1. ¿Imanötan Jehoväpa sirweqnin këman charquntsik?

JEHOVÄMI pëta sirwinapaq akramarquntsik (Juan 6:44). Sirweqninkuna kayänampaq mëtsika millon nunakunapita akranqanchömi, shonquntsikchö ima allillatapis tarirqan (1 Crön. 28:9). Jehoväqa reqimarnintsikmi, kuyamantsik y imanö kanqantsiktapis alli musyan. ¿Manaku tsënö kanqampita kushikuntsik?

2. ¿Jesusqa ima igualatsikuywantan Jehovä kuyamanqantsikta yachatsikurqan?

² Jehoväqa qamta y llapan wawqi panintsikkunatam alläpa kuyan. Tsëpita maslla musyanapaqmi, Jesusqa kë igualatsikuywan yachatsikurqan. Juk nunapa pachak üshankunapitash juk oqrakarqan, ¿imataraq tsë nuna ruranman karqan? Tsëqa, “manatsuraq isqun chunka isqun kaqta jirkachö jaqirïkurnin, oqrakashqa kaqta ashir qallëkunman”. Tarïkurninqa alläpam kushikun. Mitsikoqnö kaptinmi, Jehoväpaqqa tsë üshanö kantsik. Jesusmi kënö nirqan: “Teytäpis pishi wamranö kaqkunapita jukllaqllapis ushakärinantaqa munantsu” (Mat. 18:12-14).

3. ¿Imakunapitatan këchö yachakushun?

³ Tsëmi ima ninqantsikwan o ruranqantsikwan wawqi panintsikkuna llakikuyänantaqa munantsiktsu. Këchömi kë tapukuykunapita yachakushun: ¿imatatan rurashwan wakinkunata mana ofendinapaq? Y noqantsikta ofendimashqaqa, ¿imatatan rurashwan? Peru puntataqa, Mateu librupa  18 kaq capïtulunchö “pishi wamranö” nirqa pikunapaq parlëkanqanta yachakurishun.

4. ¿Pikunatan “pishi wamranö” kayan?

⁴ ‘Pishi wamranöqa’ Jesuspa qateqninkunam kayan. Ima edä karpis pëkunaqa wamrakunanö kayan, Jesus yachatsinqanta chaskikuyaptinmi (Mat. 18:3). Më tsëpita kayaptin y ima costumbriyoq kayaptimpis, Jesusmanmi markäkuyan o yärakuyan. Y tsënö kayanqampitam Jesusqa pëkunata alläpa kuyan (Mat. 18:6; Juan 1:12).

5. Mëqan sirweqninllatapis pantatseq o llakitseq kaqtaqa, ¿imanötan Jehoväqa rikan?

⁵ “Pishi wamranö” kaqtaqa Jehoväqa llapantam kuyan. Tsëta mas musyanapaqqa wamrakunata imanö rikanqantsikman pensarishun. Mayor nunakunapanö kallpan, imatapis rurëta yachayanqan o tantiaq mana kayaptinmi imapitapis cuidëta procurantsik. Manam ni pï mana allita rurayänantaqa munantsiktsu, tsëmi wamrakunata imatapis rurayaptinqa alläpa piñakuntsik. Tsënöllam Jehoväpis sirweqninkunata cuidan. Tsëmi mëqan sirweqninllatapis llakitsiyaptin, o pëpita rakikäratsiyaptinqa alläpa piñakun (Is. 63:9; Mar. 9:42).

6. 1 Corintius 1:26 a 29 ninqannö, ¿imanötan nunakunaqa Jesuspa qateqninkunata rikäyan?

⁶ Jesuspa qateqninkunaqa, ¿imachö mastan “pishi wamranö” kayan? Nunakunaqa kapoqyoq, reqishqa y autoridäyoq kaqkunatam precisaqpaq churayan. Peru Jesuspa qateqninkunaqa jukläyam kayan. Tsëmi nunakunaqa pishi wamrakunatanö mana kaqtanölla rikäyan (leyi 1 Corintius 1:26-29). Peru Jehoväqa manam tsëtanötsu rikan.

7. ¿Imanötan Jehoväqa wawqi panintsikkunata rikänata munan?

⁷ Jehoväqa tsëllaraq o mëtsika watakunapana sirwiyaptimpis, llapankunatam kuyan. Llapan wawqi panintsikkunata Jehovä kuyëkaptinqa, noqantsikpis “llapan creikoq” mayintsikkunatam kuyanantsik (1 Pëd. 2:17). Tsëmi wawqi panintsikkunata yanapanapaqqa listu këkänantsik. Tsënö kaptinmi mëqan wawqi panintsikta ofendir o llakitsirninqa, ichikllapaq kanqantaqa mana pensanantsiktsu. ¿Imarëkurtan wakinkunaqa raslla ofendikuyanman? Itsa wakinkunaqa imanö watashqa kayanqampita mana väliyanqanta pensayan. O tsëllaraq bautizakushqa karmi, wawqi panikuna pantayanqampita espantakuyan. Imanö kaptimpis rasllam altsanantsik. Peru raslla ofendikoq karqa, tsënö kanqantsik mana alli kanqanta y alliyänapaq kallpachakunapaq kaqtam rikänantsik. Kikintsik y wakinkunawan yamë kanantsikpaqmi kallpachakunantsik.

8. ¿Jesuspa qateqninkunaqa pikunanötan pensayaq?

⁸ ¿Imanirtan Jesusqa “pishi wamranö” kaqkunapaq parlarqan? Tsëpaqqa parlarqan qateqninkuna tapuyaptinmi, tsëmi kënö nirqan: “¿Pitaq ciëluchö Gobiernuchö mas precisaq?” (Mat. 18:1). Tsë witsan judïukunaqa reqishqa, y imëkayoq këtam puntaman churayaq. Juk yachaq nunam kënö nin: “Tsë witsan nunakunaqa respetayänanta, reqishqa këta y llapankunapis allipa rikäyänantam munayaq”.

9. ¿Imata rurayänampaqtan Jesuspa qateqninkunaqa kallpachakuyänan karqan?

⁹ Jesuspa qateqninkunaqa alliran kallpachakuyänan karqan, marka mayinkunanö reqishqa këta mana ashiyänampaq.  Jesusmi pëkunata kënö nirqan: “Mas precisaq kaqqa, mas jövin kaqnö katsun, y pushakoq kaqqa, sirwipakoqnö katsun” (Lüc. 22:26). “Mas jövin kaqnö” këta munarqa, noqantsikpita wakinkuna mas alli kayanqantam yarpänantsik (Filip. 2:3). Tsënö pensanapaq kallpachakurqä, manam wakinkunata ofendishuntsu.

10. ¿Apostol Pablu imata consejakunqantatan wiyakunantsik?

¹⁰ Llapan wawqi panintsikkunam imallachöpis noqantsikpita mas alli kayan. Tsënö kayanqantaqa rikantsik imachö alli kayanqanman pensarmi. Corintu markachö cristiänukunata Pablu consejakunqantam wiyakunantsik. “¿Pitaq pipitapis jukläyata tikratsishunki? Rasumpa kaqchöqa, ¿imëkitaq kan mana chaskinqëki? Tsëqa, chaskishqa këkarqa, ¿imanirtaq imëka mana chaskishqanö alabakunki?” (1 Cor. 4:7). Tsëmi reqishqa këta, y wakinkunapita mas allitanö rikämänataqa ashishwantsu. Tsëmi reunionchö juk wawqi shumaq yachatsikuptin o juk pani mëtsikaqta Bibliapita estudiatsiptinqa, tsëkunapita Jehoväta alabanan.

11. ¿Imatatan Jesus willakunqan reypita y sirweqninkunapita yachakuntsik?

¹¹ Qateqninkuna pitapis mana ofendiyänampaq consejarirmi, juk reypaq y sirweqninkunapaq cuentakurqan. Tsë reyqa paguëta mana puëdinampaq kaqta musyarmi, juk sirweqninta perdonarqan. Tsënö kaptimpis, tsë sirweqninqa wallkallata debikaptimpis, manam sirweq mayinta perdonëta munarqantsu. Tsëmi tsë reyqa cölerakurnin mana llakipäkoq sirweqninta carcelatsirqan. ¿Imatatan këpita yachakuntsik? Jesusmi kënö nirqan: “Tsënöllam qamkunatapis ciëluchö këkaq Teytä rurayäshunki creikoq mayikikunata shonqupita patsë mana perdonayaptikiqa” (Mat. 18:21-35).

12. Mana perdonakoq karqa, ¿imanötan wakinkunata llakitsishwan?

¹² Tsë sirwipakoq ruranqanqa, kikimpaq y wakinkunapaqpis mana allim karqan. Sirwipakoq mayintam mana alli tratarqan y jaqanta pagakuyta puëdinqanyaqmi carcelatsirqan. Wakin sirwipakoq mayinkunatapis llakitsirqanmi. Jesusmi kënö nirqan: “Tsëkuna pasakunqanta sirwipakoq mayinkuna rikärirmi alläpa llakikuyarqan, y ëwarmi reyta willayarqan llapan pasakunqankunata”. Tsënöllam noqantsik ruranqantsikpis wakinkunata llakitsin. Ofendimaqnintsik wawqi panintsikta mana perdonashqaqa, ¿imatan pasakunqa? Puntataqa, ofendimaqnintsikta mana perdonarmi mana kuyanqantsikta rikätsikuntsik, o mana kaqpaqpis churarishwan. Y congregacionchö wawqi panintsikkunapis ofendimaqnintsikta jukläyapa rikashqam kushishqatsu kayanqa.

13. ¿Imatatan juk precursöra panita pasanqampita yachakuntsik?

¹³ Perdonakoq karqa, kikintsik y wakinkunapis kushishqam kayanqa. Tsëmi precursöra regular Cristïna panita pasarqan. Pëtaqa congregacionninchö juk panim imëkanöpa llakitseq, pëmi kënö nin: “Tsë nanaqa cutsilluwan tuksimaq cuentam parlapämaq. Yachatsikoq ëwayaptïqa, manam pë këkanqan cärruman churayämänanta munaqtsu kä. Tsëmi kushi kushiqa karqänätsu”. Pani Cristïna rasumpa kaqpita llakikunampa kaqman pensarpis, perdonanampaqmi churapakarqan. Humildim karqan y 1999 wata 15 de octubri killa La Atalaya revistachö “Perdonemos de corazón” neq consëjukunatam wiyakurqan. Pëmi kënö nin: “Kananmi cläru  musyarï, llapantsikpis Jehovä munanqannö kawanapaq kallpachakuykanqantsikta y pëqa llapan junaqkuna perdonamanqantsikta. Kananqa imëka lasaq qepita churareq cuentam kushishqa këkä”.

14. (1) Mateu 18:21, 22 ninqannö, ¿itsa ima rurëtatan apostol Pëdruqa puëdeqtsu y Jesus ninqampitaqa imatatan yachakuntsik? (2) ¿Tsënöpa pasashqaqa imatan yanapamäshun?

¹⁴ Perdonakoq kanqantsik alli kanqanta musyarpis, höraqa tsëta rurëqa manam fäciltsu kanman. Apostol Pëdrutapis höra höraqa tsëtsun pasarqan (leyi Mateu 18:21, 22). ¿Imatan perdonakoq kanapaq yanapamäshun? Puntataqa, Jehovä ëka kuti perdonamanqantsikmanmi yarpänantsik (Mat. 18:32, 33). Manam perdonamänantsikpaqnötsu kantsik, tsënö kaptimpis pëqa perdonamantsikmi (Sal. 103:8-10). Jina juknintsik juknintsik kuyanakunapaq kaqtam yarpänantsik, tsëmi wawqi panintsikkunataqa ima kaptimpis perdonanantsik (1 Juan 4:11). Ishkë kaqchöqa yanapamäshun, wakinkunata perdonarnin imanö kanqantsikmi. Ofendimaqnintsik kaqtam yanapantsik. Congregacionchö yamë kanapaqmi yanapakuntsik, Jehoväwan amïgu kënintsikmi alliyan y lasaq qepita churareq cuentam kushishqa kantsik (2 Cor. 2:7; Col. 3:14). Y kima kaqchöqa yanapamäshun, perdonanapaq mañamaqnintsik Jehoväta mañakunqantsikmi. Wawqi panintsikkunawan yamë kawakunqantsikta Satanas ushakätsinantaqa ama permitishuntsu (Efes. 4:26, 27). Satanaspa trampanman mana ishkinapaqqa Jehovä yanapamänatam wanantsik.

15. Colosensis 3:13 ninqannö, ¿imatatan rurashwan juk wawqi o juk pani ofendiramashqaqa?

¹⁵ ¿Mëqan wawqi pani ofendimashqaqa imatatan ruranantsik? Pëwan yamë kanapaqmi kallpachakunantsik. Jehoväta  mañakushun y imanö këkanqantsikta llapanta willashun. Ofendimaqnintsikta bendicïkunampaq y pëchö alli kaqta rikanqankunata rikätsimänapaq mañakushun (Lüc. 6:28). Y ofendimanqantsikpita perdonëta mana puëdirqa, shumaq altsanapaq kaqman pensashun. Mas alliqa kanqa ardëpa mana ofendimanqantsikman pensanqantsikmi (Mat. 5:23, 24; 1 Cor. 13:7). Peru, ¿parlapashqa mana munaptinqa? Kë consëjutam yarpänantsik: “Jukniki juknikikuna aguantanakurnin sïguiyë” (leyi Colosensis 3:13). Peru tsëpitapis masqa ama chikipäshuntsu. Tsëta rurarqa manam Jehoväwan amïgunatsu kashun. Ama dejashuntsu imapis llakitsimarnintsik qelanäratsimänata. Tsëpa rantinqa, Jehoväta kuyanqantsiktam rikätsikunantsik (Sal. 119:165).

16. ¿Imatatan cada ünu ruranantsik?

¹⁶ ¡Juk grüpulla y juk mitseqyoqlla kanqantsikpitam Jehoväta alläpa agradecikuntsik! (Juan 10:16). Organizados para hacer la voluntad de Jehová librupa 165 kaq päginanchömi kënö nin: “Llapantsikmi, juk familianölla kanantsikpaq kallpachakunantsik”. Jina kënömi nin “Wawqi panintsikkunawanqa alli apanakushun pëkunata Jehovä rikanqannö rikarninmi”. Pishi wamrankunatanömi rikämantsik, y alläpam välintsik. Noqantsikpis tsënöllam wawqi panintsikkunata rikänantsik. Jehoväqa pëkunata cuidanapaq y yanapanapaq kallpachakunqantsikta rikëkanmi (Mat. 10:42).

17. ¿Imata ruranapaqtan kallpachakunantsik?

¹⁷ Wawqi panintsikkunata kuyarninmi “puntanman ni ima ishkitsikoqta ni tsapäkoqta” mana churanapaq cuidakunantsik (Rom. 14:13). Wawqi panintsikkuna noqantsikpita mas alli kayanqantam pensantsik. Y shonqupita patsëmi perdonantsik. Wakinkuna rurayanqan llakitsimarnintsik qelanätsimänataqa ama dejashuntsu. Tsëpa rantinqa, “yamë këman chätsikoq kaqta y juknintsik juknintsik sinchiyätsinakunapaq yanapakoq kaq cösaskunata rurar sïguishun” (Rom. 14:19).