“Prïmüwan maqanakurmi wanutsita munarnin kunkampita qapurita munarqä” (Raul).

“Wayïchö piñatsiyämaptinqa llapan tarinqätam ushakätseq kä” (Marcus).

Itsa noqantsikqa pëkunanö piñakushwantsu, tsënö kaptimpis Adan jutsata rurashqa kaptinmi geniuntsikta tsaräkuyqa fäciltsu (Rom. 5:12). Raulnö y Marcusnöllam wakinkunapaqqa geniunkunata tsarë fäciltsu. Wakinkunam oqllanakuyman, dröga shoquyman y washku upyëman mana ishkiyänampaq alliraq kallpachakuyan.

Mana alli pensënintsikta y munënintsikta alli tsaränapaqqa, ¿imaraq yanapamashwan? Tsëpaqa kima tapukuykunapita yachakurishun. Juk, ¿imatan peqata tsarëta yachëqa? Ishkë, ¿imanirtan peqantsikta tsarashwan? Y kima, ¿imaraq peqantsikta tsaränapaq yanapamashwan? (Gäl. 5:22, 23). Tsëpitam peqantsik tsarëta mana puëdirqa, ¿imata ruranapaq kaqta yachakurishun?

Geniunta tsarëta yachaqqa, Diosta kushitsita munarqa manam rasqa imatapis parlantsu ni rurantsu.

Jesusqa geniunta tsarëta yachanqantaqa rurëninwanmi rikätsikurqan. Tsëpaqmi Bibliachö kënö nin: “Ashëkäyaptimpis, manam pitapis kutitsir asharqantsu. Sufrikarpis, manam pitapis juraparqantsu, tsëpa rantinqa, alli kaqta rurar juzgaq Kaqpa makinchömi llapanta jaqirirqan” (1 Pëd. 2:23). Qeruman warkurkurmi Jesuspitaqa burlakuyarqan, peru pëqa manam imapis nirqantsu (Mat. 27:39-44). Tsënöllam Jesusqa geniun tsarëta yachanqanta rikätsikurqan, pushakoq religiösukuna ‘parlakïninchö ishkitsita’ munayaptimpis (Mat. 22:15-22). Y judïukuna piñakur rumiwan tsampita munayaptimpis, upällallam ‘templupita yarqurir’ ëwakurqan (Juan 8:57-59).

Jesuspitaqa imëkatam yachakuyta puëdintsik. Tsëpaqmi apostol Pëdru kënö qellqarqan: “Cristupis qamkunarëkurmi sufrirqan,  qamkuna pëpita yachakuyänëkipaq, tsënöpa pë ruranqankunata shumaq y alli qatiyänëkipaq” (1 Pëd. 2:21). Jutsa ruraq karnimpis Jesusnö këtaqa puëdintsikmi.

Jehoväta kushitsita munarqa geniuntsiktam tsaränantsik. Ëka watapana Jehoväta sirwikarnimpis, ninqantsikkunata y ruranqantsikkunata mana dominarqa Teyta Diosnintsikpitam karupäkurishwan.

Moisesqa, “kë patsachö pï mëpitapis alläpa alli” shonquyoqmi karqan (Nüm. 12:3). Israelïtakuna atska watapa Moisesta piñatsiyaptimpis, pëqa manam piñakurqantsu. Tsënö kaptimpis yapëmi Moisesta niyarqan yaku mana kanqanta, tsënam Moisesqa piñakurkurqan. Tsëmi piñashqa kënö nirqan: “Mana wiyakuq nunakuna, ¿manatsuraq kë qaqapita yakuta jorqayämüman upuyänëkipaq?” (Nüm. 20:2-11).

Tsë kutiqa Moisesqa manam geniun tsarëta puëdirqantsu. Qaqapita yakuta jorqunampaq Jehovä yanapëkaptimpis, kikin tsëta rurëkanqantam nirqan (Sal. 106:32, 33). Tsëmi Jehoväqa israelïtakunata Äninqan Patsamanqa pëta yëkatsirqantsu (Nüm. 20:12). ¡Geniunta mana tsaranqampitaqa, wanukunqanyaqchi Moisesqa llakikurqan! (Deut. 3:23-27).

¿Imatatan yachakuntsik Moisesta pasanqampitaqa? Ëka watapana Jehoväta sirwikarpis, manam piñashqallaqa pitapis parlapänantsiktsu (Efes. 4:32; Col. 3:12). Edäna nunakunaqa rasllam piñakuyan. Tsënö kaptimpis Moisesta pasanqantam yarpänantsik. Juk kutillapis piñakurninqa, ëka watapana Jehoväta sirwinqantsikpis manam yanapamäshuntsu.

Jehovä yanapamänapaq mañakushun. Tsënöqa mañakunantsik kallpanwan Jehovälla yanapamënintsikta puëdiptinmi (Lüc. 11:13). Geniunkunata tsaräyänampaq mañakoqkunataqa, Jehoväqa yanapanmi (Filip. 4:13). Tsënöllam Jehoväqa kuyakoq kanapaqpis yanapamantsik y tsëmi geniuntsikta alli tsaränapaq yanapamäshun (1 Cor. 13:5).

 Mana allikunaman chätsimänapaq kaqpita cuidakushun. Tsëkunataqa Internetchö y pelïculakunachömi tarishwan (Efes. 5:3, 4). Tsëmi mana alli rurëkunam mana ishkinapaqqa cuidakunantsik (Prov. 22:3; 1 Cor. 6:12). Pillapapis oqllanakuy munënin kaptinqa, tsëpaq parlaq librukunata y pelïculakunataqa manam rikanmantsu.

Itsa tsëkunata rurëqa fäciltsu kanqa. Tsënö kaptimpis kallpachakur sïguishqaqa pensënintsikta, imanö parlakunqantsikta y imata ruranqantsikkunata dominanapaqpis Jehoväqa yanapamäshunmi (2 Pëd. 1:5-8). Tsënö Jehovä yanapaptinmi, wawqi Raulwan Marcuspis mana alli geniunkunata dominëta yachakuyarqan. Cärruta manejëkar raslla piñakoq wawqiqa, ¿imatatan ruraq raslla mana piñakunampaq? Pëmi kënö willakun: “Cada junaqmi Jehoväman mañakoq kä. Geniüta tsaränäpaqqa Bibliatam leyeq kä y yanapamaq kaqkunataqa yarparaqmi kä. Atska watana pasashqa kaptimpis, kananyaqmi geniüta tsaränäpaqqa kallpachakü. Y mëta ëwarnimpis kananqa tempränullam yarqü”.

Höraqa geniuntsikta tsarëta mana puëdirmi, Jehoväman mañakuytapis penqakushun. Tsënö pasamashqam, jinan höra pëman mañakunantsik perdonamänapaq y tsë mana allita yapë mana ruranapaq (Sal. 51:9-11). Pëqa llapan mañakunqantsiktam wiyamäshun (Sal. 102:17). Apostol Juanmi kënö yarpätsimantsik: “Tsurin Jesuspa yawarninmi llapan jutsapita limpiamantsik” (1 Juan 1:7; 2:1; Sal. 86:5). Y Jehoväqa kutin kutinmi perdonamantsik y noqantsikpis tsënöllam perdonanakunantsik (Mat. 18:21, 22; Col. 3:13).

Moises piñakunqanqa Jehovätapis piñatsirqanmi, tsënö kaptimpis perdonëkurqanmi. Y Diospa Palabranchöqa Moisespaqmi nin, markäkoq o yärakoq nuna kanqanta (Deut. 34:10; Heb. 11:24-28). Israelïtakunata Äninqan Patsaman Moisesta mana yëkatsishqa karpis, Mushoq Patsachö kawanampaqmi kawariratsimunqa. Geniuntsikta tsarëta yacharninqa, noqantsikpis Mushoq Patsachöqa kawëta puëdishunmi (1 Cor. 9:25).