1. Bibliapita yachakur qallarqa, ¿imakunatataq yachakurqëki?

 ¿BIBLIATA estudiarnin yachakunqëkikunata yarpankiku? Diospa jutin ima kanqanta, nunakunata castiganampaq infiernu mana kanqanta, wanushqakuna kawariyämunampaq kaqta y pëkunawan Shumaq Patsachö kanëkipaq kaqta musyarirqa capazchi alläpa kushikurqëki.

2. Bibliapita yachakurqa, ¿imanönatan kawakur qallarqëki? (Efesius 5:1, 2).

² Bibliapita yachakurqa, maschi Jehoväta kuyarqëki. Y tsënö kuyarchi Biblia mandakunqannöna kawakur qallarqëki. Tsë consëjukunata cäsukurchi imatapis allina decidirqëki, y Diosnintsik munanqannöna pensarqëki y imatapis rurarqëki. Imanömi juk wamra papänin imatapis ruranqannölla ruran, tsënöchi qampis Jehovänö kuyakoq këta yachakurqëki (leyi Efesius 5:1, 2).

3. ¿Imakunatataq tapukushwan?

³ Kënömi tapukushwan: “¿Bautizakunqä witsanchönöku kanampis kuyakoq kä? ¿Jehovä munanqannöku pensä y imatapis rurä? ¿Jehovä munanqannöku congregacionchö wawqi panikunata kuyä?”. Bautizakunqëki witsanchönö mana kuyakoq karqa, ama yarpachakuytsu. Punta cristiänukunatapis tsëqa pasarqanmi. Jesusqa manam dejarirqantsu, y qamtapis manam dejarishunkitsu (Apoc. 2:4, 7). Pëqa musyanmi puntatanö kuyakoq këta puëdinëkipaq kaqta.

4. ¿Imatataq këchö yachakushun?

⁴ Këchömi puntata yachakurishun, Jehoväta y nuna mayintsikta  maslla kuyanapaq imata ruranapaq kaqta. Tsëpitanam yachakushun, kuyakoq kanqantsik noqantsikpaqpis y wakinkunapaqpis imanir alli kanqanta.

5, 6. (1) ¿Imakunapatan apostol Pabluqa Jehoväta sirwinqanchö pasarqan? (2) ¿Imatan yanaparqan sirwita mana dejanampaq?

⁵ Kushishqa sirwirpis apostol Pablupaqqa manam fäciltsu karqan Jehoväta sirwinan. Karu sitiukunatam viajanan karqan, y viajëkarqa “mayukunata tsimpëta mana puëdir” y ‘suwakoqkunapitam peligruchö’ karqan. Y chikeqninkunapis imëkata rurarmi sufritsiyaq (2 Cor. 11:23-27). Y manam tsëllatsu, hasta cristiänu mayinkunapis wakinqa manam ruranqankunata valorayarqantsu (2 Cor. 10:10; Filip. 4:15).

⁶ ¿Imatan apostol Pabluta yanaparqan Diosnintsikta sirwita mana dejanampaq? Vïdanchö pasanqankunata yarpanqan y Diospa Palabranta yachakurnin Jehovä Diosnintsik alläpa kuyakoq kanqanta entiendinqanmi. Segürum këkarqan Jehovä alläpa kuyanqanta (Rom. 8:38, 39; Efes. 2:4, 5). Tsëmi apostol Pabluqa Jehoväta alläpa kuyarqan. Tsënö kuyarmi sirweqninkunata yanapëta dejarqantsu (Heb. 6:10).

7. ¿Imatan yanapamäshun Jehoväta mas kuyanapaq?

⁷ Diosnintsikta maslla kuyanapaqqa, Palabrantam maslla yachakunantsik. Bibliata leyirqa, entienditam procuranantsik tsë leyinqantsikkuna Jehoväpita imata yachëkätsimanqantsikta. Kënömi tapukunantsik: “Kë versïculukunaqa, ¿imanötan yanapaman Jehovä kuyamanqanta entiendinäpaq? Y ¿imanötan yanapaman Jehoväta maslla kuyanäpaq?”.

8. ¿Imanötan Diosnintsikman mañakunqantsikqa yanapamantsik maslla kuyanapaq?

⁸ Llapan shonquntsikwan Jehoväman mañakunqantsikpis maslla kuyanapaqmi yanapamantsik (Sal. 25:4, 5). Y Jehoväqa tsënö mañakushqa wiyamantsikmi (1 Juan 3:21, 22). Asiapita Khanh b jutiyoq panim kënö nin: “Puntataqa Jehoväta kuyarqä, Bibliapita yachakushqa karllam. Peru maslla kuyanäpaqqa yanapamarqan Diosnintsikman mañakunqämi, tsënö kuyarmi Pë munanqannöna imatapis rurar qallëkurqä”.

9. ¿Imanötan Timoteu rikätsikurqan cristiänu mayinkunata kuyanqanta?

⁹ Cristiänu tikranqampita juk ishkë watakuna pasariptinmi, apostol Pabluqa Timoteu jutiyoq alläpa kuyakoq jövinta reqirqan. Timoteuqa Jehoväta y nuna mayinkunatam alläpa kuyaq. Tsëmi tiempuwanqa Filïpuschö cristiänukunata Timoteupaq Pablu kënö nirqan: “Manam pënöqa ni pï kantsu. Pëqa llapan shonqunwanmi qamkunapaq yarpachakun” (Filip. 2:20). Pabluqa manam Timoteu imakunata rurëta yachanqampitatsu ni alli yachatsikoq kanqampitatsu parlarqan, sinöqa wawqi paninkunata alläpa kuyanqampitam. Congregacionkunachö wawqi panikunaqa Timoteu watukanantaqa alläpachi shuyaräyaq (1 Cor. 4:17).

10. ¿Imatataq Ännawan qowanqa o runanqa rurayarqan cristiänu mayinkunata kuyarnin?

¹⁰ Noqantsikpis wawqi panikunatam tukuynöpa yanapëta procurantsik (Heb. 13:16). ¿Yarpäyankiku punta kaq yachatsikuychö Ännapaq parlanqantsikta? Ännawan qowanqa o runanqa juk familiata watukaqmi ëwayarqan. Tsë familiakunaqa desgraciapam  pasashqa kayänaq y wayinkunapa tëchumpis ishkishqam kanaq. Tsëmi cambiakuyänampaq limpiu röpankuna karqantsu. Ännam kënö willakun: “Röpankunatam taqshayänäpaq wayïkunaman apayarqä, wakintam planchayarqä y wakintanam doblayarqä, tsëpitanam kutitsiyarqä. Tsë rurayanqäkuna alläpa sasa o aja mana kashqa kaptimpis, tsënö yanapayanqäpitam tsë familiawanqa kananyaqpis alli amïgu kayä”. Ännawan qowanqa kuyakoq karninmi cristiänu mayinkunata yanapayarqan (1 Juan 3:17, 18).

11. (1) Kuyakoq kanqantsikta rikämarnintsik, ¿imanötan wakin nunakuna sientikuyan? (2) Proverbius 19:17 ninqannö, ¿imanötan Jehovä sientikun nuna mayintsikta kuyëpa tratashqa?

¹¹ Wakinkunata kuyëpa tratarninqa, Jehovä pensanqannö y ruranqannömi rurëkantsik. Y tsëtaqa wakin nunakunapis cuentatam qokuyan, capazchi musyashuntsu pikuna agradecikoq kayanqanta. 8 kaq pärrafuchö parlanqantsik Khanh jutiyoq panim yanapaqnin panikunata kushishqa yarparan, kënömi nin: “Alläpam agradecikü yachatsikoq pushayämaq nanakunata. Pëkunaqa alläpa kuyakoqmi kayaq. Yachatsikoq pushayämänampaqmi wayïman shayämoq, y yachatsikur ushariyaptïnam imallatapis mikunäpaq invitayämaq o almorzaq pushayämaq, tsëpitanam wayïman kutitsiyämaq. Kananmi cuentata qokü tsë rurananqa sasa o aja kanqanta, peru pëkunaqa kuyakoq karmi yanapayämaq”. Tsënö kaptimpis, yanapanqantsikpitaqa manam llapantsu agradecikamäshun. Yanapaqninkunapaq parlarmi Khanh kënö nin: “Yanapayämaq nanakunataqa noqapis yanapëtam munä, peru manam musyätsu mëchö täkuyanqanta. Tsënö kaptimpis, Jehoväqa musyëkanmi mëchö këkäyanqanta, tsëmi pëkunata yanapëkunampaq mañakü”. Jehovä Diosnintsikqa wakinkunata ichikllapis yanaparinqantsiktaqa alläpam valoran. Y pëta  sirwirnin rurëkanqantsiktanömi rikan y jaqantsik cuentam sientikun (leyi Proverbius 19:17).

12. ¿Imanötan bautizakushqana kaq ollqukunaqa kuyakoq kayanqanta congregacionchö rikätsikuyanman? (Rikäri fötukunata).

¹² Ollqu karqa, ¿imanötan kuyakoq kanqëkita congregacionchö rikätsikunkiman? Wakinkunata yanaparninmi. Jordan jutiyoq jövinmi wawqi panikunata yanapëta munar, juk anciänuta tapurqan imanö yanapakunampaq. Tsë anciänuqa yanapakuyta munanqampitam felicitarqan y imakunachö mas alliyänan pishinqantam nirqan. Nirqanmi reunionman mas tempränulla chänampaq, wakinkunata saludanampaq, reunionchö parlakunampaq, grüpunwan yachatsikoq mas seguïdu yarqunampaq y wawqi panikunata imallachöpis yanapanampaq alkäbu këkänampaq. Maslla yanapakunampaq yachakurninmi Jordanqa anciänu consejanqanta rurarqan, tsëmi yanaparqan wakinkunata mas kuyanampaq. Pitapis siervu ministerial churayaptinqa manam tsëraqtsu wakinkunata yanapar qallan, sinöqa puntata ruranqannömi yanapakur sïguin, y tsëtam Jordan entiendirqan (1 Tim. 3:8-10, 13).

13. ¿Imatan Christianta yanaparqan yapë anciänu kanampaq?

¹³ Siervu ministerial këta o anciänu këta dejashqa karqa, kuyakoq karnin llapan ruranqëkikunata Jehovä mana qonqanqanta yarparë (1 Cor. 15:58). Kuyakoq karnin kanan ruranqëkikunatapis Jehoväqa cuentachömi katsin. Christian jutiyoq wawqim anciänu këta dejarir alläpa llakikurqan. Peru manam qelanäkurirqantsu, kikinmi kënö nin: “Manana anciänu karpis, Jehoväta kuyarmi llapan puëdinqämannö yanapakunäpaq decidirqä”. Y tiempuwanqa yapë anciänu kanampaqmi churariyarqan, tsëmi kënö nin: “Tsë carguta  chaskikunäpaqqa manam segürutsu këkarqä. Peru llakipäkoq karnin congregacionchö yanapakunäta Jehovä permitikämanqanman pensarmi y wawqi panikunata y kikin Jehoväta kuyarmi tsë carguta chaskikurqä”.

14. ¿Imatataq yachakuntsik Georgia nacionpita juk pani ninqampita?

¹⁴ Noqantsikqa mana Testïgu nunakunatapis kuyantsikmi (Mat. 22:37-39). Këllaman pensarishun, Georgia nacionpita Elëna jutiyoq panim kënö nin: “Qallananllachöqa, Jehoväta kuyarllam wayin wayin yachatsikoq kä. Peru Jehoväta maslla kuyanqämi yanapamarqan mana Testïgu nunakunatapis kuyanäpaq. Ima problëmakunapa pasëkäyanqanman y imakunapita maslla yachakuyta munayanqampita parlapänäpaqmi pensaq kä. Tsënö pensanqämi yanapamarqan pëkunata yanapëta munanäpaq” (Rom. 10:13-15).

15, 16. Fötukunachö rikanqantsiknöpis, ¿imanötan kuyakoq kanqantsikqa wakinkunata yanapan?

¹⁵ Wawqi panikunata kuyarnin yanapanqantsikqa wakin nunakunatapis yanapanmi. COVID-19 qeshya witsanmi, Paöluwan warminqa edäna panikunata yanapayarqan tabletninkunata y celularninkunata imanö utilizäyänampaq, tsënöpa Diosnintsikpita alli yachatsikuyänampaq. Juk panintsikqa manam tabletninta utilicëta yacharqantsu, peru tsëpitam yachakurirqan y Jesus Wanunqanta Yarpäna reunionpaqmi familiankunata invitarqan. Y videuconferenciapam tsë reunionpaq  60 conectakäyarqan. Tsëchömi rikantsik Paöluwan warmin kë panita kuyarnin yanapayanqanqa, wakin familiankunatapis yanapashqa kanqanta. Kë panim Paöluman kënö nir qellqarqan: “Gracias, mayorna kaqkunata yachatsiyämanqëkipita. Noqakunapaq Jehovä yarparanqanta y pacienciawan yachatsiyämanqëkitaqa manam imëpis qonqashaqtsu”.

¹⁶ Tsënö rurarmi Paöluqa cuentata qokurirqan yachaq kanqantsikpita o häbil kanqantsikpitaqa kuyakoq kanqantsik mas alli kanqanta. Kënömi nin: “Juk tiempupam congregacionkunata watukakur yanapakurqä. Wawqi panikunaqa mananachi yarpäyannatsu discursarnin yachatsikunqäkunata, peru imallachöpis yanapanqäkunataqa yarparëkäyanchi”.

17. Kuyakoq kanqantsikqa, ¿imanötan kikintsiktapis yanapamantsik?

¹⁷ Kuyakoq kanqantsikqa kikintsiktapis alläpam yanapamantsik. Nueva Zelanda nacionchö Jonathan pasanqanta rikärishun. Pëqa juk säbadum, pullan junaqpanö, juk precursorta rikarqan alläpa achachëchö japallan yachatsikuykaqta. Tsëmi cada säbadu pëwan yachatsikoq yarqunampaq decidirqan. Tsë hörachöqa manam musyarqantsu kuyakoq karnin tsë precursorta yanapanqan kikintapis imanö yanapanampaq kaqta. Jonathanmi kënö nin: “Tsë witsankunaqa, Diosnintsikpita yachatsikuyqa manam gustamaqtsu. Peru tsë precursor alli yachatsikuptin y nunakuna shumaq wiyayaptinmi noqatapis yachatsikuy gustaramarqan. Y manam tsëllatsu, tsë precursorwanqa alli amïgum tikrayarqä. Pëmi yanapamarqan Diosnintsikpita mas yachakunäpaq, yachatsikurnin kushishqa kanäpaq y Jehoväwan mas amïgu kanäpaq”.

18. ¿Imata ruranatataq Jehoväqa munan?

¹⁸ Jehoväqa munan pëta y nuna mayintsikta mas kuyanatam. Y Jehovä Diosnintsikta mas kuyanapaqqa Palabran Bibliatam leyinantsik, leyinqantsikmanmi alli pensanantsik y pëmanmi cada junaq mañakunantsik. Y wawqi panintsikkunata mas kuyanapaqqa, wanayanqankunachömi yanapanantsik. Mas kuyakoq karninqa, Jehoväwanmi mas amïgu kashun y wawqi panintsikkunatapis familiantsiktanömi kuyashun. Tsëta rurarqa, ¡Jehoväwan y wawqi panintsikkunawanmi imëyaqpis amïgu kashun!