TSË librukunaqa atska dibüjukunayoqmi karqan, tsëmi maslla entiendinäpaq yanapamarqan. Tsënöpam wamra kanqäpita patsë Biblia yachatsikunqankunata alläpa musyëta munarqä.

Y tsë witsankunam Ishkë kaq Jatun Guërraqa India nacionman chëkarqan. Jina tsë witsanmi teytäkuna divorciakuriyarqan. Ishkankunatam alläpa kuyarqä, y manam entiendirqätsu juntu këta imanir mana munayanqanta. Manam wawqï ni panïpis karqantsu. Alläpa llakishqa y pïninnaqmi sientikurqä.

Karachi markachömi mamänïwan täräyarqä. Juk junaqmi Fred Hardaker nishqan edäna doctor punkükunata tsaktakaramurqan, pëqa Jehoväpa testïgunmi kanaq. Pëmi mamänïta Bibliapita yachatsita munanqanta nirirqan, peru mamänïqa noqallata yachatsimänampaqmi nirqan. Tsëmi shamoq semänachö wawqi Hardakerwan Bibliapita yachakur qallëkurqä.

Tsëpita semänakunallatam wawqi Hardakerpa clïnicanchö rurayanqan reunionkunaman ëwar qallëkurqä.  Tsëchöqa edäna Testïgukunam chunka ishkënö ëllukäyaq. Pëkunaqa wamrankunatanömi cuidayämarqan y shoqayämarqan. Reunionkunachömi noqawan takuyaq y alläpa kuyakïwanmi parlapäyämaq. Tsëqa, ¡alläpam gustamarqan!

Y reunionkunaman ëwar qallanqäpita pöcu tiempullatanam, wawqi Hardakerqa yachatsikoq yarquyänäpaq invitamarqan. Tsëmi Bibliapita grabashqa discursukunata nunakunata wiyatsinäpaq takshalla tocadiscuta utilicëta yachatsimarqan. Tsënö grabashqa discursukunaqa höraqa nunakuna imanö kayanqantam cläru parlapaq, tsëmi wakinkunaqa alläpa piñakuyaq. Tsë kaptimpis nunakunata Bibliapita yachatsitaqa alläpam gustamaq.

Japonpa tröpankuna India nacionman yëkayämunampaq ichikllana pishikaptinmi, Gran Bretäñapita autoridäkuna Testïgukunata mas chikir qallëkuyarqan. Y 1943 wata juliu killam escuëlapita director qarqaramarqan, pëqa sacerdötim karqan. Y mamänïtam nirqan, Testïgukunawan juntakunqäpita wakin yanaqïkunapaq mana alli ejemplu kanqäta. Tsëmi mamänïqa alläpa piñakurnin Testïgukunawan juntakunäta munarqannatsu. Y papänïwan täränäpaqmi mandamarqan. Papänïqa Peshawar markachömi tärarqan, tsë markaqa 1.370 kilömetru karuchömi këkarqan. Tsëchöqa mananam Bibliapita yachakïta ni reunionkunaman ëwëta puëdirqänatsu. Tsëmi Jehoväwan amïgu kënï ushakar qallëkurqan.

1947 watam Karachi markata yapë kutirirqä trabäju asheq. Tsëchö këkarnam wawqi Hardakerta asheqnin clïnicanman ëwarqä, pëqa alläpa shumaqmi chaskimarqan. Y kënömi tapumarqan:

— “¿Imëkitaq nanan?” —Tsënöqa tapumarqan qeshyarnin ëwëkanqäta pensarninmi. Tsëmi noqaqa kënö nirirqä:

—“Doctor, noqaqa allim këkä, peru Diospa kaqchömi mana alliqa këkä. Bibliapitam yachakïta munä”. Y tsënö niriptïnam kënö nimarqan:

—“¿Y imëtaq yachakïta munanki?”.

—Noqanam, “puëdikaptinqa kanan hörä” nirirqä.

Alläpa shumaqmi Bibliapita tsë tardi yachakuyarqä. Familiäkunawan yapë tinkureqnömi sientikurqä. Peru mamänïqa manam Testïgukunawan juntakunäta munarqantsu, tsënö kaptimpis noqaqa decidishqanam karqä Jehoväta mana jaqinäpaq. 1947 wata 31 de agostu killam bautizakurirqä y 17 watayoq këkarnam precursor regular karqä.

Puntataqa Quetta markamanmi precursornö yanapakunäpaq mandayämarqan, tsëchöqa Gran Bretäñapa tröpankunapa cuartelninmi kashqa karqan. 1947 watam India nacionqa ishkëman rakikärirqan, Indiaman y Pakistanman. * Tsërëkurmi religiösu nunakunaqa wanutsinakur qallëkuyarqan, y 14 millon nunakunam juk nacionkunaman ëwakuyarqan. India nacionpita musulmankunam escapayarqan Pakistan nacionman, y Pakistanpitanam hindues y sijes nishqankuna India nacionman ëwakuyarqan. Tsënö pasakïkaptinmi Karachi markachö juk trenman lloqarkur Quetta markayaq ëwakurqä. Tsë trenchöqa nunakuna alläpa juntam kayarqan, tsëmi alläpa kichki kaptin juk fiërrupita tsaripakurkurlla ëwarqä.

Quetta markachömi 20 watayoqnö George Singh jutiyoq precursor especialta reqirirqä, pëmi juk biciclëtata qaramarqan tsë markakunachö yachatsikur purinäpaq. Y joqta killallachömi 17 nunakunatana Bibliapita yachatsir qallëkurqä, wakinqa Testïgum tikrariyarqan. Bibliapita yachatsinqäpita jukqa karqan, soldädukunapa mandaqnin Sadiq Masih jutiyoq nunam. Y tiempuwanqa alli publicadormi tikrarqan. Pëmi Georgetawan yanapayämarqan wakin publicacionkunata urdu nishqan idiömaman traduciyänäpaq, tsë idiömataqa cäsi llapan nunakunam Pakistanchö parlayaq.

Tsëpita tiempuwannam Karachi markaman yapë kutirirqä, y tsëchömi Galaad Escuëlapita tsëllaraq chämushqa Henry Finch y Harry Forrest misionërukunawan yachatsikur qallëkurqä. Pëkunaqa alläpam yanapayämarqan Diospita mas alli yachatsikoq kanäpaq. ¡Tsëtaqa alläpam agradecikü! Tsë jatun jirkakunapa chakinkunachömi urdu idiömata parlaq mëtsikaq humildi nunakuna täräyaq, y alläpam Diospita yachakïta munayaq. Tsëpita ishkë wata  pasariptinnam noqatapis Galaad Escuëlaman invitarayämarqan, y tsëpita kutirirnam congregacionkunata watukakoqnö Pakistanchö höra höra yanapakurqä. Y Lahore markachö këkaq misionërukunapa wayinchömi kima misionërukunawan tärarqä.

1954 watachömi täräyanqä misionërukuna alläpa fuertipa piñatsinakuriyarqan,y noqapis mana alleq pensashpam mëtikurirqä, tsënö mëtikunqäpitam carguyoq wawqikuna fuertipa consejëkayämarqan. Tsëmi alläpa llakishqa sientikurqä Diosta sirwinqächö fracasashqa kanqäta pensarnin. Karachi markamanmi kutikurqä, tsëpitanam Londres (Inglatërra) markata ëwakurqä tsëchö mas alliyëta munarnin.

Këkanqä congregacionchöqa Londres Betelpitam mëtsikaq yanapakuyaq. Sucursalta rikaq Pryce Hughes jutiyoq wawqim alläpa yanapamarqan. Juk kutim willamarqan, entëru Patsapa yachatsikuyanqanta rikaq wawqi Joseph Rutherford pëtapis fuertipa consejëkunqanta. Jina willamarqanmi ruranqampita tsapäkïta munaptin, masraq piñapëkunqanta. Tsëkunataqa kushishqam willamarqan. Jina nimarqanmi qallananllachöqa piñakunqanta, peru tsëpitanash cuentata qokurinaq tsë consëjuta wananqanta y Jehovä alläpa kuyarnin corregikanqanta (Heb. 12:6). Tsënö nimanqanqa shonqüyaqmi chärirqan, y Jehoväta kushishqa yapë sirwinäpaqmi yanapamarqan.

Tsë witsankunaqa mamänïqa Londrestam ëwakamurqan y tsëchömi John Barr jutiyoq wawqiwan Bibliapita yachakur qallëkurqan, pëqa Jehoväpa Testïgunkunata Pushaqmi tiempuwanqa tikrarqan. Mamänïqa Bibliapita rasmi yachakurirqan, y 1957 watachömi bautizakurirqan. Jina manaraq wanukurnin teytäpis Bibliapita yachakushqa kanqantam willayämarqan.

1958 watachömi Londresman ëwakamushqa Dinamarcapita Lene jutiyoq paniwan casakurirqä. Tsëpita watallatam Jane jutiyoq warmi wamräkuna yuririrqan. Jina këkäyanqä congregacion Fulhamchöqa yanapakunäpaq cargukunatam chaskirqä. Peru warmï Lene qeshyapäkuptinmi, mas qoñu markaman ëwakuyäna karqan y 1967 watachömi Adelaida (Australia) nishqan markaman ëwakuyarqä.

Adelaida congregacionchöqa ciëlupaq akrashqa chunka ishkë edäna cristiänukunam kayaq, pëkunaqa llapäkunapaqmi Diospita yachatsikïchö alli ejemplun kayaq. Tsëmi noqakunapis maslla yachatsikur qallëkuyarqä.

1979 watachönam pitsqa kaq wamräkuna Daniel  yuririrqan. Pëqa, sindrome de Down * nishqan qeshyayoqmi yurikurqan y doctorqa niyämarqan pöcu tiempulla kawanampaq kaqtam. Tsë wamräkunawan pasayanqäpita parlakïqa alläpam llakitsiman. Wakin wamräkunata atiendita mana jaqishllapam tsë qeshyashqa wamräkunata imëkanöpa cuidayarqä. Danielpa shonqunchöqa ishkë uchkum karqan, tsëmi shütëta mana puëdir tsapakaq. Tsë hörakunam hospitalman ras apakuyaq kayä. Tsë wamräkunaqa qeshyapäkurnimpis alläpa musyaq y alläpa kuyakoqmi karqan. Jina Jehovätapis alläpam kuyaq. Mikuyänäpaq mañakuyanqä hörakunam makinta choqparkur shumaq wiyakurir shonqupita patsë “amen” nireq, y tsëpitaraqmi imëpis mikoq.

Chusku watayoq këkaptinnam Danieltaqa leucemia nishqan qeshya tsaririrqan. Warmïwanqa alläpa utishqanam kayarqä. Manam ima rurëtapis puëdirqänatsu. Tsënö alläpa llakishqa këkäyaptïmi congregacionkunata watukaq, Neville Bromwich wawqi watukayämarqan. Y waqurkayämarmi (makallarkayämarmi) waqarirqan y noqakunapis waqariyarqämi. Kuyakïwan shumaq parlapäyämanqanmi alläpa shoqayämarqan. Pullan paqas pasënam ëwakurqan. Y tsëllanam wamräkuna wanukurqan. Wamräkunata oqrayanqämi mas llakikïpaq desgracia kashqa. Peru Daniel Jehoväta kuyanqantaqa ni imapis, ni wanïpis mana rakinampaq kaqman confiakurmi alleq tsarakuyarqö (Rom. 8:38, 39). ¡Alläpam munëkuyä kawarimuptin yapë juntu këta! (Juan 5:28, 29).

Ishkë kutipa derrämi cerebral qomashqa kaptimpis, congregacionnïchöqa anciänunö yanapakurninmi sïguikä. Llapan pasanqäkunam yanapamashqa wakinkuna y masqa problëmakunapa pasëkaqkunata imanö sientikuyanqanta entiendinäpaq. Manam rurayanqankunapita juzgätsu. Tsëpa rantinqa, imapa pasayanqankunapita imanö sientikuyanqanta entienditam procurä. Jina kënömi tapukü: “¿Imanöraq kuyanqäta rikätsïman? ¿Imanötaq yanapäman Jehoväta cäsukur sïguiyänampaq?”. Cristiänu mayïkunata animanäpaq watukanqäqa noqatapis alläpam yanapaman y animaman.

Salmusta qellqaqmi kënö nirqan: “Imëka yarpachakïkuna alläpa llakitsimaptinmi, qamqa kuyakïwan shumaq shoqamarqëki” (Sal. 94:19). Kë textu ninqannömi Jehoväqa alläpa cuidamashqa. Teytäkuna rakikäkuriyaptin, Jehoväta sirwinäta michäkuyaptin, mana pensashpa problëmaman mëtikurinqäpita llakikuptï y familiächö desgracia pasaptimpis, Jehoväqa alläpa kuyakoq teytanömi imëpis noqawan këkashqa.