqan cristiänukuna Jehoväta sirwir këkäyanqanta wiyarqa, ¿imanöraq apostol Juanqa kushikurqan? Tsë cristiänukunaqa tsurinkunanömi Juanpaqqa kayarqan. Imëka problëmapa pasayaptinmi, apostol Juanqa markäkoq o yärakoq kayänampaq yanaparqan. Tsënöllam Biblia ninqanwan yanapanqantsik cristiänukuna o wamrantsikkuna Jehoväta sirwiyaptinqa kushikuntsik (leyi 3 Juan 3, 4).

2. ¿Imanirtan Juanqa kima cartakunata qellqarqan?

² 98 wata witsampaqqa Ëfesu markachö itsa Juanqa tärarqan. Patmus islachö prësu kanqampita yarqurirchi tsëmanqa täkoq ewkurqan. Tsëchö këkaptinmi Jehovä Diosqa kima cartakunata qellqanampaq mandarqan. Tsë cartakunam Jesusman markäkur o yärakur y rasumpa kaq yachatsikuyta mana dejayänampaq cristiänunakunata yanaparqan.

3. ¿Ima tapukuykunapitatan kananqa yachakushun?

³ Tsë witsanqa Juanllanam apostolkunapita kawëkarqan y cristiänu tukoqkuna mirashqa kaptinmi pëqa yarpachakurqan (1 Juan 2:18, 19, 26). * Tsë cristiänukuna Teyta Diosta reqeqtukurpis, mandakunqantaqa manam cäsukuyaqtsu. Tsëmi kananqa Juan ninqankunapita yachakushun: ¿ima ninantan rasumpa kaq yachatsikuyta  mana dejëqa?, ¿imapitatan cuidakunantsik? y ¿imanötan wakinkunata yanapashwan rasumpa kaqta mana dejayänampaq?

4. 1 Juan 2:3-6 y 2 Juan 4, 6 ninqannö, ¿imatatan rurashwan rasumpa kaq yachatsikuyta mana dejanapaq?

⁴ Rasumpa kaq yachatsikuyta mana dejanapaqqa, Teyta Diospa Palabrampitam puntata yachakunantsik. Y manam tsëllatsu, Jehovä mandakunqantam cäsukur wiyakunantsik (leyi 1 Juan 2:3-6 y 2 Juan 4, 6). Tsëpaqqa Jesus ruranqanta yachakushun, tsënöpa noqantsikpis Jehoväta wiyakur cäsukunapaq (Juan 8:29; 1 Pëd. 2:21).

5. ¿Imapitatan següru këkashwan?

⁵ Teyta Jehovä Diosnintsik kanqanta alli musyarqa, rasumpa kaq yachatsikuyta manam dejashuntsu y Palabran ninqan rasumpa kanqantam següru kashun. Y änikunqan Akrashqa Jesus kanqantam alli musyanantsik. Teyta Diospa Gobiernunchö mandakoq kanampaq Jesus akrashqa kanqantaqa kanan witsan nunakuna manam musyayantsu. Tsëchi Juanqa cristiänu mayinkunata Jehoväpita y Jesuspita yachatsirqan, tsënöpa “mëtsikaq engañakoqkuna[pita]” cuidakuyänampaq (2 Juan 7-11). Kënömi nirqan: “¿Pitaq ulikoqqa? ¿Manaku Jesus Cristu kanqanta negaq kaq?” (1 Juan 2:22). Awmi, Diospa Palabrampita yachakurllam engañamänataqa dejakushuntsu y Jehovätawan Jesustam mas kuyashun (Juan 17:3). Y tsënöpam yachakunqantsik rasumpa kanqanta següru kashun.

6. ¿Imapitatan jövin cristiänukuna cuidakuyänan?

⁶ Nunakunapa yachënimpitaqa llapantsikmi cuidakunantsik (1 Juan 2:26). Y tsë mana alli yachatsikuypitaqa jövin cristiänukunam masqa cuidakuyänan. Tsëpaqmi 25 watayoq Francia nacionpita pani Alicia * kënö cuentakun: “Escuëlachö imapis kikinlla rurakanqanta y nunakunapa mas yachatsikuyninta yachatsiyämaptinmi, rasumpa kaq yachatsikuyta cäsi dejarirqä. Höraqa imatapis  mana nishpa wiyaräkunäpaqmi pensaq kä”. Tsëmi Aliciaqa La vida... ¿cómo se presentó aquí? ¿Por evolución, o por creación? libruchö yachakurqan y juk ishkë semänallatam tse mana alli pensëta qonqarirqan. Tsëtam kënö willakun: “Tsënömi rasumpa kaqta Biblia yachatsikunqanta y tsëta cäsukurqa kushishqa kanäpaq kaqta yachakurqä”.

7. ¿Imanirtan mana alli rurëkunapita cuidakunantsik?

⁷ Mayor o jövin karpis jutsa rurëpitaqa llapantsikmi cuidakunantsik. Tsëchi rasumpa kaq yachatsikuyta musyëkarqa, mana allikunata mana ruranapaq Juanqa nirqan (1 Juan 1:6). Tsëmi kanan y shamoq witsanchöpis Teyta Dios chaskimänata munarqa, mëchö kar o japallantsik karpis shumaq portakunantsik. Tsënöqa ruranantsik Teyta Jehovä llapanta rikaptinmi (Heb. 4:13).

8. ¿Ima rurëkunamantan yarparäkushwantsu?

⁸ Kanan witsan jutsa rurëta allitanö rikäyanqampita cuidakushun. Tsëpaqmi apostol Juan kënö qellqarqan: “Sitsun, ‘manam jutsantsik kantsu’ nintsik, tsëqa kikintsiktam engañakïkantsik” (1 Juan 1:8). Juanpa tiempunchö Teyta Diosta chikeqkunaqa, jutsata rurarpis Teyta Dios kuyë alli kanqantam niyaq. Kanampis tsënömi wakinqa pensayan. Teyta Diosman creiyanqanta nirpis, pë chikinqan jutsakunata rurarmi kakuyan, masqa jukwan jukwan kakurmi lluta purikuyan. Jehovä chikinqantam nunakunaqa allitanö rikäyan, rurashqa o mana rurashqapis kikintsikpitam niyanmi.

9. ¿Biblia ninqanta jövinkuna cäsukuyanqanqa yanapanku?

⁹ Trabajaq mayinkuna o escuëlachö estudiaq mayinkuna mana allita rurayaptinqa,  jövin cristiänukunapis tsëtam munapäyanman. Tsëmi wawqi Aleksanderta pasarqan. Pëmi kënö cuentakun: “Escuëlachö wakin chïnakunaqa pëkunawan kanäta munarmi qallapäyämaq. Tsëmi, qamtaqa ollqu mayikichi gustashunki niyämaq”. Jövin, itsa qamtapis tsënö pasëkäshunki. Tsënö kaptinqa yarpë, Bibliallachömi tarinki imëka llakikuypaq, qeshyapaq y maskunapaq yanapakuytaqa. Tsënö imëkachö alli tsarakuptikiqa, mas fäcilmi kanqa alli kaqta ruranëkipaq. Yarpë, warmillaman o ollqullaman yarparäkunëkitam Diabluqa munan. Tsënöpa Diosta mana cäsukunëkipaq (1 Juan 2:14).

10. Alli shonquwan Jehoväta sirwinapaqqa, ¿imanötan 1 Juan 1:9 yanapamantsik?

¹⁰ Ima rurëkuna jutsa kanqanta Jehovä nimanqantsiktaqa musyantsikmi. Tsëmi tsëkunaman mana ishkinapaq imëkanöpa kallpachakunantsik. Peru imallachöpis pantarirqa Jehovämanmi mañakunantsik (leyi 1 Juan 1:9). Tsëmi jutsallakushqa karqa, creikoqkunata rikaq wawqikunata yanapamänapaq willanantsik, pëkunatam Jehoväqa yanapamänapaq churashqa (Sant. 5:14-16). Jutsantsikta perdonamänapaq tsurin wanunanta kuyakoq Teytantsik permitishqa kaptinmi, unë ruranqantsik llakitsimänataqa permitinantsiktsu. Tsënö perdonamarnintsikqa, jutsantsiktam Jehoväqa qonqëkun. Tsënömi limpiu shonquntsikwanna sirwintsik (1 Juan 2:1, 2, 12; 3:19, 20).

11. Cristiänu tukoqkuna niyanqampitaqa, ¿imanötan cuidakushwan?

¹¹ Cristiänu tukoqkuna niyanqampitam cuidakunantsik. Punta cristiänukuna kawayanqan witsampitam, cristiänu tukoqkunaqa Diospa sirweqninkuna  ishkitsita munayashqa. Tsëmi alli musyanantsik rasumpa kaq yachatsikuy ima kanqanta y mëqan mana rasumpa kanqanta. * Chikimaqnintsikkunaqa Internetpa y maskunapam imëkata nimäshun Jehoväpita rakimänapaq y cristiänu mayintsikkunata manana kuyanapaq. Tsëmi cristiänu tukoqkuna niyanqantaqa cäsukunantsiktsu (1 Juan 4:1, 6; Rev. 12:9).

12. ¿Imanirtan alli markäkoq o yärakoq kanantsik?

¹² Diablu imëkata ruramashqa tsarakunapaqqa, Jesusman, Teyta Dios imapaq pëta churanqanman y kanan witsan yanapamänapaq Jehovä churanqan wawqikunamanmi markäkunantsik o yärakunantsik (Mat. 24:45-47). Y Teyta Diospa Palabranta mas yachakushqam, markäkïnintsik o yärakuynintsikqa mas alliyanqa. Tsëpaqmi Pablupis Colösas cristiänukunaman cartakur këta nirqan: “Señor Cristu Jesusta chaskiyanqëkinölla, jina pëwan juknölla kawarnin sïguiyë, pëchö alli ruri ruriyaq watsishqa y sharkatsishqa, y creikïnikikunachö alli patsakashqa, tsëta yachakushqa kayanqëkinölla, y Diosta alläpa agradecikurnin” (Col. 2:6, 7). Awmi, Diabluqa manam ishkitsimäshuntsu markäkïnintsik o yärakuynintsik alli kaptinqa (2 Juan 8, 9).

13. ¿Imatatan cristiänukunaqa musyantsik?

¹³ Kanan witsan chikishqa kanantsiktaqa musyantsikmi (1 Juan 3:13). Tsëmi Juanqa “mana cäsukoq nunakunaqa Satanaspa makinchömi këkäyan” nir yarpätsimantsik (1 Juan 5:19). Ushakë junaq këllachöna kaptinmi, Diabluqa mas piñashqaraq këkan (Rev. 12:12). Diabluqa manam warmillaman o ollqullaman yarparänata ni cristiänu tukoqkuna pantatsimanqantsikman yarparänallatatsu munan, sinöqa chikeqninkunawan maqatsimënintsiktam munan. Ushakänampaq ichik tiempullana pishinqanta musyarmi, Diospita yachatsikurnin markäkoq o yärakoq kanata munantsu. Peru atska nacionchö yachatsikunata michäkuyaptimpis, cristiänu mayintsikkunaqa allim tsarakuykäyan. Awmi, Teyta Diospa sirweqninkunaqa manam dejashuntsu ishkitsimänata.

14. ¿Imanötan cristiänu mayintsikkunata yanapashwan rasumpa kaq yachatsikuyta mana dejayänampaq?

¹⁴ Wawqi panikunawan ankupäkoq karninqa, rasumpa kaq yachatsikuyta mana dejayänampaqmi yanapakushun (1 Juan 3:10, 11, 16-18). Ima pasakuptimpis llapantsikmi kuyanakunantsik. Këman yarpë; ¿wanupakushqa wawqi panikunataqa imallachöpis yanaparishwantsuraq?, ¿ima desgraciapis kaptinqa Diospa wayin altsëchö y wawqi panintsikkunapa wayinkuna altsëchö yanapakurishwanku? Cristiänu mayintsikkunata rasumpa kuyar y ankupäkoq karqa manam parlashunllatsu, sinöqa ëwëkurmi imallachöpis yanapakushun.

15. 1 Juan 4:7, 8 ninqannö, ¿imatatan ruranantsik?

¹⁵ Cristiänu mayintsikkunawan kuyanakoq karqa, ciëluchö Teytantsiknömi kantsik (leyi 1 Juan 4:7, 8). Juknöpaqa, kuyakoq karmi wakinkunata perdonashun. Pillapis llakitsimashqaqa kuyakoq  karmi perdonëkushun (Col. 3:13). Wawqi Aldu pasanqanta rikärishun. Respetanqan wawqi costumbrinpaq mana allita parlaptinmi piñakurqan. Kënömi cuentakun: “Atska kutim Jehoväta rogakurqä tse wawqita shumaq rikänäpaq”. Y manam tsëllatsu, imanö sientikunqanta ninampaqmi yachatsikoq yarquyänampaq nirqan. Pëmi kënö cuentakun: “Parlakuyninwan mana alli sientitsimanqampitam perdonëkamë nimarqan. Tsënö shumaq parlakurmi llapan pasakunqanta qonqariyarqä”.

16, 17. ¿Imatatan mana qonqëta ruranantsik?

¹⁶ Wawqi paninkunata kuyarmi apostol Juanqa, Teyta Diospa kaqchö alli kayänanta munarqan. Tsënö kanqantaqa rikantsik, kiman cartankunapita yachakurmi. Imanömi kushikuntsik, Cristuwan gobernayänampaq ciëluta ëwaq warmipis ollqupis Juannö kuyakoq kayanqampita (1 Juan 2:27).

¹⁷ Kanan yachakunqantsikqa, Jehoväpita yachakunqantsikta mana qonqanapaqmi yanapamäshun. Tsëqa Teyta Diospa Palabranta mas yachakur cäsukushun. Y Jesusman imëpitapis mas markäkushun o yärakushun. Nunakuna y cristiänu tukoqkuna niyanqantaqa ama cäsukushuntsu. Y jutsa rurëman mana ishkinapaqqa, Teyta Jehovä munanqannö japallantsik o mëchö karpis portakushun. Wawqi panikuna alli kayänampaq yanapashun, imata ruramashqapis perdonëkushun y imachöpis wanaqkunata yanapashun. Tsënö rurarqa manam imapa pasarpis rasumpa kaq yachatsikuyta dejashuntsu.