1. Colosensis 2:4, 8 textu ninqannö, ¿imanötaq Satanasqa engañamënintsikta munan?

SATANASQA Jehoväta sirwita jaqinatam munan, y tsëpaqqa pë pensanqannö pensanantsikta munarmi imëkata ruran. Y engañamänapaqqa imatapis munanqantsikkunatam utilizan (leyi Colosensis 2:4, 8).

2, 3. (1) ¿Imanirtaq Colosensis 2:8 textu ninqanta cäsukunantsik? (2) ¿Imatataq kë yachatsikïchö yachakushun?

² Satanaspa engäñunkunaqa alläpa mana allimanmi chätsikun. Tsëmi apostol Pabluqa, Colosensis 2:8 textuchö ciëlupaq akrashqa cristiänukunata cuidakuyänampaq consejarqan (Col. 1:2, 5). Tsë tiempuchö cristiänukunaqa peligruchömi këkäyarqan y noqantsikpis mas peligruchömi këkantsik (1 Cor. 10:12). Porqui kë patsamanmi Satanasqa ciëlupita qarpushqa kashqa, tsëmi Diospa llapan sirweqninkunata engañëkan (Rev. 12:9, 12, 17). Jinamampis ‘mana alli y engañakoq nunakunam mana allipita mas mana alliman’ chëkäyan (2 Tim. 3:1, 13).

³ Kë yachatsikïchömi yachakushun, “mana imapaqpis sirweq engäñukunawan” pensënintsikta Satanas cambiëta imanö munanqanta. Tsëmi puntataqa rikärishun, Satanas imanö engañamënintsikta munanqanta (Efes. 6:11). Qateqnin kaq yachatsikïchönam yachakushun Satanas munanqannö mana pensanapaq imata ruranapaq kaqta. Puntataqa rikärishun, Dios Änikunqan Patsaman yëkuriyaptin israelïtakunata Satanas imanö engañanqanta y tsëpita imata yachakunqantsikta.

4-6. Deuteronomiu 11:10-15 textu ninqannö, israelïtakunaqa Dios Änikunqan Patsaman yëkurirqa, ¿imanö murukïtataq yachakuyänan karqan?

⁴ Satanasqa yachëllapam israelïtakunata ïdulukuna adorëman ishkitsirqan. Y musyarqanmi israelïtakuna mikïta wanayanqanta y tsëtam utilizarqan. Porqui Egiptuchöqa Nïlu mayupita yakuwanmi murukuyaq. Peru Dios Änikunqan Patsachöqa manam mayu karqantsu, tsëmi israelïtakunaqa tamya witsanlla murukuyänan karqan (leyi Deuteronomiu 11:10-15 *; Is. 18:4, 5). Tsëchöqa juknöpanam murukïta yachakuyänan karqan. Y manam fäciltsu kanan karqan, porqui chakrachö trabajëta yachaqkunaqa wanukushqanam kayarqan.

⁵ Jehoväqa israelïtakunata musyatsishqanam karqan yëkuyänampaq patsachöqa juknöpana muruyänampaq kaqta. Tsëpitanam kënö consejarqan: “Shonqïkikuna mana alliman mana ishkinampaq cuidakuyë, paqtataq juk dioskunata adorar  qallëkuyankiman” (Deut. 11:16, 17). ¿Imanirtaq chakrachö juknöpana muruyänampaq nikarqa, mana alli dioskunata mana adorayänampaq consejarqan?

⁶ Jehoväqa musyarqanmi israelïtakuna pëta mana sirweq nunakunapita imanö murïta yachakïta munayänampaq kaqta. Porqui Canaan nacionchö nunakunaqa israelïtakunapitapis masmi chakrachö murukïta yachayaq. Peru pëkunapita yachakïqa alläpa mana alli rurëkunamanmi israelïtakunata chätsinman karqan. Porqui cananëu nunakunaqa Baaltam adorayaq y tsë diosninkuna tamyatsimunqantam creiyaq. Tsëmi Jehoväqa munarqantsu tsë mana alli creenciankunawan israelïtakunata engañayänanta. Peru israelïtakunaqa Baalta adorëtam decidiyarqan (Nüm. 25:3, 5; Juëc. 2:13; 1 Rey. 18:18). ¿Imanötaq Satanasqa israelïtakunata mana alliman ishkitsirqan? Rikärishun.

7. Dios Änikunqan Patsachöqa, ¿ima pruëbapataq israelïtakuna pasayarqan?

⁷ Punta kaq. Murukuyänampaq tamyata wanayanqantam Satanasqa utilizarqan. Dios Änikunqan Patsachöqa, abrilpita hasta septiembriyaqqa manam alläpatsu tamyaq. Peru mas alli cosëchaqa yarqoq octubri killachö tamya qallaptinraqmi. Tsëmi tsë nacionkunachö nunakunaqa pensayaq, tamyanampaqqa diosninkunapaq ofrendataraq rurayänan precisanqanta. Y Satanasqa israelïtakunatam creitsirqa alli kawakïta munarqa tsë mana alli costumbrikunata rurayänan precisanqanta. Jehoväman mana confiakoq israelïtakunaqa creiyarqanmi Baalta ofrendata rurayaptinqa tamyamunampaq kaqta. Tsëmi tsë mana alli diospaq ofrendata rurar qallëkuyarqan.

8. ¿Imanö mastaq Satanasqa israelïtakunata ishkitsirqan? Willakaramï.

⁸ Ishkë kaq. Warmiwan ollqu oqllanakï munëtam Satanasqa utilizarqan israelïtakunata ishkitsinampaq. Tsë nacionkunachö nunakunaqa, diosninkunata adorayanqanchöqa, lluta oqllanakurmi kakuyaq. Y templunkunachömi ollqupis warmipis qellëpaq lluta oqllanakur kakuyaq. Jina ollqupura kakuyänantapis allitanömi rikäyaq (Deut. 23:17, 18; 1 Rey. 14:24). Tsëkunata rurayaptinraq chakrankunata diosninkuna mas wayutsinampaq kaqtam pensayaq. Mëtsikaq israelïtakunam tsë melanëpaq oqllanakï rurëkunaman ishkiyarqan y tsë dioskunata adorar qallëkuyarqan. Tsëta rurarqa Satanas engañanantam permitiyarqan.

9. Osëas 2:16, 17 textu ninqannö, ¿imanötaq Satanasqa lograrqan israelïtakuna Jehoväpa jutinta qonqayänanta?

⁹ Kima kaq. Satanasqa Diospa jutintam israelïtakunata qonqaratsirqan. Profëta Jeremïas kawanqan witsanmi Jehoväqa nishqana karqan, jutinta Baalpa jutinwan mana alli profëtakuna israelïtakunata qonqatsiyänampaq kaqta (Jer. 23:27). Itsa israelïtakunaqa Diospa jutinta utilizäyänampa rantin Baalpa jutinta utilizar qallëkuyarqan. Baal jutiqa “duëñun” o “patronnin” ninanmi. Israelïtakunaqa Jehoväwan Baal igual-lla kayanqantam pensar qallëkuyarqan. Tsëmi Baalta adorarnin rurayanqan costumbrikunawan Jehoväta adorar qallëkuyarqan (leyi Osëas 2:16, 17 *).

10. ¿Imanötaq Satanasqa kanan witsan engañakun?

¹⁰ Unë witsanchö nunakunata engañanqannöllam Satanasqa kanampis engañakun.  Nunakuna wanayanqankunata y jukwan jukwan oqllanakï munëninkunatam utilizan. Jinamampis Diospa jutinta nunakuna manana utilizäyänanta munarmi nunakunata engañan. Rikärishun.

11. ¿Imatataq Satanasqa rurashqa Jehoväta mana reqiyänampaq?

¹¹ Satanasqa munan nunakuna Diosta mana reqiyänantam. Jesuspa apostolninkuna wanuriyaptinmi, cristiänu tukoqkunaqa Diospita mana alli yachatsikïkunata yachatsikur qallëkuyarqan (Hëch. 20:29, 30; 2 Tes. 2:3). Diospa contran churakashqa cristiänu tukoqkunaqa, Diospa jutintam Bibliapita jorqayarqan y “Señor” nirllana churayarqan. Tsëmi Bibliata leyeqkunaqa musyëta puëdiyarqannatsu Jehovä pï kanqanta (1 Cor. 8:5). Jinamampis Jehoväta y Jesustaqa “Señor” nirllanam qayar qallëkuyarqan. Tsëmi Dioswan Tsurin Jesus jukläya kayanqanqa clärunatsu rikakarqan (Juan 17:3). Y kima Dios jukllëllachö kanqan yachatsikïmi yurirqan, tsëtam trinidad nishpa reqiyan. Peru Bibliaqa manam tsëta yachatsikuntsu. Tsëmi kananqa mëtsikaq nunakuna pensayan Diosta reqita mana puëdinqantsikta. ¡Tsëqa manam rasumpatsu! (Hëch. 17:27).

12. (1) Mana alli religionkunaqa, ¿ima mana alli rurëkunatataq permitiyan? (2) Romänus 1:28-31 textu ninqannöpis, ¿imamantaq nunakunata chätsishqa?

¹² Warmiwan ollqu oqllanakï munëtam Satanasqa utilizan. Israelïtakuna kawayanqan witsanchöqa, nunakuna lluta oqllanakur kakuyänampaqmi, Satanasqa mana alli religionkunata utilizarqan. Jina kanampis mana alli religionkunatam utilizan nunakuna jukwan jukwan oqllanakur kakuyänampaq. Y tsë mana alli rurëkunatam allitanö rikätsikuyan. “Diostam sirwï” nikarpis, Dios mandakunqankunatam mana kaqpaq churayan. Tsëtam apostol Pabluqa Römachö cristiänu mayinkunaman cartakunqanchö willakurqan (leyi Romänus 1:28-31). Dios chikinqan rurëkunaqa kayan, jukwan jukwan oqllanakï, ollqupura y warmipura oqllanakïmi (Rom. 1:24-27, 32; Rev. 2:20). Tsëmi noqantsikqa, Biblia yachatsikunqankunata cäsukunantsik.

13. ¿Imanö mastaq Satanasqa engañakun?

¹³ Wananqantsikkunatam Satanasqa utilizan engañamänapaq. Llapantsikpis  familiantsik alli kawayänanta munarmi, ima rurëllatapis yachakïta munantsik (1 Tim. 5:8). Tsëmi escuëlaman ëwarqa alli yachakïta procurantsik. Wakin nacionkunachöqa imata rurarllapis kawakuyänampaqmi escuëlakunachö wamrakunata yachatsiyan, peru tsënö kaptimpis höraqa nunakunapa pensëninkunatam yachatsikuyan. Y tsë yachatsikïninkunaqa kayan: Dios mana kanqan y Biblia imapaqpis mana yanapakunqan yachatsikïkunam. Jina yachatsikuyanmi imëkapis kikinlla yurishqa kanqan yachatsikïta (Rom. 1:21-23). Tsëkunaqa Dios yachatsikunqampa contranmi këkan (1 Cor. 1:19-21; 3:18-20).

14. ¿Nunakuna yachatsikuyanqanqa imanö kayänampaqtaq nunakunata animan?

¹⁴ Nunakunaqa Jehovä yachatsikunqankunatam mana kaqpaq churayan. Tsëpa rantinqa munëninkunata rurayänampaqmi wakinkunata animayan (Gäl. 5:19-23). Tsëmi nunakunaqa kikinkunallaman mas yarparäkuyan y wakimpitapis mas alli kayanqanta pensayan (2 Tim. 3:2-4). Peru Jehoväqa munan nunakuna humildi y yachanëpaq kayänantam (2 Sam. 22:28). ¿Imataq pasakushqa universidäman ëwashqa wakin cristiänukunawan? Diosta mana sirweq nunakuna pensayanqannömi pensar qallëkuyashqa. Juk cäsuta rikärishun.

15, 16. ¿Imatataq yachakuntsik juk panita pasanqampita?

¹⁵ Llapan tiempunwan 15 watapana Jehoväta sirweq juk panim kënö nin: “Noqaqa publicacionkunachö y discursukunachöpis wiyashqam karqä universidächö estudië mana alliman chätsikunqanta, tsënö kaptimpis manam cäsukurqätsu y universidächömi estudiar qallëkurqä. Porqui tsë consëjukuna noqapaq mana kanqantam pensarqä.  Peru universidächö alläpa estudiarninmi Diosman mañakunäpaqpis tiempü karqannatsu; jina Diospita yachatsikurnimpis alläpa utishqa karninmi kushishqanatsu sientikoq kä, y reunionkunapaqpis mananam preparakoqnatsu kä. Cuentatam qokurirqä estudiükunawan mas ocupäda karnin, Jehoväwan amïgu manana kanqäta. Tsëmi universidächö manana estudianäpaq decidirirqä”.

¹⁶ ¿Imanötaq kananqa kë panintsik sientikun universidächö estudianqampita? Kënömi willakun: “Alläpam penqakü universidäman ëwanqäpita, porqui tsëchöqa wakinkuna rurayanqanta mana allipa rikëta y masqa cristiänu mayintsikkuna rurayanqankunatam mana allipa rikar qallëkurqä. Tsëmi pëkunapita karupäkurirqä. Imanö pensanqäta cambianäpaqqa manam fäciltsu kashqa. Kë pasamanqanmi yachatsimashqa markanwan Jehovä consejamanqantsikkunata mana cäsukïqa, mana alliman chätsikunqanta. Y Pë consejamanqanta cäsukurninqa manachi problëmakunapa pasämantsu karqan. Porqui Jehovämi musyan noqantsikpaq ima mas alli kanqanta”.

17. (1) ¿Imata ruranapaqtaq decidïdu këkänantsik? (2) ¿Imatataq qateqnin kaq yachatsikïchö yachakushun?

¹⁷ Ama imanöpapis permitishuntsu Satanaspa makinchö këkaq nunakuna pensëninkunawan engañamänata y tsëkunapita alleq cuidakushun (1 Cor. 3:18; 2 Cor. 2:11). Jina Jehovä pï kanqanta y imanö sirwinantsikta munanqanta, Satanas qonqatsimänata permitishuntsu. Tsëpa rantinqa, Jehovä mandamanqantsikkunata y consëjunkunata cäsukushun y ama permitishuntsu Satanas michämänata. Satanaspa makinchö këkaq nunakunanö pensëkanqantsikta cuentata qokurirqa, ¿imatataq ruranantsik? Qateqnin kaq yachatsikïchömi yachakushun, nunakunanö mana pensanapaq Diospa Palabran imanö yanapamänapaq kaqta (2 Cor. 10:4, 5).