Canadächömi Iglesia Unïda religionchö papänïqa anciänu karqan. Cada domingum tempränulla, wamrakunata Bibliapita yachatsiyanqan cläsiman panïtawan mandayämaq. Onci de la mañänanam, papänïwan iglesiaman ëwayaq kayä. Y tardipanam Testïgukuna yachatsikuyanqan reunionman mamänïwan ëwayaq kayä. Y cuentatam qokuyarqä ishkan religionkunapis alläpa jukläya kanqanta.

Mamänïqa, Bob Hutchesonwan y warmin Marionwanmi alli amïgu kayarqan y Bibliapita yachakunqantam willarqan, y pëkunaqa Testïgum tikrayarqan. 1958 watam atska nacionkunapaq asamblëa “Voluntad Divina” neqman, Bobwan warmin Marionqa kiman wamrankunatawan pushayämarqan. Tsë asamblëaqa öchu junaqpam Nueva York markachö karqan. Mana fäcil kaptimpis pushayämanqampitam alläpa agradecikü, tsë asamblëachö këqa alläpam gustamarqan.

Jövin karqa mëtsika animalkuna kanqan chakrachömi täkurqä. Y animalkunata cuidë gustamaptinmi, Veterinariata estudiëta munarqä. Peru mamänïmi juk anciänuta willarqan pensëkanqäta. Tsë anciänunam kuyëllapa yarpätsimarqan ‘ushanan tiempukunachöna’ kawëkanqantsikta, y kënömi tapumarqan: “Universidäman atska watapa estudiaq ëwaptikiqa, ¿imanöraq Jehoväwan amïgu këniki kanqa?” (2 Tim. 3:1). Nimanqanman pensarirmi universidäman estudiaq ëwarqänatsu.

Secundariäta usharirqa, manam imata ruranäpaq kaqta musyarqätsu. Cada semäna ushëkunam Diosnintsikpitaqa yachatsikoq yarqoq kä. Peru yachatsikuy mana gustamaptinmi precursor këta mana puëdinäpaq kaqta pensarqä. Papänïwan tiyüqa manam Testïgutsu kayarqan, tsëmi Torontu markachö llapan tiempüwan juk reqishqa emprësachö trabajanäpaq niyämarqan. Tiyüqa tsë emprësachö precisaq  carguyoqmi karqan, tsëmi tsëchö trabajanäpaq änikurirqä.

Tsëchöqa trabäju höra cumpliriptimpis mas hörakunaran trabajarqä. Y cada junaq mana Testïgu nunakunawan juntararmi, Diosnintsikpaq ruranqäkunataqa ichikllapa ichikllapa dejar qallëkurqä. Tsë witsankunaqa mana Testïgu awilüwanmi täkurqä, peru wanuriptinmi juk läduchöna wayita ashirqä.

1958 watachö asamblëaman pushayämaq Bobwan warmin Marionqa teytäkunanömi kayarqan y pëkunawan täkunäpaqmi invitayämarqan. Pëkunam Diosnintsikta mas alli sirwinäpaq yanapayämarqan. 1960 watachömi wamrankuna Johnwan bautizakuyarqä. John precursor tikrariptinmi, noqapis maslla yachatsikunäpaq kallpachakurqä. Alli yanapakoqta rikäyämarmi, Yachatsikunapaq Diospa Escuëlan neq reunionta diriginäpaq churayämarqan. a

1966 watachömi, Randi Berge jutiyoq precursörawan casakurqä. Pëtaqa alläpam gustaq Diosnintsikpita yachatsikuyta, y mëchöpis yachatsikoqkunata wanayanqanchö yanapakuyta munaq. Congregacionkunata watukaq wawqim animayämarqan Ontariu provinciachö këkaq Orillia congregacionchö yanapakuyänäpaq. Tsëmi, ¡imëkäkunata alistapakurir ëwakuyarqä!

Warmï Randi kushishqa yachatsikuptinmi noqapis Orillia markaman chärirlla, precursor tikrarqä y alli yachatsikoq kanäpaqmi kallpachakurqä. Rasumpa kaqta reqiyänampaq nunakunata yachatsirqa, alläpam kushikurqä. Orillia markachö juk nunatawan warminta cambiukunata rurayänampaq y bautizakuyänampaq yanapëqa, juk bendicionmi noqakunapaq karqan.

Juk kutim Torontu markata ëwarqä y tsëchömi Arnold MacNamara jutiyoq wawqita reqirqä, pëqa Betelchömi trabajaq. Pëmi tapumarqan precursor especial këta munayanqäta o mana munayanqäta. Y noqaqa jinan höram “awmi, munayämi, peru Quebec markallata mandayämanmantsuqa” nirqä.  Tsënöqa contestarqä ingles parlaq Canadä nunakuna, Quebec provinciachö frances idiömata parlaq, Canadä nunakunata despreciaq nunakunanö pensarmi. Tsë witsampaqqa, Quebec provinciachömi juk grüpu polïticukuna kayaq y markankuna nacionninkunapita rakikänanta munayaq.

Wawqi Arnoldmi nimarqan: “Sucursalqa Quebec markallamanmi precursor especialkunata mandëkan”. Tsënam, “allim kanqa” nirqä. Y musyarqämi warmï Randi tsë markaman yanapakoq ëwëta munanqanta. Y tiempuwannam cuentata qokurirqä, yanapakoq ëwayänäpaq decidiyanqäqa mas alli kashqa kanqanta.

Pitsqa semänapa frances idiömata yacharatsiyämaptinmi, warmïwan y juk matrimoniuwan 540 kilömetruschö këkaq Rimouski markata ëwayarqä. Tsë markaqa këkan Montreal markapa norti kaq lädunchömi. Frances idiömataqa manam parlëta yacharqällatsu, tsëmi juk kuti juk asamblëapaq willakuykar, “atska austriacukunam” visitamäshun ninäpa rantin, “atska avestruzkunam” visitamäshun nirqä.

Rimouski markachöqa manam viajayanqä matrimoniullawantsu täkuyarqä, sinöqa Diospita yachatsikoq seguïdu yarqoq chusku soltëra panikunawan y ishkë wamrayoq Huberdeau familiawanmi. Tsë familiam qanchis cuartuyoq wayita arrendamurqan y llapäkunam pagakuyaq kayä. Tsë wayita y columnankunatapis yuraqta pintashqa kayaptinmi, “Yuraq Wayi” nir reqiyaq kayä. Tsëchöqa, 12 o 14 nunakunam täkuyaq kayä. Precursor especial karmi, Randiwanqa tempränupita patsa ampinqanyaq o tsakanqanyaq yachatsikuyaq kayä. Alläpa alalaptin, tamyaptin o alläpa tsakaptimpis yanaqäyämanqampitaqa alläpam agradecikuyä.

Tsë alli trabajaq precursorkunawanqa juk familianömi tikrariyarqä. Tardikunapanam yantawan ninata tsarirkatsir juntakäyaq kayä, y juk junaqtam rakiyaq kayä pierogis niyanqan taksha empanädakunata rurayänäpaq y rurinmanqa munayanqätam imatapis winayaq kayä. Y säbadu paqaskunapanam juk wawqi müsicata tocamuptin cantayaq y tushuyaq kayä.

Rimouski markachöqa nunakuna allim Diosnintsikpita wiyakuyaq. Pitsqa watallachömi atskaq estudiantikuna bautizakuyarqan, tsëta rikarqa alläpam kushikuyarqä y congregacionchöqa 35 publicadorkunanam kayarqä.

Quebec-chö kayanqäqa, mas alli yachatsikoq kayänäpaqmi yanapayämarqan. Rikäyarqämi yachatsikuyaptï Jehovä imanö yanapayämanqanta y kawayänäpaq wanayanqäkunatapis manam faltatsimurqantsu. Tsënöllam frances idiömata parlaq nunakunatapis mas alli reqiyarqä, y idiömankuna y costumbrinkunaqa gustarayämarqanmi. Tsëmi yanapayämarqan juk costumbriyoq nunakunatapis kuyayänäpaq (2 Cor. 6:13).

Tiempuwannam, sucursalpita wawqikuna tapuyämarqan Tracadie markata yanapakoq ëwëta munayanqäta o mana munayanqäta. Tsë markaqa këkan, Nueva Brunswick niyanqampa costa kaq lädunchömi inti o rupay yarqamunan lädumampa. Tsëman ëwayänäpaq decidiyänäqa manam fäciltsu karqan. Tsëllaran wayita arrendarnin conträtuta firmashqa kayarqä y semänachö juk ishkë junaqkunam escuëlachö profesornö trabajaq kä. Y Bibliapita estudiatsinqä nunakunapis tsëllaran publicador tikrashqa kayarqan y Diospita Yachatsikunantsik Wayitapis rurëkäyarqämi.

Tsë semäna ushëqa, Diosnintsikmanmi tsë asuntupaq seguïdu mañakuyarqä. Y “tsëchö yanapakunantsikta Jehovä munëkaptinqa, aku ëwashun” nirmi Tracadie markata ëwakuyarqä. Tsë markaqa Rimouski markapita alläpa jukläyam karqan. Imanö  kayänäpaq kaqta mana musyëkarpis ëwakuyarqämi, y Jehoväqa cada junaqmi yanapayämarqan (Mal. 3:10). Warmï Randiqa Jehovätam alläpa kuyaq, allim trabajaq y imëpis kushishqallam kaq. Tsëmi tsë markata ëwakuyänäpaqqa fäcil-lla karqan.

Tracadie markachöqa Robert Ross jutiyoq juk anciänullam karqan. Pëwan warmin Lindaqa tsë markata precursornö yanapakoqmi ëwayashqa kayänaq y wamrankuna yuririptimpis, tsëchö quedakuyänampaqmi decidiyänaq. Wamrankunata wätar alläpa ocupädu karpis, alläpam yanapayämarqan. Pëkunaqa alli posadatsikoqmi kayaq, imatapis gänas gänasllam rurayaq y kushishqam yachatsikuyaq.

Tracadie markachö ishkë watapa precursor këkäyaptïmi, congregacionkunata watukayänäpaqna nirayämarqan. Siëti watapam ingles parlaq congregacionkunata watukayarqä, y tsëpitanam niyämarqan frances idiömata parlaq congregacionkunata Quebec markachö watukayänäpaq. Tsëchöqa watukakoqkunata rikaq Leonce Crepeault wawqim discursuta mas alli ruranäpaq yanapamarqan. b Kënömi nimarqan: “Yachatsikunqëki mas alli yanapakunampaqqa, ¿imataraq rurankiman?”. Tsëmi yanapamarqan mas fäcil-lla yachatsikunäpaq.

1978 watachö Montreal markachö “Fe Victoriosa” neq atska nacionkunapaq rurakaq asamblëataqa kushishqam yarpä. Tsë asamblëamanqa 80 mil nunakunam shayämunan karqan. Noqaqa cocinarmi yanapakunä karqan. Peru tsë kutichöqa puntata cocinayanqampita jukläyanam cocinayänan karqan, mäquinakunapis juknam karqan y mikuytapis juknöpanam preparayänan karqan. Alläpa achachaptin mikuy mana malogranampaqqa cärrunö veinti remolquikunam karqan, peru höra höraqa manam shumaqtsu funcionaq. Asamblëa kanampaq juk junaq pishikaptinmi, estadiuchöqa pukllayarqan y puklla ushariptinran cäsi pullan paqasnöraq estadiumanqa ëwayarqä alistapakuyänäpaq. ¡Hornukunataqa desayünupaqmi listullana katsiyänä karqan! Alläpa utishqam o pishipashqam ushayarqä, peru wawqikunaqa allim trabajayaq y kushishqam kayaq, y pëkunapitam yachakurqä. Tsëchö llapan trabajaqkunawanqa amïgum tikrariyarqä, y wakinkunawanqa kananyaqpis amïgum kayä. Quebec markachö rurakaq asamblëaqa alläpa shumaqmi karqan. Peru tiempuwanqa, tsë markachömi cuarenta y cincuenta watakuna witsanchö  Testïgukunata chikeqkuna sufritsir qatikachäyarqan.

Montreal markachö jatun asamblëa rurakanqanchöqa, asamblëachö dirigeqkunapitam allipa yachakurqä. Juk kutim, Jehoväpa testïgunkunata dirigeqkunachö kanan yanapakuykaq wawqi David Splaneta juk asamblëata dirigirqan. Y yapëkaq asamblëachönam noqata tocamarqan, y wawqi Davidmi yanapamarqan.

Congregacionkunata watukarqa 36 watapam yanapakuyarqä, y 2011 watachönam Congregacionchö Anciänukunapaq Escuëlachö yachatsikunäpaq niyämarqan. Juk läduchö punuyqa manam fäciltsu karqan, ishkë watallachömi 75 cämakunachö warmï Randiwan punuyarqä. Mana fäcil kaptimpis, semäna ushariptinqa, yachatsir yanapanqäpita y Jehoväwan alli kayänampaq Jehoväpa Testïgunkunata Pushaqkuna yanapayanqampitam, anciänukunaqa alläpa agradecikuyaq.

Tsëpitanam Diospa Gobiernumpita Yachatsikoqkunapaq Escuëlachö yachatsikunäpaq churayämarqan. Tsë escuëlaman shamoqkunaqa llapan rurayänampaq kaqta rikëkurqa, alläpam yarpachakuyaq. Cada junaqmi siëti hörapa cläsichö kayänan karqan, kima hörapam juk rurëkunachö yanapakuyänan karqan y semänachömi chusku o pitsqa asignacionkunata preparakuyänan karqan. Juk kaq yachatsikoqwanqa, “Jehoväman confiakurllam tsë llapantaqa rurëta puëdiyanki” niyaq kayä. Jehoväman rasumpa confiakurqa, rurëta mana puëdiyänampaq kaqta pensëkarpis llapantam rurayaq. Y llapanta rurëta lograshqa kayanqampitaqa alläpam espantakuyaq, tsëtaqa manam qonqashaqtsu.

Bibliapita yachakuyänampaq estudiantinkunata mamänï yanapanqanta rikarmi, papänïpis Bibliapita wiyakuyta munarirqan. Mamänï wanukunqampita kima junaq pasariptinmi, papänïqa discursuta wiyaq reunionman chäramurqan. Rikëkurqa alläpam kushikuyarqä. Y tsëpitaqa 26 watapam reunionkunaman mana faltëpa ëwarqan. Manam bautizakurqantsu, peru anciänukunam willayämarqan imëpis punta puntata reunionman chanqanta.

Diosnintsikta sirwichöqa, mamänïmi noqapaq y kimam panïkunapaqpis ejemplu kashqa. Panïkunaqa qowankunawanmi o runankunawanmi Jehovä Diosnintsikta kushishqa sirwiyan. Juk kaq panïqa Portugal Betelchö y juk kaqnam Haitï Betelchö yanapakun.

Kananqa Ontariu provinciapa Hamilton markanchömi warmïwan precursor especial kayä. Congregacionkunata watukayanqä witsankunaqa, wawqi panikunapa revisïtankunaman y estudiunkunaman ëwëmi gustayämaq. Peru kananqa kikïkunapam estudiantïkuna kayäpaman, y Jehovä Diosnintsikpita yachakuyanqanta rikëqa alläpa kushikuypaqmi. Tsënöllam congregacionchö wawqi panikunatapis mas alli reqita puëdiyä, y mana allikunapa y allikunapa pasayanqan hörakuna Jehovä imanö yanapanqanta rikarmi alläpa kushikuyä.

Yanapayämaq wawqi panikunaman pensarninqa, warmï Randiwan alläpam agradecikuyä. Y noqakunapis Jehovä Diosnintsikta mas alli sirwiyänampaqmi wawqi panikunata yanapar kallpachakuyarqö (2 Cor. 7:6, 7). Juk familiachömi kimaq precursor kayarqan: maman, ollqu wamran y warmi wamran. Tsëmi papä kaqta kënö tapurqä: “¿Y qamqa manaku precursor këta pensarqunki?”. Pëqa kimaqta yanapëkanqantam nimarqan. Tsënam noqaqa nirqä, “y ¿manatsuraq Jehoväqa qampita mas alli pëkunata cuidëta puëdinman?”. Tsënö nirirmi, “familiëkikuna precursor karnin kushishqa kanqannömi, qampis precursor karqa kushishqa këta puëdinki” nirqä. Y seis killakuna pasariptinllam precursor tikrarirqan.

Randiwan noqaqa, ‘qepa yurikoq nunakunatam’ Jehovä llapan ruranqankunapita parlapar sïguiyäshaq. Jehoväta sirwir kushishqa kayanqänömi, pëkunapis kushishqa kayänanta munayä (Sal. 71:17, 18).