1. Juk qelanashqa wawqita o panitaqa, ¿imanötan Jehovä chaskin?

JEHOVÄQA juk alli mitsikoqwan igual karmi oqrakashqa üshankunata kuyarnin ashin. Tsënö kanqantaqa musyantsik israelïtakunata kënö ninqanchömi: “Noqaman kutiyämuptikiqa yapëmi yanapayashqëki”. Y kanan witsampis Jehoväqa unë kanqannöllam rurëkan (Mal. 3:6, 7). Juk qelanashqa wawqi o pani Jehoväman kutiptinqa, pë y angelkuna kushikuyanqantam Jesus willakurqan (Lüc. 15:10, 32).

2. ¿Imapitatan yachakushun?

² Kima igualatsikuykunapita Jesus parlanqampitam yachakushun. Tsëchömi rikäshun Jehoväpita karupakashqa wawqi panikunata yanapanapaq. Y Jehoväman kutiyänampaq imanö yanapanapaqmi yachakushun.

3, 4. Lücas 15:8-10 willakoq igualatsikuychö warmiqa, ¿imanirtan qellëninta tarinampaq kallpachakurqan?

³ Jehoväman kutita munaq wawqi panikunata ashinapaqqa alliran kallpachakunantsik. Juk warmi dracma qellëninta oqrëkur ashinqampaqmi, Jesusqa juk igualatsikuychö parlarqan. Jesus parlanqan igualatsikuyqa yachatsimantsik tsë warmi kallpachakunqampaqmi (leyi Lücas 15:8-10).

⁴ Jesus kawanqan witsanqa, warmikuna casakuyaptinqa mamankunam chunka dracma qellëta qarayaq. Jesus parlanqan igualatsikuychöqa, juk dracma qellëninta oqrëkurchi tsë warmiqa chiwchinta sendirkur ashirqan. Mana tarïkurnachi wayinta pitsëkur tarinqanyaq ashin. Tsënö rurëkarmi qellëninta tarïkur  tsë warmiqa kushikun. Tsënam yanasankunata y vecïnankunata qayëkatsir oqranqan dracma qellënin tarinqanta kushishqa willan.

5. Qelanashqa wawqi panikunata ashiqa, ¿fäcilku?

⁵ Jesus parlanqan igualatsikuychömi yachakuntsik imatapis tarita munarqa alliraq kallpachakunapaq. Tsënömi Jehoväpita karupakashqakunata tarinapaqpis kallpachakunantsik. Juk markata ëwakuyaptinmi wakin qelanashqa wawqi panikunata yanapëqa fäciltsu. Tsënö kaptimpis, wakin qelanashqa wawqi panikunaqa Jehovämanmi kutita munëkäyan. Tsëmi noqantsikqa imëkanöpa yanapakunantsik.

6. Qelanashqa wawqi panikunataqa, ¿imanötan llapantsik yanapashwan?

⁶ ¿Pikunatan qelanashqa wawqi panikunata ashiyanman? Llapantsik Jehoväta sirweqkunam. Noqantsikpaqa, ¿kanku qelanashqa amïguntsik y familiantsik? Teyta Diospita yachatsikur purinqantsikchöqa, ¿qelanashqa wawqi paniwan tarinakushqantsikku? Qelanashqa wawqi panintsikkuna Jehoväman kutita munayaptinqa, creikoqkunata rikaq wawqikunatam willanantsik.

7. Creikoqkunata rikaq wawqi Thomas willakunqampitaqa, ¿imatatan yachakuntsik?

⁷ Creikoqkunata rikaq wawqikunaqa, ¿imanötan Jehoväpita karupakashqa wawqi panikunata yanapayanman? Tsëtaqa Espäña nacionpita wawqi Thomas * willakunqampitam yachakuyta puëdintsik. Pëqa Jehoväta yapë sirwiyänampaqmi, 40 wawqi panikunapitapis masta yanapashqa. Pëmi kënö willakun: “Wawqi panikunawan parlarqa, Jehoväpita karupakashqa kaqkuna mëchö täräyanqantam musyapakü. Tsënö tapukuptïmi pëkunaqa kushishqa mëchö täräyanqanta willarayäman. Jehoväpita karupakashqa wawqi panikunawan parlarqa wamrankunapaq y familiampaqmi tapurï. Tsënöqa rurä wakin wawqi panikuna reunionkunaman wamrankunawan ëwashqa kayaptinmi”.

8. Lücas 15:17-24 ninqannö, ¿imanötan wayiman kuteq wamrata teytan chaskirqan?

⁸ Jehoväpita karupakashqa wawqi panikuna kutiyämunampaqqa, ¿imanötan yanapakushwan? Tsëpaqqa oqrakashqa wamrapaq igualatsikuyta rikärishun (leyi Lücas 15:17-24). Jesus willakunqan igualatsikuychö wamraqa mana alli ruranqampita llakikurmi wayinman kutin. Tsënam teytanqa ëqipa ëwarnin waqukurkur kuyëllapa mutsëkurqan. Tsë wamraqa llakishqa karmi, “manam tsurikitanö reqiyämänampaqnönatsu kä” nirqan. Tsënö tsurin niptinnam, teytanqa mas allin kaq röpawan vistitsiyänampaq mandakurqan. Tsënömi kë teytaqa kuyanqanta rikätsikur wamranta shumaq chaskirqan.

9. ¿Imanötan wawqi panintsikkunata yanapashwan? (Rikäri “ Jehoväpita karupakashqakunata yanapashun” neqtawan).

⁹ Jesus parlanqan igualatsikuychö kuyakoq teytanömi Jehoväqa. Karupakashqa wawqi panikunata kuyarmi  pëman kutiyänanta munan. Jehovänömi noqantsikpis qelanashqa wawqi panintsikkunata yachëllapa y kuyëllapa yanapanantsik. Tsënö rurarqa wawqi panintsikkuna yanapëta puëdishunmi.

10. ¿Imanirtan pacienciawan qelanashqa wawqi panikunata yanapanantsik?

¹⁰ Qelanashqa wawqi panikuna Jehoväwan alli kayänampaqqa pacienciawanmi yanapanantsik. Jehoväpita karupakashqa wawqi panikunaqa willakuyan, creikoqkunata rikaq wawqikuna kutin kutin watukayanqan yanapashqa kanqantam. Tsënö pasanqantam pani Nancyqa kënö cuentakun: “Noqapaqa nanä cuentam juk alli yanasä kapamarqan, pëmi yanapamarqan. Jehoväta kushishqa sirwiyanqä witsantam yarpätsimaq. Y ima pasamanqanta cuentaptïqa shumaq wiyaramarmi yanapamaq”.

11. Ankupäkoq karqa, ¿imanötan qelanashqakunata yanapashun?

¹¹ Ankupäkoq këqa imëka frotacion cuentam yanapakun. Cristiänu mayinkuna mana alli tratashqa kayaptinmi, wakin wawqi panikunaqa qelanäyashqa. Tsëmi Jehoväman kutita munayantsu. Mana alli tratayanqanman yarparäkurmi shumaq wiyarnin yanapayänanta wanayan (Sant. 1:19). Tsënöpa pasaq pani Marïam kënö willakun: “Pillapis shumaq yanaparamänantam wanarqä”.

12. ¿Imanötan Jehoväqa kuyëllapa yanapakun?

¹² Bibliachömi yachakuntsik sirweqninkunata  kuyëllapa Jehovä tratanqanta. Tsëpaqqa juk qochaman jeqakurkur mana yarquyta puëdinqëkiman pensari. Tsë qochapita yarquytaqa puëdinki pillapis waskawan jorqamushuptikiran. Karupakashqa israelïtakunapaqmi Jehoväqa kënö nirqan: “Pëkunata alläpa kuyarmi shullpapëllapa y taqllapëllapa nöpäman pushamurqä” (Os. 11:4). Tsënöllam Teyta Diosnintsikqa kanan witsan qelanashqa wawqi panikunawampis rurëta munan. Awmi, Jehoväqa pëkunata kuyarmi, pëman kutiyänanta munan.

13. Wawqi Pabluta pasanqanqa, ¿imanötan yanapamantsik qelanashqakunata kuyëllapa yanapanapaq?

¹³ Qelanashqa wawqi panikunataqa Jehovä y noqantsik kuyanqantsiktam musyatsinantsik. 30 watapa Jehoväpita karupakashqa wawqi Pablum kënö willakun: “Juk junaq wayïpita yarquykaptïmi, juk edäna pani kuyëllapa y shumaq parlapämarqan. Tsë höram wamranö waqar qallëkurqä. Tsë panita Jehovä mandamushqa kanqanta musyarmi, pëman kutirqä”.

14. Lücas 15:4, 5 ninqannö, ¿imatatan juk alli mitsikoqqa ruran üshanta tarïkur?

¹⁴ Jehoväpita karupakashqakuna kutiyämuptinqa kuyëllapam yanapanantsik. Tsënöqa ruranantsik Jesus cuentakunqan igualatsikuychö oqrakashqa wamranö kayaptinmi. Tsëmi Jehoväman  markäkuyänampaq o yärakuyänampaq yanapanantsik. Oqrakashqa üshapaq cuentakunqanchömi Jesusqa nirqan, alli mitsikoqqa oqrakashqa üshanta tarïkur hombrurkur apanqanta. Tsënöqa ruran üshanta kuyarnin ashinampaq alli kallpachakushqa karmi (leyi Lücas 15:4, 5).

15. ¿Imanötan qelanashqa wawqi panikunata yanapashwan? (Rikäri “ Kutikamunëkitam Jehoväqa munan” neqtawan).

¹⁵ Jehoväman wakin kutimoqkunata yanapanapaqqa alliran kallpachakunantsik (Rom. 15:1). Tsëta ruranapaqqa Jehovämi kallpanwan y Palabran Bibliawan yanapamäshun. Noqantsikqa, ¿imanötan yanapakushwan? Unëna creikoqkunata rikaq wawqim kënö nin: “Cäsi llapan Jehoväman kuteqkunam Bibliapita yapë yachatsiyänanta wanayan”. * Tsëmi, creikoqkunata rikaq wawqikuna yanapakunapaq nimashqaqa, “yä” ninantsik. Creikoqkunata rikaq wawqiqa kënöpis ninmi: “Qelanashqa wawqi panikunaqa juk alli amïgu yanaparinantam wanayan”.

16. Jehoväpita karupakashqa wawqi panikunata yanapanapaqqa, ¿imanötan angelkuna yanapamantsik?

¹⁶ Jehoväman kutita munaqkunata wayinkunachö tarinapaqqa angelkunam  yanapamantsik (Rev. 14:6). Tsënö kanqantaqa musyantsik Ecuador nacionpita wawqi Silviuta pasanqanchömi. Jehoväman kutinampaq mañakur këkaptinshi ishkaq creikoqkunata rikaq wawqikuna wayinman chäriyänaq. Tsënash tsë wawqitaqa yanapar qallëkuyänaq.

17. Jehoväpita karupakashqa wawqi panikunata yanaparqa, ¿imanötan sientikushun?

¹⁷ Jehoväpita karupakashqa wawqi panikunata yanaparqa kushishqam sientikushun. Tsënö kanqantaqa rikärishun wawqi Salvador willakunqanchö. Pëmi kënö nin: “Hörataqa, Jehoväman wawqi panikuna kutimoqta rikarqa waqarïmi. Diablupa makinchö wawqi panikuna këkaqta, kikin Jehovä pëman kutiyänampaq yanapaqta rikarqa alläpam kushikü” (Hëch. 20:35).

18. Jehoväpita karupakashqa karqa, ¿imatatan yarpänëki?

¹⁸ Wawqi pani Jehoväpita karupakashqa karqa, yarpë Jehovä kuyashunqëkita y pëman kutimunëkita munanqanta. Yarpë Jesus willakunqan igualatsikuychö teytata. Tsënö kaqllam Jehoväqa pëman kutinëkipaq shuyëkäshunki.