UNË WITSAMPITAM israelïtakunaqa Jehoväta adorayänampaq qellëninkunawan yanapakuyaq. Peru Jesuspa tiempuchöqa, mëtsika impuestukunata pagayänan kaptinmi, judïukunaqa alläpa yarpachakuyaq.

Diospa carpa wayinchö y tsëpitana tiempuwan templuchö yanapakuyänampaqmi, llapan ollqu kaq judïukuna 20 watayoq kayanqampita patsë mediu ciclu qellëta pagayaq, tsëqa ishkë dracma qellëmi kaq. Punta cristiänukuna kawayanqan witsanqa, tsë qellëwanqa Herödis altsatsinqan templutam altsapäyaq y tsëchö kayana ofrendakunata rurayänampaqmi utilizäyaq. Tsë impuestu paguëpaq Jesus ima ninqantam Pëdruta wakin judïukuna tapuyarqan. Y Jesusqa pagayänan allilla kanqantam nirqan. Tsëmi Pëdruta nirqan qellëta ashirir tsë impuestuta paganampaq (Mat. 17:24-27).

Diosta tsë witsan sirweqkunaqa diezmutam pagayaq, juk parlakuychöqa, cosëchayanqampita o ganayanqampita chunka kaq partita (Lev. 27:30-32; Nüm. 18:26-28). Pushakoq religiösukunaqa “hierbabuënapita, eneldupita y comïnupitam, chunka kaq partita” pagayänampaq nunakunata obligayaq. Jesusqa Ley qellqaqkunawan y fariseukunawanqa manam tsëta mañakuyanqampitatsu piñakurqan, sinöqa ishkë qaqlla kayanqampitam (Mat. 23:23).

Jina Röma nacion judïukunata gobernaptinmi, pëkunatapis impuestuta pagayaq. Juk impuestuqa karqan chakrayoq kayanqampitam, y tsëtaqa cosechayanqanwan o qellëwanmi pagayaq. Tsëqa tsë chakrachö wayunqampita, 20 o 25 kaq partitam pagayaq. Y judïukunaqa ollqu kaqkunam impuestuta pagayaq. Tsëmi tsë impuestuta paguë alli o mana alli kanqanta fariseukuna tapuyaptin, Jesusqa kënö nirqan: “Römata gobernaqtaqa, Römata gobernaqpa kaqta pagayë, peru Diostaqa, Diospa kaqta” (Mat. 22:15-22).

Juk provinciapita juk provinciaman yëkoq o yarqoq negociukunapitapis impuestuta pagayaqmi. Tsë impuestukunataqa cobrakuyaq barcukuna chänanchö, tsakakunachö, crücikunachö o juk markapa o mercädupa punkunkunachömi.

Röma gobiernu impuestukunata mañakunqanqa alläpam kaq. Patsachö Jesus këkaptin Römata gobernaq Tiberiuta, Siria y Judëa provinciakunachö täraqkuna mas wallka impuestuta pagayänampaq mañakuyanqantam, unë pasakunqanta willakoq Täcitu nuna kënö nirqan: “Impuestukunata imanö cobrakuyanqampitam, judïukunapaqqa pagakuyqa fäciltsu kaq”.

Impuestukunata cobrakoq kayänampaqqa pagakuyaqmi, y masta pagaq kaqmi tsë trabäjuman yëkoq. Y yëkoq kaqqa, impuestuta cobranqampitam wakin qellëta tsarikurkoq. Pëkunaqa impuestuta cobrayänampaqmi, juk nunakunata contratayaq. Y pëkunapis cobrayanqampitam wakin qellëta tsarikurkuyaq. Zaqueupapis impuestukunata cobraqninkuna kapoqmi (Lüc. 19:1, 2). Tsërëkurmi nunakunaqa impuestu cobrakoqkunata chikiyaq.