“¡YAMËLLAKU! ¿Imanötaq këkanki?”.

Atska kutichi tsënö nirnin saludakurquntsik. Höraqa waqurkurnin o makipita chachaq tsarirkurninchi saludakurquntsik. Cada nacionpa costumbrinkuna y imata nir saludakuyanqan jukläya jukläya kaptimpis, saludakïqa alläpam yanapakun. Peru mana saludakur o saludamanqantsikta mana contestarqa, mana respetakoq kanqantsiktam rikätsikushwan.

Manam llapankunapaqtsu saludakïqa fäcil, wakinkunaqa penqakuyanmi saludakïta. Wakinkunanam juk kasta, juk costumbriyoq y rïcu nunakunataqa saludëta mantsayan. Peru saludakurnin ichikllapis parlapärinqantsikqa alläpam yanapakun.

Tsëmi kënö tapukunantsik: “¿Wakinkunata saludanqantsikqa yanapakuntsuraq? ¿Imatataq Diospa Palabranqa saludakïpaq nin?”.

Corneliuta Diospa markanman chaskirninmi apostol Pëdruqa nirqan, “Diosqa llapantapis igualpa rikanqanta”. Tsëtaqa nirqan Corneliu mana judïu kaptinmi (Hëch. 10:34). Tsëpitanam, Diosqa ‘llapankuna arrepentikuyänanta munanqanta’ nirqan (2 Pëd. 3:9). Itsapis kë textukunaqa Bibliapita yachakïkaq nunakunapaq parlëkanqanta pensashwan. Peru Pëdruqa cristiänu mayinkunatapis kënömi nirqan: “Tukïläya nunakunata precisaqpaq churar respetayë, llapan creikoq mayikunata kuyayë” (1 Pëd. 2:17). Tsëqa, ¿manatsuraq llapan nunakunata saludëqa alläpa alli kanman? Awmi. Mëpita kayaptin, ima kastapita kayaptin o ima costumbriyoq kayaptimpis saludakurninqa, wakinkunata respetanqantsikta y kuyanqantsiktam rikätsikuntsik.

Jina apostol Pablupis, cristiänu mayinkunatam kënö nirqan: “Jukniki juknikikuna kushishqa chaskinakuyë, qamkunata Cristu kushishqa chaskiyäshunqëkinölla” (Rom. 15:7). Pablutaqa creikoq mayinkuna alläpam yanapayarqan, tsëmi pëkunapaq shumaq parlarqan. Y kanan witsannäqa, masran precisan cristiänu mayintsikkunata yanapanantsik, porqui Satanasmi imëkanöpa Diospa markanta ushakätsita tïrëkan (Col. 4:11; Rev. 12:12, 17).

Saludakïqa pitapis chaskinallapaq mana kanqantam Bibliaqa rikätsimantsik. Imakunachö mas yanapakunqanta rikärishun.

Marïa qeshyaq manaraq tikraptinmi, Jehoväqa juk angelta mandarqan Marïawan parlanampaq. Angelqa kënömi nirqan: “Yamëllaku, Diospa rikëninchö alläpa alli këkaq, Jehovämi qamwan këkan”. Marïaqa manam entiendirqantsu pëwan imanir angel parlëkanqanta, tsëmi alläpa mantsakarqan. Imanö sientikunqanta cuentata qokurirmi angelqa kënö nirqan: “Ama mantsakëtsu Marïa, porqui Diospa rikëninchömi alli këkanki”. Tsëpitanam angelqa nirirqan, Tsurimpa maman kananta Jehovä munanqanta. Tsënö niptinmi Marïaqa mas allina sientikurqan, y kënömi nirqan: “¡Rikë! ¡Noqaqa Jehoväpa sirweqninmi kallä! Qam ninqëkinölla noqachö pasakutsun” (Lüc. 1:26-38).

Kë angelqa alläpam kushikurqan Jehoväpa willakoqnin karnin. Y manam pensarqantsu juk jutsasapawan parlëqa mana allichö quedatsinqanta, tsëmi puntataqa Marïata shumaq saludarirqan. Tsë angel ruranqampitaqa yachakuntsik, wakinkunata saludanapaq y yanapanapaq listu këkänantsikpaq kaqtam. Alläpa mana parlarnimpis, cristiänu mayintsikkunataqa yanapanantsik y precisaqpaqmi churanantsik.

Asia Menorchö y Euröpachö këkaq congregacionkunapita, mëtsikaq cristiänukunatam Pabluqa reqirqan. Qellqanqan cartankunachöqa, jutipam wakinkunata saludarqan. Tsënö ruranqantam Romänus librupa 16 kaq capïtulunchö rikantsik. Tsëchöqa, Fëbi cristiänatam “panintsik” nirnin qayan y pëta kushishqa  chaskiyänampaq y llapan wananqanchö yanapayänampaqmi wakin cristiänukunata mandarqan. Jina Pabluqa kënöpis nirqanmi: “Priscata y Äquilata saludëkuyanki, [...] pëkunataqa manam noqallatsu agradecikü, sinöqa juk nacionkuna kaq llapan creikoqkunam agradecikuyan”. Jinamampis, alläpa mana reqishqa cristiänukunapaqmi parlarqan. Epënetu wawqipaqqa kuyëllapam parlarqan, y Trifëna y Trifösa panikunatapis empëñu empëñu Diospaq trabajayaptinmi saludarqan. Awmi, Pabluqa cristiänu mayinkunata saludëtaqa manam qonqarqantsu (Rom. 16:1-16).

Kuyëllapa Pablu saludanqampitaqa, cristiänu mayinkunaqa alläpachi kushikuyarqan. Tsë cristiänukunaqa, tsënö kuyakoq kaptinchi Pabluta y wakin cristiänukunatapis masraq kuyayarqan. Jinamampis, tsënö kuyakïllapa saludakunqanta wiyaq cristiänukunatapis markäkïninkunachö alli tsarakuyänampaqchi yanaparqan. Jina tsënöllam kuyakïllapa saludashqa y rurayanqampita shonqupita patsë felicitashqaqa, cristiänu mayintsikkunawan juknölla y mas amïgu kashun.

Puteöli puertuman Pablu chärir Römaman ëwëkaptinmi, tsë kinrëchö këkaq cristiänukuna ëwayarqan pëwan topayänampaq. Pëkunata rikëkurmi Pabluqa “Diosta agradecikurirqan, y mas kallpata tsarirqan” (Hëch. 28:13-15). Höraqa noqantsikpis, cristiänu mayintsikkunata kushi kushi rikärillata o karullapita saludaritam puëdintsik, peru tsënölla ruranqantsikpis alläpam wakinkunata yanaparinman y masqa llakishqa këkaqkunata.

Kananqa Santiägu ruranqanta rikärishun. Pëqa, wakin cristiänukuna mana allikunata rurayashqa kaptinmi corregirqan (Santiägu 4:4). Peru ¿imanötaq tsëta rurarqan? Rikärishun.

Kënö nirmi qellqar qallarqan: “Santiägupita, Diospa y Señor Jesucristupa sirweqnimpita, më tsëchö ramakashqa këkaq chunka ishkë kastakunapaq: ¡Salüdüta chaskiyë!” (Sant. 1:1). Tsënö saludakunqanqa, consejanqanta tsë cristiänukuna shumaq chaskikuyänampaqmi yanapakurqan, porqui Santiäguqa manam pëkunapita mas precisaq kanqantatsu rikätsikurqan. Awmi, respëtuwan saludakushqaqa consejashqapis shumaqmi chaskikuyanqa.

Ichiklla saludanqantsikta cuentata mana qokuyaptimpis, kuyakïwan saludakunqantsikqa alläpam yanapakun (Mat. 22:39). Juk kutim, Irlanda nacionchö täraq juk pani reunion qallarinampaq këkaptinna chärirqan. Tsëmi raslla yëkurëkaptin, juk wawqi tumëkurnin kushishqalla kënö nirqan: “¡Yamëllaku! Alläpam kushikü chäramunqëkipita”. Paniqa, mana imatapis nirmi täkurirqan.

Tsëpita juk ishkë semänakuna pasariptinnam, tsë paniqa wawqita willarqan tsë junaqkuna familianchö mana allikunapa pasëkanqanta. Tsëpitanam kënö nirqan: “Alläpa llakishqa sientikurmi, reunionman tsë tardi shamïta munarqätsu. Manam tsë reunionchö imapita yachatsikayämunqantaqa alläpaqa yarpätsu, peru imanö saludamanqëkitaqa manam qonqätsu. Alläpam agradecikü tsënö saludamanqëkipita”.

Tsë wawqiqa manam ichikllapis pensarqantsu tsënö saludakunqanqa alläpa yanapashqa kanqanta. Pëmi kënö willakun: “Tsënö saludarinqä alläpa yanapashqa kanqanta willaramaptinqa, alläpam kushikurqä”.

Rey Salomonmi kënö nirqan: “Yakuman tantëkita jitarkï, porqui tiempu pasariptinqa yapëmi taririnki” (Ecl. 11:1). Wakinkunata y masqa cristiänu mayintsikkunata saludashqaqa, pëkunata y noqantsiktapis alläpam yanapamäshun. Awmi, ¡saludakïqa alläpam yanapakun!