Estädus Unïdus nacionpa Saint Paul (Minnesota) markanchömi, 1954 watachö yurikurqä. Noqakunaqa pitsqaqmi kayarqä, noqaqa mayor kaqpa qepanmanmi yurikurqä. Familiä catölicu kaptinmi, catölicu escuëlachö estudiarqä. Y cürakunata yanaparpis manam Bibliapitaqa musyaqllatsu kä. Dios kamanqanmanqa creiqmi kä, peru Iglesiachö niyanqanmanqa manam markäkurqänatsu o yärakurqänatsu.

Abogädu kanäpaq estudiëkanqä witsanmi, William Mitchell Jehoväpita yachatsikur wayïman chämurqan. Ocupädu kakuykaptïmi kutirayämushaq niyämarqan. Kutirayämuptinnam kënö tapuparqä: “¿Imanirtan mana allita ruraqkunaqa kushishqa kayan?” Y “¿imanötan kushishqa këtaqa puëdintsik?”. Tsënam La verdad que lleva a vida eterna librü y Traducción del Nuevo Mundo de las Santas Escrituras Bibliä qarayämarqan.  Y Bibliapita yachatsiyämänampaqmi quedayarqä. Diospa Gobiernunlla imëka mana allikunata ushakätsimunampaq kaqta yachakuyqa gustamarqanmi. Tsënömi musyarirqä nunakunapa mandädunchö këqa mana alli kanqanta.

1982 wata asamblëachömi Jehoväta sirwinäpaq änikurir, St. Paul Civic Center estadiuchö bautizakurirqä. Qateqnin semänanam tsë estadiuman, abogädu kanäpaq exämin ruraq ëwarqä. Octubri killanam willayämarqan abogäduna kanqäta.

Tsë asamblëachömi reqirqa wawqi Mike Richardsonta, pëqa Brooklyn (Nueva York) Betelchömi yanapakoq. Pëmi nimarqan Betelchö abogädukuna wanayanqanta. Tsënam Etiopïa nacionpita nuna Hëchus 8:36 ninqannö tapukurqä: “¿Imataq michäman Betelchö abogädunö yanapakunäpaq?”. Tsëmi Betelchö yanapakunäpaq mañakurqä.

Teytäkunataqa manam Jehoväpa testïgun tikranqäqa gustayarqantsu. Papänïqa nimarqan, ¿imanötan Watchtowerpaq trabajëqa yanapashunki? nirmi. Tsënam yanapakuyta munarnin kikï tsëchö trabajanäpaq änikunqäta nirqä.

Abogädunö trabajanqa witsanmi, 1984 watachö Brooklyn Betelchö yanapakur qallarqä. Noqataqa abogädunö yanapakunäpaqmi niyämarqan. Tsënö yanapakunäpaqqa, manaraq Betelman ëwar abogädunö trabajanqämi yanapamarqan.

1983 wata noviembri killam, Jehoväpa testïgunkunaqa Jersey City (Nueva Jersey) markachö Stanley localta rantiyarqan. Wawqikunaqa luzpaq cablita y yakupaq tübukunata altsayänampaqmi autoridäkunata mañakuyarqan. Wawqikunaqa Jehoväpa testïgunkuna asamblëankunata rurayänampaq tsë local kanqantam niyarqan. Peru tsë markachö autoridäkunaqa, kutin kutin mañakuyaptimpis manam munayarqantsu tsë localchö altsapakuyänanta. Tsënöqa karqan, tsë local qatukuyänan sitiuchö  kaptinmi. Y leyqa mandakoq asamblëakunata rurayänan sitiukuna, juk läduchö kanampaqmi.

Tsë asuntutaqa mas puëdeq autoridäkunamanmi wawqikunaqa chätsiyarqan, tsëqa pasarqan tsëraq Betelman chärishqächömi. Noqaqa ishkë watanam Saint Paul (Minnesota) markachö abogädunö trabajarqä, tsëmi alli musyarqä tsë cäsukuna tratëta. Noqakunapita juk kaqmi Stanley localchö pelïcula rikäyanqanta y tukuy niraq müsica tocayanqanta nirqan. Tsëqa, ¿imanirtan asamblëakunata rurëqa allitsu? Tsënam juezqa nirqan Jersey City markachö ley ninqanta mana cumplikäyanqanta y autoridäkunatam mana michäkuyänampaq nirqan. Tsënö Jehovä yanapayämanqanta rikarqä kushikoqmi kä.

Tsë localtaqa, cäsi juk watallachömi wawqi panikunaqa altsapakur ushariyarqan. 1985 wata 8 de septiembri killachömi, 79 grüpu Galaad escuëlapita yarqoqkunapaq reunion karqan. Tsëpitaqa, Jersey City markachö localqa asamblëakunata rurayänampaqmi karqan. Betelchö abogädunö trabajëqa, unë trabäju ruranqäpitapis masmi kushitsimarqan. Tsëpita Jehovä bendicimänampaq kaqtaqa, manam ichikllapis pensarqätsu.

1980 wata witsanqa, wawqi panikuna yawarta mana churakuyta munayaptinqa, mana cäsushpam hospitalkunachö doctorkunaqa yawarta churariyaq. Mamannaq wamrakuna mana kayänampaq nirmi, yawarta churakuyänampaq qeshyaq warmikunata juezkunaqa obligayaq.

1988 wata 29 de diciembri killam, pani Denise Nicoleau qeshyakurishqanchö yawarnin alläpa ëwaptin, doctorkunaqa yawarta churayänampaq niyarqan. Paniqa manam yawarta churayänanta munarqantsu. Tsënam waränin junaqqa, juk juezta mañakuyarqan yawarta churayänampaq. Y jueznam yawarta churayänampaq mandakurqan pani Nicoleauta y nunanta mana willashpa.

Viernis 30 de diciembri killachömi, hospitalchö doctorkunaqa yawarta churariyarqan pani, nunan y familian michäkuykäyaptimpis. Tsë junaqllam wakin  familianta y creikoqkunata rikaq wawqikuna michäkuyanqanta nirnin carcelman llawiratsiyarqan. Tsënö Nueva York markachö pasakunqantaqa, säbadu 31 de diciembrim noticiachö pasaratsiyarqan.

Mas puëdeq autoridäkunamanmi tsë cäsuta chätsiyarqä. Y lünisnam Milton Mollen juezwan parlayarqä. Tsë juezta ima pasakunqanta willariptïmi, juez Mollenqa oficïnanchö parlayänäpaq nimarqan. Tsë juezmanqa ëwayarqä wawqi Philip Brumleywanmi. Juezqa hospitalpa abogäduntapis qayatsimushqam kanaq. Tsë abogäduwan piñatsinakuykäyaptïmi, wawqi Brumleyqa: “Shumaqlla parlë” nimarqan. Tsënö wawqi nimanqanqa allim karqan, noqaqa alläpa piñashqanam parlëkänaq kä.

Juk höra pasariptinmi, juez Mollenqa waränin junaq tsë cäsuta rikänampaq nirqan. Oficïnampita yarqurëkäyaptïnam juezqa niyämarqan, hospitalpa abogädumpaq mana fäcil kanampaq kaqta. Tsë höram Jehovä yanapayämänampaq kaqta musyarirqä. Kushikuypaqmi karqan Teyta Dios noqakunawan tsëta rurëkätsinqanqa.

Juiciupaq documentukunataqa tsë paqasmi tardiyaq alistapakuyarqä. Brooklyn Betelpa amänunllachömi juiciuqa kanan karqan, tsëmi wakin wawqikunaqa chakipa tsë juiciuman ëwayarqan. Tsë juiciuchö niyanqäta chuskun juezkuna wiyarirnam, pani Nicoleaupaq punta kaq juez mana alli mandakunqanta niyarqan.

Tsëpita ichik tiempullatam Nueva York markachö autoridäkunaqa pani Nicoleau yawarta mana churakunampaq derëchuyoq kanqanta niyarqan. Tsëpitaqa, yawarta wawqi panikuna mana churakuyänampaqqa chusku cäsu maschömi Estädus Unïdus nacionchö yanapakurqä (Rikäri “ Yawar asuntuchö ganayan” neqtawan).  Betelchö abogädukunawanqa trabajayarqä mëqan teytan wamrankunata rikänampaq, rakikëpaq, herenciapaq y mas cäsukunachömi.

Pani Dawnqa, kima wamrayoq y nunampita rakikashqam karqan reqinqä witsanqa. Pëqa mana fäcil kaptimpis trabajaq y Diostam kushishqa llapan tiempunwan sirweq, tsënö Jehoväta sirwinqanmi noqataqa gustamarqan. 1992 wata Nueva York markachö kima junaq asamblëamanmi ëwayarqä, tsë asamblëachömi mas reqinakuyänäpaq nirqä. Tsëpitaqa juk watallatam casakuriyarqä. Tsënö Jehoväta kuyaq warmita tarinqäqa, noqapaqqa juk shumaq qarë cuentam karqan. Proverbius 31:12 ninqannömi, Dawnqa juk shumaq bendicion karqan.

Casakuyanqä witsanqa Dawnpa wamrankunaqa 11, 13 y 16 watayoqnam kayarqan. Pëkunapaq alli teyta këta munarmi, wamräkunatanö rikänäpaq tsëpaq parlaq librukunata y revistakunata leyirqä. Manam fäciltsu kashqa, peru teytantanö y amïguntanö rikäyämanqampitaqa kushikümi. Winë mayin amïgunkunawan wayiman shayämuptinqa kushikuyämi.

2013 watachömi, Dawnwan noqaqa Wisconsin markata ëwakuyarqä teytäkuna cuidaq. Tsënö kaptimpis Betelchöqa abogädunömi yanapakur sïguirqä.

2018 wata septiembri witsanqa, manam fäcil parlëta puëdirqätsu. Tsënam atiendimaq doctorqa ima kanqanta musyarqantsu. Y juk doctornam, celebruta rikaq doctorman ëwanäpaq nimarqan. 2019 wata enëru killanam tsë doctorqa nimarqan, celebrü mana alli kaptin höra höra kuyukuyta mana puëdinqäta.

Kima junaq pasarishqanchönam makï ulloqpaq ishkïkurqä. Tsënömi musyarqä, celebrü mana alli kaptin unënöna mana kuyukuy puëdinqäta. Tsë qeshyawanqa rasllam parlakuyta, kuyukuyta y mikuytapis puëdirqänatsu.

Abogädunö Jehoväpaq trabajarnin wawqi panikunata yanapanqäpitaqa alläpam kushikü. Y kushikümi mas doctorkuna musyayänampaq atska revistakunapaq qellqanqäta y më tsë nacionchö abogädunö doctorkunata yachatsir purinqäpita. Tsënö ruranqämi më tsëchö wawqi panikuna yawarta mana churakuyänampaq yanapakushqa. Tsënö kaptimpis Lücas 17:10 ninqannömi, imapaqpis mana sirweq sirwipakoqnölla kallä. Ruranäpaq kaqllatam rurarqö.