1. ¿Imanirtaq alläpa kushikuntsik?

ALLÄPAM kushikuntsik Jehoväpa sirweqninkuna mas mirayanqanta rikarnin. Mas miranqanqa rikätsimantsik aktsintsikta atsikyätsir sïguikanqantsiktam. Pasaq wataqa 10 millonpitapis mastam nunakunata Bibliapita estudiatsirquntsik. Jina mëtsika millon nunakunam Jesus Wanunqanta Yarpëman shayämurqan, y Diosnintsik alläpa kuyakoq kanqantam yachakuyarqan (1 Juan 4:9).

2, 3. (1) ¿Imataq michämënintsikta puëdintsu aktsintsikta atsikyätsinata? (2) ¿Imapitataq kë yachatsikïchö yachakushun?

² Jehoväpa sirweqninkunaqa tukï idiömatam parlantsik. Peru tsëqa manam michämantsiktsu Jehovä Diosnintsikta llapantsik unïdu alabanata (Rev. 7:9). Ima idiömata parlar o mëchö tärarnimpis, llapantsikmi nunakunachö aktsintsikta atsikyätsita puëdintsik (Filip. 2:15).

³ Mas miranqantsik, unïdu kanqantsik y mäkoq mäkoqlla kanqantsikmi yanapamantsik Jehovä Diosnintsikta alabanapaq, y mas nunakuna yachakïta munayänampaq. Kë yachatsikïchömi rikäshun tsë kimankunachö aktsintsikta imanö atsikyätsinapaq kaqta (leyi Mateu 5:14-16).

4, 5. (1) Yachatsikurnimpis, ¿imanö mastaq aktsintsikta atsikyätsishwan? (2) ¿Imanötaq yanapakun nunakunata kushi kushilla parlapanqantsik? (Rikäri kë yachatsikïpa qallananchö këkaq fötuta).

⁴ Juk yachatsikïninchömi, 1925 wata 1 de juniu Täpakoq revista kënö nirqan: “Manam pipis Diosta shonqupita patsë sirwita puëdinmantsu [...] aktsin atsikyänanta mana provecharqa”. Jina tsëpitam kënö nirqan: “Tsëpaqqa llapan markakunachömi Diospita yachatsikunan y mandakunqannömi kawanan”. Awmi, Diospa Gobiernumpita yachatsikur y Jesuspa qateqninkuna kayänampaq nunakunata yanaparninmi aktsintsiktaqa atsikyätsintsik (Mat. 28:19, 20). Jina alli portakunqantsikpis Jehovätam alaban. Yachatsikunqantsik hörakuna imanö portakunqantsiktam nunakuna rikäyan. Kushishqa kanqantsik y nunakunata shumaq saludarinqantsikmi rikätsikun, alli portakoq kanqantsikta y Diosnintsikpa sirweqnin kanqantsikta.

⁵ Jesusmi qateqninkunata kënö nirqan: “Wayiman yëkurirqa, tsëchö täraqkunata saludakuyanki” (Mat. 10:12). Pëkuna yachatsikuyanqan markakunachö nunakunaqa, mana reqishqakuna wayinkunaman visitakoq chäyaptinqa yëkatsiyaqmi. Peru markantsikchöqa itsa tsë costumbriqa kantsu. Y wakin wayiyoqkunaqa, mana reqishqankuna chäyaptinqa mantsakäyanmi o manam gustayantsu. Tsëmi mas alliqa kanman kushishqa saludarinqantsik. Jina tsënöllam rurashwan carrïtukunawan yachatsikurnimpis. Tsënö yachatsikoqkunaqa alleqchi musyayan kushi kushilla saludariyaptinqa nunakuna alli sientikuyanqanta. Wakin nunakunaqa parlapämarnintsikmi qallëkuyan y hasta publicacionkunatapis confianzam apakuyan.

6. ¿Imatataq juk mayorllana parëja rurashqa aktsin atsikyänanta munarnin?

⁶ Inglatërrapita juk mayorllana parëjam, qeshyapäkurnin wayin wayin yachatsikïta puëdiyantsu. Peru aktsinkuna atsikyar sïguinanta munarmi, wayinkuna punkunkunallachö juk mësaman publicacionkunata churëkur yachatsikuyan. Tsë sitiupaqa atskaq teytakunam pasayan escuëlapita wamrankunata ëlluyänampaq. Tsëmi mëtsikaq teytakuna Los jóvenes preguntan nishqan librukunata y follëtukunatapis apakuyan. Juk precursöram kë edäna parëjawan tsë sitiuchö yachatsikur qallëkurqan. Kë pani y kë parëja nunakunata yachatsiyänampaq kallpachakuyaptinmi, juk teyta Bibliapita yachakur qallëkurqan.

7. ¿Imanötaq yanapashwan nacionnintsikman ëwakamoqkunata?

⁷ Kë qepa watakunachöqa mëtsikaq nunakunam nacionninkunapita qeshpir, juk nacionkunaman ëwakïkäyan. ¿Markantsikmampis chëkäyämunku? Tsënö kaptinqa, ¿imatataq rurashwan Jehoväpita y ruramunampaq kaqpita yachatsinapaq? Puntataqa idiömankunachö saludëtam yachakurishwan. Y tsëpaqqa JW Language aplicacionmi yanapamënintsikta puëdin. Jina maslla parlapärinapaqmi juk ishkë palabrakunata yachakurishwan. Y tsëpitanam jw.org päginachö idiömankunachö këkaq videukunata y publicacionkunata rikäratsishwan (Deut. 10:19).

8, 9. (1) ¿Ima yanapakïtataq chaskintsik Cristiänunö Kawakunapaq y Yachatsikunapaq reunionchö? (2) ¿Imanötaq teytakuna wamrankunata yanapayanman reunionchö shumaq parlakuyänampaq?

⁸ Cristiänunö Kawakunapaq y Yachatsikunapaq reunionmi yanapamantsik wakin nunakunata y estudiantikunatapis mas confianzawan yachatsinapaq. ¡Tsë reunionqa Jehoväpa qarëninmi!

⁹ Reunionkunaman tsëraq shamoqkunaqa  alläpam espantakuyan wamrakuna reunion höra parlakuyanqanta wiyarnin. Tsëmi teytakunaqa wamrankunata alleq yachatsiyänan reunion hörachö parlakurnin aktsinkunata atsikyätsiyänampaq. Wamrakuna shonqunkunapita patsë parlakuyanqanmi, höraqa reunionman tsëraq shamoqkunata yanaparin rasumpa kaqta tarishqa kayanqanta cuentata qokuriyänampaq (1 Cor. 14:25).

10. ¿Imanötaq familiachö Diospita yachakuyanqan yanapakun familiachö mas unïdu kayänampaq?

¹⁰ Jina aktsintsiktaqa mas atsikyätsintsik familiantsikkunawan y cristiänu mayintsikkunawan mas unïdu kanapaq kallpachakurninmi. Alläpam precisan teytakunaqa familianwan Diospita seguïdu yachakuyänan. Wakinkunaqa tsë hörakunachömi JW Broadcasting progrämata rikäyan. Rikärirninqa llapankunam parlakuriyanman yachakuyanqankuna imanö yanapanqanta y imanö rurayänampaq kaqta. Jina teytakunaqa manam qonqayänantsu wamrakunata y jövinkunata pasëkäyanqanchö yanapëtapis. Tsëmi teytakunaqa, alleq pensayänan yachakuyanqankuna llapankunata imanö yanapanampaq kaqkunaman (Sal. 148:12, 13).

11-13. ¿Imanötaq llapantsikpis yanapakushwan cristiänu mayintsikkunawan mas unïdu kanapaq y aktsinkunata mas atsikyätsiyänampaq?

¹¹ Mayor kar o jövin karpis, llapantsikmi cristiänu mayintsikkunawan mas unïdu kanapaq kallpachakunantsik, tsënöpam yanapashun aktsinkunata mas atsikyätsiyänampaq. ¿Imakunatataq jövinkuna rurayanman? Mayor kaq cristiänu mayinkunawan tiemputa pasayänampaqmi patsätsiyänan. Itsa tapupäriyanman Jehoväta sirwiyanqanchö imakunapa pasayanqanta cuentariyänampaq. Tsënöpam mayor kaqkuna y jövin kaqkunapis aktsinkunata mas atsikyätsiyänampaq animanakuyanqa. Jina llapantsikmi altantu këkänantsik reunionkunaman invitädu shamoqkunata shumaq chaskirinantsikpaq. Kushi kushillam chaskinantsik, jamakuyänampaqmi juk asientuta ashipunantsik y wakin cristiänu mayintsikkunatam reqitsinantsik. Tsënö tratashqam familiachönö sientikuyanqa.

¹² Diospita yachatsikoq yarqunapaq dirigeqkunaqa, mayor kaqkunatam yanapëta puëdiyan mas fäcil-lla puriyänan territoriukunaman yachatsikuyänampaq churarnin. Y höraqa allim kanman pëkunata yanapayänampaq jövin kaqkunawan yachatsikoq yarquyänampaq churayanqampis. Jina  qeshyapäkur o juk asunturëkur yachatsikïta alläpa mana puëdeq kaqkunatapis cuentachömi katsiyänan. Tsënöpam jövin kaqkuna y mayor kaqkunapis kushishqa yachatsikïta puëdiyanqa (Lev. 19:32).

¹³ Salmus qellqaqmi alläpa kushishqa kënö nirqan: “¡Rikäyë! ¡Alläpa allim, y kushikïpaqmi wawqikuna y panikuna juk shonqulla juntu kayanqanqa!” (leyi Salmus 133:1, 2 *). Israelïtakunataqa alläpam yanapaq Jehoväta juntu adorayanqan. Tsënö unïdu kayanqantaqa Salmus qellqaq igualatsirqan alläpa precisaq y alläpa shumaq aceititawanmi. Tsënö këkaptinqa, ¿manatsuraq noqantsikpis cristiänu mayintsikkunata animashwan y pëkunawan juk shonqulla kanapaq kallpachakushwan? Rurëkarnaqa, ¡allitam rurëkantsik! Peru ¿manatsuraq masllata rurarkushwan? (2 Cor. 6:11-13).

14. ¿Imakunatataq rurashwan täranqantsik sitiuchö aktsintsik atsikyänampaq?

¹⁴ ¿Manatsuraq vecïnuntsikkunata Bibliapita maslla yachatsirnin aktsintsikta maslla atsikyätsishwan? Yachanëpaq nuna kashqaqa, Bibliapita yachakïtam munayanqa. Kënö tapukushun: “¿Ima niyantaq noqapaq vecïnükuna? ¿Limpiutaku katsï wayïta, wakin cösasnïkunata y täranqä sitiuta? ¿Wakinkunata yanapanäpaq listuku këkä?”. Cristiänu mayintsikkunawan parlarninqa tapurishun alli portakuyanqanta rikarnin vecïnunkuna, familiankuna y wakin yanaqinkuna imata pensayanqanta. Tsëqa, allikunata pensayanqantam willaramäshun (Efes. 5:9).

15. ¿Imanirtaq precisan mäkoq mäkoqlla këkänantsik?

¹⁵ Aktsintsik atsikyar sïguinanta munarqa, mana alli tiempukunachö kawëkanqantsiktam imëpis yarparänantsik. Jesusmi discïpulunkunata, “mäkoq mäkoqlla këkäyë” nir kutin kutin yarpätsirqan (Mat. 24:42; 25:13; 26:41). Diospita yachatsikïtaqa manam alläpa precisaqpaqnatsu churashun kënö pensarninqa: “Alläpa ‘jatun sufrimientuqa’ imëraq chämunqa. Chämïtaqa chämunqachi, peru noqaqa rikämannaraqku” (Mat. 24:21). Tsëqa aktsintsik mananam alläpaqa atsikyanqanatsu, y hasta upirinmanmi.

16, 17. ¿Imatataq ruranantsik mäkoq mäkoqlla këkänapaq?

¹⁶ Kë tiempuqa mas peormi tikranqa, tsëmi alläpa precisan mäkoq mäkoqlla sïguinantsik. Jehoväqa, dispuninqan tiempuchömi llapan mana allikunata ushakäratsimunqa (Mat. 24:42-44). Peru tsëyaqqa pacienciawanmi shuyaränantsik y imë hörapis mäkoq mäkoqllam këkänantsik. Diosnintsikpa Palabranta llapan junaqkuna leyishun y Diosnintsikman mañakïta ama jaqishuntsu (1 Pëd. 4:7). Mäkoq mäkoqlla këkaq y aktsinkunata atsikyätsir sïgueq cristiänu mayintsikkunapa ejemplunta qatishun. Tsënö juk willakïtaqa tarintsik 2012 wata 15 abril Täpakoq revistapa 18-21 päginankunachö këkaq, “Qanchis chunka wata juk judïopa faldampita tsaripakushqa” nishqan yachatsikïninchömi.

¹⁷ Jehoväta sirwirnin ocupädu kashun, wakinkunata tukïnöpa yanapashun y cristiänu mayintsikkunawan mas tiemputa pasashun. Tsënöpam mas kushishqa kashun y tiempu pasaqtapis manam mäkushuntsu (Efes. 5:16). Unëpitanam cristiänu mayintsikkunaqa Jehoväpita yachatsikïta më tsëman chätsiyänampaq alläpa kallpachakuyashqa. Peru kananqa, imanö ruranapaq Jehovä nimanqantsikmi yanapamantsik mastana ruranapaq. ¡Aktsintsikqa imëpitapis masmi atsikyëkan!

18, 19. ¿Imanötaq anciänukunaqa yanapakuyan mäkoq mäkoqlla këkänapaq? Juk pasakunqanwan willakaramï.

 ¹⁸ Jutsa rurëman ishkishqapis, Jehoväqa sirwirnin sïguinatam permitimantsik. Y yanapamänapaqqa anciänukunatam “qarëtanö” qomarquntsik, pëkunam yanapamantsik mäkoq mäkoqlla imëpis këkänapaq (leyi Efesius 4:8, 11, 12). Tsëmi anciänukuna watukamashqaqa, provechanantsik consëjunkunata shumaq wiyakurinapaq.

¹⁹ Inglatërrapita juk parëjam mana allipa pasarnin anciänukunata mañakuyarqan yanapayänampaq. Warmi kaqmi nirqan Diosta sirwichöqa qowanwan shumaqlla mana yanapanakuyanqanta. Y ollqu kaqnam nirqan alli yachatsikoq mana kanqanta y familianwan höra höralla Diospita yachakuyanqanta. Anciänukunaqa, qateqninkunata Jesus imanö cuidanqampita y wanayanqankunata cuentachö imëpis katsinqampitam parlapäyarqan. Ollqu kaqtam parlapäyarqan Jesuspa ejemplunta qatinampaq y warmi kaqtanam niyarqan pacienciayoq kanampaq. Jina Familiachö Diosta Adorayänan Hörachö yachakuyänampaq imanö yanapanakuyänampaq kaqtam niyarqan (Efes. 5:21-29). Y tsëpita tiempuwannam ollqu kaqta felicitäyarqan ruranqankunapita. Jina animayarqanmi rurarnin sïguinampaq y alli qowa kanampaq santu espïritu yanapanampaq kaqman confiakunampaq. Anciänukuna kuyakïwan y pacienciawan shumaq yanapayaptinmi, kë familiaqa aktsinkunata atsikyätsiyarqan.

20. ¿Imaraq pasakunqa aktsintsikta mas atsikyätsishqaqa?

²⁰ Salmus 128:1 textum nin Jehoväta respetaq kaq y mandakunqankunata wiyakoq nunaqa kushishqa kanqanta. Kë yachatsikïchömi yachakurquntsik Diosnintsikta sirwiyänampaq wakin nunakunata invitarnin, mas unïdu kanapaq kallpachakurnin y mäkoq mäkoqlla karnin aktsintsikta atsikyätsinapaq kaqta. Tsëta rurarqa mas kushishqam kashun, wakinkunapis allikunata ruranqantsiktam rikäyanqa y Jehovä Diosnintsiktam adorëta munayanqa (Mat. 5:16).