Jehoväqa casakoqkuna kushishqa y imëyaqpis juntu kawakuyänantam munan (Mat. 19:4-6). ¿Casakuyta munarqa imanötan alli nunata o alli warmita tarinkiman? Jehovämi kamamarquntsik, tsëmi pëqa musyan piwampis reqinakurnin y casakurnin kushishqa kanantsikpaq imata ruranapaq kaqta. Bibliachö consëjukuna ninqannö imatapis rurashqaqa, mas allim kanqa. Bibliachö këkaq wakin consëjukunallata rikärishun.

Puntataqa këtam cuentachö katsinantsik: “Nunapa shonqunqa alläpa feyu mana markäkïpaqmi këkan. ¿Piraq musyanman shonqunchö imata yarpëkashqantapis?” (Jer. 17:9). Casakuyta munaq warmiwan ollqu reqinakur qallëkuyaptinqa, mas kuyanakurmi imapitapis allillaqa cuentata qokuyantsu. Kuyanakurlla casakurirqa, itsa tsëpitaqa llakikuyanqa (Prov. 28:26). Reqinakuyanqan witsanqa, manam alläpa kuyanakuyanqanta ninakuyanmantsu o imatapis äninakuyanmantsu.

Proverbius 22:3 (TNM) textuchömi kënö nin: “Yachaq nunaqa mana allikuna pasananta tantiyarirmi witikurin, peru upa nunakunaqa mana allita rikëkarpis ëwayanllam, tsëmi imëka sufrimientuman chäyan”. ¿Ima mana allimantan chätsikun Internetpa y juk aplicacionkunapa pitapis reqiqa? Tsënö pitapis reqeqkunaqa llakikurmi ushayashqa. Y wakin mana alli nunakunaqa, Internetpa pitapis reqeq tukurmi qellëninkunata suwapuyashqa. Wakinqa, Jehoväpa testïgunkuna kayanqanta nirmi tsëkunata rurayashqa.

Ima mas pasakunqanta rikärishun. Casakuyta munar Internetman inscribikurishqaqa, kikin mäquinallam noqantsikpaqnö nunata o warmita akraramun. ¿Peru imanötan musyashwan alli o mana alli nuna o warmi kanqantaqa? Casakunapaq pillatapis reqinapaqqa, ¿allitsuraq kanman juk mäquina akramunanta dejanqantsik? Tsëqa mana allichi kanman. Tsë mäquinakuna rurayanqanqa manam nï ichikllapis igualantsu Bibliapa consëjunkunawanqa (Prov. 1:7; 3:5-7).

Proverbius 14:15 textuchöpis kënömi nin: “Mana tantiyakuq nunaqa llapan niyashqantam juklla creyirin. Alli käyikuq nunaqa  asïllaqa pitapis manam creyintsu”. Juk ollqu o juk warmi alli maja kanampaq kaqta musyanapaqqa, puntataqa alliran reqinantsik. Peru Internetllapa piwampis parlarninqa, ¿allitsuraq reqishwan? Imanö kayanqanta qellqanakurnin y mëtsika hörakunapa parlarnimpis, ¿rasumpatsuraq alli reqinakuyanqä? Alli majata tarishqa kayanqanta pensaqkunaqa, rikänakurirqa chipyëpam llakikuyashqa.

Salmus libruta juk qellqaqmi kënö nirqan: “Rasumpa kaqta mana parlaq nunakunawan, ni alli tukoq nunakunawanqa manam juntakurqötsu” (Sal. 26:4, TNM). Mëtsikaqmi, pëkunaman interesäkuyänampaq fötunkunata altsapäyan o kikinkunapaq mana rasumpa kaqta qellqayan. Itsa pitapis qellqapäyanqanchöqa, rasumpa imanö kayanqantaqa willakuyantsu. Itsa wakinkunaqa Jehoväpa testïgun kayanqanta niyan, peru ¿bautizakuyashqanatsuraq? ¿Jehoväta alli sirweqku kayan? ¿Jehoväwanqa alli amïguku kayan? Congregacionninchö wawqi panikunaqa, ¿imanötan rikäyan? ¿Mana allikunataku rurayan o hasta mana alli nunakunaku kayan? (1 Cor. 15:33; 2 Tim. 2:20, 21). ¿Biblia ninqannöku casakunampaq libri këkan? Tsë llapantam alli musyanantsik. Peru pëta reqeq wawqi panikunawan mana parlarqa, manam imanö kanqanta musyashuntsu (Prov. 15:22). Y, Diosta alli sirwikaqqa, manam mana bautizakushqawan casakuytaqa nï pensanqallapistsu (2 Cor. 6:14; 1 Cor. 7:39).

Casakuyänampaq Internetpa y juk aplicacionkunapa pitapis reqï mana alli këkaptinqa, ¿imanötan juk alli warmita o juk alli nunata pipis reqinman? Reunionnintsikkunapaq juntakänata mana michämashqaqa, cada semäna ruranqantsik reunionnintsikkunachö, asamblëantsikkunachö o juk reunionkunachömi, juk wawqi panikunata reqita puëdintsik.

COVID-19 muyakoq qeshya kanqan witsanchönö Diospita Yachatsikuna wayikunachö juntakëta mana puëdirqa, reunionnintsikkunamanqa Internetllapam yëkuntsik, y tsëchömi soltëru këkaq Testïgukunata reqita puëdintsik. Tsëchöqa, imanö yachatsikunqantam rikëta puëdintsik y Diosman markäkunqan o yärakunqan imanö këkanqantam parlakunqanchö musyëta puëdintsik (1 Tim. 6:11, 12). Jina reunion ushariptimpis, wallka wallkalla rakimanqantsik grüpukunachömi, parlakurita puëdintsik. O Internetpa juk grüpu wawqi panikuna juntakäyaptimpis parlakurishwanmi. Tsëkunachömi juk wawqi o juk pani imanö kanqanta y wakinkunata imanö tratanqanta rikäshun (1 Pëd. 3:4). Reqinakuyanqanmannömi, imata rurëta munayanqanchö y imanö kayanqanchö igual o mana igual kayanqantapis rikäyanqa.

Soltëru këkaqkuna Bibliachö consëjukunata cuentaman churëkur piwampis casakurninqa, mas kushishqam kawakuyanqa. Proverbius 18:22 (TNM) textuchö ninqannömi kanqa: “Alli warmita tarishqa nunaqa, juk bendiciontam chaskishqa, y Jehoväpa favornintam tarin”.