1. Imata rurayänampaq kaqta mëtsikaq nunakunata tapuyaptin, ¿imatatan Jesuspa qateqninkuna niyarqan?

MËTSIKA nacionkunapita y tukuyläya idiömakunata parlaq ollqukuna y warmikunam Jerusalenman ëwashqa kayarqan. Tsë junaqmi tsë nunakuna parlayanqan idiömakunata wakin judïukuna illaqpita parlar qallëkuyarqan. Peru espantakïpaqqa karqan, manam tsë judïukuna juk idiömakunata parlayanqantsu. Sinöqa imapita parlayanqan y tsëpita llapankunata apostol Pëdru ima ninqanmi. Ichik parlarirmi, Jesusman markäkur o yärakur salvakuyta puëdiyänampaq kaqta entienditsikurqan. Tsëkunata yachatsikunqanqa nunakunapa shonqunkunayaqmi chärirqan. Tsëmi kënö tapuyarqan: “¿Imatataq rurayäshaq?”. Y Pëdrunam, “cada ünu bautizakuyë” nirqan (Hëch. 2:37, 38).

2. ¿Imatatan këchö yachakushun? (Jana qaranchö këkaq fötuta rikäri).

² Tsënö niriptinmi, tsë junaqqa 3 milnö nunakuna bautizakuyarqan y Jesuspa qateqnin këman chäyarqan. Tsëpinmi Jesuspa qateqninkunaqa më tsëchö nunakuna Jesuspa qateqnin kayänampaq yachatsikurnin qallëkuyarqan. Y tsëtaqa kananyaqmi rurëkantsik. Kanan witsanqa, manam juk ishkë hörallatsu nunakunata yacharatsintsik bautizakuyänampaq. Itsa Bibliata estudiëkaqqa, atska killakuna pasanqanchö, o juk wata o ichik mas pasanqanchöraq bautizakunqa. Wakin nunakunata Bibliata estudiëkätseqkuna musyayanqannöpis, juk nunata yachatsinapaqqa alliran kallpachakunantsik. Këchöqa Bibliata estudiëkaqkuna bautizakuyänampaq  imanö yanapanapaq kaqtam yachakushun.

3. Mateu 28:19 y 20 ninqannöpis, ¿imatatan Bibliata estudiëkaq nuna ruranman bautizakunampaq?

³ Bibliata estudiëkaqqa manaraq bautizakurmi, yachakunqanmannö imatapis ruranan (leyi Mateu 28:19, 20). Tsënö rurarqa, qaqa jananchö wayinta sharkatseq “alli juiciuyoq” nunapaq Jesus parlanqannömi kanqa (Mat. 7:24, 25; Lüc. 6:47, 48). Bibliata estudiëkaq nuna yachakunqanmannö ruranampaq imanö yanapanapaq kaqta kimallata rikärishun.

4. ¿Imanötan Bibliata estudiëkaqta yanapashwan bautizakuyta munanampaq? (Rikäri “ Bibliata estudiëkaqta yanapë rurëta munëkanqanta churapakänampaq y tsëta logranampaq” neqta).

⁴ Rurëta munanqankunata patsätsinampaq yanapashun. ¿Imanirtan tsëta ruranman? Këllaman yarpärishun, karu markata chakipa ëwëkarqa itsa juk sitiuchö jamarishwan rikachakurinapaq. Tsëta rurashqaqa, manam ëwëkanqantsik sitiu karutsu paricimäshun. Tsënöllam Bibliata estudiëkaqpis, ichik tiempullachö imatapis ruranampaq churapakar y tsëta lograrqa, bautizakuyta munanqan difïcil mana kanqanta rikanqa. Disfrute de la vida libruchö “Propóngase esto” neq recuadruwanmi, Bibliata estudiëkaqta mas yanaparishwan. Cada capïtuluta usharir, yachakunqannö tsëchö ninqanta ruranampaq imanir churapakänampaq kaqta entiendiratsi. Jukta ruranampaq churapakänanta munarqa, “Más objetivos” ninqanman qellqari. Tsëkunata yachakuykar wallka tiempullachö rurëta munanqankunapaq Bibliata estudiëkaqwan parlari.

5. Marcus 10:17 a 22 willakunqannö, ¿imatatan juk rïcu nunata Jesusqa nirqan y imanir?

⁵ Unë imanö kanqanta dejanampaq  yanapashun (leyi Marcus 10:17-22). Jesusqa juk rïcu nunatam llapan kapunqanta rantikunampaq nirqan. Tsëpita kawanampaq fäcil mana kanampaq kaqta musyëkarpis (Mar. 10:23). Tsënöqa nirqan tsë nunata kuyarninmi. Itsa höraqa maslla yachakunan pishinqanta yarparnin, Bibliata estudiëkaqta yachakunqanmannö ruranampaq nintsiktsu. Awmi, tiempu pasanqanmannöran imanöpis kanqanta cambianqa y Dios munanqannö kawanqa (Col. 3:9, 10). Peru yachakunqannö ruranampaq kananllapita nishqaqa, mas rasmi cambiukunata ruranqa. Tsëkunapita parlaparqa, kuyanqantsiktam rikätsishun (Sal. 141:5; Prov. 27:17).

6. ¿Imanirtan imata pensayanqanta parlakarayämunampaq tapushwan?

⁶ Bibliata estudiëkaqkunataqa yachakuykäyanqampita imata pensayanqantam tapupashwan. Tsënö tapurmi yachakuykäyanqanta y imata creiyanqanta musyashun. Tsëta imëpis rurashqaqa, fäcil mana parlana asuntukunapitapis shumaqllam parlarishun. Disfrute de la vida libruchöqa, yachakuykaq parlakaramunampaq atska tapukuykunam kan. Chusku kaq capïtuluchömi kë tapukuy këkan: “¿Cómo cree que se siente Jehová cuando usted usa su nombre?”. Y 9 kaq capïtuluchönam: “¿Sobre qué cosas le gustaría orar?” neq tapukuy këkan. Itsa qallananllachöqa Bibliata yachakuykaqqa rasllatsu tsë tapukuykunapita parlakaramunqa. Parlakamunampaqqa, tsëchö këkaq textukunaman y dibüjukunaman pensanampaqmi nirishwan.

7. ¿Imanötan wakinkuna pasayanqanwan Bibliapita yachakuykaqta yanapashwan?

⁷ Imata ruranampaq kaqta Bibliapita yachakuykaq entiendiriptinqa, wakinkuna pasayanqanta willar yachakunqannö ruranampaq nishun. Reunionkunaman ëwëta mantsaptinqa, 14 kaq capïtuluchö “Descubra algo más” ninqanchö Jehoväqa noqapaq yarpachakunmi neq videuta rikäratsi. Disfrute de la vida librupa atska capïtulunkunachömi, “Profundicemos en el tema” o “Descubra algo más” ninqanchö mëtsika willakuykuna kan. * Bibliata estudiëkaqkunataqa ama kënö nishuntsu: “Pë cambiashqa këkaptinqa, qampis puëdinkim”. Tsë videuchö yarqamoq nunata, juk textu o imata ruranqan imanö yanapashqa kanqanta Bibliapita yachakuykaqta rikätsishun. Puëdikaptinqa, tsë nunata Jehovä imanö yanapashqa kanqanta nishun.

8. ¿Imanötan Bibliapita yachakuykaqta Jehoväta mas kuyanampaq yanapashwan?

⁸ Jehoväta kuyayänampaq yanapashun. Bibliapita yachakuykaqkunata Jehovä imanö kanqampita yachatsishun. Jehovä Diosnintsik kushishqalla kanqanta y pëta kuyaqkunata yanapanampaq imëpis listu këkanqanta rikätsishun (1 Tim. 1:11; Heb. 11:6). Yachakunqanta rurar mas alli kawakunampaq kaqta y Jehovä kuyanampaq kaqtapis rikätsishun (Is. 48:17, 18). Tsëmi Jehoväta mas kuyanqan jukläyana kawakunampaq yanapanqa (1 Juan 5:3).

9. Marcus 10:29 y 30 ninqannö, ¿imatan juk nunata yanapanqa bautizakunampaq imëkata dejanampaq?

⁹ Bautizakuyta munarqa imëkatam ruranan. Pitsqa kaq pärrafuchö rïcu nunapaq yachakunqantsiknömi, itsa Bibliata estudiëkaq wakin nunakunaqa imëka  kayäpunqankunata dejayanqa. Itsa wakinkunaqa Biblia yachatsikunqampa contran këkaq trabäjupita yarqukuriyanqa. Wakinkunana Jehoväta mana sirweq nunakunawan amïgu këta dejayanqa. Y wakinkunatanam, Jehoväpa testïgunkunapa contran këkaq familiankuna itsapis chikiyanqa. Jesusmi nirqan wakinkunapaqqa, tsëkunapa pasayanqan mana fäcil kanampaq kaqta. Peru pëta sirweqkuna juk familiachönö kayänampaq kaqtam Jehoväqa nirqan (leyi Marcus 10:29, 30). ¿Imanötan Bibliata estudiëkaqta yanapashwan Jehoväta adoraqkunata familiantanö rikänampaq?

10. ¿Imatatan Manuel ninqampita yachakuntsik?

¹⁰ Bibliata estudiëkaqpa amïgun kashun. Pëman yarpachakunqantsiktam rikätsinantsik. ¿Imanirtan tsëtaqa ruranantsik? Bibliata estudianqan witsan Mëxicu nacionpita Manuel jutiyoq wawqi imanö kanqanta rikärishun, pëmi kënö nin: “Bibliapita manaraq yachakuyaptïmi yachatsimaqnïqa, imanö këkanqäta tapumaq. Tsëmi imanö këkanqäta mana mantsakushpa willaq kä. Tsëchömi noqapaq yarpachakunqanta rikaq kä”.

11. ¿Imanirtan Bibliata estudiëkaqwanqa imallatapis rurashwan?

¹¹ Imanöllam Jesus qateqninkunawan imallatapis rurarqan, tsënöllam noqantsikpis Bibliata estudiëkaqwan ruranantsik (Juan 3:22). Yachakunqanmannö kawar qallëkuptinqa, allim wayintsikman invitarishwan imallatapis mikurinapaq, JW Broadcastingta rikänapaq o imallatapis ruranantsikpaq. Mas alliqa kanqa fiestakunata rurayanqan witsan japallan mana kanampaq invitanqantsikmi. Uganda nacionchö Kazibwe jutiyoq wawqim kënö nin: “Bibliapita yachatsimaqnïwan imallatapis juntu rurayanqäpitaqa, Bibliapita yachakunqänöllam Jehoväpita imëkata yachakurqä. Jehovä y pëta sirweqninkuna, alläpa kuyayämanqanta y kushishqa kayanqantam rikarqä. Tsëmi noqapis pëkunanölla këta munarqä”.

12. Pitapis Bibliapita yachatsirqa, ¿imanirtan juk wawqi panikunata yanaqämänapaq mañakunantsik?

 ¹² Pitapis Bibliapita yachatsirqa kaq wawqi panikunallawanqa ëwëtsu. Höraqa japallantsik o kaq wawqi panillawan ëwanqantsikmi mas allinö kanman. Tsëta ruranqëki allinö kaptimpis, juk wawqi panikunawan ëwanqëkim Bibliata estudiëkaqta yanapanqa. Moldavia nacionchö täraq Dimitri jutiyoq wawqim kënö nin: “Bibliapita yachatsimaqnïpa yanaqinkunaqa jukläyam imatapis yachatsikuyaq. Tsëmi yanapamarqan imatapis juknöpa rikänäpaq. Atska wawqi panikunata reqinqämi yanapamarqan, reunionman ëwëta mana penqakunäpaq”.

13. ¿Imanirtan Bibliata estudiëkaqkunata yanapashwan reunionkunaman shayämunampaq?

¹³ Reunionkunaman shayämunampaq yanapashun. Reunionkunamanqa invitanantsik juntakänapaq Jehovä nimashqa, y tsëchö pëta adorashqam (Heb. 10:24, 25). Jina shayämunampaqqa nintsik, congregacionchö wawqi panintsikkuna familiantsiknö kayaptinmi. Reunionkunachö pëkunawan juntu kashqaqa, mishki mikuyta mikuykaq cuentam kantsik. Bibliata estudiëkaqkuna shayämuptinqa bautizakuyänampaqmi yanapashun. Peru wakintaqa imallapis michanmanmi, tsëqa ¿imanötan Disfrute de la vida libruwan yanapashwan?

14. ¿Imanötan Bibliata estudiëkaqkunata yanapashwan reunionkunaman shayämunampaq?

¹⁴ Disfrute de la vida librupa 10 kaq capïtulunwanmi, Bibliata estudiëkaqkunata reunionkunaman shayämunampaq yanaparishwan. Kë libru manaraq yarqamuptinmi, mëtsika watapana nunakunata yachatsirnin yanapakoq wawqi panikunata niyarqan, kë librupa 10 kaq capïtulunta utilizarnin Bibliata estudiëkaqkunata yanapayänampaq. Tsë capïtuluchö ninqannö rurayanqanqa alläpam yanapakurqan. Peru Bibliata estudiëkaqkunata yanapanapaqqa, manam 10 kaq capïtuluman chëtaraqtsu shuyarashwan. Bibliapita yachatsir qallanqantsikllachömi, kutin kutin invitashwan. Pëkunaqa jukläya y tukuy problëmayoqmi kayan. Tsëmi imapa pasëkäyanqanman y imanö yanapanapaq kaqman yarpachakunantsik. Reunionkunaman invitarishqa mana shayämuptinqa ama llakikushuntsu. Tsëpa rantinqa, pacienciawanmi yanapanantsik shayämunampaq.

15. ¿Imatatan Bibliata estudiëkaqkunaqa itsapis mantsayanman?

¹⁵ Bibliata estudiëkaqkuna imanir mantsakuyanqantaqa entiendishun kikintsikman yarparmi. Mantsakurqantsikmi Jehoväpa testïgun këta, y wayin wayin yachatsikuyta mana puëdinapaq kaqtam pensarqantsik. Itsa familiantsik o amïguntsikkuna contrantsik churakäyänampaq kaqta mantsarqantsik. Tsëkunapa pasashqa karqa, Bibliata estudiëkaqkunata entiendishunmi. Jesuspis wakin nunakuna mantsakuyänampaq kaqtaqa nirqanmi. Tsëmi Jesusqa qateqninkunata nirqan, imatapis mantsayanqan Jehoväta sirwiyänampaq mana michänampaq (Mat. 10:16, 17, 27, 28). ¿Imanötan Jesusqa qateqninkunata yanaparqan valienti kayänampaq? Y ¿imanötan noqantsikpis Bibliata estudiëkaqkunata yanapashwan?

16. ¿Imanötan Bibliata estudiëkaqkunata yachakuyanqankunapita parlakunampaq yachatsishwan?

¹⁶ Yachakunqanmannö wakinkunata parlapänampaq yachatsï. Jesuspa qateqninkunapis Diospita yachatsikuyänampaq mandaptinqa mantsakuyarqanchi. Peru Jesusqa, pikunata y imata yachatsikuyänampaq  kaqta nirmi yanaparqan (Mat. 10:5-7). Tsënöllam noqantsikpis, pikunata yachatsiyänampaq kaqta Bibliata estudiëkaqkunata nirishwan. ¿Imanirtan, “¿kë yachakunqantsikqa pillatapis yanaparinmantsuraq?” nir tapurintsiktsu? Tsëpitaqa, shumaq entienditsikunampaqmi yanaparishwan. Tiemputa shumaq patsëkatsir, Disfrute de la vida libruchö “Lo que algunos dicen” y “Lo que algunos preguntan” ninqampita shumaq yacharatsishun. Imanö yachatsikunampaq kaqta yachatsirqa, pillapis tapupaptin Bibliawan shumaq contestanampaq yachatsishun.

17. Bibliata estudiëkaq nuna Jehoväman mas markäkunampaqqa, ¿imanötan Mateu 10:19, 20, 29 a 31 utilizashwan?

¹⁷ Jehoväman markäkunampaq yanapashun. Pëkunata kuyar Jehovä yanapanampaq kaqtam Jesusqa nirqan (leyi Mateu 10:19, 20, 29-31). Jehovä pëkunata yanapanampaq kaqta Bibliata estudiëkaqkunatapis yarpätsishun. Churapakanqannölla ruranampaq Jehovä Diosman mañakunampaq yachatsi. Polonia nacionchö täraq wawqintsik Franciszek kënö nin: “Bibliapita yachatsimaqnï Jehoväman mañakurqa, rurëta munanqäkunapitam mañakoq. Y pëta Jehovä wiyanqanta rikarmi, noqapis mañakurnin qallëkurqä. Reunionkunaman y asamblëaman ëwanäpaq trabäjüchö permïsuta mañakunqächö Jehovä yanapamanqantam rikarqä”.

18. Bibliata estudiëkaqkuna imëkanöpa kallpachakuyanqampita, ¿imanötan Jehovä rikan?

¹⁸ Bibliapita kanan witsan pitapis mana yachëkätsirqa, ¿puëdishwanku Bibliata estudiëkaqkunata bautizakuyänampaq yanapëta? Awmi. Tsëpaqqa Bibliata estudiëkätseq wawqi panikunata yanaqäshun. Jehoväqa pëkunapaq alläpam yarpachakun. Jina pëta reqiyänampaq kallpachakunqantsikpitam kushikun y tsërëkurmi kuyamantsik (Is. 52:7).