Lïbanu nacionpa Amiun markanchömi 1940 wata 19 de mäyu killa yurikurqä. Tsëpita wallka watakunallatanam, Trïpoli markaman ëwakuyarqä. Familiäqa, kuyakoq y Jehoväta alläpa kuyaqmi kayaq. Kima paniyoq y juk wawqiyoqmi karqä, noqam ultimu kaq karqä. Teytäkunaqa Bibliata estudiëta, reunionkunaman ëwëta y Diospita nunakunata yachatsitam mas puntaman churayaq, manam qellëta ganëtatsu.

Congregacionnïchöqa ciëlupaq akrashqakunaqa atskam kayarqan. Jukninqa Michel Aboudmi karqan, pëmi librupita yachakunapaq kaqta reunionchö yachatsikamoq. Pëqa Nueva York markachömi Bibliapita yachakurqan. Y 1920 wata witsankunam Lïbanu nacionchö yachatsikur qallëkurqan. Yarpäran Galaad Escuëlapita yarqamushqa Anne y Gwen Beavor panikunata respëtuwan tratanqanta y yanapanqanta. Tsë ishkan panikunataqa familiäqa alläpam yachanäyaq. Tsëpita atska watakuna pasanqanchö, pani Annewan Estädus Unïdus nacionchö tinkuyanqäpitam alläpa kushikurqä. Tsëpita mas tiempu pasarinqanchömi, Gwenwan tinkuyarqä. Pëqa Wilfred Goochwanmi casakushqa karqan. Y ishkanmi Inglatërra nacionpa Londres markanchö këkaq Betelchö yanapakuykäyarqan.

Wamra kanqä witsanqa, Lïbanuchöqa wallkaqllam Testïgukuna kayarqan. Tsënö kaptimpis, yachakuyanqäpitam wakinkunata Bibliapita yachatsiyaq kayä. Wakin pushakoq religiösukuna chikikuyaptimpis, yachatsikuyarqämi. Kananyaqmi yarpä, tsë witsankuna imakunapa pasayanqäta.

Juk kutim panï Sänawan mëtsika pïsukunayoq wayichö yachatsikuykäyarqä. Juk pïsuchö täraqta yachëkätsiyaptïmi, juk cüra yurirkamurqan. Pï karpis qayashqachi karqan, tsë nunaqa panïtam insultar qallëkurqan y alläpa piñakurmi escalërapa kumarkurqan. Policïatam qayayarqan, y panï ishkirnin malograkunqanta jampiyänampaqmi chäramur mandakurqan. Sacerdötitam comisarïaman apakuyarqan y tsëchömi armayoq kanqanta musyariyarqan. Tsëmi policïakunaqa kënö tapuyarqan: “¿Qamqa Diospitaku nunakunata yachatsinki o maqakoq kayänampaqku yachatsinki?”.

Jina manam qonqätsu cärruta alquilëkur, Diospita mana yachatsikuyanqan markaman yachatsikoq ëwayanqäta. Shumaqmi yachatsikuykäyarqä, peru tsë markachö sacerdöti musyarirqä atskaq nunakunatam juntarirqan tsëpita qarqayämänampaq. Tsë nunakunaqa rumiwanmi tsampiyämarqan, y teytätam ratëkätsiyarqan. Qaqllan yawarllana kanqantam yarpä. Teytäqa mamänïwanmi cärruman kutiyarqan, y llapäkunam qepankunata alläpa mantsakashqa kutiyarqä. Yarpäran papänïpa qaqllanta limpiëkarnin mamänï kënö ninqanta: “Jehovä manam musyayantsu imata rurëkäyanqanta, perdonëkullë”.

Juk kutinam wakin familiäkunata watukayänäpaq markäkunaman kutiyarqä. Chäriyaptïqa awilïtüpa wayinchöqa juk cüram këkarqan. Pëqa musyarqanmi teytäkunaqa Jehoväpa testïgun kayanqanta. Tsëmi joqta watayoqllaraq këkaptïpis, kënö tapumarqan: “Qamqa, ¿imanirtan bautizakunkiraqtsu?”. Tsënö nimaptinmi, wamrallaraq kanqäta nirqä. Y bautizakunäpaqqa Bibliata mas estudianä y Diosman mas markäkunäraq pishinqanta nirqä. Tsënö ninqäpitam mana respetakoq kanqäta awilïtüta nirqan.

Tsënö mana allikunapa juk ishkë kutikunallam pasayarqä. Lïbanu nacionchöqa cäsi llapanmi kuyakoq y alli nuna kayan. Tsëmi Diospita parlakuyaq kayä y mëtsikaqtam Bibliapita yachatsiyaq kayä.

Escuëlallachöraq këkaptïmi, Venezuëla nacionpita juk wawqi shamurqan. Congregacionnïkunamanmi shamoq y panï Wafawanmi reqinakur qallëkuyarqan. Tiempuwanmi casakuriyarqan y Venezuëlatam täraq ëwakuyarqan. Panï Wafa qellqakamurqa, alläpa llakiyämanqanta y Venezuëlata ëwakuyänäpaqmi teytäta neq. Tsëmi Venezuëlata täraq ëwakuyarqä.

 1953 watam Venezuëlaman chäriyarqä, y palaciu de gobiernupa amänunchö Caräcas markachömi tärar qallëkuyarqä. Wamrallaraq karmi, cärrunwan presidenti wayï punkumpa pasëkaqta rikarnin kushikoq kä. Tsë nacionchö yachakëqa teytäkunapaqqa manam fäciltsu karqan. Parlayanqan idiöma, costumbrinkuna, mikuyanqan hasta mëchö täräyanqäpis jukläyam karqan. Y tsëllaraq yachakëkäyaptïmi, juk desgracia pasakurqan.

Teytämi illaqpita qeshyakurkurqan. Pëqa alli sänu nunam kaq, qeshyëkaqtaqa manam imëpis rikäyashqatsu kayarqä. Cancer de pancreaswanmi karqan, tsëmi operayarqan. Llakikuypaqqa karqan, juk semäna pasarinqanchö wanukunqanmi.

Alläpa llakishqa këkäyanqätaqa manam imanöpa entienditsikuyta puëditsu. Noqaqa, 13 watayoqllaran karqä. Alläpa llakishqa karmi, ima rurëtapis musyayarqätsu. Mamänïqa manam creita munaqtsu papänï wanukunqanta. Peru tsëpitam cuentata qokuriyarqä alli tsarakurnin sïguiyänäpaq kaqta. Y Jehovä yanapayämaptinmi mas alliyäyarqä. 16 watayoq këkar Caräcas markachö colegiuta usharirqä, familiäta manteninäpaqmi churapakarqä.

Tsë witsankunam wawqi Ruben Araujuqa, Galaad Escuëlata usharir Venezuëlaman kutimushqa karqan. Pëwanmi panï Säna casakurirqan. Nueva York markatam täraq ëwakuyarqan. Familiäqa universidächö estudianäpaqmi niyämarqan. Tsëmi panï Sänawan nunan këkäyanqanman täraq ëwakurqä y tsëchömi estudiarqä. Pëkunaqa Jehoväpita mas yachakunäpaqmi yanapayämarqan. Jina Brooklyn Spanish congregacionnïchöqa Diosta unëpana sirweq mëtsikaq wawqi panikunam kayarqan. Tsëchöqa alläpa yachanëpaq, wawqi Milton Henschel y Frederick Franzmi këkäyarqan. Pëkunaqa Brooklyn Betelchömi yanapakuyaq.

Universidächö juk watanöna estudiëkarmi, kawënïwan imata rurëkanqäta yarpachakurnin qallëkurqä. La Atalaya revistachö Jehoväta mas sirwinapaq leyinqäkunamanmi yarpachakur këkarqä. Congregacionnïchö precursorkuna y Betelchö yanapakoqkunaqa alläpa kushishqam kayaq. Tsëmi pëkunanö këta munarqä. Peru manaraq bautizakushqa karmi, Jehovällatana sirwinäpaq änikurqä. Tsëta rurarirmi, 1957 wata 30 de marzu killa bautizakurirqä.

Bautizakurirqa, llapan tiempüwan Jehoväta sirwinäpaqmi churapakarqä. Precursor këtaqa, masmi munaq kä. Peru tsënö yanapakunäpaq fäcil mana kanampaq kaqtaqa musyaqmi kä. Universidächö estudiëkar precursor imanö kanäpaq kaqmanmi yarpachakurqä. Mamänïwan, panïwan y wawqïwanmi cartanakuyarqä, universidäta dejarir Venezuëlaman kutïkur imanir precursor kanäpaq kaqta entienditsinäpaq.

 1957 wata juniu killam Caräcas markaman kutirirqä. Peru chärirqä familiä pishipukuykäyanqanta y yanapayänanta wanayanqantam rikarqä. Tsënö këkaptïmi, bancuchö trabajanäpaq niyämarqan. Noqaqa precursor këta munarmi kutishqa karqä. Precursor kanäpaq y bancuchö trabajanäpaqmi churapakarqä. Tsënömi atska watakunapa karqä y imëka rurëyoq karnimpis, kushishqam këkarqä.

Jina alläpam kushikurqä, shumaqllam pani Sylviata reqirirnin. Pëqa alläpam Jehoväta kuyaq, y teytankunawanmi Alemaniapita Venezuëlaman täraq ëwakamushqa kayarqan. Tiempuwanmi casakuriyarqä, y ishkë wamrayoq kayarqä. Juknimpam Michel jutin, pëtaqa Mike nirmi reqiyä, y warmi kaqpanam, Samïra jutin. Mamänïtam niyarqä noqakunawan täränampaq. Familiäta manteninäpaq y cuidanäpaq precursor këta dejarirpis, Diospitaqa precursornömi yachatsikoq kä. Trabäjüpita jamanqä junaqkunaqa, Sylviawanmi precursor auxiliar kayaq kayä.

Wamräkuna escuëlallachöraq këkäyaptinmi, qallananchö cuentakunqä pasamarqan. Imëkämi kapamarqan y bancuchö trabajaq mayïkunapis alläpam respetayämaq. Tsënö kaptimpis, Diospa sirweqnintanö rikäyämänantam munarqä. Tsëmanqa yarparëkarqällam. Tsëmi Sylviawan tëkur gastukuna imakuna kanqanman parlayarqä. Bancuchö trabajëta dejariptïqa, mëtsikatam pagayämänan karqan. Wanayanqällawan kawayänäpaq churapakäyaptïqa, jaqayoq mana kayaptïmi tsë pagayämanqan qellëqa atska tiempupaq tinkunman karqan.

Tsëta rurayänäpaq churapakëqa manam fäciltsu karqan. Tsënö kaptimpis, kuyashqa warmï y mamänïqa yanapayämarqanmi. Tsëmi llapan tiempüwan Diospita yapë yachatsikur qallëkurqä. Diospa kaqchö mas yanapakunäpaq pensarmi, ¡alläpa kushishqa këkarqä! Tsënö këkaptïmi, juk noticia chäramurqan.

Juk junaqmi Sylvia qeshyaq këkanqanta doctor niyämarqan, tsëtaqa manam shuyaräyarqätsu. Kushishqam këkäyarqä, peru noqaqa precursor këpaqpis yarparëkarqämi. ¿Puëdïmanraqtsuraq tsënö yanapakuyta? Tsë noticiata willarayämanqampita ichik tiempu pasarinqanllachömi, wamräkuna yurinanta kushishqa shuyarëkäyarqä. Peru tsë  noticiata manaraq musyar patsätsiyanqäkunaqa, ¿imanöraq kanman karqan?

Ima rurëta munayanqäta pensarirmi, patsätsiyanqänölla rurayänäpaq churapakäyarqä. 1985 wata abril killam wamrä Gabriel yurikurqan. 1985 wata juniu killachömi bancuchö trabajëta dejarirqä y precursor regular tikrarirqä. Tsëpita tiempuwanqa, Sucursalta rikarmi yanapakurqä. Peru Caräcas markapita Betel wayi juk hörapitapis mas karuchö kaptinmi, cärrüwan ishkë o kima kuti ëwaq kä.

Betelqa La Victoria markachömi këkarqan. Tsëmi Betelpa mas amänunchö kayänäpaq tsë markata ëwakuyarqä. Tsëta rurayanqäqa llapäkunapaqpis jukläyam karqan. Familiä tsëta rurashqa kanqampitam alläpa agradecikü y respetä. Juk läduta ëwakuyänäpaq listu këkäyanqanqa kushikuypaqmi karqan. Baha jutiyoq panïmi, mamänïta cuidanampaq nimarqan. Mike wamräqa casakushqanam karqan. Peru Samïrawan Gabrielqa noqakunawanran täräyarqan. Tsëmi Caräcaschö amïgunkunata dejayarqan. Y warmï Sylviaqa mas ichikllam markachömi yachakänan karqan. Y llapäkunam mas ichikllam wayichö tärëta yachakäyäna karqan. Awmi, La Victoria markachö täräyänäpaqqa imëkatam Caräcas markachö dejayarqä.

Tsëpitanam Gabriel casakurirqan y Samïraqa juk lädutam täraq ëwakurqan. Y 2007 watachömi warmï Sylviatawan Betelchö yanapakuyänäpaq invitayämarqan y kananyaqmi tsëchö yanapakuyä. Mayor kaq wamrä Mikeqa creikoqkunata rikaqmi y warmin Mönicawanmi precursor regular kayan. Wamrä Gabrielpis creikoqkunata rikaqmi y warmim Ambrawanmi Italia nacionchö yanapakuyan. Y warmi wamrä Samïranam precursöra y wayinllapitam Betelpaq trabajan.

Kawënïchö Diosta sirwinäpaqqa, imëkatam patsätsirqö. Y tsëkunata ruranqäpitaqa manam pësakütsu. Yapëpis patsätsinqänöllam ruräman. Jehoväta sirwinqächö imëkata ruranqäpitam alläpa agradecikü. Mas watakuna pasanqanmannömi, Jehoväta mas reqï yanapakunqanta rikarqö. Imata ruranapaq patsätsishqapis, “imëka yarpachakïkuna janampa këkaq Diospa yamë këninmi” tranquïlu kanapaq yanapamantsik (Filip. 4:6, 7). Warmï Sylviawanqa kushishqam Betelchö yanapakuyä. Jehoväta cuentaman churëkur imatapis patsätsiyanqä alli yarqushqa kanqantam pensayä.