LLAPANTSIKMI musyantsik kë “ushanan junaqkunachöqa” sirweqninkunata Jehovä yanapëkanqanta (2 Tim. 3:1). Tsëmi nimanqantsikkunata cäsukunantsik. Unë witsan tsunyaq sitiuchö israelïtakuna kayanqannöllam noqantsikpis kanan witsan kawakuykantsik. Pëkunaqa, cornëtata jukläya juklayä tocayaptinmi alkäbulla këkäyänan karqan imatapis rurayänampaq.

Jehovämi Moisesta kënö nirqan: “Martilluwan tsaktëpa qellëpita ishkë cornëtakunata ruratsinki. Tsë cornëtakunata tocatsinki nunakuna ëllukäyänanpaq y ëwayänanpaq” (Nüm. 10:2). Israelïtakuna imata rurayänampaq kaqta musyayänampaqmi jukläya jukläya cornëtata tocayaq (Nüm. 10:3-8). Kanan witsampis, Teyta Diosta sirweqkunaqa jukläya jukläya cornëta tocaqtam wiyantsik. Rikärishun unë witsan cornëta tocaqnö igualatsikuykunata: asamblëakunaman ëwanapaq, creikoqkunata rikaq wawqikunata mas yachatsiyänampaq y imatapis imanö ruranapaq yachatsimashqa.

“Llapan nunakuna” juntakäyänanta Jehovä munaptinmi, ishkan cornëtakunata tocayaq (Nüm. 10:3). Tsënam toldu jiruroqninchö këkaq kastakunaqa cornëta waqaqta cläru wiyayaq. Tsëchi Diospa wayin amänunchö këkaq israelïtakunaqa raslla ëwayaq. Peru mas karuchö kaqkunaqa mas unëtaran chäyaq. Imanö kaptimpis Jehoväqa llapankuna juntakëkur yachatsikunqanta wiyayänantam munaq.

Kanan witsampis unë witsannöllam Jehoväqa yachatsimantsik. Peru manam unënötsu Diospa wayinmanqa ëwantsik, sinöqa imëkata yachakunapaqmi asamblëakunaman ëwantsik. Y tsë asamblëakunaqa entëru Patsachömi rurakan y tsëman chäyänampaqqa wakinkunaqa karutaraqmi ëwayan. Tsënö kaptimpis, asamblëakunachö yachakuyanqampitaqa kushikuyanmi.

Peru asamblëakunata rurayanqampita karu markächö täraqkunaqa, ¿imanötan yachakuyan? Pëkunaqa wakinkunanö kaqllam, Jehovä yanapaptin Internetpa rikarnin kushikuyan. Tsënöllam karqan  Benin sucursalman betelpita shamoq wawqi yachatsikuptin, tsë yachatsikunqantaqa Niger nacionpa uchukllan Arlit markanchömi 21 wawqi panikuna y juk nunakunapis wiyayarqan. 44.131 wawqi panikunawan mana juntu karnimpis, pëkunawan këkaqnömi sientikuyarqan. Tsëpaq willakurmi juk wawqi kënö qellqarqan: “Tsë reunionta Internetpa pasatsiyämunqëkipitaqa alläpam agradecikuyä. Tsëmi rikätsiyämashqa rasumpa kuyayämanqëkita”.

Juk kaq cornëtata tocayaptinqa “cada trïbupa mandakuqninkunallam shayämunqa” Diospa wayinman (Nüm. 10:4). Tsëchömi Moisesqa llapankunata yachatsirqan imanö dirigiyänampaq kaqta. Tsë mandakoqkunanö tsë reunionchö karninqa, yachatsikuyanqantaqa shumaqchi wiyakushwan karqan.

Kanan witsanqa creikoqkunata rikaqkunaqa, manam ‘patron tukurtsu’ creikoqkunata mandëkachäyan (1 Pëd. 5:1-3). Tsëpa rantinqa kuyarmi wawqi panikunata yanapayan. Tsëmi pëkunaqa juk junaq kaq escuëlaman invitayatin kushishqa yachakoq ëwayan. Tsëchömi yachakuyan wakin wawqi panikunata imanö yanapayänampaq kaqta. Y tsë escuëlaman mana ëwashqa karnimpis, creikoqkunata rikaq wawqikuna yachatsikayämuptinmi Jehoväpita mas yachakushun.

Kutin kutin cornëtata tocayaptinqa, israelïtakunaqa musyayaqnam ëwakuyänampaq kaqta (Nüm. 10:5, 6). Y llapan cösasninkunata ëllurkur ëwakuyqa, manam llapankunapaqtsu fäcil kaq. ¿Imanir?

Wakinkunaqa, illaqpita cornëtata pükayanqantam pensayaq. Tsëpaq parlarmi Bibliachöqa nin, “höraqa juk paqaslla” pukutë karinqanta y hörana ‘ishkë junaq o juk killaraq’ pukutë kakunqanta (Nüm. 9:21, 22). Nümerus librupa 33 kaq capïtulunmi willakun, 40 kuti israelïtakuna tukuy sitiukunaman ëwayanqanta.

Itsachi wakin israelïtakunaqa shumaq sitiukunata tariyaq “mantsanëpaq chusyaq” jirkakunachöpis (Deut. 1:19). Tsëchi wakinkunaqa ëwakuytaqa munayaqtsu.

Kutin kutin cornëtata tocayaptinqa llapan israelïtakunam wiyayaq, peru manam llapantsu tsë höra ëwar qallëkuyaq. Tsëchi wakin israelïtakunapis raslla ëwakuyta munayaq. Tsënö kaptimpis, ishkë kima cornëtata tocayanqanqa inti yarqamunan lädupita, Judä kasta, Isacar kasta y Zabulon kasta yarquyänampaqmi musyatsikoq (Nüm. 2:3-7; 10:5, 6). Y tsë kastakuna eqariyaptinnam yapë cornëtata tocayaq. Tsënam ura läduchö kiman kastakuna yarquyänampaq musyatsikoq. Y tsënöllam rurayaq llapankuna yarquyanqanyaq.

Jehoväpa markanchöqa unëpitam cambiukuna kashqa. Unë imanö rurayanqanwan yachakashqa karmi, kanan witsan cambiukunawan yachakëqa fäciltsu kanman. Tsënö kaptinmi höraqa qelanärishwan. Peru allipaq tsë cambiukuna kanqanta rikarqa, Jehovä bendicikämanqantsiktam rikäshun.

Moises kawanqan witsanmi tsunyaq sitiukunapa Jehoväqa pusharqan mëtsikaq nunakunata, warmikunata y wamrakunata. Y tsënö Jehovä mana yanapaptinqa, tsë nunakunaqa wanuyanmanchi karqan. Kanan witsampis, israelïtakunatanöllam Jehoväqa tukuynöpa yanapëkamantsik. Tsëmi noqantsikqa israelïtakunanölla shumaq wiyakoq y cäsukoq kanantsik.