1. Pëta mañakunapaq Jehovä permitimanqantsiktaqa, ¿imanötan rikantsik?

 CIËLUTA y Patsata kamaq Diosnintsik pëman mañakunapaq permitimanqantsikqa juk shumaq qarëmi. Këllaman pensarishun: Jehovätaqa imë hörapis y ima idiömata parlarpis, imanö këkanqantsiktam llapanta willëta puëdintsik. Wiyamänapaq kaqta següru karmi, Pëtaqa hospitalchö cämarëkar o carcelchö llawirëkarpis mañakuyta puëdintsik. Tsëmi Diosman mañakunqantsiktaqa, ichikllapaqqa churantsiktsu.

2. Diosta mañakuyta puëdinqampita, ¿imanötan alläpa agradecikunqanta David rikätsikurqan?

² Diosman mañakuytaqa, rey Davidqa manam ichikllapaqtsu churaq. Tsëmi Jehoväpaq cantarnin juk cancionchö kënö nirqan: “Mañakamushqäpis inciensunö nöpëkiman chärallämutsun” (Sal. 141:1, 2). David kawanqan witsanqa, Jehovä ninqannöllam pëta adorayänampaq sacerdötikuna inciensuta rurayaq (Ex. 30:34, 35). Tsëmi inciensupaq parlarqa, Teytan Jehoväta imanö mañakunampaq kaqta puntallapitana pensanampaq kaqta David nikarqan. Mañakunqantsikta wiyar Jehovä kushikunanta munarmi, noqantsikpis Davidnölla rurëta munantsik.

3. ¿Imanötan Jehoväqa ciëluchö këkan y tsëta musyanqantsikqa imanö mañakunapaqtaq yanapamantsik?

³ Jehoväman mañakurqa, alläpa respëtuwanmi parlapänantsik. Isaïas, Ezequiel, Daniel y Juan suëñïninkunachönö rikäyanqanman pensarishun. Tsëllata mana rikashqa karpis, Jehovä Alläpa Puëdeq Rey kanqantam rikäyarqan. Isaïasqa,  ‘ciëluchö kuyëllapaq trönunchö tëkaqtam’ Jehoväta rikarqan (Is. 6:1-3). Ezequielnam, cärruchönö tëkaqta y jiruroqnimpana “turmanyë shanshäkurninraq” chipapaqtanö rikarqan (Ezeq. 1:26-28). Danielnam, ratashnimpis rajunö pasëpa yulaq vistishqa “wiñëpa kawaq Awkin” trönunchö tëkaqta rikarqan, y tëkanqampitam nina yarquykarqan (Dan. 7:9, 10). Gobernar täkunanchö Jehovä tëkaqta y jiruroqninchö “esmeralda niraq turmanyë” këkaqtanam Juan rikarqan (Rev. 4:2-4). Jehovä ciëluchö imanö këkanqanta musyanqantsikmi, pëta mañakuyta puëdinqantsikpita agradecikunapaq y alläpa respetarnin mañakunapaq yanapamantsik. Tsënö këkaptinqa, ¿imapitataq mañakunqantsik höra parlapashwan?

4. Diosta mañakunapaq Jesus yachatsimanqantsikchöqa, ¿imatataq yachakuntsik imakunapaq parlar qallanqampita? (Mateu 6:9, 10).

⁴ (Leyi Mateu 6:9, 10). Jirkapita yachatsikunqanchömi, Dios wiyanampaq imanö mañakuyänampaq kaqta qateqninkunata Jesus yachatsirqan. “Kënömi Diosta mañakuyänëki” nirirmi, Jehoväpa voluntäninchö këkaqkunapita parlarqan. Tsëkunaqa: jutin alläpa respëtuwan rikashqa kanampaq kaq, llapan chikeqninkunata ushakätseq Gobiernun shamunampaq kaq y Patsapaq y nunakunapaq änikunqan bendicionkunata cumplimunampaq kaqmi. Mañakunqantsikkunachö tsëkunapaq parlarqa, Diospa voluntänin mas puntachö këkanqantam rikätsikuntsik.

5. ¿Imanötan musyantsik wananqantsikkunapaq mañakuyqa allilla kanqanta?

⁵ Imanö mañakunapaq Jesus yachatsikunqanchöqa, kikintsikpaq mañakunqantsikpis allilla kanqantam rikätsikurqan. Jehovätaqa mikunapaq kapamänantsikpaq, jutsantsikkunapita perdonamänapaq, tentacionman mana ishkinapaq y Satanaspa makimpita librëkamänapaqmi mañakuyta puëdintsik (Mat. 6:11-13). Tsëkunapaq Jehoväta mañakurqa, pëlla yanapamënintsikta puëdinqanta y pëpa rikëninchö alli këta munanqantsiktam rikätsikuntsik.

6. ¿Jesus yachatsimanqantsikllapaqku mañakushwan?

⁶ Jesusqa manam yachatsikunqannö kutin kutin mañakuyänampaqtsu qateqninkunata nikarqan. Juk kutikuna mañakunqanchöqa,  tsë höra yarpachakuykanqankunapaqmi mañakurqan (Mat. 26:39, 42; Juan 17:1-26). Noqantsikpis yarpachakunqantsikkunapaqmi mañakuyta puëdintsik. Këllaman pensarishun: imatapis decidinantsik kaptinqa, yanapëkamänapaqmi mañakushwan (Sal. 119:33, 34). Chaskinqantsik carguchö yanapakunantsik fäcil mana kanampaq kaqta pensarqa, Jehovätam yachaqta tikrëkatsimänapaq mañakuyta puëdintsik (Prov. 2:6). Teytakunam wamrankunapaq y wamrakunanam teytankunapaq mañakuyta puëdiyan. Jina llapantsikmi Bibliata estudiëkätsinqantsikkunapaq y yachatsinqantsik nunakunapaq mañakuyta puëdintsik. Peru Diosman mañakurqa, manam wananqantsikkunallapaqtsu mañakunantsik.

7. ¿Imanirtan mañakunqantsik höra Jehoväta alabanantsik?

⁷ Jina mañakunqantsikkunachöqa, Jehovätapis alabashwanmi. Pipitapis masqa pëllatam alabanantsik. Salmus libruta juk qellqaq nunam Jehoväta kënö nirqan: “Allillata ruraqmi y perdonakuqmi kanki”. Jina kënöpis nirqanmi: “Qamqa alli shonquyuq y ankupäkuqmi kanki. Jukllaqa manam piñakunkitsu. Ankupäkuqmi y rasun kaqllata parlaqmi këkanki” (Sal. 86:5, 15). Jehovätaqa imanö kanqampita y imëkata ruranqampitam alabanantsik.

8. Diosta mañakunqantsikchö agradecikunapaq kaqkunapitaqa, ¿imakunatan wakinqa kayan? (Salmus 104:12-15, 24).

⁸ Jina mañakunqantsikchö Jehoväta alabarpis, noqantsikrëkur imëkata ruramunqampitam agradecikushwan. Wakinqa këkunam kayan: shumaq color wëtakunata rikanqantsik, tukuyläya mikuykuna kanqan y alli amïgukunayoq kanqantsikmi. Y Jehoväqa kushishqa kanantsikta munarmi, tsë llapanwan bendicimantsik (leyi Salmus 104:12-15, 24). Y masqa, pëpita yachakunapaq mëtsika publicacionkuna kapamanqantsikpita y shamoq tiempuchö imëkapis alliyänampaq kaqpita änimanqantsikpitam agradecikuntsik.

9. ¿Imatataq rurashwan Jehoväta agradecikuyta mana qonqanapaq? (1 Tesalonicensis 5:17, 18).

⁹ Noqantsikpaq imëkata ruramunqampita Jehoväta agradecikuytaqa, fäcil-llam qonqarishwan.  Tsënö mana pasamänapaqqa, ¿imatataq rurashwan? Imakunata mañakunqantsiktam juk listaman qellqashwan y tsëpitanam tiempu pasanqanmannö, Jehovä imanö contestamanqantsikta rikashwan. Nïkurnam, Jehoväta mañakunqantsikchö imanö yanapamanqantsikpita agradecikushwan (leyi 1 Tesalonicensis 5:17, 18). ¿Manaku kushikuntsik imapitapis wakinkuna agradecikamashqa? Tsënöllam Jehoväpis, mañakunqantsikta contestamunqampita agradecikushqa alläpa kushikun (Col. 3:15). Peru tsëkunata agradecikunqantsikpitapis juk asunturëkur-ran Jehovätaqa masraq agradecikunantsik. ¿Imapaqtan parlëkantsik?

10. ¿Imanirtan Tsurinta Patsaman mandamunqampita Jehoväta agradecikushwan? (1 Pëdru 2:21).

¹⁰ (Leyi 1 Pëdru 2:21). Pëpita yachatsimänapaq Tsurinta Jehovä mandamunqampitam agradecikushwan. Jesus imanö kawanqampita yachakurqa, Jehoväpita y pë kushishqa kanampaq imata ruranapaq kaqpitam yachakuntsik. Noqantsikrëkur Jesus wanunqanman markäkur o yärakurqa, Jehoväwanmi alli amïgu kashun y yamë kawakushun (Rom. 5:1).

11. ¿Imanirtan Jesuspa jutinchö mañakunantsik?

¹¹ Tsurimpa jutinchö mañakuyta puëdinqantsikpitam Jehoväta agradecikuntsik. Imatapis mañakunqantsiktaqa, Jehoväqa Jesuswanmi contestamantsik. Tsurimpa jutinchö mañakushqaqa, Jehoväqa wiyamantsikmi y contestamantsikmi. Jesusmi kënö entienditsikurqan: “Jutïchö qamkuna mañakuyaptikiqa, tsëtam rurashaq, tsënöpa Tsurirëkur Teyta alläpa precisaqpaq churashqa kanampaq” (Juan 14:13, 14).

12. ¿Imanir mastan Jehoväta Tsurimpita agradecikushwan?

¹² Jehoväqa noqantsikrëkur Jesus wanunqampitam jutsantsikkunapita perdonamantsik. Bibliachöqa, Jesus ‘mandakoq kaq sacerdöti’ kanqanta y ‘Alläpa Respetashqa Kaqpa gobernar täkunampa derëcha kaq lädunchö’ tëkanqantam nin (Heb. 8:1). Jina kënöpis ninmi: “Teytawan këkaq juk yanapakoqmi kapamantsik, Jesucristu” (1 Juan 2:1). Jehovätam agradecikuntsik noqantsikta llakipämaqnintsik o ankupämaqnintsik, llapanta rurëta mana puëdinqantsikta entiendeq y ‘noqantsikrëkur parlakamoq’ Sacerdötikunapa Mandaqnin kanampaq Jesusta churamunqampita (Rom. 8:34; Heb. 4:15). Noqantsikrëkur Jesus mana wanushqa kaptinqa, manachi jutsasapa kanqantsikrëkur Jehoväman mañakuyta puëdishwantsu karqan. Noqantsikrëkur kuyë Tsurin wanunanta Jehovä permitinqampitaqa, manam imata ninqantsikwampis alläpa agradecikunqantsiktaqa rikätsikuyta puëdishuntsu.

13. Wanunampaq ichikllana pishikaptin, ¿imanötan qateqninkunata kuyanqanta Jesus rikätsikurqan?

¹³ Wanutsiyänampaq tsariyanqan paqasmi, qateqninkunapaq atska hörakunapa mañakurnin Satanaspita cuidëkunampaq Teytanta mañakurqan (Juan 17:15). Tsëta ruranqanqa, ¡alläpa kuyakoq kanqantam rikätsikurqan! Imëka mana allikunapa pasanampaq këkaptimpis, apostolninkunapaqmi yarpachakurqan.

14. ¿Imanötan wawqi panintsikkunata kuyanqantsikta rikätsikuntsik?

¹⁴ Jesus ruranqannöllam Diosman mañakurqa, kikintsik wananqantsikkunallamantsu yarpantsik. Tsëpa rantinqa, wawqi  panintsikkunapaqpis mañakuntsikmi. Tsëta rurarmi, juknintsik juknintsik kuyanakunapaq Jesus mandakunqanta wiyakunqantsikta y wawqi panintsikkunata kuyanqantsikta Jehoväta rikätsintsik (Juan 13:34). Y wawqi panintsikkunapaq mañakurqa, manam tiempuntsikta perdikantsiktsu. Bibliachömi, “alli kaqta ruraq nunapa mañakïninqa alläpa poderyoqmi” nin (Sant. 5:16).

15. ¿Imanirtan wawqi panintsikkunaqa pëkunapaq mañakunata wanayan?

¹⁵ Wawqi panintsikkunaqa, imëka mana allikunapa pasayaptinmi pëkunapaq mañakunantsikta wanayan. Itsa Jehovätaqa, pëkunata yanapëkunampaq mañakushwan qeshyapäkuyaptin, desgraciakunapa pasayaptin, guërrakuna kaptin o chikir sufritsiyaptin. Jina desgraciakuna pasakuptin yanapakoq wawqi panikunapaqpis mañakushwanmi. Itsa pillatapis mana allikunapa pasëkaqta reqinki. Tsëqa, ¿imanirtan Diosta mañakurnin pëpa jutimpa mañakunkitsu? Wawqi panintsikkuna alli tsarakurnin sïguiyänampaq Jehoväta yanapëkunampaq mañakurqa, pëkunata rasumpa kuyanqantsiktam rikätsikuntsik.

16. ¿Imanirtan dirigimaqnintsik wawqikunapaq mañakushwan?

¹⁶ Congregacionta dirigeq wawqikunapis pëkunapaq mañakunqantsik yanapayanqampitam alläpa agradecikuyan. Tsënö kaptinmi, apostol Pablupis kënö qellqarqan: “Noqapaqpis mañakuyë, tsënöpa parlanqä höra shimïman imata parlanäpaq kaq chämunampaq, tsënöpa alli willakïkunapa pakarëkaq sagrädu willakïninta musyatsikunqä höra, mana mantsakushpa parlanäpaq” (Efes. 6:19). Kanan witsampis, alli trabajaq wawqintsikkunam dirigimantsik. Rurayanqankunachö bendicinampaq Jehoväta mañakurmi, pëkunata kuyanqantsikta rikätsikuntsik.

17, 18. ¿Imëtan itsapis mañakunapaq nimashwan, y imatataq cuentachö katsinantsik?

¹⁷ Itsa höraqa, Diosman mañakunantsikpaq pillapis nimäshun. Këllaman pensarishun: itsa juk paniqa pitapis estudiatsinampaq yanaqaq panita mañakunampaq ninqa. Bibliata estudiëkaqta tsë pani alläpa mana reqirqa, itsa estudiuta ushayanqan höra mañakunampaq äninqa. Tsënöpam, Bibliata estudiëkaq  warmi wananqankunapaq Diosman mañakunqa.

¹⁸ ¿Diospita yachatsikoq manaraq yarqur o reunionchö mañakunampaq juk wawqita niyaptinqa? Tsë wawqikunaqa, imanir juntu këkäyanqantam cuentachö katsiyänan. Diosta mañakurqa, manam congregacionchö kaqkunata consejayanmantsu ni imatapis willakuyanmantsu. Cäsi llapan reunionkunachömi cantanapaq y mañakayämunampaqqa, 5 minütuslla kan. Tsëmi reunionkunachö mañakoq wawqikunaqa, “mëtsika palabrakunata” utilizäyänantsu y masran, reunion qallanampaq mañakuyänan kaptinqa (Mat. 6:7).

19. ¿Imatan Jehoväpa cölerakuynin junaqpaq listu këkänapaq yanapamäshun?

¹⁹ Jehoväpa cölerakuynin junaq këllachöna kaptinmi, pëman mañakuytaqa mas precisaqpaqraq churanantsik. Tsëpaq parlarmi Jesus kënö nirqan: “Riyaq riyaqlla këkäyë, ima tiempuchöpis Diosta rogakurnin, tsënöpa llapan pasakunampaq kaqkunapita escapayänëkipaq” (Lüc. 21:36). Seguïdu mañakushqaqa, Diosmanmi mas markäkushun o yärakushun y Jehoväpa cölerakuynin junaq chämunampaqmi listu këkäshun.

20. ¿Imatataq rurashwan mañakunqantsikkuna shumaq mushkoq inciensunö kanampaq?

²⁰ ¿Imatataq këchö yachakurquntsik? Jehoväman mañakuyta puëdinqantsikpitaqa, alläpam agradecikuntsik. Jehoväman mañakurqa, mas puntataqa pëpa voluntänin rurakänampaq kaqkunapaqmi mañakunantsik. Jina noqantsikrëkur Tsurinta mandamunqampita y Gobiernumpitam agradecikuntsik, y wawqi panintsikkunapaqpis mañakuntsikmi. Y pishipakunqantsikkunapaq y pëman mas markäkunapaq yanapëkamänapaqpis mañakuyta puëdintsikmi. Manaraq mañakurnin imata ninapaq kaqta pensarmi, Diosman mañakuyta puëdinqantsikpita alläpa agradecikunqantsikta rikätsikuntsik. Tsëta rurashqaqa, Jehoväqa shumaq mushkoq inciensutanömi mañakunqantsikta ‘kushishqa chaskinqa’ (Prov. 15:8).