Rehoboamqa rey Salomonpa tsurinmi karqan, y Salomonqa Israel nacionchö 40 watapam rey karqan (1 Rëy. 11:42). Jesus manaraq shamuptin 997 watachö Salomon wanuriptinmi, tsurin Rehoboamqa Siquem markaman ëwarqan rey kanampaq corönata chaskeq (2 Crön. 10:1). ¿Papänin alläpa yachaq kashqa kaptintsuraq mantsakurqan teytannö gobernëta mana puëdinampaq kaqta? Ichikllachönam rikätsikunan karqan imëka problëmakunata altsëta puëdinqanta o mana puëdinqantapis.

Rehoboam rey tikranqan witsanqa, imëka problëmakunam Israelchö pasakïkarqan. Tiempuwannam precisaq nunakuna alläpa yarpachakurnin reyta kënö niyarqan: “Teytëkita sirwinanqa sasam kashqa, porqui alläpatam exigiyämarqan; peru qamqa ama pënöqa alläpata exigiyämëtsu, tsënöpam shumaq sirwiyashqëki” (2 Crön. 10:3, 4).

Rehoboampaqqa manachi fäciltsu karqan mañakuyanqanta rurëqa. Porqui mañakuyanqanta rurarqa kikin, familian y cortichö trabajaqkunaqa mananam puntatanönatsu alli atiendishqa kayänan karqan. Peru mañakuyanqanta mana cäsuptinqa, nunakunaqa mananam sirwiyänannatsu karqan. Tsëqa, ¿imatataq rurarqan? Puntataqa Salomonta yanapashqa kaq precisaq nunakunatam tapukurqan. Peru tsëpitanam, winë mayin kaqkunata consëjuta mañakurqan y pëkuna niyanqantam cäsurqan. Tsëmi nunakunata kënö nirqan: “Noqaqa mastaraqmi exigiyashqëki. Teytäqa chikutikunallawanmi astayäshurqëki; peru noqaqa, fiërru puntayoq chikutikunawanmi astayashqëki” (2 Crön. 10:6-14).

¿Imatataq tsëpita yachakuntsik? Anciänukuna y wakin poqushqa cristiänukuna consejamanqantsikta cäsukunantsik alläpa precisanqantam. Pëkunaqa alleq tantiyaq nuna karninmi, decidinantsikpaq kaqkuna imaman chätsimänantsikpaq kaqta raslla cuentata qokuyan, tsëmi alli consejamënintsikta puëdiyan (Job 12:12).

Rehoboamqa mandakïnimpita rakikäkureqkunata castiguëta munarmi, llapan tröpanta alistar qallëkurqan, peru Jehoväqa willakoqnin Semäyatam mandarqan kënö ninampaq: “Manam witsäyänëkitsu wawqikikunawan [...] pelyayänëkipaq. Wayikikunata cada ünu kutikuyë, porqui noqa munaptïmi këqa pasakushqa” (1 Rëy. 12:21-24). *

“Fiërru puntayoq chikutikunawanmi astayashqëki” nikarnin tsë nunakunata castïgunnaqta jaqiriptinqa, ¿imataraq nunakuna pëpita pensayanman karqan? (Igualaratsi 2 Crönicas 13:7 textutawan). Jehovä ninqanta cäsukunan mana fäcil kaptimpis, rey Rehoboam y tröpankunaqa cäsukurninmi wayinkunata kutikuyarqan.

¿Imatataq këpita yachakuntsik? Nunakuna burlakuyänan kaptimpis, Diosnintsikta cäsukunantsik mas alli kanqantam. Tsënöpam Jehoväpa amïgun kashun, y pëqa bendicimäshunmi (Deut. 28:2).

Rehoboamqa Jehoväta cäsukurninmi, tsë rakikaq mushoq nacionwan pelyarqantsu. Tsëpa rantinqa, Judächö y Benjaminchö këkaq markakuna següru kayänampaqmi jatusaq perqakunata ruratsirqan (2 Crön. 11:5-12). Peru tsëpitapis masqa, Jehoväpa leyninkunatam juk tiempupa cäsukurqan. Tsëmi Jeroboan mandakunqan kastakuna imäginkunata adorar qallëkuyaptin, wakin nunakunaqa Jehoväta adoraq y Rehoboamta yanapaq Jerusalenman ëwayarqan (2 Crön. 11:16, 17). Rehoboam cäsukoq kanqanrëkurmi, gobiernunqa mas alli karqan.

Gobiernun mas alliyäriptinqa, Rehoboamqa mananam Jehoväpa Leyninta cäsukurqannatsu y juk dioskunatam adorar qallëkurqan. Itsa tsëtaqa rurarqan, Jehoväta mana adoraq Ammon markapita mamäninta cäsurnin (1 Rëy. 14:21). Imanö kaptimpis, llapan nunakunam pë ruranqanta qatir qallëkuyarqan. Tsënöpam, tsapänampaq jatusaq perqakunata Rehoboam ruratsishqa kaptimpis, Jehoväqa permitirqan Egiptupa reynin Sisaq Judächö këkaq markakunata ushakätsinanta (1 Rëy. 14:22-24; 2 Crön. 12:1-4).

Sisaqqa, Rehoboam gobernanqan Jerusalen markamanmi ushakätsinampaq chärirqan. Y Jehoväqa, profëtan Semäyatam mandarqan rey Rehoboamta y precisaq nunakunata kënö ninampaq: “Qamkunaqa jaqiyämarqunkim, tsëmi noqapis Sisaqpa makinchö qamkunata jaqiyarqoq”. ¿Imatataq Rehoboam rurarqan Jehovä tsënö niptin? Bibliam kënö willakun: “Israelchö precisaq nunakuna y reypis humillakurninmi kënö niyarqan: ‘Jehoväqa alli kaqta ruraqmi’”. Tsënö arrepentikuptinmi Jehoväqa Rehoboamta salvarirqan y Jerusalenta Sisaq ushakätsinanta permitirqantsu (2 Crön. 12:5-7, 12).

Rehoboamqa ishkë kaq kastakunata gobernarmi sïguirqan. Y manaraq wanukurninmi, llapan wamrankunata atska qarëninkuna qorqan. Tsëtaqa itsa rurarqan Abïaspa contran wawqinkuna churakäyänanta mana munar, porqui pëmi rey kanan karqan (2 Crön. 11:21-23). Tsë kutichöqa, yachëyoq kanqantam rikätsikurqan.

Allikunata rurashqa karpis, Rehoboamqa manam Diospa amïguntsu karqan. Bibliaqa kënömi nin: “Mana alli kaqtam rurarqan”. Tsënöqa nin shonqupita patsë Jehoväta mana kuyashqa kaptinmi (2 Crön. 12:14).

Höra höra Jehoväta wiyakurpis y nacionnimpaq allikunata rurashqa karnimpis, manam Diospa amïguntsu karqan ni manam kushitsita munarqantsu. Tsëmi mana allikunata rurarqan y juk dioskunata adorarqan. Pensari, ¿Rehoboamqa Jehovä ninqanta wiyakurqan rasumpa arrepentikurtsuraq y kushitsita munartsuraq? O ¿wakinkuna niyaptinllatsuraq? (2 Crön. 11:3, 4; 12:6). Tiempuwanqa, Rehoboamqa yapëmi  mana allikunata rurar qallëkurqan. Manam awilun Davidnötsu karqan. Davidqa alläpa jutsakunata rurashqa karpis, Jehovätaqa kuyëkarqanllam y shonqupita patsëmi arrepentikurqan, jina llapan nunakunatam yanaparqan Jehovä munanqannö adorayänampaq (1 Rëy. 14:8; Sal. 51:1, 17; 63:1).

¿Imatataq Rehoboampita yachakuntsik? Diosnintsikpa amïgun kanapaqqa, pëta sirwitam imëpis puntaman churanantsik. Y manam pensanantsiktsu familiantsikta alli manteninqantsikllapita ni höra höralla sirwinqantsikllapita Diospa amïgun këta puëdinqantsiktaqa.

Jehoväwan amïgu kanapaqqa, shonqupita patsëmi imëpis kuyanantsik. Y tsëpaqqa, nina mana upinampaq yamtata seguïdu churapaqnömi, alläpa precisan Palabranta llapan junaqkuna alleq estudianantsik, yachakunqantsikman alleq pensanantsik y seguïdu mañakunantsik (Sal. 1:2; Rom. 12:12). Tsë kuyakïmi yanapamäshun Jehoväta kushitsinqan rurëkunallata ruranapaq, y jutsata rurarirpis shonqupita patsë arrepentikunapaq. Tsëta rurarqa, manam Rehoboamnötsu kashun, sinöqa Jehovä Diosnintsiktam imëpis sirwikäshun (Jüd. 20, 21).